“No Tene Miedu ni Desmayá”

“No tene miedu ni desmayá. . . . SEÑOR ta ku boso.”​—2 KRÓNIKANAN 20:17.

1. Ki efekto terorismo tin riba hende, i pakiko nan miedu ta komprendibel?

TERORISMO! E palabra so kaba ta hinka miedu den kurpa di hende, i pone nan sinti nan insigur i impotente. E ta lanta un sintimentu miksto di teror, tristesa i rabia. I e ta un palabra ku ta deskribí loke masha hende ta teme lo plaga humanidat pa hopi aña mas. E echo ku algun nashon pa hopi dékada ta bringando terorismo den su vários formanan sin muchu éksito ta base pa e miedu ei.

2. Kon Testigunan di Yehova ta reakshoná riba e problema di terorismo, i esei ta hiba na ki pregunta?

² No opstante, tin bon motibu pa karga speransa. Testigunan di Yehova ku ta predikando aktivamente den 234 pais i teritorio di e tera, tin un optimismo remarkabel. En bes di tene miedu ku nunka mas lo por eliminá terorismo, nan tin konfiansa ku esei lo sosodé—anto pronto. Ta realístiko pa nos tin e mesun optimismo aki? Ken lo por logra libra mundu di e plaga aki, i kon esei lo por tuma lugá? Siendo ku nos tur probablemente a yega di ser afektá di un òf otro forma pa violensia,  lo ta bon pa analisá ki base nos por tin pa e optimismo ei.

3. Kiko ta e kousanan di miedu, i kiko a ser profetisá tokante nos tempu?

³ Awe, hende tin miedu i ta spantá pa vários motibu. Pensa riba e hopi hendenan ku no por sòru pa nan mes mas debí na edat avansá, e personanan ku ta sufri di enfermedat inkurabel ku ta kaba ku nan, i e famianan ku ta lucha pa tene kabes riba awa. De echo, wak kon insigur bida mes ta! Un momentu pa otro nos por haña nos ku morto repentino debí na un aksidente òf un desaster ku ta pone fin na tur loke nos ta balorá den bida. Tal miedu i ansiedat, huntu ku numeroso konflikto i desepshon ku nos ta haña nos kuné, a hasi nos tempu presisamente loke apòstel Pablo a deskribí: “Sabi esaki, ku den e último dianan tempunan trabahoso lo bin. Pasobra hende lo ta stimadó di nan mes, . . . sin amor, irekonsiliabel, ku mala lenga, sin dominio propio, grosero, odiadó di loke ta bon.”​—2 Timoteo 3:​1-3.

4. Ounke kosnan ta pinta skur segun 2 Timoteo 3:​1-3, ki aspekto positivo e pasashi aki ta presentá?

⁴ Ounke segun e pasashi aki kosnan ta pinta skur, tòg e ta duna speransa. Ripará ku ta “den e último dianan” di Satanas su mal sistema di kosnan lo mester presentá tempunan trabahoso. Esaki ta nifiká ku alivio ta den kurpa i ku pronto e mundu malbado lo ser remplasá dor di e Reino perfekto di Dios, pa kua Hesus a siña su siguidónan pidi. (Mateo 6:​9, 10) E Reino ei ta e gobièrnu selestial di Dios ku segun profeta Daniel, “nunka lo no wòrdu destruí,” pero ku “lo garna i pone un fin na tur e reinonan [humano] aki, [i] e mes lo dura pa semper.”​—Daniel 2:44.

Neutralidat Kristian Versus Terorismo

5. Kon e nashonnan a reakshoná resientemente riba e menasa di terorismo?

⁵ Pa hopi dékada, aktonan terorista a kosta míles di bida. Spesialmente despues di e atentadonan di 11 di sèptèmber 2001 na New York i Washington, mundu kompleto a bira muchu mas konsiente di e peliger aki. En bista di e magnitut i alkanse mundial di terorismo, nashonnan rònt mundu a uni forsa mesora pa kombatié. Por ehèmpel dia 4 di desèmber 2001, segun informenan di medionan di komunikashon, “ministernan di asuntunan eksterior di 55 pais europeo, di Nort Amérika i Asia sentral a adoptá unánimamente un plan” prepará pa kordiná nan esfuersonan. Un alto funshonario di Merka a elogiá e akshon aki komo un “nivel nobo di impulso” na e esfuersonan pa kombatí terorismo. Diripiente, miónes di hende a haña nan mes enbolbí den loke The New York Times Magazine a yama “kuminsamentu di un bataya históriko.” Ainda nos tin ku mira sí kuantu éksito e esfuersonan ei lo tin. Sin embargo, e reperkushonnan di tal guera kontra teror a lanta sintimentunan di miedu i temor den hopi hende, pero no den esnan ku ta konfia den Yehova.

6. (a) Pakiko algun hende kisas tin problema pa aseptá e posishon kristian neutral ku Testigunan di Yehova ta tuma? (b) Ki ehèmpel relashoná ku aktividat polítiko Hesus a pone pa su siguidónan?

⁶ Testigunan di Yehova ta bon konosí pa nan posishon neutral den asuntunan  polítiko. Ounke mayoria hende talbes ta dispuesto pa aseptá e posishon aki den tempu di pas, nan ta bira ménos tolerante ora surgi sirkunstansianan ekstraordinario. Hopi bes, e miedu i insiguridat ku guera ta kousa ta lanta sintimentu fuerte di nashonalismo. Dor di esei kisas algun hende tin problema pa komprondé kon por tin personanan ku no ta dispuesto pa apoyá movementunan nashonal popular. No opstante, kristiannan berdadero sa ku nan tin ku obedesé e mandamentu di Hesus pa “no ta [parti] di mundu.” (Juan 15:19; 17:​14-16; 18:36; Santiago 4:4) Esaki ta eksigí pa nan keda neutral den asuntunan polítiko òf sosial. Hesus mes a pone e ehèmpel korekto. En bista di su sabiduria perfekto i abilidatnan sobresaliente, e por a duna un bon kontribushon n’e asuntunan humano di su tempu. Pero el a nenga di drenta polítika. Na kuminsamentu di su ministerio, el a rechasá redondamente e oferta di Satanas p’e haña tur e reinonan di mundu. Mas despues, sin bira rònt, el a evitá ku nan a skoh’é pa un enkargo polítiko.​—Mateo 4:​8-10; Juan 6:​14, 15.

7, 8. (a) E echo ku Testigunan di Yehova ta neutral den asuntunan polítiko, kiko esei no kier men, i pakiko nò? (b) Kon Romanonan 13:1 i 2 ta ekskluí kualkier partisipashon den aktividatnan violento kontra gobièrnunan?

⁷ E posishon neutral ku Testigunan di Yehova ta tuma no kier men ku nan ta apoyá òf hustifiká aktonan di violensia. Sino ta kon nan lo por pretendé ku nan ta sirbidó di “e Dios di amor i di pas”? (2 Korintionan 13:11) Nan a siña kiko Yehova ta pensa di violensia. E salmista a skirbi: “SEÑOR ta pone e hustu i e malbado na prueba, ma esun ku ta gusta violensia su alma ta odia.” (Salmo 11:5) Tambe nan ta konsiente di loke Hesus a bisa apòstel Pedro: “Pone bo spada bèk na su lugá; pasobra tur esnan ku saka spada lo peresé pa medio di spada.”​—Mateo 26:52.

⁸ Ounke historia ta mustra bon kla kon hopi bes kristiannan falsu a usa “spada,” esei no ta e kaso ku Testigunan di Yehova. Nan ta apstené nan mes di tur e aktividatnan ei. E Testigunan ta obedesé fielmente e mandamentu di Romanonan 13:1 i 2: “Laga tur hende someté nan mes na e outoridatnan ku ta goberná. Pasobra no tin outoridat ku no ta di Dios, i esnan ku ta eksistí, ta Dios a establesé nan. P’esei, esun ku resistí outoridat a oponé e ordenansa di Dios; i esnan ku opon’é lo risibí kondenashon riba nan mes.”

9. Den ki dos maneranan Testigunan di Yehova ta kombatí terorismo?

⁹ Pero ya ku terorismo ta asina malu, Testigunan di Yehova no mester hasi algu pa yuda kombatié? Sí, nan mester hasi algu, i ta loke nan ta hasi tambe. Na promé lugá, nan mes no ta partisipá den niun dje aktividatnan ei. Di dos, nan ta siña hende e prinsipionan kristian ku si nan apliká nan, lo por eliminá violensia den tur su formanan. * Aña pasá, e Testigunan a dediká 1.202.381.302 ora na yuda hende siña tokante e manera di biba kristian aki. Nan no a tira nan tempu afó, ya ku komo resultado di e aktividat aki, 265.469 persona a batisá komo Testigu di Yehova, mustrando asina públikamente ku nan ta rechasá violensia kategórikamente.

10. Ki posibilidat tin pa eliminá violensia den e mundu djawe?

¹⁰ Ademas, Testigunan di Yehova ta rekonosé ku riba nan mes, hamas nan lo por kaba ku maldat. P’esei nan ta pone nan konfiansa total den esun ku sí por: Yehova Dios. (Salmo 83:18, NW) Apesar di hende su esfuerso sinsero, nan no por pone fin na violensia. E eskritor inspirá di Beibel a spièrta nos adelantá tokante nos tempu, “e último dianan,” i a bisa: “Hendenan malbado i gañadónan lo bai di malu pa pió, gañando i siendo gañá.” (2 Timoteo  3:​1, 13) Mirá for di e punto di bista aki, e posibilidatnan pa hende gana e bataya kontra maldat no ta dje faborabel ei. Di otro banda, nos por konfia ku Yehova lo eliminá violensia totalmente i permanentemente.​—Salmo 37:​1, 2, 9-11; Proverbionan 24:​19, 20; Isaias 60:18.

Sin Temor Apesar di un Atake Inminente

11. Ki pasonan Yehova a dal kaba pa eliminá violensia?

¹¹ Ya ku e Dios di pas ta odia violensia, nos por komprondé pakiko el a dal e pasonan inisial pa destruí su kousa básiko, Satanas e Diabel. De echo, ya kaba El a pone Satanas sufri un derota humiante na man di Miguel e arkangel, ku ta Kristu Hesus, Dios su Rei resien entronisá. Beibel ta deskribí e suseso ku e palabranan aki: “Tabatin guera den shelu, Miguel i su angelnan tabata hasi guera kontra e dragon. I e dragon i su angelnan tabata hasi guera, i nan no a prevalesé, i no tabatin lugá mas pa nan den shelu. I e gran dragon a wòrdu tirá abou, e kolebra di antigwedat, kende ta wòrdu yamá Diabel i Satanas, kende ta gaña henter mundu; el a wòrdu tirá abou riba tera, i su angelnan a wòrdu tirá abou huntu kuné.”​—Revelashon 12:​7-9.

12, 13. (a) Kiko ta notabel tokante e aña 1914? (b) Kiko e profesia di Ezekiel ta pronostiká pa loke ta esnan ku ta respaldá e Reino di Dios?

¹² Beibel su konteo di tempu kombiná ku susesonan di mundu ta indiká ku ta na aña 1914 e guera ei a tuma lugá den shelu. Desde e tempu ei, kondishonnan di mundu a empeorá gradualmente. Revelashon 12:12 ta splika pakiko, bisando: “Pa e motibu aki, regosihá, o shelunan i boso ku ta biba den nan. Ai di tera i laman, pasobra Diabel a baha bin serka boso ku gran furia, sabiendo ku ta ked’é solamente un poko tempu mas.”

¹³ Ta di komprondé ku e furia di Diabel ta dirigí prinsipalmente kontra Dios su adoradónan ungí i nan kompañeronan ku ta forma e “otro karnénan.” (Juan 10:16; Revelashon 12:17) Pronto e oposishon aki lo alkansá su kulminashon ora Diabel lansa un atake intenso kontra tur hende ku ta apoyá e Reino establesí di Dios i ku ta pone nan konfiansa den dje. Ezekiel kapítulo 38 ta referí na e atake total aki komo un atake ku “Gòg di tera di Magòg” lo lansa.

14. Ki protekshon Testigunan di Yehova a yega di haña den pasado, i esaki lo ta semper e kaso?

¹⁴ For di dia ku Satanas a ser saká for di shelu, tabatin algun okashon ku sierto elementonan polítiko, deskribí den idioma simbóliko na Revelashon 12:15 i 16, a brinda e pueblo di Dios protekshon kontra e atakenan di Satanas. Na kontraste, Beibel ta indiká ku durante e atake final di Satanas, ningun agensia humano lo sali na defensa di esnan ku ta pone nan konfiansa den Yehova. Esaki mester hinka miedu i spantu den kurpa di kristiannan? Lubidá!

15, 16. (a) Ki motibu pa optimismo e garantia ku Yehova a duna su pueblo den tempu di Josafat ta duna kristiannan awe? (b) Ki patronchi Josafat i e pueblo a establesé pa sirbidónan di Dios awe?

¹⁵ Dios lo respaldá su pueblo meskos ku el a  apoyá su nashon típiko den tempu di Rei Josafat. Beibel ta bisa: “Skucha, henter Huda i habitantenan di Yerusalèm i Rei Josafat: Asina SEÑOR ta bisa boso: ‘No tene miedu ni desmayá pa motibu di e multitut grandi aki, pasobra e bataya no ta di boso, ma di Dios. . . . Boso no tin mester di bringa den e bataya aki; stashoná boso mes, para i mira e salbashon di SEÑOR na boso fabor, o Huda i Yerusalèm. No tene miedu ni desmayá; sali mañan pa enfrentá nan, pasobra SEÑOR ta ku boso.’”​—2 Krónikanan 20:​15-17.

¹⁶ Yehova a garantisá e pueblo di Huda ku nan no tabatin nodi bringa. Meskos tambe, ora Gòg di Magòg ataká e pueblo di Dios, nan lo no kohe arma pa defendé nan kurpa. Mas bien, nan lo “para i mira e salbashon di SEÑOR” na nan fabor. Klaru ku e echo ku nan ta para mira no ta nifiká ku nan ta kompletamente inaktivo, meskos ku e pueblo di Dios den tempu di Josafat no tabata totalmente inaktivo. Nos ta lesa: “I Josafat a baha su kabes ku su kara te na suela, i henter Huda i e habitantenan di Yerusalèm a tira nan kurpa abou dilanti di SEÑOR, i a adorá SEÑOR. . . . I ora ku [Josafat] a konsultá ku e pueblo, el a apuntá esnan ku tabata kanta na SEÑOR i esnan ku tabata alab’é bistí na paña santu, miéntras ku nan tabata sali dilanti di e ehérsito, bisando: ‘Duna danki na SEÑOR, pasobra su miserikòrdia ta pa semper.’” (2 Krónikanan 20:​18-21) Sí, asta ora nan a haña nan konfrontá ku atake di enemigu, e pueblo a sigui alabá Yehova aktivamente. Esaki ta establesé e patronchi ku Testigunan di Yehova mester sigui ora Gòg lansa su atake kontra nan.

17, 18. (a) Relashoná ku e atake di Gòg, ki aktitut positivo Testigunan di Yehova tin? (b) Ki rekordatorio hóbennan kristian a haña resientemente?

¹⁷ Te ku e tempu ei—i asta despues ku e atake di Gòg kuminsá—Testigunan di Yehova lo sigui duna nan apoyo n’e Reino di Dios. Nan lo sigui haña forsa i protekshon den nan asosiashon ku e mas di 94.600 kongregashonnan rònt mundu. (Isaias 26:20) Aworakí ta tempu oportuno pa alabá Yehova ku kurashi! Biba den ekspektativa di e binidero atake di Gòg no ta pone nan hala atras di miedu. Al kontrario, e ta animá nan pa oumentá nan sakrifisio di alabansa te kaminda ta rasonablemente posibel.​—Salmo 146:2.

¹⁸ Míles di hóben rònt mundu ku a kuminsá  e sirbishi di tempu kompleto a ègt demostrá e aktitut positivo aki. E tratado Hóben​—Kiko Lo Bo Hasi ku Bo Bida? presentá n’e kongreso di distrito di 2002 a resaltá kon superior e kurso di bida aki ta. Kristiannan, hóben i bieu, ta gradisidu pa e rekordatorionan oportuno aki.​—Salmo 119:​14, 24, 99, 119, 129, 146.

19, 20. (a) Pakiko kristiannan no tin nodi spanta ni tene miedu? (b) Kiko e siguiente artíkulo di studio lo mustra nos?

¹⁹ Apesar di kondishonnan di mundu, kristiannan no tin nodi spanta ni desmayá di miedu. Nan sa ku pronto e Reino di Yehova lo eliminá tur forma di violensia di unabes pa semper. Tambe nan ta haña konsuelo den e echo ku e resurekshon lo permití hopi hende ku a pèrdè nan bida dor di violensia bolbe bèk na bida. Ounke esaki lo duna algun nan promé oportunidat pa siña tokante Yehova, lo e permití otronan sigui ku nan bida di sirbishi dediká na dje.​—Echonan 24:15.

²⁰ Komo kristiannan berdadero, nos sa ku nos tin ku keda neutral i nos ta determiná pa hasi esei. Nos kier tene firme na e speransa maravioso di por “para i mira e salbashon di SEÑOR.” E siguiente artíkulo lo fortalesé nos fe dor di hasi nos konsiente di susesonan aktual ku pokopoko pero sigur ta yuda nos komprondé kon profesia di Beibel ta kumpli.

[Nota]

Bo Por Splika?

• Pakiko hopi hende ta asina pesimista awe?

• Pakiko Testigunan di Yehova ta optimista tokante futuro?

• Kiko Yehova a hasi kaba tokante e kousa di tur violensia?

• Pakiko nos no tin nodi tene miedu di e atake di Gòg?

[Preguntanan di Estudio]

[Plachi na página 13]

Hesus a pone e ehèmpel korekto pa kristiannan keda neutral

[Plachi na página 16]

Míles di hóben Testigu ku un kurason kontentu a kuminsá e sirbishi di tempu kompleto

[Rekonosementu pa Potrèt na página 12]

UN PHOTO 186226/M. Grafman