Pregunta di Lektor

Ta robes pa laga mata un bestia di kas ku ta hopi malu òf bieu?

Mayoria hende ta konsiderá vários bestia interesante i komo algu ku ta duna nan goso. Algun bestia di kas ta bon kompaño komo maskota. Por ehèmpel, ta konosí ku kachó ta fiel na nan doño i ta pega mashá na nan. P’esei ta di komprondé ku hende ta pega nan kurason na un bestia asina, foral si nan tiné pa hopi aña.

Sin embargo, mayoria bestia di kas no ta biba masha largu. Kachó i kisas pushi tambe, ta biba un 10 pa 15 aña, dependiendo di nan rasa. Den nan behes, bestianan di kas por sufri di malesa i desabilidat ku ta hasi nan doño tristu, foral dor ku nan ta kòrda kon e bestianan aki tabata tempu ku nan tabata mas yòn i bibitu. Lo ta algu malu si bo libra e bestianan aki di nan miseria dor di laga mata nan?

Un kristian lo kier aktua na armonia ku e boluntat di Dios ora e ta trata ku bestia. Trato kruel sigur ta kontra e boluntat di Dios, pasobra su Palabra ta bisa: “Un hende hustu ta kuida bida di su bestia.” (Proverbionan 12:10) Sin embargo, esaki no kier men ku Dios ta mira bestia meskos ku e ta mira hende. Ora Dios a krea hende, el a mustra ku lo tabatin un distinshon bon kla entre hende i bestia. Por ehèmpel, el a duna hende e speransa di bida eterno, pero nunka e no a ofresé e speransa aki na bestia. (Romanonan 6:23; 2 Pedro 2:12) Siendo ku e ta e Kreadó, e tin derecho di determiná kiko ta e relashon apropiá entre hende i bestia.

Génesis 1:28 ta konta nos ki relashon esei ta. Dios a bisa e promé hendenan: “Goberná riba e piskánan di laman i riba e paranan di shelu, i riba tur ser bibu ku ta move riba tera.” Asina tambe Salmo 8:​6-8 ta bisa: “[Dios] a pone tur kos bou di [hende] su pia, tur karné i baka, i tambe e bestianan di mondi, e paranan di shelu i e piskánan di laman.”

Dios a duna di komprondé bon kla ku hende por a usa bestia debidamente i mata nan. Por ehèmpel, nan por a usa nan kueru pa traha bistí. Despues di e Diluvio di dia di Noe, Dios a duna pèrmit tambe pa hende kome karni di bestia, i asina suplementá e dieta di bèrdura ku nan a risibí originalmente.​—Génesis 3:21; 4:4; 9:3.

Pero esaki no ta duna lus bèrdè na hende pa mata bestia pa loko, djis pa spòrt. Na Génesis 10:9, Beibel ta deskribí Nimrod komo “un yagdó poderoso dilanti di SEÑOR.” Den e idioma original, e ekspreshon “dilanti di SEÑOR” ta duna e idea di “kontra,” “na oposishon” ku Yehova (NW).

Pues, maske hende tin dominio riba bestia, e no mag abusá di e outoridat ei, sino mas bien mester us’é na armonia ku e prinsipionan di e Palabra di Dios. Esaki lo por enserá ku bo no ta laga un bestia di kas sufri innesesariamente debí na behes, leshon grave òf malesa fatal. Den un kaso asina, ta e kristian mester disidí kiko pa hasi. Si e disidí ku lo ta un muestra di miserikòrdia pa no laga un bestia sigui sufri sin ningun speransa di rekuperashon, e por skohe pa laga mat’é.