Evidensia Ku Hesukristu A Yega di Biba Riba Tera

MAYORIA hende nunka no a topa e famoso sientífiko ku yama Albert Einstein personalmente. Den algun pais, nan no sa mes ta ken e ta. Pero informenan konfiabel di su hazañanan ta proba ku el a yega di eksistí. Komunidat por sinti su influensia a base di e manera ku siensia ta apliká su deskubrimentunan. Por ehèmpel, hopi hende ta benefisiá di elektrisidat ku ta ser generá, den algun kaso, a base di su deskubrimentunan.

E mesun rasonamentu ta konta pa Hesukristu tambe, kende ta ser rekonos’é komo e hòmber di mas influensia den historia humano. Loke a ser skirbí tokante dje i evidensia visibel di e  influensia ku el a ehersé ta proba fuera di tur duda ku el a eksistí. Pa interesante ku e deskubrimentu arkeológiko resien di e inskripshon di Santiago por ta (mira artíkulo anterior), e prueba ku Hesus a yega di eksistí no ta dependé di esaki ni di niun otro opheto. Echo ta ku nos por haña evidensia di Hesus su eksistensia den loke historiadónan di mundu a skirbi tokante dje i su siguidónan.

Testimonio di Historiadónan

Tuma por ehèmpel e testimonio di Flavio Josefo, un historiadó hudiu di promé siglo kende tabata un fariseo. El a referí na Hesukristu den e buki Jewish Antiquities. Ounke algun hende ta duda ku e promé referensia kaminda Josefo ta menshoná Hesus komo e Mesias ta outéntiko, Profèser Louis H. Feldman di Universidat Yeshiva ta bisa ku masha poko hende tabatin duda ku e di dos referensia sí ta berdadero. Ei Josefo a bisa: “[Sumo saserdote Anano] a konvoká e huesnan di e Sanedrin i a presentá dilanti nan un hòmber ku yama Santiago, ruman di Hesus ku tabata yamá e Kristu.” (Jewish Antiquities, XX, 200) Sí, un fariseo, miembro di e sekta di kua hopi di su siguidónan a deklará abiertamente ku nan ta enemigu di Hesus, a rekonosé ku a eksistí un tal “Santiago, ruman di Hesus.”

Hesus tabatin un gran influensia riba e aktividatnan di su siguidónan; un evidensia ku e mester a eksistí. Ora apòstel Pablo tabata enkarselá na Roma rònt di aña 59 di nos era, e hòmbernan prinsipal dje hudiunan a bis’é: “Enkuanto e sekta aki, nos sa ku e ta wòrdu kontradisí tur kaminda.” (Echonan 28:17-22) Nan a yama e disipelnan di Hesus “e sekta aki.” Bo no ta kere ku si tur kaminda nan tabata papia kontra nan, kasi sigur historiadónan lo mester a menshoná esei?

Tácito, kende a nase rònt di aña 55 di nos era i konsiderá komo un dje gran historiadónan di mundu, a menshoná e kristiannan den su obra Anales. Den su relato kaminda Nero ta kulpa e kristiannan pa e kandela grandi na Roma na aña 64, el a skirbi: “Nero a tira e kulpa riba un grupo di hende odiá pa nan kosnan repugnante, ku pueblo tabata yama kristian, i el a someté nan na torturanan sumamente kruel. Kristu, for di kua e nòmber a bini, a sufri pena kapital durante e reinado di Tiberio na man di un di nos prokuradónan, Ponsio Pilato.” E detayenan di e relato aki ta kuadra ku e informashon relashoná ku e Hesus di Beibel.

Un otro eskritor ku a komentá riba Hesus su siguidónan tabata Plinio e Menor, gobernadó di Bitinia. Rònt di aña 111, Plinio a skirbi Emperador Trajano pa puntra kon mester trata ku e kristiannan. Plinio a skirbi ku hendenan ku a ser akusá falsamente di ta kristian lo a invoká e diosnan i adorá e estatua di Trajano, djis pa proba ku nan no tabata kristian. Plinio a kontinuá: “Aparentemente, lo bo no por a fòrsa hende ku ta berdaderamente kristian di kumpli ku ningun di e kosnan aki.” Esei ta duna prueba ku Kristu en bèrdat a eksistí, i ku su siguidónan tabata prepará pa sakrifiká nan bida pa motibu di nan fe den dje.

Despues di resumí e referensianan ku e historiadónan di e promé dos siglonan a hasi na  Hesukristu i su siguidónan, The Encyclopædia Britannica (edishon 2002) ta konkluí: “E relatonan independiente aki ta duna prueba ku den pasado ni e opositornan di kristianismo no a duda nunka ku di bèrdat Hesus a eksistí. Ta te na final di siglo 18, durante siglo 19 i na kuminsamentu di siglo 20 numa hende a kuminsá lanta duda pa promé biaha riba e punto aki, anto sin sufisiente base.”

Testimonio di Hesus Su Siguidónan

“E Tèstamènt Nobo ta duna kasi tur e detayenan ku por yuda bo saka afó kon Hesus a biba i muri, i ki importansia e promé kristiannan a duna tur esakinan,” segun The Encyclopedia Americana. Kisas hende ku tin nan dudanan tokante religion no ta aseptá Beibel komo evidensia ku Hesus a eksistí. Pero, dos argumentu basá partikularmente riba relatonan di Beibel ta yuda establesé ku Hesus en bèrdat a yega di biba riba tera.

Manera nos a menshoná, e gran teorianan di Einstein ta proba ku el a eksistí. Meskos tambe e siñansanan di Hesus ta proba ku en bèrdat el a eksistí. Tuma por ehèmpel e Sermon Riba Seru, un diskurso bon konosí ku Hesus a duna. (Mateo, kapítulo 5-7) Apòstel Mateo a mustra ki impakto e sermon ei tabatin: “E multitutnan a keda asombrá di su siñansa; pasobra e tabata siña nan manera un hende ku tin outoridat.” (Mateo 7:28, 29) Relashoná ku e efekto ku e sermon ei tabatin riba hende durante siglonan, Profèser Hans Dieter Betz a remarká: “Por lo general e influensia ku e Sermon Riba Seru a ehersé ta bai hopi mas leu ku e fronteranan di hudaismo i kristianismo, òf asta di kultura oksidental.” El a agregá ku e sermon aki tin “un atrakshon ekstraordinario rònt mundu.”

Wak e sabiduria ku e siguiente palabranan kòrtiku i práktiko den e Sermon Riba Seru ta reflehá: “Ken ku dal bo na bo banda drechi di kara, dun’é e otro banda tambe.” “Perkurá pa boso no hasi boso obranan di karidat dilanti di hende.” “No preokupá boso mes pa e dia di mañan . . . Kada dia tin sufisiente problema di su mes.” “No . . . tira boso pèrlanan pa porko.” “Pidi, i lo wòrdu duná na boso.” “Tur loke boso kier pa hende hasi pa boso, hasi meskos pa nan.” “Drenta dor di e porta smal.” “Na nan fruta boso lo konosé nan.” “Tur bon palu ta duna bon fruta.”—Mateo 5:39; 6:1, 34; 7:6, 7, 12, 13, 16, 17.

Sin duda bo a tende algun di e ekspreshonnan aki òf e esensia di nan. Talbes nan a bira dicho den bo idioma. Tur esakinan ta saká for di e Sermon Riba Seru. E influensia ku e sermon aki tin riba hopi hende i kultura ta duna testimonio inekibokabel di e eksistensia di “e gran maestro.”

Laga nos imaginá ku ta un hende a inventá un personahe ku yama Hesukristu. Suponé ku e persona ei tabata sufisiente sabí pa krea e siñansanan den Beibel ku ta ser atribuí na Hesus. Lo e no trata pa hasi Hesus i su siñansanan mas aseptabel posibel pa hende en general? No opstante, apòstel Pablo a remarká: “Hudiunan ta pidi señalnan i griegonan ta buska sabiduria; ma nos ta prediká Kristu [“klabá na staka,” NW], pa hudiu un piedra di trompeká, i pa pagano, lokura.” (1 Korintionan 1:22, 23) E mensahe di Kristu klabá na staka no tabata atraktivo ni p’e hudiunan ni p’e nashonnan. Pero ta esei tabata e Kristu ku e kristiannan di promé siglo a proklamá. Pakiko e representashon di Kristu klabá na staka? E úniko splikashon satisfaktorio ta ku e eskritornan di e Skritura Griego Kristian a skirbi e bèrdat tokante e bida i morto di Hesus.

Un otro argumentu ku ta mustra ku di bèrdat Hesus a yega di biba riba tera ta e manera inkansabel ku su siguidónan a prediká tokante su siñansanan. Apénas un 30 aña despues ku Hesus a kuminsá su ministerio, Pablo por a bisa ku e bon nobo “a wòrdu proklamá den henter kreashon bou di shelu.” (Kolosensenan 1:23) Sí, e siñansanan di Hesus a plama den henter e mundu antiguo apesar di oposishon.  Pablo mes ku a ser persiguí komo kristian, a skirbi: “Si Kristu no a wòrdu lantá, e ora ei nos predikamentu ta [en]bano, i [nos] fe tambe ta [en]bano.” (1 Korintionan 15:12-17) Si e predikashon tokante un Kristu ku no a resusitá ta enbano, predikashon tokante un Kristu ku nunka no a eksistí lo ta mas banidat ainda. Manera nos ta lesa den e informe di Plinio e Menor, e kristiannan di promé siglo tabata dispuesto pa muri pa nan fe den Kristu Hesus. Nan a riska nan bida pa Kristu pasobra e tabata real; el a biba riba tera manera e Evangelionan ta mustra.

Bo A Mira Prueba

Kristiannan mester tabatin fe den e resurekshon di Hesukristu promé ku nan por a prediká. Den bo mente, abo tambe por visualisá Hesus resusitá dor di mira e impakto ku e ta kousando awe.

Djis promé ku nan a klaba Hesus na staka, el a duna un gran profesia tokante su futuro presensia. Tambe el a indiká ku lo e ser resusitá i sinta na man drechi di Dios, sperando e tempu p’e trata ku su enemigunan. (Salmo 110:1; Juan 6:62; Echonan 2:34, 35; Romanonan 8:34) Despues di esei, lo e tuma akshon i saka Satanas i su demoñonan for di shelu.—Revelashon 12:7-9.

Na ki tempu tur esei lo a sosodé? Hesus a duna su disipelnan ‘e señal di su binida [“presensia,” NW] i di e fin di tempu.’ E señal pa identifiká su presensia invisibel a inkluí gueranan grandi, skarsedat di kuminda, temblor, presensia di profeta falsu, oumento di maldat i epidemianan severo. E susesonan kalamitoso ei tabata kos di spera, pasobra e sakamentu di Satanas e Diabel for di shelu lo a nifiká “ai di tera.” E Diabel a baha bin den bisindario di e tera “ku gran furia, sabiendo ku ta ked’é solamente un poko tempu mas.” Ademas, e señal ta inkluí predikashon di e bon nobo di Reino “den henter mundu komo un testimonio na tur nashon.”—Mateo 24:3-14; Revelashon 12:12; Lukas 21:7-19.

Meskos ku e pidanan di un pùzel ku ta pas ku otro, asina e kosnan ku Hesus a profetisá a tuma lugá. For di dia ku Promé Guera Mundial a kuminsá na 1914, nos a mira e kombinashon di evidensia di e presensia invisibel di Hesukristu. E ta reinando komo Rei di e Reino di Dios i ta ehersiendo un tremendo influensia. E echo ku bo tin e revista aki den bo man ta evidensia ku e trabou di prediká e Reino ta ser efektuá awe.

Pa bo por komprondé mas mihó ki efekto Hesus su eksistensia tin riba hende, bo tin ku studia Beibel. Pakiko no puntra Testigunan di Yehova tokante e detayenan di Hesus su presensia?

[Plachi na página 5]

Josefo, Tácito, i Plinio e Menor a referí na Hesukristu i su siguidónan

[Rekonosementu]

Tur e tres plachinan: © Bettmann/CORBIS

[Plachi na página 7]

E promé kristiannan tabata konvensí ku Hesus tabata un hòmber real