“Dios Ta Amor”
“Dios Ta Amor”
“Esun ku no ta stima no konosé Dios, pasobra Dios ta amor.”—1 JUAN 4:8.
1-3. (a) Kiko Beibel ta deklará tokante Yehova su kualidat di amor, i dikon esaki ta un deklarashon úniko? (b) Dikon Beibel ta bisa ku “Dios ta amor”?
TUR Yehova su kualidatnan ta ekselente, perfekto i atraktivo. Pero amor ta su kualidat di mas atraktivo ku tur. No tin nada otro ku ta hala nos serka Yehova asina poderoso manera su amor. Afortunadamente amor ta su kualidat dominante tambe. Kon nos por sa esei?
2 Wèl, tin un kos ku Beibel ta bisa tokante amor ku e no ta bisa di ningun di Yehova su otro kualidatnan prinsipal. E Skritura no ta bisa ku Dios ta poder ni ku Dios ta hustisia ni ku Dios ta sabiduria. E tin e kualidatnan ei i é ta e fuente supremo di nan tres. Pero tokante amor, 1 Juan 4:8 ta bisa algu mas profundo: “Dios ta amor.” Sí, amor ta un parti integral di Yehova su personalidat, esei ta henter su karakter. Por lo general nos por pensa di esaki di e siguiente manera: Yehova su poder ta permitié aktua. Su hustisia i su sabiduria ta guia su manera di aktua. Sin embargo, Yehova su amor ta motiv’é pa aktua. I su amor semper ta wòrdu reflehá den e manera ku e ta usa su otro kualidatnan.
3 Hopi bes hende sa bisa ku Yehova ta amor en persona. Pues, si nos kier siña tokante amor, nos tin ku siña tokante Yehova. Laga nos analisá antó algun faseta di Yehova su amor inigualabel.
E Akto Mas Grandi di Amor
4, 5. (a) Kua ta e akto mas grandi di amor den henter historia? (b) Dikon nos por bisa ku Yehova i su Yu ta uní mediante e banchi di amor di mas fuerte ku hamas a eksistí?
4 Yehova a mustra amor den vários manera, pero tin un ku ta destaká riba tur. Kua esei ta? Ora el a manda su Yu pa sufri i muri pa nos. Nos por bisa ku tur konfiansa ku esei ta e akto mas grandi di amor den henter historia. Dikon nos por bisa esei?
5 Beibel ta yama Hesus “e primogénito di henter kreashon.” (Kolosensenan 1:15) Pensa un ratu. Yehova su Yu a eksistí promé ku e universo material. Ta kuantu tempu anto e ku su Tata tabatin huntu? Algun sientífiko ta kalkulá ku e universo ta 13 mil mion aña bieu. Sin embargo, asta si e kálkulo aki ta korekto, esei lo no ta sufisiente pa indiká kuantu aña Yehova su Yu primogénito tin na bida! Kiko el a hasi durante tur e siglonan ei? E Yu a sirbi felismente komo “trahadó eksperto” di su Tata. (Proverbionan 8:30; Juan 1:3) Yehova ku su yu a traha huntu pa krea tur otro kos. Ki un tempu eksitante i felis nan tabatin! Kua di nos por realmente komprondé e poder di e banchi ku nan tabatin ku otro i ku a eksistí pa un periodo di tempu asina largu? Ta bisto ku Yehova Dios i su Yu ta uní mediante e banchi di amor di mas fuerte ku hamas a eksistí.
6. Kon Yehova a ekspresá su sintimentu pa Su Yu ora ku Hesus a batisá?
6 Apesar di tur esei, Yehova a manda su Yu na tera pa nase komo un beibi humano. Esei a nifiká ku pa algun dékada Yehova lo no tabatin asosiashon íntimo ku su Yu stimá den shelu. Ku sumo interes El a opservá for di shelu kon Hesus a krese bira un hòmber perfekto. Ora Hesus tabatin mas o ménos 30 aña, el a batisá. Na e okashon ei e Tata a papia personalmente for di shelu i a bisa: “Esaki ta mi Yu stimá, den kende mi tin goso.” (Mateo 3:17) Hesus su Tata mester tabata hopi kontentu ora el a mira ku Hesus a kumpli fielmente ku tur loke a ser profetisá i ku tur loke el a pidié hasi!—Juan 5:36; 17:4.
7, 8. (a) Kiko Hesus mester a soportá dia 14 di nísan di aña 33, i kon esaki a afektá su Tata selestial? (b) Dikon Yehova a permití su Yu sufri i muri?
7 Pero kon Yehova a sinti dia 14 di nísan di aña 33, ora ku Hesus a ser traishoná i despues arestá dor di un multitut rabiá? Ora ku nan a hasi bofon di Hesus, skupié i dal e ku moketa? Ora ku nan a sut’é te ku su lomba a keda tur habrí na herida? Ora ku nan a klab’é, na man ku pia, na un palu i lag’é kologá einan miéntras ku hende tabata insult’é? Kon e Tata a sinti ora ku su Yu stimá tabata sklama na dje den agonia? Sí, kon Yehova a sinti ora ku Hesus a hala su lastu rosea i, pa promé bes desde prinsipio di tur kreashon, Su Yu stimá a stòp di eksistí?—Mateo 26:14-16, 46, 47, 56, 59, 67; 27:26, 38-44, 46; Juan 19:1.
8 Komo ku Yehova tin sintimentu, ta imposibel pa nos deskribí e doló ku lo e mester a sinti ora ku su Yu a muri. Loke sí por ser ekspresá ta e motibu pakiko Yehova a permití esaki sosodé. Dikon e Tata tabata dispuesto pa soportá e doló ei? Yehova ta revelá algu maravioso na nos na Juan 3:16. Esaki ta un versíkulo asina importante ku nan a yega di yam’é e Evangelio na miniatura. E ta bisa: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” Pues loke a motivá Dios tabata esaki: amor. Hende nunka a demostrá un amor asina grandi.
E Manera Ku Yehova Ta Sigurá Nos di Su Amor
9. Kiko Satanas kier pa nos kere tokante e manera ku Yehova ta mira nos, pero kiko Yehova ta sigurá nos?
9 Sin embargo, tin un pregunta importante ku ta lanta: Dios ta stima nos individualmente? Tin hende ta di akuerdo ku Dios ta stima humanidat en general, manera Juan 3:16 ta bisa. Pero en realidat nan ta pensa: ‘Dios nunka lo por stima ami komo persona.’ Echo ta ku Satanas e Diabel ta ansioso pa nos kere ku nos no tin balor den bista di Yehova i ku e no ta stima nos. Pero na otro banda, no ta importá kon inútil nos ta sinti nos mes ni kon indigno di wòrdu stimá nos ta pensa ku nos ta, Yehova ta sigurá nos ku kada un di su sirbidónan fiel tin balor p’e.
10, 11. Kon e ilustrashon di mòfi ku Hesus a usa ta mustra ku nos tin balor den bista di Yehova?
10 Por ehèmpel, konsiderá Hesus su palabranan skirbí na Mateo 10:29-31. Pa ilustrá kon balioso su disipelnan ta, Hesus a bisa: “Dos mòfi no ta wòrdu bendí pa ún sèn? I ni un di nan lo no kai na suela si no ta e boluntat [òf, “sin konosementu,” NW] di boso Tata. I asta e drachinan di kabei riba boso kabes, tur ta kontá. P’esei, no tene miedu; boso bal mas ku un kantidat di mòfi.” Pensa un ratu riba loke e palabranan ei a nifiká pa e oyentenan di Hesus den promé siglo.
11 Den tempu di Hesus, mòfi tabata e para mas barata di tur e paranan ku nan tabata bende komo kuminda. Pa un sèn (un moneda ku tabatin masha poko balor), un kumpradó a haña dos mòfi. Pero mas despues Hesus a bisa, manera ta pará skirbí na Lukas 12:6 i 7, ku pa dos plaka (dos di e mesun moneda menshoná na Mateo) un hende por a haña no kuater mòfi sino sinku. Bendedónan a agregá e para èkstra ei komo si fuera e no tabatin ningun balor. Kisas den bista di hende e paranan ei no tabatin balor, pero kon e Kreadó a konsiderá nan? Hesus a bisa: “Ni un di nan [ni sikiera esun èkstra] no ta wòrdu lubidá dilanti di Dios.” Kisas awor nos ta kuminsá komprondé Hesus su punto. Ya ku un solo mòfi tin asina tantu balor pa Yehova, hende mester tin muchu mas balor ainda! Manera Hesus a bisa, Yehova sa delaster un detaye di nos. Figurá bo, asta e drachinan di kabei riba nos kabes ta kontá!
12. Dikon nos por ta sigur ku Hesus tabata realístiko ora ku el a bisa ku e drachinan di kabei riba nos kabes ta kontá?
12 Tin hende kisas ta asumí ku Hesus a eksagerá den e asuntu aki di konta e drachinan di kabei riba nos kabes. Pero pensa un ratu riba e resurekshon. Yehova mester konosé nos masha bon mes pa e por bolbe krea nos! Pa Yehova, nos tin asina tantu balor ku e ta kòrda tur nos detayenan, entre otro, nos kódigo genétiko kompliká i tur nos añanan di eksperensia i tur nos rekuerdonan. Konta e drachinan di kabei riba nos kabes (ku ta mas o ménos 100.000 riba un kabes normal) ta un tarea masha simpel na komparashon ku resusitá hende. Hesus su palabranan ta sigurá nos na un manera masha bunita ku Yehova ta interesá den kada un di nos personalmente!
13. Kon e kaso di Rei Josafat ta mustra ku Yehova ta buska e bon ku tin den nos apesar ku nos ta imperfekto?
13 Beibel ta revelá un kos mas ku ta sigurá nos ku Yehova stima nos. E ta buska i ta balorá e bon ku tin den nos. Tuma por ehèmpel, e bon Rei Josafat. Ora ku e rei a kometé un bobedat, Yehova su profeta a bis’é ku el a ‘trese e rabia di Yehova riba su mes.’ Esei tabata un kos serio. Pero Yehova su mensahe no a terminá einan. El a sigui bisa: “Sin embargo, tin algu bon den bo.” (2 Krónikanan 19:1-3) Pues Yehova su rabia hustu no a sieg’é pa e “bon” ku tabatin den Josafat. No ta un konsuelo pa sa ku Dios ta buska e bon ku tin den nos apesar ku nos ta imperfekto?
Un Dios Ku Ta “Kla pa Pordoná”
14. Ki sintimentunan angustioso nos lo por tin ora nos peka, pero kon nos lo por benefisiá di Yehova su pordon?
14 Ora nos peka, e desepshon, bèrgwensa i kulpa ku nos ta sinti por pone nos pensa ku nunka nos lo ta digno di sirbi Yehova. Pero kòrda ku Yehova ta “kla pa pordoná.” (Salmo 86:5) De echo, si nos repentí di nos pikánan i traha duru pa no ripití nan, nos lo por benefisiá di Yehova su pordon. Ban wak kon Beibel ta deskribí e maravioso faseta aki di Yehova su amor.
15. Kon leu for di nos Yehova ta pone nos pikánan?
15 E salmista David a usa un ekspreshon bibu pa deskribí Yehova su pordon: “Mes leu ku ost ta for di wèst, asina leu El a alehá nos transgreshonnan for di nos.” (Lèter skùin ta di nos; Salmo 103:12, The Amplified Bible) Kon leu ost ta for di wèst? Den un sentido, ost ta semper na e distansia di mas leu ku hende lo por imaginá for di wèst; e dos puntonan ei no por kontra nunka. Un eksperto a komentá ku e ekspreshon aki ta nifiká “mas leu posibel; di mas leu ku nos por imaginá.” David su palabranan inspirá ta bisa nos ku ora Yehova pordoná, e ta pone nos pikánan di mas leu for di nos ku nos por imaginá.
16. Ora Yehova pordoná nos pikánan, dikon nos por tin sigur ku djei padilanti e ta konsiderá nos limpi?
16 Bo a yega di purba kita un mancha for di un paña koló kla? Podisé apesar di ku bo a hasi bo bèst, e mancha a keda visibel. Tuma nota kon Yehova ta deskribí su kapasidat di pordoná: “Maske boso pikánan ta manera skarlata, nan lo bira blanku manera sneu; maske nan ta kòrá manera skarlata, nan lo bira manera lana.” (Isaias 1:18) E palabra “skarlata” ta indiká un koló kòrá bibu. * Riba nos mes forsa nunka nos lo no por kita e mancha di piká. Sin embargo, Yehova por kita piká ku ta manera skarlata i hasi nan blanku manera sneu òf manera lana puru. P’esei ora Yehova pordoná nos pikánan, nos no mester sinti ku nos ta karga e mancha di tal piká pa restu di nos bida.
17. Den ki sentido Yehova ta tira nos pikánan tras di su lomba?
17 Den un kantika di gratitut konmovedor ku Ezekias a komponé despues ku el a kura di un enfermedat mortal, el a bisa Yehova: “Bo a tira tur mi pikánan tras di bo lomba.” (Isaias 38:17) Aki e ta deskribí Yehova komo si fuera e ta kohe e pikánan di un pekador arepentí i tira nan tras di Su lomba kaminda E no ta mira nan ni tuma nota di nan mas. Segun un buki di referensia, e idea ku ta ser transmití por ser ekspresá asin’akí: “Bo a hasi [ku mi pikánan] komo si fuera nan no a tuma lugá.” Esei no ta un konsuelo?
18. Kon profeta Mikeas ta indiká ku ora Yehova pordoná, E ta kita nos pikánan permanentemente?
18 Den un promesa di restorashon, profeta Mikeas a ekspresá su konvikshon ku Yehova lo a pordoná su pueblo arepentí, bisando: “Ken ta un Dios manera bo, kende . . . ta pasa e akto di rebeldia di e restante di su herensia forbei? . . . Abo lo tira tur nan pikánan den e profundidatnan di laman.” (Mikeas 7:18, 19) Imaginá bo kiko e palabranan ei a nifiká pa hende ku tabata biba den tempu bíbliko. Lo tabatin un chèns ku lo bo por a rekuperá algu ku a ser tirá “den e profundidatnan di laman”? Mikeas su palabranan ta indiká antó ku ora Yehova pordoná, e ta kita nos pikánan permanentemente.
“E Miserikòrdia Tierno di Nos Dios”
19, 20. (a) Kiko e palabra hebreo tradusí komo “mustra kompashon” òf “tene miserikòrdia” ta nifiká? (b) Kon Beibel ta usa e sintimentunan di un mama pa su beibi pa siña nos tokante e kompashon di Yehova?
19 Kompashon ta un otro faseta di Yehova su amor. Kiko ta kompashon? Den Beibel, e palabra kompashon i miserikòrdia ta hopi ligá ku otro. Tin vários palabra hebreo i griego ku ta transmití e sentido di kompashon. Por ehèmpel, e palabra hebreo ra·chám hopi bes ta ser tradusí komo “mustra kompashon” òf “tene miserikòrdia.” E palabra hebreo aki, ku Yehova ta apliká na su mes, ta relashoná ku e palabra pa “matris” i por ser deskribí komo “kompashon di mama.”
20 Beibel ta usa e sintimentunan di un mama pa su beibi pa siña nos tokante e kompashon di Yehova. Isaias 49:15 ta bisa: “Un muhé por lubidá su yu ku e ta kria na pechu, i no tene kompashon [ra·chám] ku e yu di su mondongo? Esakinan por lubidá, ma ami sí lo no lubidá bo.” Ta difísil pa imaginá ku un mama lo lubidá di alimentá i kuida su yu na pechu, un kriatura indefenso ku mester di e atenshon di su mama di dia i anochi. Pero lamentablemente negligensia di parti di mamanan no ta algu raro, foral den e “tempunan trabahoso” aki. (2 Timoteo 3:1, 3) “Ma ami sí lo no lubidá bo,” Yehova ta deklará. E tierno kompashon ku Yehova tin pa su sirbidónan ta inmensamente mas fuerte ku e kariño natural di mas tierno ku nos por imaginá: e kompashon ku un mama normalmente ta sinti pa su beibi.
21, 22. Kiko e israelitanan a eksperensiá na Egipto di antigwedat, i kon Yehova a reakshoná riba nan sklamashon?
21 Kon Yehova ta mustra kompashon, manera un mayor amoroso? Nos ta mira e kualidat aki bon kla den e manera ku el a trata ku Israel di pasado. Banda di fin di siglo 16 promé ku nos era, miónes di israelita tabata katibu na Egipto, kaminda nan a ser oprimí severamente. (Eksodo 1:11, 14) Den nan angustia, e israelitanan a sklama na Yehova. Kon e Dios di kompashon a reakshoná?
22 Esaki a konmové Yehova su kurason. El a bisa: “Mi a mira e aflikshon di mi pueblo ku ta na Egipto, i a tende nan sklamashon . . . mi ta konsiente di nan sufrimentunan.” (Eksodo 3:7) Yehova no por a mira e sufrimentu di su pueblo ni tende nan sklamashon sin sinti pa nan. Yehova ta un Dios di empatia. I empatia—e abilidat di sinti i komprondé e doló di otro hende—ta ligá ku kompashon i miserikòrdia. Sin embargo, Yehova no a djis sinti pa su pueblo; el a ser motivá pa aktua na nan fabor. Isaias 63:9 ta bisa: “Den su amor i den su miserikòrdia el a redimí nan.” Ku “un man poderoso,” el a reskatá e israelitanan for di Egipto. (Deuteronomio 4:34) Mas despues el a perkurá alimento milagroso pa nan i a hiba nan na un pais fruktífero di nan mes.
23. (a) Kon e salmista su palabranan ta sigurá nos ku Yehova ta profundamente interesá den nos individualmente? (b) Den ki maneranan Yehova ta yuda nos?
23 No ta na su pueblo komo grupo so Yehova ta mustra kompashon. Nos Dios amoroso ta profundamente interesá den nos komo persona individual. E ta sumamente konsiente di kualkier sufrimentu ku kisas nos ta pasando aden. E salmista a bisa: “E wowonan di SEÑOR ta riba e hustunan, i su oreanan ta atento pa skucha nan sklamashon. SEÑOR ta serka di e hende di kurason kibrá, i ta salba esnan di spiritu abatí.” (Salmo 34:15, 18) Kon Yehova ta yuda nos individualmente? No nesesariamente dor di kita e kousa di nos sufrimentu. Pero sí el a hasi masha hopi perkurashon pa esnan ku ta sklama na dje pa yudansa. Su Palabra ta ofresé konseho práktiko ku por yuda nos masha hopi. Den kongregashon, el a perkurá pa nos tin superintendentenan spiritualmente kualifiká, kendenan ta hasi esfuerso pa reflehá su kompashon ora di yuda otro hende. (Santiago 5:14, 15) Komo ku Yehova ta Esun “ku ta skucha orashon,” e ta duna “spiritu santu na esnan ku pidié.” (Salmo 65:2; Lukas 11:13) Tur e provishonnan ei ta muestra di “e miserikòrdia tierno di nos Dios.”—Lukas 1:78.
24. Kon lo bo reakshoná riba e amor di Yehova?
24 No ta emoshonante pa reflekshoná riba e amor di nos Tata selestial? Den e artíkulo anterior, nos a ser rekòrdá ku Yehova a ekspresá su poder, hustisia i sabiduria den maneranan amoroso pa nos benefisio. Den e artíkulo aki, nos a mira ku Yehova a ekspresá su amor pa humanidat direktamente—i pa nos kada un individualmente—den maneranan remarkabel. Awor ta bon pa nos kada un puntra nos mes: ‘Kon lo mi reakshoná riba e amor di Yehova?’ Laga nos reakshoná dor di stim’é ku henter nos kurason, mente, alma i forsa. (Marko 12:29, 30) Nos ta spera ku e manera ku bo ta hiba bo bida tur dia ta reflehá bo deseo sinsero di hala semper mas serka di Yehova. I ku Yehova, e Dios ku ta amor, hala mas serka bo, pa tur eternidat!—Santiago 4:8.
[Nota]
^ par. 16 Un eksperto a bisa ku skarlata “tabata un koló fiho, ku no ta basha. Ni serena, ni áwaseru, ni labamentu ni hopi uso lo no a kit’é.”
Bo Ta Kòrda?
• Kon nos sa ku amor ta Yehova su kualidat dominante?
• Dikon nos por bisa ku e echo ku Yehova a manda su Yu pa sufri i muri pa nos ta e akto di amor di mas grandi den historia?
• Kon Yehova ta sigurá nos ku e ta stima nos individualmente?
• Den ki maneranan bibu Beibel ta deskribí Yehova su pordon?
[Preguntanan di Estudio]
[Plachi na página 15]
“Dios . . . a duna su Yu unigénito”
[Plachi na página 16, 17]
“Boso bal mas ku un kantidat di mòfi”
[Rekonosementu]
© J. Heidecker/VIREO
[Plachi na página 18]
E sintimentunan di un mama pa su beibi por siña nos tokante Yehova su kompashon