“El A Yena un Bashí den Mi Kurason”

“MI KIER gradisí boso di henter mi kurason pa e bunita regalo Hala Serka Yehova. El a yena un bashí den mi kurason: e nesesidat di sinti ku Yehova ta stimá mi i apresiá mi. Awor mi ta sinti mi hopi mas serka di Yehova i su Yu stimá. Mi kier konta tur hende tokante e buki aki i duna un ehemplar na tur mi sernan kerí.” Esei ta loke un Testigu di Yehova a bisa di e buki nobo di 320 página ku a sali publiká na e Kongresonan di Distrito “Proklamadónan Seloso dje Reino” ku a ser tené durante aña 2002-2003. Laga nos analisá algun rasgo di e buki nobo aki i e motibu pakiko el a ser publiká.

Algun Rasgo di e Buki Nobo

Kiko e buki nobo aki tin aden? Tur e informashon presentá den e dos artíkulonan di studio di e revista aki i hopi mas! E buki tin 31 kapítulo, i kada un ta mas o ménos mes largu ku un artíkulo di studio di Toren di Vigilansia. Despues di e prólogo i e promé tres kapítulonan, e buki ta partí den kuater sekshon, un pa kada kualidat prinsipal di Yehova. Kada sekshon ta habri ku un kapítulo ku ta duna un idea general di e kualidat ku ta ser tratá. E kapítulonan ku ta sigui ta trata e manera ku Yehova ta desplegá e kualidat ei. Kada sekshon tin un kapítulo tokante Hesus. Dikon? Wèl, Hesus a bisa: “Esun ku a mira mi a mira e Tata.” (Juan 14:9) Dor ku Hesus a reflehá Yehova su kualidatnan perfektamente, el a perkurá pa nos algun ehèmpel bibu di Dios su kualidatnan den akshon. Kada sekshon ta konkluí ku un kapítulo ku ta siña nos kon pa imitá Yehova den desplegá e kualidat ku a wòrdu tratá. E buki nobo aki ku ta analisá Yehova su kualidatnan ta referí na tur buki di Beibel.

E buki Hala Serka Yehova tin tambe algun rasgo spesial. Kuminsando na kapítulo 2, kada kapítulo tin un kuadro titulá: “Pregunta pa Meditá Ariba.” E tekstonan bíbliko i preguntanan ku tin den e kuadro no ta pa repasá e kapítulo. Mas bien, nan ta diseñá pa yuda bo usa Beibel pa meditá profundamente riba e tema. Ta rekomendabel pa bo lesa tur e pasashinan di Beibel ku sumo atenshon. Kaba meditá riba e pregunta, i trata di aplik’é na bo mes. E manera ei di meditá por stimulá bo kurason, i lo yuda bo hala asta mas i mas serka di Yehova.—Salmo 19:14.

E plachinan den e buki Hala Serka Yehova a wòrdu prepará i investigá kuidadosamente pa nan por eduká i motivá. Den 17 kapítulo tin plachi di esenanan bíbliko masha bunita riba henter un página.

Dikon A Publik’é?

Dikon a publiká e buki Hala Serka Yehova? E propósito prinsipal di e publikashon nobo aki ta pa yuda nos siña konosé Yehova mihó di manera ku nos lo por forma un relashon personal mas fuerte ku nos Dios.

Bo por pensa riba un hende ku lo benefisiá di e buki Hala Serka Yehova, kisas un studiante di Beibel òf asta un ruman kristian ku ta inaktivo? Ke tal di abo? Bo a kuminsá lesa e buki nobo aki? Si no ta asina, dikon bo no ta programá tempu pa kuminsá mas pronto posibel? Tuma bo tempu pa reflekshoná riba loke bo ta lesa. Nos ta spera ku e publikashon nobo aki lo yuda bo hala semper mas serka di Yehova Dios, ya asina bo por proklamá su bon nobo di Reino ku mas selo i goso!