Kon Nos Por Kultivá Berdadero Amor

“Amor ta e kura-lo-todo di bida; amor ta bida.”—Living to Purpose (Biba ku un Propósito), di Joseph Johnson, 1871.

KON un hende ta siña stima? Dor di studia sikologia? Dor di lesa buki pa desaroyo personal? Dor di wak pelíkula romántiko? Klaru ku nò. Hende ta siña stima na promé lugá dor di e ehèmpel i edukashon di nan mayornan. Yunan lo siña e nifikashon di amor si, den un ambiente di tierno kariño, nan mira nan mayornan alimentá nan i protehá nan, komuniká ku nan, i mustra interes personal profundo den nan. Tambe nan ta siña stima ora nan mayornan siña nan biba segun e prinsipionan sano di loke ta bon i malu.

Berdadero amor ta mas ku djis un emoshon superfisial. E ta buska semper loke ta e mihó interesnan di otro hende, asta ora ku na sierto momentu nan no ta komprondé esei kompletamente, i foral serka mucha esei sa ta e kaso ora mester disipliná nan ku amor. Un ehèmpel perfekto di un persona ku ta mustra amor inegoista ta e Kreadó mes. Apòstel Pablo a skirbi: “Mi yu, no menospresiá e disiplina di SEÑOR, ni desmayá ora ku e reprendé bo; pasobra esnan ku SEÑOR ta stima, e ta disipliná.”—Hebreonan 12:5, 6.

Mayornan, kon boso por imitá Yehova den mustra amor na boso famia? I kon importante e ehèmpel ku boso ta pone den boso relashon ku otro komo esposo i esposa ta?

Siña Yu Kiko Ta Amor ku Boso Ehèmpel

Si bo ta un esposo, bo ta apresiá bo kasá i dun’é hopi balor? Bo ta trat’é ku onor i rèspèt? Si bo ta un esposa, bo ta un persona amoroso i bo ta apoyá bo kasá? Beibel ta bisa ku esposo i esposa mester stima otro i respetá otro. (Efesionan 5:28; Tito 2:4) Ora nan ta hasi esei, nan yunan ta mira personalmente kon mester mustra amor kristian. Esei por ta un lès masha efektivo i balioso!

Tambe mayornan ta promové amor na kas ora nan ta pega na normanan haltu p’e famia relashoná ku kosnan manera dibertishon, moralidat, metanan i prioridatnan. Rònt mundu, hende a ripará ku Beibel ta un gran yudansa pa fiha e normanan di famia ei, dunando evidensia palpabel ku Beibel en bèrdat “ta inspirá pa Dios i ta útil pa siñansa, pa reprendementu, pa korekshon, pa eduká den hustisia.” (2 Timoteo 3:16) Sí, hopi hende ta konsiderá por ehèmpel e konsehonan i prinsipionan moral di bida den e Sermon Riba Seru komo algu sin igual.—Mateo, kapítulo 5 pa 7.

 Ora henter e famia ta akudí na Dios pa guia i ta pega na su normanan, kada individuo ta sinti su mes mas sigur i yunan tin mas chèns di krese ku amor i rèspèt pa nan mayornan. Di otro banda, den un kas kaminda mayornan ta midi ku dos midí, òf kaminda e normanan ta robes òf suak, esei por iritá e yunan, pone nan rabia i bira rebelde.—Romanonan 2:21; Kolosensenan 3:21.

Kiko di mayornan soltero? Nan tin un desbentaha serio den siña nan yunan kiko ta amor? No nesesariamente. Ounke no tin mihó ku un mama i tata ku ta traha huntu komo un bon tim, eksperensia ta mustra ku te na sierto grado e kalidat di relashonnan di famia por kompensá e ousensia di un dje mayornan. Si bo ta un mayor soltero, hasi esfuerso pa apliká prinsipionan di Beibel den bo kas. Sí, un proverbio ta bisa nos: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” Un dje “bereanan” ei ta bo trabou komo mayor.—Proverbionan 3:5, 6; Santiago 1:5.

Den e míles di kongregashonnan kristian di Testigunan di Yehova rònt mundu tin hopi hóben ekselente ku awor ta sirbiendo Dios fielmente pero ku a lanta den kas ku un solo mayor. Esaki ta evidensia ku mayornan soltero tambe por tin éksito den siña nan yunan tokante amor.

Kon Nos Tur Por Kultivá Amor

Beibel a profetisá ku den “e último dianan” hende lo ta “sin amor,” esta sin e kariño natural ku miembronan di famia por lo general mester tin pa otro. (2 Timoteo 3:1, 3) Pero, asta hende ku kisas a lanta den un ambiente den kua no tabatin kariño por siña kultivá amor. Kon? Dor di siña for di Yehova, kende ta e Fuente di amor i kende ta demostrá amor i kariño na tur persona ku di kurason ta akudí na dje. (1 Juan 4:7, 8) “Maske mi tata i mi mama bandoná mi, SEÑOR lo rekohé mi,” segun un salmista.—Salmo 27:10.

Yehova ta ekspresá su amor pa nos den hopi diferente manera. Esakinan ta entre otro e manera amoroso ku e ta guia nos pa medio di Beibel, e yudansa ku e ta duna nos pa medio di spiritu santu i e sosten kaluroso ku nos ta risibí di e hermandat kristian. (Salmo 119:97-105; Lukas 11:13; Hebreonan 10:24, 25) Laga nos wak kon e tres perkurashonnan aki por yuda bo krese den amor pa Dios i pa próhimo.

Guia Inspirá Duná ku Amor

Pa nos por kultivá un relashon di kariño ku un persona, nos tin ku konosé e persona ei bon. Dor di revelá su mes mediante e páginanan di Beibel, Yehova ta invitá nos pa hala serka dje. Sin embargo, lesa Beibel so no ta basta. Nos tin ku apliká su siñansanan i mira pa nos mes e benefisionan ku esei ta duna. (Salmo 19:7-10) “Ami ta SEÑOR bo Dios, Kende ta siña bo, pa bo prosperá, Kende ta guia bo den e kaminda ku bo mester kana,” segun Isaias 48:17. Sí, Yehova, e personifikashon di amor, ta instruí nos pa nos benefisio—no pasobra e kier restringí nos libertat ku reglanan innesesario.

Un konosementu eksakto di Beibel tambe ta yuda nos krese den amor pa nos próhimo. Esei ta pasobra e bèrdat di Beibel ta siña nos kon Dios ta mira hende. Ademas e ta siña nos a base di ki prinsipionan nos mester trata otro  hende. Ku e informashon ei, nos tin un base sólido pa kultivá amor pa próhimo. Apòstel Pablo a bisa: “Esaki ta mi orashon, ku boso amor por abundá mas i mas ainda den konosementu berdadero [“eksakto,” NW] i tur disernimentu.”—Filipensenan 1:9.

Pa ilustrá kon konosementu eksakto por yuda hende mustra amor den e manera korekto, konsiderá e bèrdat fundamental deklará na Echonan 10:34 i 35: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” Si Dios ta evaluá hende segun nan obranan hustu i nan temor p’e, i no segun nan nashonalidat òf rasa, nos no mester mira nos próhimo for di e mesun punto di bista imparsial?—Echonan 17:26, 27; 1 Juan 4:7-11, 20, 21.

Amor—Un Fruta di Dios Su Spiritu

Meskos ku un áwaseru na tempu ta yuda un kunuku produsí un bon kosecha, asina e spiritu di Dios por produsí den personanan reseptivo kualidatnan ku Beibel ta deskribí komo ‘fruta di spiritu.’ (Galationan 5:22, 23) Esun di mas prinsipal ta e fruta di amor. (1 Korintionan 13:13) Pero kon nos por haña e spiritu di Dios? Un manera vital ta mediante orashon. Si nos ta pidi Dios pa su spiritu, lo e duna nos e. (Lukas 11:9-13) Abo ta sigui pidi pa spiritu santu? Si bo ta hasié, e ora ei su fruta presioso, entre kua amor, mester bira mas bisto ku nunka den bo bida.

Sin embargo, tin un otro klase di spiritu ku ta obra kontra e spiritu di Dios. Beibel ta yama esaki “e spiritu di mundu.” (1 Korintionan 2:12; Efesionan 2:2) Esei ta un influensia malbado, i su fuente ta Satanas e Diabel mes, “prens di e mundu aki” di humanidat alehá for di Dios. (Juan 12:31) Meskos ku bientu ta lanta stòf ku sushi, asina “e spiritu di mundu” ta lanta deseonan perhudisial ku ta kaba ku amor i stimulá e debilidatnan di karni.—Galationan 5:19-21.

Hende ta apsorbé e spiritu malbado ei ora nan ta eksponé nan mes na pensamentu materialista, n’e idea di ami-promé, na aktitutnan violento i na e punto di bista eróneo i hopi bes trosé di amor ku ta asina komun den mundu. Si bo kier krese den berdadero amor, bo mester resistí e spiritu di mundu fuertemente. (Santiago 4:7) Sin embargo, no konfia den bo mes forsa; pidi Yehova yuda bo. Su spiritu—e forsa di mas poderoso den universo—por fortifiká bo i duna bo éksito.—Salmo 121:2.

Siña Amor for di e Hermandat Kristian

Meskos ku yu ta siña mustra amor dor di eksperensi’é na kas, asina nos tur—hóben i bieu—por krese den amor dor di asosiá ku otro kristiannan. (Juan 13:34, 35) En bèrdat,  un dje funshonnan prinsipal di e kongregashon kristian ta pa perkurá un ambiente den kua e miembronan por “stimulá otro pa stima i hasi bon obra.”—Hebreonan 10:24.

Spesialmente hende ku ta “kansá i plamá” den e mundu aki sin amor ta duna hopi balor n’e amor ei. (Mateo 9:36) Eksperensia a demostrá ku un amistat yen di amor entre hende grandi por yuda vense hopi di e mal efektonan di un infansia ku a karesé di amor. P’esei ta masha importante anto pa tur kristian dediká risibí e nobonan den nan seno na un manera kaluroso!

“Amor Nunka No Ta Faya”

Beibel ta bisa ku “amor nunka no ta faya.” (1 Korintionan 13:8) Kon asina? Apòstel Pablo ta bisa nos: “Amor tin pasenshi, amor ta kariñoso i no ta yalurs; amor no ta gaba, i no ta arogante, e no ta komportá su mes indesente; e no ta buska su propio interes, e no ta wòrdu provoká, e no ta warda renkor.” (1 Korintionan 13:4, 5) Ta bisto anto ku e amor aki no ta djis un emoshon imaginario òf un sintimentu superfisial. Al kontrario, esnan ku ta demostr’é ta konsiente ku bida tin su desapuntenan i dolónan, pero nan no ta laga esakinan kaba ku nan amor pa próhimo. Un amor asina ta berdaderamente un “laso perfekto di unidat.”—Kolosensenan 3:12-14.

Tuma por ehèmpel e kaso di un mucha muhé kristian di 17 aña na Korea. Ora el a kuminsá sirbi Yehova Dios, su famia no a gusta esei niun tiki i e mester a sali for di kas. Sin embargo, en bes di rabia, el a hasi orashon tokante e asuntu i a laga Dios su Palabra i spiritu dirigí su pensamentunan. Despues di esei, el a skirbi karta na su famia diferente biaha, i semper su palabranan a reflehá e kariño i afekto sinsero ku e tabatin pa nan. Komo resultado di esaki, dos di su ruman hòmbernan mas grandi a kuminsá studia Beibel i awor ta kristiannan dediká. Su mama i ruman hòmber mas yòn tambe a aseptá e bèrdat di Beibel. Finalmente, su tata, kende tabata masha kontra dje, tambe a kambia su punto di bista. E hóben Testigu ta skirbi: “Nos tur a kasa ku un kristian, i nos famia di adoradónan uní ta konsistí awor di un total di 23 miembro.” Ki un viktoria pa amor!

Bo kier kultivá berdadero amor i yuda otro hende hasi meskos? Anto akudí na Yehova, e Fuente di e kualidat presioso ei. Sí, tuma su Palabra na pechu, pidi pa spiritu santu i asosiá regularmente ku e hermandat kristian. (Isaias 11:9; Mateo 5:5) Ta masha alentador pa sa ku pronto tur maldat lo disparsé, lagando solamente esnan ku ta praktiká berdadero amor kristian! En bèrdat, amor ta e klave pa felisidat i bida.—Salmo 37:10, 11; 1 Juan 3:14.

[Plachi na página 6]

Orashon i un estudio di e Palabra di Dios lo yuda nos kultivá berdadero amor