“Mira, Esaki Ta Nos Dios”
“Mira, Esaki Ta Nos Dios”
E informashon ku ta ser tratá den e dos artíkulonan di studio aki ta basá riba e buki Hala Serka Yehova. E buki aki a keda presentá na e kongresonan di distrito ku a ser tené rònt mundu durante aña 2002-2003.—Wak e artíkulo “El A Yena un Bashí den Mi Kurason,” na página 20.
“Mira, esaki ta nos Dios, riba kende nos a spera pa e salba nos. Esaki ta e SEÑOR.”—ISAIAS 25:9.
1, 2. (a) Kiko Yehova a yama e patriarka Abraham, i kiko esaki lo por pone nos puntra nos mes? (b) Kon Beibel ta sigurá nos ku nos por tin un amistat íntimo ku Dios?
“MI AMIGU.” Asina Yehova, Kreadó di shelu i tera, a yama e patriarka Abraham. (Isaias 41:8) Djis imaginá bo: un simpel hende disfrutando di un amistat ku e Señor Soberano di universo! Kisas bo ta puntra bo mes: ‘Ami lo por tin un amistat asina será ku Dios?’
2 Beibel ta sigurá nos ku nos por tin un amistat íntimo ku Dios. Abraham a haña chèns di tin tal amistat íntimo pasobra el a pone fe den Yehova. (Santiago 2:23) Awe tambe, Yehova “tin komunion íntimo ku e hende rekto.” (Proverbionan 3:32) Na Santiago 4:8, Beibel ta animá nos: “Hala serka Dios i e lo hala serka boso.” Pues ta bisto ku si nos dal paso pa hala serka Yehova, lo e reakshoná riba esei. De echo, e tambe lo hala serka nos. Pero, e palabranan inspirá aki ta nifiká ku ta nos—hende imperfekto i pekaminoso—ta dal e promé paso? Nò, niun ora so. Ta dor ku Yehova a dal dos paso importante kaba, ta posibel pa nos por tin amistat íntimo kuné.—Salmo 25:14.
3. Kua dos paso Yehova a dal pa hasi posibel ku nos por forma un amistat kuné?
3 Komo promé paso, Yehova a hasi areglo pa Hesus “duna su bida komo preis di reskate pa hopi.” (Mateo 20:28) E sakrifisio di reskate ei a habri kaminda pa nos por tin un amistat íntimo ku Dios. Beibel ta deklará: “Nos ta stima, pasobra el a stima nos promé.” (1 Juan 4:19) Sí, siendo ku Dios “a stima nos promé,” ta e a pone e base pa nos por forma un amistat kuné. Komo di dos paso, Yehova a revelá su mes na nos. Ora nos sera amistat ku un hende, e banchi di e amistat ei ta basá riba e echo ku nos konosé e persona a fondo i ta atmir’é i apresi’é pa su karakterístikanan úniko. Pensa un ratu kiko esaki ta nifiká. Si Yehova tabata un Dios skondí ku nos no por a konosé, nunka nos lo por tabatin amistat kuné. Sin embargo, en bes di skonde su mes, Yehova kier pa nos siña konos’é. (Isaias 45:19) Den su Palabra, Beibel, Yehova ta revelá su mes di un manera ku nos por komprondé. Esaki ta duna prueba no solamente ku e ta stima nos, pero ku e kier pa nos siña konos’é i stim’é komo nos Tata selestial.
4. Kon nos lo sinti tokante Yehova segun ku nos ta siña konosé su kualidatnan mihó?
4 Bo a yega di mira un mucha chikí bisa su amiguitunan ku ègt un goso i orguyo inosente: “Ata mi papi ei”? Dios su adoradónan tin tur motibu pa sinti meskos pa ku Yehova. Beibel ta profetisá di un tempu ora ku hende fiel lo bisa: “Mira, esaki ta nos Dios.” (Isaias 25:8, 9) Mas profundo e konosementu ku nos atkerí di e kualidatnan di Yehova ta, mas nos lo sinti ku nos tin e mihó Tata i e Amigu di mas íntimo ku nos por imaginá. Sí, dor di komprondé Yehova su kualidatnan, nos ta haña hopi motibu pa hala serka dje. P’esei laga nos eksaminá kon Beibel ta revelá Yehova su kualidatnan prinsipal, esta, poder, hustisia, sabiduria i amor. Den e artíkulo aki nos lo trata e promé tres kualidatnan.
“Ekselente den Poder”
5. Dikon ta na su lugá ku ta Yehova so ta wòrdu yamá “Todopoderoso,” i den ki maneranan e ta usa su inmenso poder?
5 Yehova ta “ekselente den poder.” (Jòb 37:23) Jeremias 10:6 ta bisa: “No tin ningun manera bo, o SEÑOR; grandi bo ta, i bo nòmber ta grandi den poder.” Distinto di tur kriatura, Yehova su poder no tin límite. Ta p’esei mes ta e so ta wòrdu yamá “Todopoderoso.” (Revelashon 15:3) Yehova ta usa su inmenso poder pa krea, destruí, protehá i restorá. Laga nos konsiderá djis dos ehèmpel: su poder di krea i su poder di protehá.
6, 7. Kon poderoso solo ta, i di ki bèrdat importante e ta duna prueba?
6 Si bo ta pará pafó riba un dia sin nubia, kiko bo ta sinti riba bo kueru? E kayente di solo. Pero loke en realidat bo ta sinti ta e resultado di Yehova su poder di krea. Kon poderoso solo ta? Den su núkleo, e temperatura ta mas o ménos 15 mion grado Celsius. Si bo por a kita djis e tamaño di un kabes di feneta for di e núkleo di solo i pon’é aki riba tera, lo bo mester para na un distansia di 140 kilometer pa e no hasi bo daño! Kada sekònde, solo ta produsí mes tantu energia ku e eksploshon di sientos di miónes di bòm nuklear. Sin embargo, tera ta drei nèt na e distansia korekto for di e inmenso fòrnu tèrmonuklear ei ku yama solo. Si tera tabata muchu serka di solo, tur awa na mundu lo a evaporá; si e tabata muchu leu, tur awa lo a fris. Tur dos ekstremo lo a hasi bida riba nos planeta imposibel.
7 Maske nan bida ta dependé di solo, hopi hende no ta para pensa riba e manera ku solo ta funshoná. Dor di esei nan no ta kapta e lès ku solo por siña nos. Salmo 74:16 ta bisa di Yehova: “Abo a prepará lus i solo.” Sí, solo ta glorifiká Yehova, “e Kreadó di shelu i tera.” (Salmo 146:6) Asina mes esaki ta djis un di e tantísimo kosnan di kreashon ku ta siña nos tokante Yehova su inmenso poder. Mas nos siña tokante Yehova su poder di krea, mas rèspèt i atmirashon nos ta haña p’e.
8, 9. (a) Ki ilustrashon tierno ta mustra nos ku Yehova ta dispuesto pa protehá i kuida su adoradónan? (b) Ki kuido un wardadó den tempu bíbliko a perkurá pa su karnénan, i kiko esaki ta siña nos tokante nos Gran Wardadó?
8 Tambe Yehova ta usa su poder inmenso pa protehá su sirbidónan i kuida nan. Beibel ta usa algun ilustrashon bibu i konmovedor pa deskribí e maneranan ku Yehova a primintí di duna kuido i protekshon. Por ehèmpel, tuma nota di Isaias 40:11. Einan Yehova ta kompará su mes ku un wardadó di karné, i su pueblo ku karné. Nos ta lesa: “Manera un wardadó di karné e lo kuida su tou, e lo kohe e lamchinan den su brasa, i tene nan serka di su kurason; ku ternura e lo guia esnan ku tin yu chikitu.” Bo por visualisá loke e versíkulo ei ta deskribí?
9 Masha poko bestia ta asina indefenso manera karné. Un wardadó den tempu bíbliko mester tabatin kurashi pa protehá su karnénan for di wòlf, ber i leon. (1 Samuel 17:34-36; Juan 10:10-13) Pero tabatin bes ku e mester a mustra ternura ora di protehá i kuida su karnénan. Por ehèmpel, si un karné a wèrp leu di e tou, kon e wardadó lo a protehá e lamchi indefenso ku a kaba di nase? Lo el a karg’é—kisas pa vários dia—“serka di su kurason,” es desir, den e ploinan di su paña ku a forma un saku na su pechu. Pero kon un lamchi tabata logra yega te den brasa di e wardadó di karné? Kisas e lamchi tabata bai serka e wardadó i asta pasa push’é na su pia. Pero ta e wardadó di karné lo tabatin ku sak abou i saka man pa kohe e lamchi, anto dun’é protekshon den su brasanan. Esta un deskripshon tierno! E ta mustra kon dispuesto nos Gran Wardadó ta pa protehá i kuida su sirbidónan!
10. Ki protekshon Yehova ta perkurá awe, i dikon e protekshon ei ta hopi importante?
10 Pero Yehova a hasi mas ku djis primintí protekshon. Den tempu bíbliko el a demostrá den maneranan milagroso ku e por “libra hende deboto na dje for di prueba.” (2 Pedro 2:9, NW) Kiko djawe? Nos sa ku aworakí e no ta usa su poder pa protehá nos di tur kalamidat. Pero sí e ta duna nos algu mas importante, esta, protekshon spiritual. Nos Dios amoroso ta protehá nos di daño spiritual dor di ekipá nos ku loke nos tin mester pa por wanta prueba i protehá e relashon presioso ku nos tin kuné. Por ehèmpel, Lukas 11:13 ta bisa: “Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!” E forsa poderoso ei por ekipá nos pa hèndel kualkier prueba òf problema ku nos por konfrontá. (2 Korintionan 4:7) Pues, Yehova ta traha pa preservá nos bida, no pa djis un par di aña kòrtiku so, sino pa eternidat. Ku e speransa ei na mente, nos en bèrdat ta mira kualkier sufrimentu den e mundu aki komo algu ‘leve i pa un momentu so.’ (2 Korintionan 4:17) Nos no ta sinti nos atraé na un Dios ku di un manera asina amoroso ta usa su poder na nos benefisio?
Yehova “Ta Stima Hustisia”
11, 12. (a) Dikon Yehova su hustisia ta atraé nos na dje? (b) Na ki konklushon David a yega relashoná ku Yehova su hustisia, i kon e palabranan inspirá aki por konsolá nos?
11 Yehova ta hasi loke ta hustu i rekto, i e ta hasi esei konsistentemente, sin hasi distinshon di persona. Hustisia divino no ta un kualidat severo sin sintimentu ku ta alehá nos for di Dios. Al kontrario, e ta un kualidat atraktivo ku ta pone nos hala serka Yehova. Beibel ta deskribí bon kla e karakter alentador di e kualidat aki. P’esei laga nos analisá tres manera den kua Yehova ta ehersé hustisia.
12 Na promé lugá, Yehova su hustisia ta motiv’é pa mustra fieldat i lealtat na su sirbidónan. E salmista David personalmente a eksperensiá e faseta aki di Yehova su hustisia. Ki konklushon David a saka for di su eksperensia personal i for di su estudio di Dios su manera di hasi kosnan? El a deklará: “SEÑOR ta stima hustisia i no ta bandoná su santunan. Nan ta keda preservá pa semper.” (Salmo 37:28) Ki un garantia konsolador! Ni pa un momentu so nos Dios lo no bandoná esnan ku ta santu òf leal na dje. P’esei nos por konta ku su amistat i kuido amoroso. Su hustisia ta garantisá esaki!—Proverbionan 2:7, 8.
13. Kon Yehova su preokupashon pa esnan marginá tabata bisto den e Lei ku el a duna Israel?
13 Na di dos lugá, hustisia divino ta tene kuenta ku e nesesidatnan di esnan ku ta sufri. Yehova su preokupashon pa esnan marginá ta bisto den e Lei ku el a duna Israel. Por ehèmpel, e Lei tabatin areglo pa hasi sigur ku huérfano i biuda ta haña kuido. (Deuteronomio 24:17-21) Dor ku Yehova tabata konsiente ku bida por ta hopi difísil pa famianan asina, e mes a bira nan Hues i Protektor amoroso. (Deuteronomio 10:17, 18) El a spièrta e israelitanan pa nan no pone hende muhé òf mucha indefenso sufri, pasobra sin falta lo e skucha nan sklamashon. Anto “mi rabia lo sende,” Yehova a bisa, manera ta pará skirbí na Eksodo 22:22-24. Ounke rabia no ta un di Dios su kualidatnan dominante, e ta sinti indignashon hustu ora aktonan deliberá di inhustisia tuma lugá, spesialmente si e víktimanan ta hende indefenso.—Salmo 103:6.
14. Kiko ta un evidensia realmente remarkabel di e echo ku Yehova no ta hasi distinshon di persona?
14 Na di tres lugá, Beibel ta sigurá nos na Deuteronomio 10:17 ku Yehova “no ta hasi distinshon di persona, ni ta aseptá plaka pasá bou di mesa.” Distinto for di hopi hende ku poder òf influensia, Yehova no ta laga rikesa material ni aparensia influensi’é. Lo e no mustra prehuisio ni faboresé un hende riba otro. Un evidensia berdaderamente remarkabel di e echo ku e no ta hasi distinshon di persona ta lo siguiente: No ta un grupito privilegiá so tin e oportunidat di bira berdadero adoradó di dje, ku e speransa di biba pa semper. Al kontrario, Echonan 10:34 i 35 ta bisa: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” Tur hende—sin importá nan posishon sosial, kolo di kueru òf e nashon den kua nan ta biba—tin oportunidat di biba pa semper. Ta eksistí mihó hustisia ku esei? En bèrdat un mihó komprondementu di Yehova su hustisia ta hala nos serka dje!
‘O Profundidat di e Sabiduria di Dios!’
15. Kiko ta sabiduria, i kon Yehova ta despleg’é?
15 Apòstel Pablo a sintié konmoví pa ekspresá, manera tin pará skirbí na Romanonan 11:33: ‘O profundidat di e sabiduria i di e konosementu di Dios!’ Sí, segun ku nos ta analisá e diferente aspektonan di Yehova su sabiduria inmenso, nos no por keda sin haña profundo rèspèt i atmirashon p’e. Pero kon nos por definí e kualidat aki? Sabiduria ta apliká konosementu, disernimentu i komprondementu huntu pa haña e efekto deseá. Hasiendo uso di su konosementu ekstenso i di su komprondementu profundo, Yehova semper ta tuma e mihó desishon posibel, i ta kumpli kuné di e mihó manera ku nos por imaginá.
16, 17. Kon Yehova su kreashon ta konfirmá su sabiduria inmenso? Duna un ehèmpel.
16 Kua ta algun evidensia spesífiko di Yehova su inmenso sabiduria? Salmo 104:24 ta bisa: “O SEÑOR, ki numeroso bo obranan ta! Ku sabiduria bo a traha tur; tera ta yen di loke bo a krea.” Sí, mas nos siña tokante e kosnan ku Yehova a krea, mas su sabiduria ta impreshoná nos. Figurá bo ku sientífikonan mes a siña hopi kos dor di studia Yehova su kreashon! Asta tin un ramo di ingenieria ku yama biomimétika ku ta purba imitá diseñonan ku tin den naturalesa.
17 Por ehèmpel, kisas bo a yega di atmirá un bunita kas di araña. I en bèrdat e ta un diseño maravioso. Algun di su hilunan ta mustra frágil, pero proporshonalmente nan ta mas fuerte ku heru i ku e fibranan di un chaleko antibala. Pero kon fuerte presis esei ta? Imaginá bo un kas di araña mes grandi ku un reda di piska. Un kas di araña di e tamaño ei lo ta asina fuerte ku lo e por para un avion di pasahero den pleno vuelo! Sí, Yehova a traha tur e kosnan ei “ku sabiduria.”
18. Kon nos ta mira Yehova su sabiduria den e echo ku el a usa hende pa skirbi su Palabra, Beibel?
18 Nos por haña e prueba mas grandi di Yehova su sabiduria den su Palabra, Beibel. E konseho sabí ku tin den dje ta mustra nos en bèrdat kua ta e mihó manera di biba. (Isaias 48:17) Pero tambe nos por mirá Yehova su sabiduria inkomparabel den e manera ku Beibel a wòrdu skirbí. Kon asina? Hasiendo uso di su sabiduria, Yehova a skohe hende pa skirbi su Palabra. Si el a usa angel pa skirbi e Palabra inspirá, Beibel lo tabata mes atraktivo? Ta bèrdat ku angelnan lo por a deskribí Yehova for di nan posishon superior i ekspresá nan propio deboshon na dje. Pero realmente nos lo por a komprondé e punto di bista di kriaturanan spiritual perfekto ku tin hopi mas konosementu, eksperensia i forsa ku nos?—Hebreonan 2:6, 7.
19. Ki ehèmpel ta mustra ku ta e echo ku Dios a usa hende pa skirbi Beibel ta loke a hasié sumamente atraktivo i konmovedor?
19 E echo ku ta hende a skirbi Beibel ta pone ku e ta sumamente atraktivo i konmovedor. Su eskritornan tabata hende ku sintimentu manera nos. Siendo ku nan tabata imperfekto, nan tambe a enfrentá prueba- i preshonnan meskos ku nos. Den algun kaso, nan a skirbi relatonan personal tokante nan mes sintimentu- i luchanan. (2 Korintionan 12:7-10) Pues, nan a skirbi palabranan ku niun angel lo por a ekspresá. Por ehèmpel, konsiderá e palabranan di David skirbí na Salmo 51. Segun e título riba e salmo, David a komponé esaki despues ku el a kometé pikánan grave. El a revelá su sintimentunan di mas íntimo, a ekspresá su tristesa profundo i a roga Dios pa pordon’é. Versíkulo 2 i 3 ta bisa: “Laba mi kita tur mi inikidat, i purifiká mi di mi piká. Pasobra mi ta rekonosé mi transgreshonnan, i mi piká ta semper mi dilanti.” Wak kiko versíkulo 5 ta bisa: “Mira, den inikidat mi a wòrdu formá, i den piká mi mama a konsebí mi.” Versíkulo 17 ta sigui bisa: “E sakrifisionan di Dios ta un spiritu kibrá; un kurason repentí i kibrá, o Dios, bo no ta despresiá.” Bo no ta sinti e angustia di e eskritor? Ken fuera di un ser humano imperfekto lo por a ekspresá e tipo di sintimentunan ei?
20, 21. (a) Dikon nos por bisa ku Beibel ta kontené e sabiduria di Yehova, ounke ta hende a skirbié? (b) Kiko nos lo konsiderá den e siguiente artíkulo?
20 Dor di usa hende imperfekto asina, Yehova a proveé nèt loke nos tin mester—un relato “inspirá pa Dios” pero ku a keda ku e toke humano. (2 Timoteo 3:16) Sí, e eskritornan ei a wòrdu guiá dor di spiritu santu. Pues nan a skirbi Yehova su sabiduria, no esun di nan mes. E sabiduria ei ta kompletamente konfiabel. Dios su sabiduria ta asina mas superior ku nos sabiduria, ku amorosamente Yehova ta urgi nos: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” (Proverbionan 3:5, 6) Dor di sigui e konseho sabí ei, nos ta hala serka nos Dios ku tin un sabiduria inkomparabel.
21 E kualidat mas bunita i atraktivo di tur Yehova su kualidatnan ta amor. Den e siguiente artíkulo nos lo konsiderá kon Yehova a mustra amor.
Bo Ta Kòrda?
• Ki pasonan Yehova a dal pa hasi posibel ku nos por kultivá un amistat kuné?
• Kua ta algun ehèmpel di Yehova su poder di krea i di su poder di protehá?
• Den ki maneranan Yehova ta ehersé su hustisia?
• Kon nos por mira Yehova su sabiduria den kreashon i tambe den Beibel?
[Preguntanan di Estudio]
[Plachi na página 10]
Meskos ku un wardadó ku ta karga un lamchi den su brasa, Yehova ta kuida Su karnénan ku ternura
[Plachi na página 13]
Nos por mira Yehova su sabiduria den e manera ku a skirbi Beibel