Pregunta di Lektor

Dikon Satanas ta ser yamá “esun ku tin e medio pa kousa morto” na Hebreonan 2:14 (NW)?

Den poko palabra, Pablo tabata kier men ku Satanas, personalmente òf mediante su agentenan, por kousa e morto físiko di hende. Na armonia ku esei, Hesus a yama Satanas “un matadó for di prinsipio.”—Juan 8:44.

Por surgi mal komprondementu tokante Hebreonan 2:14 debí na e manera ku algun Beibel ta tradusié, bisando ku Satanas tin e “poder di morto” òf e “poder riba morto.” (King James Version; Beibel Santu; Beibel na papiamentu koriente; Jerusalem Bible) E tradukshonnan ei ta laga parse ku Satanas tin e kapasidat sin límite di mata ken ku e ke. Sin embargo, ta klaru ku esaki no ta e kaso, pasobra si tabata asina, probablemente masha tempu lo el a eksterminá e adoradónan di Yehova for di riba tera.—Génesis 3:15.

E ekspreshon griego tradusí “poder riba morto” den algun tradukshon, i “e medio pa kousa morto” den Tradukshon di Mundu Nobo ta “krá·tos tou tha·ná·tou.” Tou tha·ná·tou ta un forma di e ekspreshon ku ta nifiká “morto.” Krá·tos básikamente ta nifiká “forsa, fortalesa, poder.” Segun e Theological Dictionary of the New Testament, e ta indiká “e presensia i importansia di forsa òf fortalesa mas bien ku su uso.” Pues, na Hebreonan 2:14, Pablo no ta indiká ku Satanas tin poder apsoluto riba morto. Mas bien, e ta hala atenshon na e kapasidat òf potensial ku Satanas tin pa kousa morto.

Kon Satanas ta usa “e medio pa kousa morto”? Den e buki di Jòb, nos ta lesa di un okashon ku kisas tabata un poko eksepshonal. E relato ta bisa ku Satanas a usa un tormenta pa ‘kousa e morto’ di e yunan di Jòb. Pero ripará ku Satanas por a hasi esaki solamente pasobra Dios a permitié. El a haña e pèrmit ei pasobra tabatin un kuestion vital ku mester a ser disidí. (Jòb 1:12, 18, 19) De echo, Satanas no por a mata Jòb mes. E no a haña pèrmit pa esei. (Jòb 2:6) Esaki ta mustra ku maske de bes en kuando Satanas por a kousa morto di hende fiel, nos no tin nodi tene miedu ku e por kaba ku nos bida ki ora ku e ke.

Tambe Satanas a kousa morto mediante agentenan humano. P’esei hopi kristian a muri pa nan fe; tin di nan a ser asesiná dor di multitutnan furioso òf a ser ehekutá inhustamente riba órden di funshonarionan gubernamental òf huesnan korupto.—Revelashon 2:13.

Ademas, tabatin biaha ku Satanas a kousa morto dor di probechá di debilidatnan humano. Den tempu di Israel di pasado, profeta Balaam a konsehá e moabitanan pa tenta e israelitanan pa “bira infiel na SEÑOR.” (Numbernan 31:16) Esei a resultá den morto di mas ku 23.000 israelita. (Numbernan 25:9; 1 Korintionan 10:8) Awe tambe algun hende ta kai den Satanas su “trampanan” i ta ser tentá pa kometé inmoralidat seksual òf otro práktikanan malbado. (Efesionan 6:11) Ta bèrdat ku por lo general e personanan ei no ta pèrdè nan bida mesora. Pero nan ta kore e riesgo di pèrdè bida eterno, i den e manera ei Satanas ta kousa nan morto.

Maske nos ta rekonosé ku Satanas tin e potensial di kousa daño, nos no tin nodi tene un miedu eksagerá di dje. Ora Pablo a bisa ku Satanas tabatin e medio pa kousa morto, el a bisa tambe ku Kristu a muri afin ku e “por redusí [Satanas] na nada . . . i pa e por emansipá tur esnan ku pa miedu di morto a keda sometí na sklabitut durante henter nan bida.” (Hebreonan 2:14, 15, NW) Sí, Hesus a paga e reskate i asina a libra humanidat kreyente for di sklabitut na piká i morto.—2 Timoteo 1:10.

Klaru ku ta un kos serio pa pensa ku Satanas tin e medio pa kousa morto, pero nos tin e konfiansa ku Yehova por drecha kualkier daño ku Satanas i su agentenan por kousa. Yehova ta sigurá nos ku Hesus resusitá lo “destruí e obranan di Diabel.” (1 Juan 3:8) Ku poder di Yehova, Hesus lo resusitá e mortonan i asina kaba ku morto mes. (Juan 5:28, 29) Ku tempu, Hesus na un manera dramátiko lo revelá kon limitá Satanas su poder ta dor di ser’é den abismo. I finalmente Satanas ta ser kondená na destrukshon eterno.—Revelashon 20:1-10.