Un Vidio Ku Ta Yega na Kurason di Hóbennan

E VIDIO Hóbennan Sa Puntra—Kon Mi Por Haña Berdadero Amigu? * a stimulá hopi hóben ku a mir’é pa analisá nan kondukta seriamente. E vidio ta kontené konseho sano basá riba Beibel, komentarionan personal di hóbennan kristian, i un drama moderno konmovedor basá riba e relato bíbliko tokante Dina. (Génesis, kapítulo 34) For di Mexico nos a haña e siguiente komentarionan tokante e vidio.

Martha ta konta: “E vidio a konmové mi profundamente. Ta komo si fuera ta pa mi nan a trah’é. Mi a kere ku basta mi maestronan i e muchanan di mi skol sa ku mi ta un Testigu di Yehova, tur kos ta kla. Mi no a proba nan esei dor di duna nan testimonio. Mi ta gradisidu pa tur e informashon ku Yehova ta perkurá, spesialmente ora e ta konmové nos asina profundamente manera e vidio aki ta hasi.”

Juan Carlos ta bisa: “E vidio aki ta ègt pone bo para pensa. Komo hóben, mi a yega di kometé algun fayo i mi por a mira mi mes den algun dje personahenan den e drama. Algun aña pasá, mi tabata hiba un bida dòbel, pero mi a realisá ku un bida asina por trese mal konsekuensia. Despues di a wak e vidio, mi ta determiná pa keda fiel na Yehova.”

Sulem ta konfesá: “Ora mi a wak e vidio, mi hemut a yena. Poko tempu promé, mi a stòp di lesa Beibel, i mi no tabata hasi orashon mashá na Yehova. Skuchando e komentarionan ku e hóbennan den e vidio a duna, a motivá mi pa kuminsá studia Beibel atrobe i hasi orashon na Yehova.”

Awe hóbennan ta haña nan ku hopi reto, i e amigunan ku nan ta skohe hopi bes por tin un influensia fuerte riba e manera ku nan ta hiba nan bida. (Salmo 26:4; Proverbionan 13:20) E vidio Hóbennan Sa Puntra—Kon Mi Por Haña Berdadero Amigu? ta yudando hopi di nan tuma bon desishon relashoná ku esaki.

[Nota]