Eusebio—“Tata di Historia di Iglesia”?

NA AÑA 325 di nos era, emperador romano Constantino a konvoká un reunion pa tur obispu na Nisea. Su propósito tabata pa resolvé e kuestion hopi debatí di kiko ta e relashon entre Dios ku su Yu. Entre esnan presente tabatin un hòmber ku nan a konsiderá esun mas siñá di su époka, Eusebio di Cesarea. Eusebio a studia e Skritura diligentemente i tabata un defensor di e doktrina kristian ku tin un solo Dios.

Encyclopædia Britannica ta skirbi ku na e Konsilio di Nisea, “Constantino mes a presidí, guiando e diskushonnan aktivamente, i personalmente a proponé . . . e fórmula desisivo enkuanto e relashon entre Kristu ku Dios den e kredo ku e konsilio a saka, ku e ta ‘di e mesun esensia ku e Tata’ . . . Intimidá pa e emperador, e obispunan, ku eksepshon di dos so, a firma e kredo, hopi di nan masha kontra nan inklinashon.” Eusebio tabata un di e dos eksepshonnan? Ki lès nos por siña for di e posishon ku el a tuma? Laga nos wak e antesedente di Eusebio: su kualifikashonnan i logronan.

E Obranan Remarkabel Ku El A Skirbi

Eusebio probablemente a nase na Palestina rònt di aña 260 di nos era. For di un edat yòn, e tabata den kontakto estrecho ku Pánfilo, un superintendente di e iglesia di Cesarea. Eusebio a djòin e skol teológiko di Pánfilo i a bira un alumno diligente. El a hasi bon uso di Pánfilo su tremendo biblioteka. Eusebio a dediká su mes na su lèsnan, foral na su estudio di Beibel. Tambe el a bira un fiel amigu di Pánfilo, i mas despues tabata referí na su mes komo “Eusebio di Pánfilo.”

Relashoná ku su aspirashonnan, Eusebio a deklará: “Mi propósito ta pa skirbi un relato di e susesornan di e Apòstelnan santu i tambe di e tempu ku a transkurí for di dia di nos Salbadó te na nos dia; pa konta kon supuestamente hopi evento i suseso importante a tuma lugá den historia di iglesia; i pa menshoná esnan ku a goberná i presidí riba iglesia den e parokianan di mas prominente, i esnan ku den kada generashon a proklamá e palabra di Dios sea oralmente òf por eskrito.”

Eusebio ta ser rekordá pa su obra altamente respetá titulá Historia di e Iglesia Kristian. Su dies volúmennan publiká rònt di aña 324 ta ser konsiderá e historia di iglesia mas importante ku ta data di e era promé ku Edat Medio. Debí na e logro aki, Eusebio a bira konosí komo e tata di historia di iglesia.

Fuera di Historia di e Iglesia, Eusebio a skirbi Krónika, den dos volúmen. E promé volúmen tabata un resúmen di historia mundial. Den siglo 4, esei a bira e teksto standard pa referí na kronologia mundial. E di dos volúmen a sita fecha di eventonan históriko. Eusebio a usa  kolòmnan banda di otro pa presentá e suseshon di rei di vários nashon.

Eusebio a skirbi dos otro publikashon históriko, titulá Mártirnan di Palestina i Bida di Constantino. E promé obra ta abarká añanan 303 pa 310 di nos era i ta konta di e mártirnan di e periodo ei. Eusebio a biba durante e tempu di e susesonan ei. E di dos obra, publiká komo un sèt di kuater buki despues di morto di Emperador Constantino na aña 337, tabatin detayenan históriko balioso. En bes di ta skirbí den forma di un narashon históriko direkto, e ta pa gran parti un relato ku ta elogiá e birtutnan i servisionan di Constantino.

E obranan ku Eusebio a skirbi pa defendé su religion ta inkluí un kontesta na Hierocles, un gobernadó romano di su tempu. Ora Hierocles a skirbi kontra e kristiannan, Eusebio a sali na nan defensa. Ademas, el a skirbi 35 buki pa mustra ku Dios ta outor di e Skritura. Nan ta ser konsiderá komo e obranan mas importante i ekstenso di e tipo ei. E promé 15 bukinan ta purba hustifiká dikon kristiannan ta aseptá e Skritura Hebreo komo sagrado. E otro 20 bukinan ta ofresé prueba ku e kristiannan tin rason pa bai mas ayá di e reglanan hudiu i adoptá prinsipio- i práktikanan nobo. Huntu, e bukinan aki ta presentá un defensa kompletu di kristianismo manera Eusebio a komprond’é.

Eusebio a biba un 80 aña (di mas o ménos aña 260 pa 340), i a bira un di e eskritornan mas produktivo di antigwedat. Su obranan skirbí ta abarká e susesonan di e promé tres siglonan di nos era te ku tempu di Emperador Constantino. Den e último parti di su bida, Eusebio su trabou komo eskritor tabata kompañá pa su aktividatnan komo obispu di Cesarea. Ounke e ta mas konosí komo historiadó, Eusebio tabata tambe un defensor di su religion, un trahadó di mapa di Palestina, predikadó, krítiko teológiko i eskritor ku a splika òf interpretá obranan skirbí di temanan religioso.

E Dos Motibunan Pakiko El A Skirbi

Dikon Eusebio a kuminsá ku e proyektonan inmenso i sin presedente ei? E kontesta ta sinta den su kreensia ku e tabata biba den un tempu di transishon pa un époka nobo. E tabata di opinion ku eventonan grandi a tuma lugá durante generashonnan ku a pasa i ku tabatin mester di un registro skirbí pa generashonnan binidero.

Eusebio tabatin un propósito mas: e kier a defendé su religion. P’e, kristianismo tabata di orígen divino. Pero tabatin algun hende ta lucha kontra e idea aki. Eusebio a skirbi: “Ta mi propósito tambe pa menshoná nòmber di hende, kantidat di hende i e frekuensia ku e hendenan aki dor di amor pa inovashon a kometé e erornan di mas grandi, i proklamando nan mes komo deskubridónan di—loke falsamente ta wòrdu yamá—konosementu, a destruí e tou di Kristu sin miserikòrdia meskos ku lobo feros.”

Eusebio a konsiderá su mes un kristian? Aparentemente ku sí, pasobra el a referí na Kristu komo “nos Salbadó.” El a deklará: “Ta mi intenshon . . . di relatá e atversidatnan ku inmediatamente a bini riba henter e nashon hudiu a konsekuensia di e plannan ku nan a trama kontra nos Salbadó, i pa registrá e maneranan i okashonnan ku e palabra di Dios a ser ataká dor di e paganonan, i pa deskribí e karakter di esnan ku durante vários periodo a lucha pa e palabra apesar di sanger i tortura, i tambe deskribí e konfeshonnan públiko di lealtat ku a ser hasí den nos mes tempu, i e yudansa miserikòrdioso i bondadoso ku nos Salbadó a duna nan tur.”

 Su Investigashon Ekstenso

E kantidat di buki ku Eusebio personalmente a lesa i referí na dje ta enorme. Ta den e bukinan ku Eusebio a skirbi so hopi persona prominente di e promé tres siglonan di nos era ta ser revelá. Ta solamente den su obranan skirbí nos ta haña relatonan útil ku ta tira lus riba movementunan importante. Nan ta saká for di fuentenan di informashon na kua nos no tin akseso mas.

Eusebio a reuní su informashon na un manera diligente i kabal. Parse ku el a purba hasi un bon distinshon entre informenan konfiabel i inkonfiabel. Sin embargo, su obranan no ta liber di eror. Tin biaha e ta malinterpretá kosnan òf asta no ta komprondé sierto hende i nan akshonnan. Den kronologia, tin bes e ta ineksakto. Tambe Eusebio tabata falta kreatividat den su manera di presentá informashon. Pero apesar di e defisiensianan opvio, hende ta konsiderá su hopi obranan komo un tesoro baliosísimo.

Un Amante di e Bèrdat?

Eusebio a preokupá ku e kuestion pendiente tokante kon e Tata i e Yu ta relashoná ku otro. E Tata a eksistí promé ku e Yu, manera Eusebio a kere? Òf e Tata i e Yu a kuminsá eksistí pareu? El a puntra: “Si nan a kuminsá eksistí pareu, kon e Tata por ta Tata i e Yu por ta Yu?” El a asta apoyá su kreensia ku tekstonan bíbliko, sitando Juan 14:28, ku ta bisa ku ‘e Tata ta mas ku Hesus,’ i Juan 17:3, kaminda ta ser referí na Hesus komo esun ku e úniko Dios berdadero “a manda.” Refiriendo na Kolosensenan 1:15 i Juan 1:1, Eusebio a argumentá ku e Logos, òf Palabra, ta “e imágen di e Dios invisibel,” esta, Yu di Dios.

Pero sorprendentemente, na final di e Konsilio di Nisea, Eusebio a duna su sosten na e punto di bista kontrario. El a bai di akuerdo ku e emperador i kontra di su mes posishon bíbliko ku Dios i Kristu no tabata sernan igual ku a kuminsá eksistí pareu.

Un Lès pa Nos

Dikon Eusebio a entregá na preshon na e Konsilio di Nisea i a sostené un doktrina ku ta kontra Beibel? Akaso e tabatin metanan polítiko na mente? Dikon el a asistí mes na e konsilio? Ounke e emperador a konvoká un reunion pa tur obispu, ta solamente un kantidat chikí—300—a asistí. Akaso Eusebio tabata preokupá pa konserbá su status sosial? I dikon Emperador Constantino tabatin asina un apresio grandi p’e? Eusebio a sinta na man drechi di e emperador na e konsilio.

Aparentemente Eusebio a ignorá e rekisito di Hesus pa Su siguidónan ‘no ta parti di mundu.’ (Juan 17:16; 18:38) “Boso, adúlteranan, boso no sa ku amistat ku mundu ta enemistat pa ku Dios?” disipel Santiago a puntra. (Santiago 4:4) I Pablo su spièrtamentu ta masha apropiá: “No uni boso mes den yugo desigual ku inkrédulonan”! (2 Korintionan 6:14) Laga nos keda separá for di mundu segun ku nos ta “adorá [e Tata] den spiritu i bèrdat.”—Juan 4:24.

[Plachi na página 31]

Pintura riba muraya di e Konsilio di Nisea

[Rekonosementu]

Scala/Art Resource, NY

[Rekonosementu pa Potrèt na página 29]

Kortesia di Special Collections Library, University of Michigan