Kon Nos Mester Mira Hende Segun Ku e Dia di Yehova Ta Aserká?

“Señor no ta tarda ku su promesa . . . ma e tin pasenshi pa ku boso, i no kier pa ningun hende bai pèrdí, ma pa tur bin na repentimentu.”—2 PEDRO 3:9.

1, 2. (a) Ki punto di bista Yehova tin di hende djawe? (b) Ki preguntanan nos por hasi nos mes?

YEHOVA su sirbidónan a haña e asignashon pa “hasi disipel di hende di tur nashon.” (Mateo 28:19, NW) Miéntras nos ta kumpli ku e asignashon aki i ta warda riba “e gran dia di SEÑOR” nos mester mira hende manera Yehova ta mira nan. (Sofonias 1:14) I ta kon Yehova ta mira hende, esta, ki punto di bista e tin di hende? Apòstel Pedro ta bisa: “Señor no ta tarda ku su promesa manera algun tin esaki pa tardansa, ma e tin pasenshi pa ku boso, i no kier pa ningun hende bai pèrdí, ma pa tur bin na repentimentu.” (2 Pedro 3:9) Dios ta mira kada hende individualmente komo personanan ku por arepentí. Su deseo ta “pa tur hende wòrdu salbá i yega na konosementu di e bèrdat.” (1 Timoteo 2:4) Figura bo ku Yehova ta sinti un gran goso ora ku un hende “malbado bira for di su kaminda i biba”!—Ezekiel 33:11.

² Personalmente, bo tin e mesun punto di bista ku Yehova tin di hende? Nos tambe ta konsiderá ku hende di tur rasa i nashon lo por bira ‘karné ku e ta pastoriá’? (Salmo 100:3; Echonan 10:34, 35) Laga nos ban wak dos ehèmpel ku ta mustra e importansia di tin Dios su punto di bista. Den ámbos kaso, destrukshon tabata inminente, i Yehova su sirbidónan a haña sa esei di antemano. E ehèmpelnan aki ta spesialmente importante segun ku nos ta warda riba e gran dia di Yehova.

 Abraham Tabatin Yehova Su Punto di Bista

3. Ki punto di bista Yehova tabatin di e habitantenan di Sodoma i Gomora?

³ E promé ehèmpel ta di e fiel patriarka Abraham i e statnan malbado Sodoma i Gomora. Ora Yehova a tende “e klamor kontra Sodoma i Gomora,” no ta mesora el a destruí e statnan ei huntu ku tur nan habitantenan. Promé el a hasi un investigashon. (Génesis 18:20, 21) El a manda dos angel bai Sodoma, kaminda nan a keda den kas di e hòmber hustu Lòt. Riba e anochi ku e angelnan a yega, “e hòmbernan di e stat, . . . a rondoná e kas, tantu hóben komo bieu, henter e pueblo for di tur parti,” ku e deseo di tene relashon seksual ku e angelnan. Klaramente, e kondishon sumamente inmoral di e habitantenan di e stat a proba ku e tabata meresé destrukshon. Sin embargo, e angelnan a puntra Lòt: “Ken mas bo tin aki? Yerno, bo yu hòmbernan, bo yu muhénan, i ken ku bo tin den e stat, saka nan for di e lugá aki”! Yehova a habri kaminda pa algun habitante di e stat ei wòrdu salbá, pero na final di kuenta ta Lòt i su dos yu muhénan so a skapa e destrukshon.—Génesis 19:4, 5, 12, 16, 23-26.

4, 5. Pakiko Abraham a hasi súplika na fabor di e habitantenan di Sodoma, i su punto di bista di hende tabata na armonia ku esun di Yehova?

⁴ Laga nos bai bèk na e momentu ku Yehova a revelá su intenshon pa inspekshoná Sodoma i Gomora. Tabata na e okashon ei ku Abraham a supliká: “Suponé ku tin sinkuenta hende hustu den e stat; di bèrdat lo bo destruyé sin salba e lugá pa kousa di e sinkuenta hendenan hustu ku tin den dje? Ku esei keda leu di bo pa hasi un kos asina, esta, mata e hustu huntu ku e malbado, asina ku e hustu i e malbado ta wòrdu tratá igual. Ku esei keda leu di bo! E Hues di henter mundu lo no hasi hustisia?” Dos bes Abraham a usa e ekspreshon “ku esei keda leu di bo.” Esei ta indiká ku di eksperensia Abraham tabata sa ku Yehova lo no destruí e hustu huntu ku e malbado. Ora Yehova a bisa ku lo e no destruí Sodoma si tin “sinkuenta hende hustu den e stat,” Abraham gradualmente a redusí e kantidat te ora el a yega na dies so.—Génesis 18:22-33.

⁵ Yehova lo a skucha Abraham su súplikanan si nan no tabata na armonia ku su mes punto di bista? Klaru ku nò. Komo “amigu di  Dios,” Abraham aparentemente tabata konosé i kompartí Yehova su punto di bista. (Santiago 2:23) Ora Yehova a dirigí su atenshon na Sodoma i Gomora, e tabata dispuesto pa konsiderá Abraham su petishon. Dikon? Pasobra nos Tata selestial “no kier pa ningun hende bai pèrdí, ma pa tur bin na repentimentu.”

Jonas Su Punto di Bista di Hende —Un Kontraste Skèrpi

6. Kon e ninivitanan a reakshoná riba Jonas su proklamashon?

⁶ Awor laga nos konsiderá e di dos ehèmpel, esun di Jonas. Den e ehèmpel aki e stat marká pa destrukshon tabata Nínive. Profeta Jonas a haña e asignashon pa proklamá ku e maldat di e stat ei ‘a yega te dilanti Yehova.’ (Jonas 1:2) Huntu ku e área residensial na rant di e stat, Nínive tabata un stat grandi i “tabata tuma tres dia pa por a pasa dor di dje.” Ora ku porfin Jonas a obedesé Dios i a drenta Nínive, el a sigui deklará: “‘Aki kuarenta dia Nínive lo wòrdu destruí.’ E ora ei e hendenan di Nínive a kere den Dios, i nan a proklamá un yunamentu i a bisti paña-di-saku.” Asta e rei di Nínive a repentí.—Jonas 3:1-6.

7. Kiko Yehova a pensa di e echo ku e ninivitanan a repentí?

⁷ Esei tabata un kontraste bastante grandi kompará ku e reakshon di e hendenan di Sodoma! Kiko Yehova a pensa di e ninivitanan ku a repentí? Jonas 3:10 ta bisa: “Dios a repentí di e kalamidat ku el a deklará ku e lo trese riba nan. I e no a hasié.” Yehova “a repentí” den e sentido ku el a kambia su manera di trata ku e ninivitanan pasobra nan a kambia nan kaminda. E normanan di Dios no a kambia, pero Yehova a kambia su desishon ora el a mira ku e ninivitanan a repentí.—Malakias 3:6.

8. Dikon Jonas tabata disgustá?

⁸ Ora ku Jonas a realisá ku Yehova lo no destruí Nínive, el a mira e asuntu for di Yehova su punto di bista? Nò, pasobra Beibel ta bisa: “Ma esaki a disgustá Jonas mashá, i el a rabia.” Kiko mas Jonas a hasi? E relato ta bisa: “El a hasi orashon na SEÑOR i a bisa: ‘Pa fabor, SEÑOR, esaki no ta loke mi a bisa ora mi tabata na mi mes tera ainda? Ta p’esei mi kier a evitá esaki dor di hui bai Tarsis, pasobra mi tabata sa ku bo ta un Dios yen di grasia i kompashon, kende no ta rabia lihé i ta abundá den miserikòrdia, i kende ta repentí di kalamidat.’” (Jonas 4:1, 2) Jonas tabata sa di Yehova su kualidatnan. Sin embargo, na e momentu ei e profeta tabata disgustá i no tabatin e mesun punto di bista ku Dios tabatin di e habitantenan repentí di Nínive.

9, 10. (a) Ki lès Yehova a siña Jonas? (b) Dikon nos por asumí ku finalmente Jonas a bin aseptá e punto di bista ku Yehova tabatin di e ninivitanan?

⁹ Jonas a sali for di Nínive. El a traha un ramada i a sinta bou di su sombra “te ora ku e por a mira kiko lo a bai pasa den e stat.” Yehova a laga un mata krese pa Jonas haña sombra. Sin embargo, e siguiente dia e mata a marchitá. Ora Jonas a rabia pa motibu ku esei  a sosodé, Yehova a bis’é: “Bo tabatin duele di e mata . . . I ami no mester tene duele di Nínive, e stat grandi, kaminda tin mas ku shentibinti mil persona, ku no sa e diferensia entre nan man drechi i man robes, i tambe hopi bestia?” (Jonas 4:5-11) Esei tabata un bon lès pa Jonas tokante e punto di bista ku Yehova tin di hende!

¹⁰ Beibel no ta bisa kon Jonas a reakshoná riba loke Yehova a bis’é tokante sinti duele di e hendenan di Nínive. Sin embargo, ta evidente ku e profeta a ahustá su punto di bista di e ninivitanan ku a repentí. Nos ta saka e konklushon ei for di e echo ku Yehova a usa Jonas mes pa skirbi e relato inspirá aki.

Kua Punto di Bista Abo Tin?

11. Ki punto di bista Abraham probablemente lo tabatin di hende djawe?

¹¹ Awendia, nos ta enfrentá un otro destrukshon, esun di e mal sistema di kosnan aktual durante e gran dia di Yehova. (Lukas 17:26-30; Galationan 1:4; 2 Pedro 3:10) Ki punto di bista Abraham lo tabatin di hende ku ta biba riba e mundu aki ku pronto lo wòrdu destruí? Probablemente lo e ta interesá den esnan ku ainda no a tende e bon nobo òf ‘evangelio di e reino.’ (Mateo 24:14) Abraham bes tras bes a súplika Dios na fabor di hende den Sodoma ku kisas tabata hustu. Personalmente, nos ta preokupá pa hende ku podisé lo rechasá e kamindanan di e mundu aki ku ta bou di kontròl di Satanas si nan haña e oportunidat pa repentí i sirbi Dios?—1 Juan 5:19; Revelashon 18:2-4.

12. Dikon ta fásil pa desaroyá un aktitut manera di Jonas pa ku hende ku nos topa den sirbishi, i kiko nos por hasi tokante esei?

¹² Ta na su lugá pa deseá pa e fin di maldat bin. (Habakuk 1:2, 3) Sin embargo, ta masha fásil pa desaroyá un aktitut manera esun di Jonas, un aktitut di no ta interesá den e bienestar di hende ku kisas lo arepentí. Esaki por ta spesialmente e kaso ora nos ta topa hende ku ta indiferente òf ta oponé nos òf ta asta kla pa pleita ora nos bishitá nan pa duna nan e mensahe di Reino. Nos lo por pèrdè for di bista esnan ku Yehova ainda lo saka for di e mal sistema di kosnan aki. (Romanonan 2:4) Si nos eksaminá nos mes sinseramente, anto resultá ku nos tin maske ta un tiki di e aktitut ku Jonas tabatin originalmente pa ku e ninivitanan, nos por pidi yudansa den orashon pa nos adaptá nos punto di bista na armonia ku esun di Yehova.

13. Dikon nos por bisa ku Yehova ta interesá den hende djawe?

¹³ Yehova ta interesá den esnan ku ainda no  ta sirbié, i e ta skucha e petishonnan di su pueblo dediká. (Mateo 10:11) Por ehèmpel, lo e kontestá nan orashonnan dor di “hasi hustisia” pa nan. (Lukas 18:7, 8) Ademas, na su debido tempu Yehova lo kumpli ku tur su promesa- i propósitonan. (Habakuk 2:3) Esaki lo inkluí libra mundu di tur maldat, meskos ku el a hasi ora el a destruí Nínive despues ku su habitantenan a bolbe kai den maldat.—Nahum 3:5-7.

14. Kiko nos mester ta hasiendo miéntras nos ta warda riba e gran dia di Yehova?

¹⁴ Nos lo sigui warda ku pasenshi, i a la bes keda okupá hasiendo Dios su boluntat, te ora ku e mal sistema di kosnan aki ser eliminá durante e gran dia di Yehova? Nos no sa e detayenan tokante te na ki grado e trabou di prediká tin ku ser hasí ainda promé ku e dia di Yehova ta yega. Pero loke sí nos sa ta ku promé ku e fin bin e bon nobo di Reino lo ser prediká den henter e tera habitá te ora ku Dios ta satisfecho. I sin duda nos mester ta interesá den e “kosnan deseabel” ku ainda Yehova lo trese den su kas segun ku e ta sigui yen’é ku gloria.—Hageo 2:7, NW.

Nos Akshonnan Ta Revelá Kiko Nos Punto di Bista Ta

15. Kiko por yuda nos mira e balor di e trabou di prediká?

¹⁵ Kisas nos ta biba den un komunidat kaminda e trabou di prediká no ta masha gustá i nos no ta den un posishon pa muda bai kaminda tin mas nesesidat pa proklamadó di Reino. Suponé ku nos lo por haña dies hende den nos teritorio promé ku e fin yega. Nos ta sinti ku ta bale la pena pa buska nan? Hesus a “sinti kompashon” di e multitutnan “pasobra nan tabata kansá i plamá, manera karné sin wardadó.” (Mateo 9:36) Dor di studia Beibel i lesa ku atenshon e artíkulonan den E Toren di Vigilansia i Spièrta!, nos por bin komprondé e situashon difísil di e mundu aki mas mihó. Komo resultado, esaki por yuda nos pa nos ta mas konsiente di e balor di prediká e bon nobo. Ademas, ora nos ta apresiá e informashonnan bíbliko ku e “esklabo fiel i prudente” ta perkurá i ta hasi bon uso di nan, esei por yuda nos papia di un manera mas konvinsente den teritorionan trahá ku frekuensia.—Mateo 24:45-47; 2 Timoteo 3:14-17.

16. Kon nos por ta mas efikas den sirbishi?

¹⁶ Nos interes den esnan ku ainda por reakshoná faborabel riba e mensahe bíbliko ku ta salba bida ta motivá nos pa konsiderá ki ora ta mas apropiado pa aserká doñonan di kas den nos sirbishi i den ki maneranan nos por hasi esei. Hopi hende no ta na kas ora nos bishitá nan? Si esei ta e kaso, kisas nos por ta mas efikas den sirbishi dor di varia e ora- i lugánan di nos aktividat di prediká. Piskadó ta piska ora piská ta kome. Nos por hasi algu similar den nos trabou di piskamentu spiritual? (Marko 1:16-18) Pakiko bo no ta purba prediká anochi òf via telefon, kaminda esei ta legal? Algun publikadó a ripará ku riba parkeerplaats, parada di bùs, na pòmp di gasolin i tiendanan ta ‘lugánan di piska’ produktivo. Si nos tin un aktitut manera di Abraham pa ku hende esei lo ta bisto tambe ora nos ta probechá di oportunidatnan pa prediká informalmente.

17. Den ki maneranan nos por animá misioneronan i otro hende ku ta sirbi den otro pais?

¹⁷ Miónes di hende no a tende e mensahe di Reino ainda. Banda di nos predikashon, nos por mustra interes den hende asina asta sin sali for di kas? Wèl, nos konosé misioneronan òf predikadónan di tempu kompletu ku ta sirbi den otro pais? Si ta asina, kisas lo ta bon si nos por skirbi karta pa nan pa mustra nos apresio pa nan trabou. Kon esei ta demostrá interes pa hende en general? Nos kartanan di animashon i elogio por fortalesé e misioneronan pa keda den nan asignashon, i asina por yuda hopi hende mas pa haña konosementu di e bèrdat. (Huesnan 11:40) Tambe nos por resa pa e misioneronan i pa hende hambrá pa e bèrdat den otro  pais. (Efesionan 6:18-20) Un otro manera pa mustra interes ta dor di hasi donashon na e obra mundial di Testigunan di Yehova.—2 Korintionan 8:13, 14; 9:6, 7.

Abo Lo Por Muda?

18. Kiko algun kristian a hasi pa promové interesnan di Reino den e pais kaminda nan ta biba?

¹⁸ Esnan ku a bai biba na lugánan kaminda tin mas nesesidat di proklamadónan di Reino a wòrdu bendishoná pa e sakrifisio ku nan a hasi. Tin otro Testigu di Yehova ku a keda den nan mes pais, pero a siña un otro idioma pa nan por duna yudansa spiritual na imigrantenan. Tal esfuerso sin duda ta rekompensador. Por ehèmpel na aña 2001, shete Testigu ku ta yuda hende chines den un stat na Texas, Merka, a duna bonbiní na 114 hende ku a asistí na e Sena di Señor. Ta komo si fuera ku esnan ku ta yuda gruponan asina a haña nan kunukunan kla pa wòrdu kosechá.—Mateo 9:37, 38.

19. Kiko ta konsehabel pa hasi si bo tin pensá di muda bai un otro pais pa promové e trabou di prediká e Reino?

¹⁹ Kisas abo i bo famia ta sinti ku boso ta den un posishon pa muda bai un lugá kaminda tin mas nesesidat di proklamadó di Reino. Naturalmente, ta sabí pa promé boso “sinta kalkulá e gastunan.” (Lukas 14:28) Esaki ta spesialmente e kaso ora un hende tin pensá di muda bai un otro pais. Ta bon pa ken ku tin pensá di hasi esei puntra su mes e siguiente preguntanan: ‘Lo mi por kria mi famia? Lo mi por haña un visa apropiá? Mi por papia e idioma di e pais kaba òf mi ta dispuesto pa siñ’é? Mi a pensa kaba riba e klima i e kultura? Realmente lo mi por ta “un enkurashamentu” i no un karga pa e rumannan den e pais ei?’ (Kolosensenan 4:10, 11) Pa haña sa kuantu nesesidat tin den e pais kaminda bo tin pensá di bai, semper ta bon pa skirbi e ofisina di sukursal di Testigunan di Yehova ku ta supervisá e trabou di prediká den e área ei. *

20. Kon un hóben kristian a usa su vigor na benefisio di rumannan di otro pais?

²⁰ Un kristian hóben ku tabata enbolbí den konstrukshon di Salònnan di Reino na Hapon a haña sa ku tabatin un nesesidat pa trahadónan ábil pa konstruí un lugá di adorashon na Paraguay. Dor ku e tabata soltero i tabatin e vigor di hubentut, el a muda bai e pais ei i a traha pa ocho luna komo e úniko trahadó di tempu kompletu riba e proyekto. Durante su estadia einan, el a siña spañó i a dirigí studionan di Beibel. E por a mira ku e pais tabatin nesesidat di proklamadónan di Reino. Maske el a bai Hapon bèk, no a dura mashá ku el a regresá Paraguay i a yuda buska hende pa reuní den e mesun Salòn di Reino ei.

21. Kiko mester ta nos interes prinsipal i punto di bista segun ku nos ta warda riba e gran dia di Yehova?

²¹ Dios lo perkurá pa e trabou di prediká wòrdu hasi kabalmente, na armonia ku su boluntat. Awe, e ta pura òf aselerá e kosecha spiritual final. (Isaias 60:22) Pues segun ku nos ta spera riba e dia di Yehova, laga nos traha ku selo den e trabou di kosecha i laga nos mira hende manera Dios ta mira nan.

[Nota]

Bo Ta Kòrda?

• Segun ku nos ta spera e dia di Yehova, ki punto di bista nos mester tin di hende?

• Ki punto di bista Abraham tabatin di hende hustu ku lo por tabatin den Sodoma?

• Ki punto di bista Jonas tabatin di e ninivitanan ku a repentí?

• Kon nos por mustra ku nos tin e mesun punto di bista ku Yehova tin di hende ku ainda no a tende e bon nobo?

[Preguntanan di Estudio]

[Plachi na página 16]

Abraham a mira hende manera Yehova ta mira nan

[Plachi na página 17]

Jonas a siña mira e ninivitanan arepentí manera Yehova a mira nan

[Plachi na página 18]

Interes den hende ta motivá nos pa konsiderá varios ora i manera pa prediká e bon nobo