Nos Realmente Tin Mester di Otro Hende?

“ORA nos analisá nos bida i aktividatnan, nos ta ripará mesora ku kasi tur loke nos ta hasi i ta deseá ta enbolbé otro hende,” e famoso sientífiko Albert Einstein a deklará. El a agregá: “Nos ta kome kuminda ku otro hende a produsí, bisti paña ku otro hende a kose, biba den kas ku otro hende a traha. . . . E hende ta loke e ta, pero su balor no ta sinta den loke e ta komo persona individual, sino mas bien den e echo ku e ta miembro di un gran komunidat humano ku ta dirigí su bida den sentido material i spiritual for di su nasementu te na su morto.”

Den e mundu di animal, ta normal pa bo mira kompañerismo basá riba instinto. Olefantenan ta move huntu komo tou i nan ta kuida nan yunan ku masha atenshon. Leonnan hembra ta yag huntu i nan ta kompartí loke nan a kohe ku e machunan. Dòlfeinnan ta hunga huntu i asta a yega di protehá otro animal òf landadónan ku a haña nan ku problema.

Sin embargo serka hende, sosiólogonan a ripará un tendensia ku ta kousando mas i mas preokupashon. Segun un korant publiká na Mexico, algun sosiólogo ta di opinion ku “dékadanan di isolashon personal i e echo ku hende no ta biba mas komo un komunidat uní, a kousa un daño inmenso na sosiedat merikano.” E korant a deklará ku “bienestar di e nashon ta dependé di un kambio sosial radikal, ku ta enserá bai bèk n’e bida di komunidat.”

E problema aki ta komun spesialmente serka esnan ku ta biba den paisnan desaroyá. Einan hende tin e tendensia di isolá nan mes for di otronan. I e tendensia aki ta kresiendo rápidamente. Hende kier ‘biba nan bida’ i nan ta masha kontra pa otro hende ‘mete den nan bida.’ Ekspertonan ta bisa ku e aktitut aki a pone sosiedat humano bira mas vulnerabel pa problemanan emoshonal, depreshon i kasonan di suisidio.

Relashoná ku esaki Dr. Daniel Goleman a deklará: “Isolashon sosial—e pensamentu ku bo no tin niun otro hende ku ken bo por kompartí bo sintimentunan òf mantené un bon relashon kuné—ta pone ku un persona tin dos bes mas tantu chèns di bira malu òf muri.” Un informe publiká den e revista Science a yega n’e konklushon ku isolashon sosial ‘ta hunga un papel mes importante riba e sifranan di mortalidat ku e hábito di huma, preshon i kolesteròl haltu, obesidat i falta di ehersisio físiko.’

P’esei anto, pa vários motibu nos realmente tin mester di otro hende. Nos no por ta kompletamente independiente. Kon nos por solushoná e problema di isolashon anto? Kiko a duna bida di hopi hende berdadero propósito? E siguiente artíkulo lo trata e preguntanan ei.

[Plachi na página 3]

“Kasi tur loke nos ta hasi i ta deseá ta enbolbé otro hende.”—Albert Einstein