“Dos Hende A Bati na Porta”

“YA TA dos aña kaba ku nos a pasa den e gran tristesa di a pèrdè nos yu muhé chikitu.” Asina un karta habrí den e korant Le Progrès, publiká na Saint-Étienne, Fransia, ta bisa.

“Mélissa tabatin tres luna di edat i a sufri di un apnormalidat mental grave ku yama trisomy 18. Hamas bo ta rekuperá kompletamente di un tragedia asina, ku ta parse demasiado inhustu. Ounke nos a lanta den religion katóliko, nos ta puntra nos mes konstantemente: ‘Mi Dios, si bo ta eksistí, pakiko bo ta laga kosnan asina pasa?’” Ta bisto anto ku e mama ku a skirbi e karta ei a sinti su mes angustiá i impotente. Su karta ta sigui:

“Djis despues di loke a pasa, dos hende a bati na porta. Mi a rekonosé nan mesora komo Testigu di Yehova. Mi tabata kla pa kore ku nan na un manera fini ora ku mi a tuma nota di un foyeto ku nan tabata ofresiendo, tokante pakiko Dios ta permití sufrimentu. E ora ei mi a disidí di laga nan drenta ku e intenshon di proba nan ku nan ta robes. Mi a pensa ku ora ta trata di sufrimentu, mi famia sí a pasa den bastante i ku ya nos a tende sufisiente palabra di konsuelo sin sentido manera ‘Dios ta duna, Dios ta tuma.’ E Testigunan a keda mas ku un ora. Nan a skucha mi ku hopi kompashon, i ora nan tabata bayendo, mi a sinti mi hopi mas mihó te ku mi a bai di akuerdo pa nan bolbe bishitá mi. Esei tabata dos aña pasá. Mi no a bira Testigu di Yehova, pero mi a kuminsá studia Beibel ku nan, i ki ora ku mi por, mi ta bai nan reunionnan.”