Historia di Bida

Felis Ta Esun Kende Su Dios Ta Yehova

SEGUN E RELATO DI TOM DIDUR

Ya nan a hür e sentro di bario kaba i a ferwagt alrededor di 300 hende na e asamblea na Porcupine Plain, Saskatchewan, Canada. Sneu a kuminsá kai djarason, i ya pa djabièrnè e tempestat di sneu a pone ku bo no por a mira nada-nada. Temperatura a baha te na 40 grado Celsius bou di sero. Tabatin bintiocho hende presente, inkluso un par di mucha. Esaki tabata mi promé asamblea komo superintendente di sirkuito. Mi tabatin 25 aña i tabata nervioso. Promé ku mi konta bo kiko a pasa, laga mi splika kon mi a haña e privilegio spesial di sirbishi aki.

NOS ta ocho ruman hòmber, i ami ta esun di shete. Bill ta e mayó, despues ta bin Metro, John, Fred, Mike i Alex. Ami a nase na 1925, i Wally ta esun mas chikitu. Nos tabata biba serka di e pueblo Ukraina, Manitoba, kaminda mi mayornan Michael i Anna Didur, tabatin un kunuku chikitu. Papa tabata traha den mantenshon di spoorban. Nos a keda na kunuku ya ku e lugá kaminda Papa a keda no tabata adekuá pa lanta un famia grandi. Pa gran parti dje tempu Papa tabata for di kas, pues Mama tabata esun ku mester a lanta nos. Tempu-tempu, e tabata bai serka Papa pa mas o ménos un siman, pero el a perkurá di siña nos kushiná, hòrna kos i hasi trabou di kas. I dor ku nos tabata miembro di e Iglesia Katóliko Griego, for di chikitu Mama a siña nos memorisá orashon i hasi otro ritonan.

 Kontakto ku Bèrdat di Beibel

Mi anhelo pa komprondé Beibel a krese durante mi hubentut. Un bisiña Testigu di Yehova a bishitá nos famia regularmente pa lesa partinan di Beibel tokante e Reino di Dios, Armagedon i e speransa bunita di e mundu nobo. Mama no tabata niun tiki interesá den loke e tabata bisa, pero Mike i Alex sí a sinti nan atraé na e mensahe. Loke nan a siña a motivá nan pa rechasá sirbishi militar durante segundo guera mundial, ya ku esei a bai kontra nan konsenshi. Despues Mike a bai será pa un poko tempu anto nan a manda Alex kampo di trabou fòrsá na Ontario. Ku tempu Fred i Wally tambe a aseptá e bèrdat. Pero mi tres rumannan grandi sí nò. Pa añanan largu Mama a oponé e bèrdat pero despues el a sorprendé nos tur, ora el a disidí di sirbi Yehova. El a batisá ku 83 aña. Anto el a muri na edat di 96 aña. Promé ku Papa a muri e tambe tabatin un aktitut faborabel pa e bèrdat.

Ku 17 aña mi a bai Winnipeg pa buska trabou i pa asosiá ku esnan ku por a yuda mi studia Beibel. N’e tempu ei e trabou di Testigunan di Yehova tabata prohibí, pero nan tabata tene nan reunionnan regularmente. E promé reunion ku mi a bai tabata na un kas di famia. Dor ku mi a lanta den e religion katóliko griego, loke mi a tende einan a zona straño den mi orea. Pero tiki-tiki mi a bin komprondé dikon e diferensia ku ta eksistí entre klero i laiko no ta basá riba Beibel i dikon Dios no ta aprobá e echo ku klero ta bendishoná guera. (Isaias 2:4; Mateo 23:8-10; Romanonan 12:17, 18) Bida den Paradeis riba tera a parse mi muchu mas realístiko i rasonabel ku bai na un lugá leu ayá pa eternidat.

Konvensí ku esaki ta e bèrdat, mi a dediká mi mes na Yehova i a batisá na 1942 na Winnipeg. Pa aña 1943 e trabou di Testigunan di Yehova na Canada no tabata prohibí mas, i e predikashon a kuminsá progresá mas lihé. E bèrdat di Beibel tambe a kuminsá afektá mi kurason mas profundamente. Mi a haña e privilegio di sirbi komo sirbidó di kongregashon, partisipá den kampañanan di reunion públiko i tambe traha den teritorio ku no ta asigná. Kongresonan grandi na Merka ta loke a yuda mi masha hopi mes pa hasi progreso spiritual.

Ampliando Mi Sirbishi na Yehova

Na 1950 mi a bira pionero, i na desèmber di e aña ei mi a haña invitashon pa sirbi komo superintendente di sirkuito. Mi tabatin e privilegio di haña mi entrenamentu ofisial den bisindario di Toronto for di Charlie Hepworth, un ruman leal i ku eksperensia. Tambe mi tabatin e goso di pasa e último siman di mi entrenamentu huntu ku mi ruman Alex, kende ya kaba tabata den e trabou di sirkuito na Winnipeg.

Mi promé asamblea di sirkuito ku mi a menshoná na prinsipio, a keda grabá den mi mente. Manera bo mes por komprondé, mi tabata preokupá tokante kon kos lo a bai. Anyway, nos superintendente di distrito, Ruman Jack Nathan, a tene nos bon okupá i kontentu. Nos a resumí e programa di asamblea ku e partisipantenan ku tabata presente. Kada un di nos a haña turno pa konta eksperensia, mustra kon ta prediká di kas pa kas, hasi rebishita i kondusí studio di Beibel na kas. Tambe nos a kanta kantika di Reino i tabatin hopi kuminda. Kada dos ora asina nos a bebe kòfi i kome gebak. Algun ruman a drumi riba banki i riba plataforma, anto otronan a drumi riba flur. Pa djadumingu e tempestat a baha un poko, i nos tabatin un asistensia di 96 hende pa e diskurso públiko. E eksperensia aki a siña mi trata ku situashonnan difísil.

 Mi siguiente asignashon den e trabou di sirkuito tabata den nort di Alberta, British Columbia, i e Teritorio di Yukon kaminda solo no ta baha den zomer. Biaha riba e outopista malu Alaska Highway, ku ta kore di Dawson Creek, British Columbia, pa Whitehorse, Yukon (un distansia di 1.477 kilometer), i duna testimonio na kaminda a rekerí perseveransia i koutela. Un berdadero desafio tabata e avalanchanan, bahada- i subidanan di seru ku ta slep i bientu ku sneu ku ta stroba bo di wak.

Mi a keda asombrá di mira kon e bèrdat a kasi yega te na Polo Norte. Na un okashon, ami ku Walter Lewkowicz a yama na un kasita simpel serka di Lower Post, British Columbia, banda di Alaska Highway no muchu leu for di e frontera di Teritorio di Yukon. Nos tabata sa ku tin hende ta biba den e kasita pasobra nos por a mira un tiki lus ta sali for di un bentana chikitu. Tabata banda di nueb’or di anochi, i nos a bati na porta. Un stèm a bisa nos bin paden, pues nos a drenta. Nos a keda masha sorprendí di mira un hòmber bieu drumí riba su kama ariba ku abou lesando e revista Toren di Vigilansia! Pa kolmo su revista tabata mas nobo ku esun ku nos tabatin pa ofresé. El a splika nos ku el a haña di dje via pòst. Nos tabatin ocho dia sin bai nos kongregashon i p’esei nos no a haña revista nobo ainda. E hòmber a introdusí su mes komo Fred Berg, i maske e tabatin basta aña ta aboná kaba, esaki tabata e promé biaha ku el a haña bishita di Testigunan di Yehova. Fred a pone nos pasa anochi serka dje. Nos a haña oportunidat pa mustr’é vários bèrdat bíbliko i a hasi areglo pa otro Testigu ku ta pasa eibanda regularmente, bishit’é.

Pa algun aña mi a traha den tres sirkuito chikitu. Di Grande Prairie, Alberta, ku ta keda den ost, te Kodiak, Alaska, ku ta keda den wèst, un distansia di mas ku 3.500 kilometer.

Mi a bira hopi kontentu ora mi a deskubrí ku Yehova su bondat inmeresí ta pa tur hende, esta, pa esnan ku ta biba na lugánan aislá tambe, i ku Dios su spiritu ta motivá mente i kurason di hende ku ta dispuesto pa bida eterno. Un  di e hendenan ei ta Henry Lepine di Dawson City, Yukon, ku awor yama Dawson. Henry tabata biba den un área isolá. E tabatin mas ku 60 aña sin sali for di e zona kaminda nan ta mina oro. Maske nunka el a yega di bai un reunion di kongregashon, tòg Yehova su spiritu a motivá e hòmber aki di 84 aña pa biaha mas ku 1.600 kilometer i bai Anchorage pa un asamblea di sirkuito. E programa a emoshon’é masha hopi mes i el a disfrutá mashá di e asosiashon. Despues ku Henry a bai Dawson City bèk, el a keda fiel te na morto. Hopi hende ku tabata konosé Henry tabata puntra nan mes ta kiko a motivá e hòmber bieu aki pa hasi un biahe asina largu. E kuriosidat aki a pone ku algun hende bieu mas a aseptá e bèrdat. Pues indirektamente, Henry por a duna un ekselente testimonio.

Mi A Risibí e Bondat Inmeresí di Yehova

Na aña 1955 mi a keda masha kontentu ora mi a haña un invitashon pa asistí na e di 26 klas di Skol Bíbliko di Galaad di Watchtower. E entrenamentu aki a fortalesé mi fe i a yuda mi hala mas serka Yehova. Despues di mi graduashon, mi a haña e asignashon pa sigui den e trabou di sirkuito na Canada.

Mi a traha den e provinsia di Ontario pa mas o ménos un aña. Despues nan a asigná mi pa traha na Alaska atrobe, un pais impreshonante. Ainda mi por visualisá paisahenan bunita manera outopistanan ku a pasa kant’i lagonan limpi i briante i ta subi kadenanan di seru ku nan tòpnan tapá ku sneu. Den zomer, e vaye- i sabananan ta parse manera un tapeit kolorido di flornan di mondi masha bunita mes. E airu ta fresku i e awa ta puru. Ber, wòlf, èlk, karibú i otro bestianan salbahe libremente ta kana rònt den nan medio ambiente.

Tòg tin desafionan na Alaska; no solamente e klima ku ta kambia sino tambe e distansianan largu. Di ost pa wèst mi sirkuito tabata 3.200 kilometer largu. E tempu ei no tabatin areglo pa superintendente di sirkuito haña un outo. E rumannan lokal tabata ofresé nan mes pa hiba mi di un kongregashon pa e otro. Pero tin bes mi mester a para kant’i kaminda pa pidi trùk òf outo di turista left.

Esei a sosodé un biaha banda di un sekshon di Alaska Highway entre Tok Junction, Alaska, i Mile 1202, esta e área Scotty Creek. E ofisinanan di duana di e dos lugánan aki tabata mas o ménos 160 kilometer leu for di otro. Mi a pasa na e duana merikano na Tok i a haña un kabe’i boto pa un distansia di 50 kilometer. Despues di esei mi mester a pidi left atrobe, pero niun outo no tabata pasa, i mi mester a kana pa alrededor di dies ora, esta mas di 40 kilometer. Ta despues mi a bin haña sa ku ora mi a kaba di pasa e ofisina di duana, tur tráfiko ku tabata pasa riba e sekshon aki di e outopista mester a para pasobra no muchu leu for di e ofisina di duana na frontera tabatin un avalancha di sneu. Meianochi temperatura a baha te na 23 grado Celsius bou di sero, i ainda mi tabata un 80 kilometer leu for di un lugá kaminda mi por a skonde. Tabata sumamente importante pa mi haña un lugá pa deskansá.

Miéntras mi tabata kokochá, mi a mira un outo pará kant’i kaminda ku tabata tapá ku sneu. Mi a pensa ku si mi drenta i drumi riba  e asiento, lo mi por sobrebibí e anochi friu ei. Mi a logra kita basta sneu, anto habri e porta. Pa mi sorpresa e úniko kos ku mi por a mira den dje tabata e erante di heru. Felismente, no muchu leu djei mi a bin haña un kasita bashí. Ora mi a logra drenta paden i sende un kandela, mi por a deskansá pa algun ora. Mainta mi a haña un left pa bai na un lugá di hospedahe, kaminda mi a kome un tiki i por a kuida mi dedenan ku tabata tur kòrtá.

Yehova Ta Hasi e Obra Krese na Alaska

Mi promé bishita na Fairbanks tabata masha animador. Nos tabatin éksito den sirbishi, i mas o ménos 50 hende a asistí na e diskurso públiko e djadumingu ei. Nos a reuní den un kas di misionero chikitu kaminda Vernor i Lorraine Davis tabata biba. Esnan presente tabata saka nan kabes for kushina, kamber i gang pa tende e diskurso. Dor ku asina hopi hende a asistí, nos tabata sa ku un Salòn di Reino lo duna stabilidat na e trabou di prediká na Fairbanks. Pues ku Yehova su yudansa, nos a kumpra un edifisio grandi ku anteriormente tabata un sala di baile. Nos a hala e edifisio aki i a pon’é riba un tereno mas adekuá. Nan a bora un pos pa nan haña awa, a traha baño i a instalá verwarming. Den un aña, nan por a kuminsá usa e Salòn di Reino na Fairbanks. Despues ku nan a traha un kushina, nan a usa e salòn pa e kongreso di distrito na 1958 i 330 hende a asistí.

Durante zomer di 1960, mi a hasi un biahe largu ku outo pa bai e sede mundial di Testigunan di Yehova na New York, pa mi asistí na un kurso suplementario pa tur superintendente biahero na Merka i Canada. Ora mi tabata einan Ruman Nathan Knorr i otro rumannan den puesto di responsabilidat a hasi mi pregunta tokante e posibilidat pa habri un ofisina di sukursal na Alaska. Un par di luna despues, nos a keda kontentu di tende ku Alaska lo haña su propio ofisina di sukursal riba 1 di sèptèmber 1961. Ruman Andrew K. Wagner a keda enkargá ku supervishon di e sukursal. E ku su kasá Vera a traha 20 aña na Bètel di Brooklyn i tabatin eksperensia den e trabou di sirkuito tambe. Establesimentu di e ofisina di sukursal na Alaska a wòrdu apresiá mashá, pasobra el a redusí e kantidat di ora ku e superintendente di sirkuito mester a biaha i a yud’é konsentrá mas riba e nesesidatnan spesífiko di e kongregashonnan i teritorionan aislá.

E zomer di 1962 tabata un temporada dushi na Alaska. E sukursal di Alaska a wòrdu dediká, i tabatin un kongreso di distrito na Juneau. A konstruí Salònnan di Reino nobo na Juneau i Whitehorse, Yukon, i tambe a forma algun grupo aislá.

Bèk pa Canada

Pa vários aña kaba ami ku Margareta Petras di Canada tabata skirbi otro. Reta, ku ta su nòmber di kariño, a kuminsá traha pionero na 1947, a gradua na Galaad na 1955, i tabata traha pionero na ost Canada. Mi a pidié pa kasa, i el a aseptá. Nos a kasa na febrüari 1963 na Whitehorse. Pa hèrfst di e aña ei, mi a haña e asignashon pa traha den sirkuito den wèst Canada, i tabatin e goso di traha einan pa e siguiente 25 añanan.

Pa motibu di salú, nan a asigná nos na 1988 pa traha komo pionero spesial na Winnipeg, Manitoba. Esaki a inkluí kuida un Salòn di Asamblea pa sinku aña. Te na e grado posibel, ainda nos ta partisipá den e trabou gososo di hasi disipel. Den e trabou di sirkuito nos a kuminsá hopi studio di Beibel anto otro hende a sigui ku nan. Awor, mediante e bondat inmeresí di Yehova, nos ta kuminsá studionan di Beibel i nos ta mas felis ainda pasobra nos mes ta mira e studiantenan progresá te na dedikashon i boutismo.

Mi ta konvensí ku sirbi Yehova ta e mihó kos pa hasi den bida. E ta duna bo bida satisfakshon i nifikashon, i esaki ta pone nos stima Yehova kada dia mas. Esaki ta loke ta duna berdadero felisidat. Sin importá ki asignashon teokrátiko nos tin, òf na unda nos ta biba, nos ta di akuerdo ku loke e salmista a bisa: “Felis [ta] e pueblo ku nan Dios ta Señor!”—Salmo 144:15, BPK.

[Plachi na página 24, 25]

Den trabou di sirkuito

[Plachi na página 25]

Di bishita serka Henry Lepine na Dawson City. Ami ta na man robes

[Plachi na página 26]

Promé Salòn di Reino na Anchorage

[Plachi na página 26]

Ami ku Reta na 1998