Pregunta di Lektor

Yehova a permití poligamia entre e israelitanan, su sirbidónan di antigwedat, pero awendia e no ta permití esei mas. Akaso su norma por kambia?

Yehova no a kambia su punto di bista tokante poligamia. (Salmo 19:7; Malakias 3:6) Poligamia no tabata parti di Yehova su areglo pa hende na prinsipio, i aworakí tampoko. Ora el a krea Eva komo esposa pa Adam, Yehova a deklará ku e norma divino ta un esposa pa un esposo. “P’esei un hòmber lo bandoná su tata i su mama i lo uni ku su esposa. I nan lo bira ún karni.”—Génesis 2:24.

Ora Hesukristu tabata riba tera el a bolbe deklará e norma aki ora el a kontestá esnan ku a hasié pregunta tokante divorsiá i kasa di nobo. El a bisa: “Boso no a lesa ku Esun ku a krea hende for di prinsipio ‘a traha nan hòmber i muhé,’ i a bisa: ‘Pa e motibu aki un hòmber lo bandoná su tata i mama i lo uni ku su esposa; i nan dos lo bira ún karni’? Asina anto nan no ta dos mas, sino ún karni.” Hesus a agregá: “Ken ku divorsiá su esposa, si no ta pa motibu di inmoralidat seksual, i kasa ku otro muhé, ta kometé adulterio.” (Mateo 19:4-6, 9) For di e deklarashon aki ta bisto ku un hòmber ku tin mas ku un esposa tambe ta kometé adulterio.

Pakiko anto poligamia a ser permití den tempu di antigwedat? Kòrda ku no ta Yehova a inisiá e práktika aki. E promé persona ku Beibel ta menshoná ku tabatin mas ku un esposa ta Lamek, un desendiente di Kain. (Génesis 4:19-24) Ora ku Yehova a trese e Diluvio den tempu di Noe, tantu Noe komo su tres yu hòmbernan kada un tabatin solamente un esposa. Tur hende polígamo a ser destruí den e Diluvio.

Siglonan despues ora Yehova a skohe e israelitanan komo su pueblo, nan tabata praktiká poligamia kaba, ounke aparentemente tabata mas komun pa un hòmber tin solamente un esposa. Dios no a eksigí pa kibra famianan ku tabatin mas ku un esposa. En bes di esei, el a pone reglamentu estrikto p’e práktika ei.—Eksodo 21:10, 11; Deuteronomio 21:15-17.

Yehova a tolerá poligamia temporalmente. Nos por ripará esaki no solamente for di loke Hesus a bisa enkuanto Yehova su norma original pa matrimonio, sino tambe for di loke apòstel Pablo a skirbi bou di inspirashon di e spiritu santu di Dios. El a bisa: “Laga kada hòmber tin su mes esposa, i laga kada muhé tin su mes esposo.” (1 Korintionan 7:2) Tambe Pablo a ser inspirá pa skirbi ku tur hòmber kasá nombrá komo superintendente òf sirbidó ministerial den e kongregashon kristian mester ta “esposo di ún esposa.”—1 Timoteo 3:2, 12; Tito 1:6.

Pues, ora e kongregashon kristian a ser formá mas o ménos 2.000 aña pasá, Yehova no a tolerá poligamia mas. E tempu ei, e norma pa matrimonio a bolbe bira loke e tabata na prinsipio ora Dios a krea hòmber i muhé: un esposa pa un esposo. Esaki ta e norma ku e pueblo di Dios ta sigui awe rònt mundu.—Marko 10:11, 12; 1 Korintionan 6:9, 10.