Bo Ta Buska Yehova ku Empeño?

UN HÒMBER kristian tabata ansioso pa papia tokante e bon nobo di Beibel ku e pasaheronan den trein. (Marko 13:10) Pero miedu a paralis’é. El a stòp di purba? Nò, el a hasi orashon ferviente tokante e asuntu i a hasi su bèst pa haña mas maneranan pa kuminsá kòmbersashonnan. Yehova Dios a kontestá e orashon di e ruman aki i a dun’é forsa pa prediká.

Tal empeño ta masha importante ora nos ta buska Yehova i su aprobashon. Apòstel Pablo a bisa: “Esun ku ta akudí na Dios mester kere ku e ta eksistí i ku e ta bira e rekompensador di esnan ku ta busk’é ku empeño.” (Hebreonan 11:6, NW) Ta nesesario pa hasi mas ku djis buska Yehova superfisialmente. E verbo griego ‘buska ku empeño’ ta tradusí di tal manera ku e ta transmití intensidat i esfuerso vigoroso. Esaki ta enserá henter bo kurason, mente, alma i forsa di bida. Si nos ta buska Yehova ku empeño, nos lo no ta indiferente, indispuesto pa hasi esfuerso ni floho. Mas bien, nos lo mustra berdadero selo ora nos ta busk’é.—Echonan 15:17.

Personanan Ku A Buska Yehova ku Empeño

E Skritura tin masha hopi ehèmpel di personanan ku a hasi tur nan esfuerso pa buska Yehova. Jakòb tabata un di nan. El a lucha ku tur su forsa ku un angel di Dios ku a tuma kurpa di karni, te ora di dia a habri. Komo resultado, Jakòb a wòrdu yamá Israel (Esun ku a perseverá ku Dios) pasobra el a “lucha,” persistí òf perseverá ku Dios. E angel a bendishon’é pa su esfuerso vigoroso.—Génesis 32:24-30.

Tambe tin e ehèmpel di un señora di Galilea kende su nòmber no ta ser menshoná den Beibel. Pa 12 aña largu e tabatin un derame di sanger ku a pon’é “sufri mashá.” Eigenlijk, e no tabatin mag di mishi ku otro hende debí na su kondishon. Sin embargo, el a tuma un kurashi i a sali bai topa ku Hesus. El a sigui bisa den su mes: “Si mi djis mishi ku su paña, lo mi bira bon.” Purba visualisá kuantu esfuerso el a hasi p’e pasa entre ‘un multitut grandi ku tabata sigui [Hesus] i tabata push’é di tur banda.’ Asina ku el a mishi ku Hesus su paña, el a sinti ku “su derame di sanger a stòp,” esta, ku su malesa króniko a kura! Ora Hesus a puntra, “Ta ken a mishi ku mi paña?” e señora a spanta. Pero Hesus kariñosamente a bis’é: “Mi yu, bo fe a salba bo; bai na pas i sea kurá di bo aflikshon.” Su esfuersonan a wòrdu rekompensá.—Marko 5:24-34; Levítiko 15:25-27.

Un otro ehèmpel tabata di un señora di Fenisia. El a roga Hesus di kurason pa kura su yu  muhé. Hesus a kontestá ku no ta korekto pa duna kachó pan di e yunan. Loke e tabata kier men ta ku e no por a atendé nesesidatnan di esnan ku no ta israelita a kosto di e hudiunan meresedor. Maske e señora a komprondé su ilustrashon, tòg el a suplik’é: “Sí, Señor; ma asta e kachónan ta kome e garnachinan ku ta kai for di mesa di nan shon.” Su fe fuerte i sinseridat a konmové Hesus pa bisa: “O muhé, bo fe ta grandi; laga sosodé ku bo manera bo ta deseá.”—Mateo 15:22-28.

Kiko lo a pasa ku e personanan aki si nan no a sigui persistí? Nan lo a risibí e bendishonnan si nan a hala atras ora nan a haña nan promé opstákulo òf rechaso? Nò! E ehèmpelnan aki ta mustra bon kla loke Hesus kier a siña, esta ku “persistensia tribí” ta na su lugá i asta esensial, ora di buska Yehova.—Lukas 11:5-13, NW.

Na Armonia ku Su Boluntat

Papiando di e personanan ku a risibí kurashon milagroso den e relatonan ya menshoná, nos por bisa ku empeño no tabata e úniko rekisito pa nan haña kurashon. Nan petishonnan mester tabata na armonia ku e boluntat di Dios tambe. Hesus a haña poder pa hasi milager pa duna evidensia remarkabel ku e ta Yu di Dios, e Mesias primintí. (Juan 6:14; 9:33; Echonan 2:22) Ademas, e milagernan ku Hesus a hasi ta duna hende un idea di e gran bendishonnan terenal ku Yehova lo bai drama riba humanidat durante e Gobernashon di Mil Aña di Kristu.—Revelashon 21:4; 22:2.

No ta Dios su boluntat mas pa esnan ku ta praktiká e religion berdadero tin podernan milagroso, manera e abilidat di kura hende i papia den lenga. (1 Korintionan 13:8, 13) Su boluntat pa nos dia ta, entre otro, pa e bon nobo di e Reino wòrdu deklará den henter e tera pa ‘tur hende yega na konosementu di e bèrdat.’ (1 Timoteo 2:4; Mateo 24:14; 28:19, 20) Dios su sirbidónan por spera ku e ta tende nan orashonnan i aprobá e orashonnan aki si nan hasi esfuerso sinsero na armonia ku su boluntat.

Algun ruman kisas ta puntra nan mes: ‘Pakiko hasi esfuerso siendo ku di tur manera Dios su propósito lo kumpli?’ Maske ta bèrdat ku Yehova lo logra su propósito sin esfuerso di hende, e ta keda kontentu ora hende ta enbolbí den kumplimentu di su boluntat. Yehova por ser kompará ku un hòmber ku ta konstruí un kas. E konstruktor tin un mapa ku ta spesifiká ki material mester ser usá pa e proyekto, pero tòg e ta skohe material di konstrukshon ku tin disponibel lokalmente. Di igual manera, Yehova tin ku kumpli ku un proyekto awe i ta keda kontentu pa usa su sirbidónan, ku  ta ofresé nan mes boluntariamente.—Salmo 110:3; 1 Korintionan 9:16, 17.

Ban wak e eksperensia di un hóben ku yama Toshio. Ora el a bai skol sekundario, e kier a duna testimonio di un manera mas kabal posibel den su teritorio úniko. Tur ora bai e tabatin su Beibel na man i konsientemente el a hasi un esfuerso pa ta un kristian ehemplar. Na fin di e aña eskolar el a haña un oportunidat pa duna un spreekbeurt dilanti su klas. Toshio a pidi Yehova den orashon pa yud’é, i e tabata kontentu pa mira henter e klas skucha ku masha atenshon na su spreekbeurt titulá “Mi Meta pa Hasi e Trabou di Pionero un Karera.” El a splika ku e kier a bira un minister di tempu kompletu di Testigunan di Yehova. Un di e alumnonan a aseptá pa studia Beibel kuné i a progresá te na boutismo. Toshio su esfuerso vigoroso na armonia ku su orashonnan a wòrdu rekompensá rikamente.

Kuantu Esfuerso Abo Ta Hasi?

Tin masha hopi manera ku bo por mustra ku bo ta buska Yehova i su bendishonnan ku empeño. Na promé lugá tin kosnan básiko ku bo por hasi, manera prepará bon pa reunionnan kristian. Dor di duna komentarionan bon prepará, partinan motivador i demostrashonnan efikas, bo ta indiká ku kuantu empeño òf esfuerso bo ta buska Yehova. Tambe bo por mustra bo empeño dor di mehorá e kalidat di bo sirbishi. Pakiko bo no ta purba di ta mas amigabel ora bo ta papia ku un doño di kas i usa introdukshonnan efikas ku ta kuadra mas mihó ku bo teritorio? (Kolosensenan 3:23) Dor di ta kompletamente dediká, un hòmber kristian kisas por aseptá asignashonnan den kongregashon, manera sirbi komo un sirbidó ministerial òf ansiano. (1 Timoteo 3:1, 2, 12, 13) Dor di pone bo mes disponibel, lo bo por sinti e goso di duna. Kisas bo por apliká pa yuda ku un proyekto di konstrukshon di sukursal òf pa traha na un ofisina di sukursal di Testigunan di Yehova. Si bo ta un ruman hòmber soltero ku ta kualifiká, kisas lo bo kier asistí na e Skol di Entrenamentu Ministerial ku ta yuda hòmbernan spiritual pastoriá e tou bon. Si bo ta kasá, sirbishi di misionero lo por ta un manera pa mustra bo deseo ku empeño pa sirbi Yehova mas. Muda bai kaminda tin nesesidat pa mas predikadó di Reino kisas por ta algu pa bo.—1 Korintionan 16:9.

Loke ta mas importante ta bo aktitut ora bo ta kumpli ku un asignashon. Sea kual sea e responsabilidat ku bo haña, kumpli kuné ku empeño, ku tur bo forsa i ku “sinseridat  di kurason.” (Echonan 2:46; Romanonan 12:8) Ta bon pa bo mira kada asignashon ku bo haña komo un oportunidat pa demostrá bo empeño pa duna alabansa na Yehova. Pidi Yehova yudansa konstantemente den orashon, anto hasi bo esfuerso. E ora ei lo bo haña rekompensa na abundansia.

Esfuerso ku Empeño Ta Trese Rekompensa

Bo ta kòrda e hòmber kristian ku a resa p’e vense su temor di prediká n’e pasaheronan den trein? Yehova a bendishoná su deseo sinsero. E ruman aki a hasi esfuerso pa prepará introdukshonnan mas agradabel, dor di skohe diferente tópiko pa kuminsá kòmbersashon. E por a usa Beibel di un manera efikas pa papia ku un hòmber ku tabata preokupá tokante relashonnan tenso ku tin entre hende. Despues di vários rebishita riba trein, e hòmber a aseptá un studio di Beibel na kas. No tin duda ku Yehova a bendishon’é pa su esfuerso ku empeño!

Abo tambe por haña resultadonan similar si bo sigui buska Yehova ku empeño. Si bo perseverá humildemente i hinka henter bo alma den kualkier asignashon teokrátiko ku bo tin, Yehova lo usa bo na armonia ku su propósitonan i lo bo haña rekompensa na abundansia.

[Plachi na página 26]

Kiko lo a pasa ku e señora aki si e no a persistí?

[Plachi na página 27]

Bo ta persistí den roga Yehova pa su bendishon?

[Plachinan na página 28]

Kon bo por mustra ku bo ta buska Yehova ku empeño?