Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Den ki maneranan Ruth tabata un ehèmpel ekselente?

Ruth tabata un bon ehèmpel den su amor pa Yehova i su amor leal pa Noemí. Tambe e tabata humilde i diligente. Ku rason e pueblo a haña ku e tabata “un muhé ekselente.” (Ruth 3:11)—15/4, página 23-6.

• Kon nos por sa ku Yehova tin interes den hende komun i koriente?

El a bisa e israelitanan ku a haña un trato kruel na Egipto, pa no maltratá hende pober. (Eksodo 22:21-24) Hesus, kende a imitá su Tata, a mustra berdadero interes den hende komun i koriente, i el a skohe komo su apòstelnan ‘hòmbernan ku no tabata eduká ni siñá.’ (Echonan 4:13; Mateo 9:36) Nos por imitá Dios dor di mustra interes den, por ehèmpel, hóbennan.—15/4, página 28-31.

• Dikon nos por tin sigur ku Yehova ta ripará loke nos ta hasi?

Relatonan bíbliko ta mustra ku Yehova ta ripará hazañanan di hende. El a mira e sakrifisio ku Abel a ofresé, i ta mira nos ‘sakrifisionan di alabansa, esta, e fruta di lepnan.’ (Hebreonan 13:15, NW) Yehova tabata konsiente ku Enok a hasi esfuerso pa agrad’é dor di hiba un bida moralmente limpi. I Dios a ripará kon un biuda di Sarepta ku no tabata israelita, a parti e poko ku e tabatin ku profeta Elias. Yehova ta ripará nos obranan di fe tambe.—1/5, página 28-31.

• Pakiko nos por bisa ku despues di Pentekòste di aña 33 di nos era, hudiu ku a bira kristian mester a hasi un dedikashon personal na Dios?

Na 1513 promé ku nos era, e israelitanan di antigwedat a kuminsá un relashon den kua nan tabata dediká na Yehova. (Eksodo 19:3-8) Despues di esei, hudiunan a nase den e nashon dediká ei, bou di e pakto òf aliansa di Lei. Pero Yehova a kita e aliansa di Lei, mediante e morto di Kristu na aña 33 di nos era. (Kolosensenan 2:14) Anto despues, hudiunan ku kier a sirbi Dios na un manera aseptabel mester a hasi un dedikashon na dje i batisá den nòmber di Hesukristu.—15/5, página 30-1.

• Kimamentu di sensia ta parti di adorashon berdadero?

Den Israel di antigwedat, kimamentu di sensia tabata parti di adorashon berdadero. (Eksodo 30:37, 38; Levítiko 16:12, 13) Pero e aliansa di Lei, inkluso kimamentu di sensia, a terminá ora Kristu a muri. Kristiannan por disidí pa nan mes si nan kier kima sensia pa propósitonan ku no ta religioso, pero e no ta un parti di adorashon berdadero awe. Tambe nos mester tene kuenta ku sintimentu di otro hende pa nos no pone nan trompeká.—1/6, página 28-30.

• Kua notisia resien tokante un deskubrimentu a pone hopi hende presta mas atenshon na e echo ku Hesus a eksistí?

A duna masha publisidat na un kahita (osario) ku nan a haña na Israel. Ta parse ku e ta di promé siglo, i tin un inskripshon riba dje ku ta bisa: “Santiago, yu di Hosé, ruman di Hesus.” Algun hende ta bisa ku “fuera di Beibel, esaki ta e prueba arkeológiko mas antiguo” di Hesus su eksistensia.—15/6, página 3-4.

• Kon un hende ta siña stima?

Hende ta siña stima na promé lugá dor di e ehèmpel i edukashon di nan mayornan. Ora esposo i esposa ta stima otro i ta respetá otro, e yunan por siña stima. (Efesionan 5:28; Tito 2:4) Asta si un hende a lanta den un famia sin amor, e por siña stima dor di aseptá Yehova su guia amoroso, risibí yudansa di spiritu santu i benefisiá di e sosten kaluroso di e hermandat kristian.—1/7, página 4-7.

• Ken Eusebio tabata, i kiko nos por siña for di su bida?

Eusebio tabata un historiadó di antigwedat kende a terminá e obra literario di dies volúmen titulá Historia di e Iglesia Kristian na aña 324 di nos era. Maske el a kere ku e Tata a eksistí promé ku e Yu, Eusebio a aseptá un punto di bista diferente na e konsilio di Nisea. Aparentemente el a ignorá e rekisito di Hesus pa Su siguidónan ‘no ta parti di mundu.’ (Juan 17:16)—15/7, página 29-31.

• Yehova a kambia su punto di bista tokante poligamia?

Nò, Yehova no a kambia su punto di bista tokante poligamia. (Malakias 3:6) Dios su areglo pa e promé hòmber tabata p’e “uni ku su esposa” i bira ún karni. (Génesis 2:24) Hesus a bisa ku ken ku divorsiá si no ta pa motibu di fornikashon i kasa bèk, ta kometé adulterio. (Mateo 19:4-6, 9) Ora e kongregashon kristian a ser formá, Yehova no a tolerá poligamia mas.—1/8, página 28.