Kon Algun Persona Ta Wòrdu Rekordá

RÒNT di 3 mil aña pasá, David tabata huyendo for di Rei Saul di Israel. David a manda pidi e hòmber riku Nabal, un kriadó di karné i kabritu, kuminda ku awa. Eigenlijk, Nabal tabata debe David i su siguidónan un fabor pasobra nan a protehá Nabal su bestianan. Sin embargo, Nabal a nenga di mustra hospitalidat. Asta el a zundra e hòmbernan di David. Nabal tabata hunga ku kandela, pasobra David no a laga hende probechá di dje asina-asina.—1 Samuel 25:5, 8, 10, 11, 14.

Nabal su aktitut no tabata na armonia ku e tradishon di Medio Oriente di mustra hospitalidat na bishitante i stranhero. P’esei, ki reputashon Nabal a haña? E relato di Beibel ta bisa ku e “tabata brutu i di mala fe” i “pèrvèrso.” Su nòmber ta nifiká “banidat,” i e sigur a manifestá e kualidatnan ei. (1 Samuel 25:3, 17, 25) Abo lo kier wòrdu rekordá asina? Bo ta un persona brutu i infleksibel ora di trata otro hende, foral ora ku aparentemente nan tin sierto desbentaha? Bo ta amabel, hospitalario i kompasivo?

Abigail Tabata un Muhé Huisioso

Nabal a haña su mes den problema serio pa motibu di su mal aktitut, ya ku David huntu ku 400 di su hòmbernan a kohe nan spada i sali pa bai regla kuenta kuné. Abigail, esposa di Nabal a tende loke a pasa. E tabata sa ku un konfrontashon tabata inevitabel. Kiko e por a hasi? El a kore prepará sufisiente kuminda i bai pa stroba David i su hòmbernan di kumpli ku nan plan. Ora el a topa nan, el a roga David pa no drama sanger inosente. Esei a suavisá David su kurason. David a skucha Abigail su súplikanan i a kambia di idea. Djis despues di e insidentenan aki, Nabal a muri. E ora ei David, rekonosiendo Abigail su bon kualidatnan, a tum’é komo esposa.—1 Samuel 25:14-42.

Ki klase di reputashon Abigail a establesé pa su mes? Beibel ta bisa ku e tabata un muhé “inteligente.” Ta opvio ku e tabata huisioso, kapas pa hasi kosnan na un manera práktiko, i tabata sa kon i ki ora pa tuma inisiativa. El a aktua ku lealtat pa protehá su esposo bobo i su famia for di desaster. Ku tempu Abigail a muri, pero ku un reputashon sobresaliente komo un muhé huisioso.—1 Samuel 25:3.

Ki Registro Pedro A Laga Atras?

Laga nos avansá den tempu te n’e promé siglo di nos era i wak e kaso di e 12 apòstelnan di Hesus. Sin duda un di esnan mas ekspresivo i impulsivo tabata Pedro, òf Séfas, un  eks-piskadó di Galilea. Aparentemente e tabata un persona dinámiko ku no tabatin miedu di ekspresá su sintimentunan. Por ehèmpel, na un okashon Hesus a laba pia di su disipelnan. Kon Pedro a reakshoná ora el a yega na bùrt?

Pedro a bisa Hesus: “Señor, abo ta laba mi pia?” Hesus a kontest’é: “Loke mi ta hasi bo no ta komprondé awor, ma despues lo bo komprondé.” Pedro a kontestá Hesus: “Hamas lo bo no laba mi pia!” Ripará Pedro su reakshon enfátiko pero impulsivo. Kon Hesus a respondé?

E di: “Si mi no laba bo, bo no tin parti ku mi.” Simon Pedro a bis’é: “Señor, no mi pianan so, ma tambe mi mannan i mi kabes!” Awor Pedro a bai n’e otro ekstremo! Pero semper bo tabata sa kiko bo tin na Pedro. No tabatin nada di astusia òf engaño.—Juan 13:6-9.

Pedro ta wòrdu rekordá tambe pa su debilidatnan humano. Por ehèmpel, el a nenga Kristu tres bes dilanti hende ku a akus’é di ta un dje siguidónan di e Hesus kondená di Nazarèt. Ora Pedro a realisá su eror, el a yora amargamente. E no tabatin miedu di ekspresá su duele i tristesa. Ta notabel tambe ku probablemente ta e mes a informá e eskritornan di Evangelio kon el a nenga Hesus! E tabata sufisiente humilde pa atmití su fayonan. Abo tin e mesun humildat ei?—Mateo 26:69-75; Marko 14:66-72; Lukas 22:54-62; Juan 18:15-18, 25-27.

Un par di siman despues ku Pedro a nenga Kristu, spiritu santu a impuls’é p’e prediká ku kurashi na un multitut di hudiu na  Pentekòste. Esaki tabata un indikashon bon kla ku e Hesus resusitá tabatin konfiansa den dje.—Echonan 2:14-21.

Na un otro okashon, Pedro a kai den un trampa distinto. Apòstel Pablo a splika ku promé ku algun ruman hudiu a yega Antiokia, Pedro a asosiá libremente ku e kreyentenan dje nashonnan. Sin embargo, el a separá su mes for di esakinan “pa miedu di esnan ku tabata di sirkumsishon” ku a kaba di yega for di Yerusalèm. Pablo a mustra abiertamente ku Pedro a trata hende ku dos kara.—Galationan 2:11-14.

Tòg, ta kua dje disipelnan a papia ku kurashi na un momentu krusial ora ku aparentemente hopi dje disipelnan di Hesus tabata kla pa bandon’é? Tabata n’e okashon ku Hesus a revelá algu nobo relashoná ku e nifikashon di komementu di su karni i bebementu di su sanger. El a bisa: “Si boso no kome e karni di e Yu di hende i bebe su sanger, boso no tin bida den boso.” Mayoria di Hesus su disipelnan a trompeká i bisa: “E diskurso aki ta ofensivo; ken por skuch’é?” [NW] Kiko a sosodé despues? “Komo resultado di esaki hopi di su disipelnan a retirá i no tabata kana kuné mas.”—Juan 6:50-66.

N’e momentu krusial aki, Hesus a bira wak e 12 apòstelnan i hasi nan un pregunta mashá al kaso: “Boso tambe kier bai anto?” Pedro a kontestá: “Señor, serka ken nos lo bai? Abo tin e palabranan di bida eterno. I nos a kere i a haña sa ku abo ta Esun Santu di Dios.”—Juan 6:67-69.

Ki klase di reputashon Pedro a establesé? Ora bo lesa e relatonan tokante dje, bo no por keda sin ser impreshoná pa su onestidat, su frankesa, su lealtat i e echo ku e tabata dispuesto pa rekonosé su mes debilidatnan. El a traha un hopi bon nòmber!

Kiko Hende A Kòrda di Hesus?

Hesus su ministerio riba tera a dura apénas tres aña i mei. Apesar di esei, kon su siguidónan ta rekord’é? E tabata un persona seku i inaserkabel debí ku tabata perfekto i sin piká? El a usa su outoridat na un manera kuestionabel dor ku e tabata sa ku e ta e Yu di Dios? El a intimidá su siguidónan i obligá nan obedes’é? El a tuma su mes asina na serio te ku e no tabatin sentido di humor? E tabata asina okupá te ku e no tabatin tempu pa hende débil, enfermo òf pa mucha? El a menospresiá hende di otro rasa i hende muhé, manera hende hòmber tabatin kustumber di hasi e tempu ei? Kiko historia ta siña nos?

Hesus tabatin interes den hende. Un estudio di su ministerio ta revelá ku na hopi okashon el a kura hende lam i malu. El a usa su energia pa yuda hende den nesesidat. El a mustra interes den mucha, ora el a instruí su disipelnan: “Laga e muchanan bin serka mi; no stroba nan.” Anto Hesus “a tuma nan den su brasa i a bendishoná nan, poniendo su mannan riba nan.” Abo ta saka tempu pa mucha, òf bo ta muchu okupá asta pa tuma nota di nan presensia?—Marko 10:13-16; Mateo 19:13-15.

Tempu Hesus tabata riba tera, reglanan religioso ku a bai mas ayá ku e rekisitonan di e Lei a forma un karga p’e pueblo hudiu. Nan lidernan religioso a oprimí hende ku karga pisá ku nan mes no kier a move ni ku un dede. (Mateo 23:4; Lukas 11:46) P’esei Hesus tabata un kontraste grandi! El a bisa: “Bin serka mi tur ku ta kansá i kargá, i lo mi duna boso sosiegu [“refreskamentu,” NW].”—Mateo 11:28-30.

Hende a sinti nan refreská ora nan tabata den kompania di Hesus. E no a intimidá su disipelnan i duna nan miedu di ekspresá nan mes. De echo, el a hasi pregunta pa animá nan pa duna nan opinion. (Marko 8:27-29) Superintendentenan kristian mester puntra nan mes: ‘Ami ta kousa e mesun impreshon riba mi rumannan spiritual? Otro ansianonan  ta ègt bisa mi loke nan ta pensa, òf nan ta duda pa duna nan opinion?’ Ki refreskante ta ora ansianonan ta aserkabel, ta skucha otro i ta keda fleksibel! En kambio, personanan irasonabel ta desanimá ekspreshon franko i liber.

Ounke Hesus tabata e Yu di Dios, nunka el a malusá su poder òf outoridat. Mas bien, el a rasoná ku su oyentenan. Esei tabata e kaso ora e fariseonan a purba koh’é den trampa ku e pregunta astuto: “Lei ta permití pa paga belasting na Cesar, sí òf nò?” Hesus a pidi nan mustr’é un moneda i a puntra nan: “Ta ken su imágen i inskripshon esaki ta?” Nan a kontestá: “Di Cesar.” E ora ei el a bisa nan: “Anto duna Cesar loke ta di Cesar, i Dios loke ta di Dios.” (Mateo 22:15-21) Un kontesta simpel i lógiko tabata sufisiente.

Hesus tabatin sentido di humor? Kisas algun lektor ta sinti un toke di humor ora nan topa e pasashi kaminda Hesus a bisa ku tabata mas fásil pa un kamel pasa dor di wowo di angua ku pa un hòmber riku drenta e Reino di Dios. (Mateo 19:23, 24) E idea so di un kamel ku ta purba pasa dor di un angua di kose literal ta algu eksagerá. Otro ehèmpel di tal eksagerashon ta esun di mira e stòf den wowo di bo ruman sin ripará e balki den bo mes wowo. (Lukas 6:41, 42) Nò, Hesus no a duna disiplina na un manera rígido. E tabata un persona kariñoso i amigabel. Ta bon pa kristiannan djawe tambe tin un sentido di humor. Esei por lanta e ánimo den tempu di ansiedat.

Hesus Su Kompashon pa Hende Muhé

Kon hende muhé a sinti nan den presensia di Hesus? En bèrdat tabatin hopi hende muhé ku a siguié fielmente. Su mama Maria mes tabata un di nan. (Lukas 8:1-3; 23:55, 56; 24:9, 10) Hende muhé a sinti nan asina liber pa aserká Hesus te ku na un okashon un muhé ku tabata konosí komo “un pekadó” a laba su pianan ku su lágrimanan i a hunta nan ku zeta perfumá. (Lukas 7:37, 38) Un otro hende muhé ku a sufri di un derame di sanger pa hopi aña a pusha bai dilanti den un multitut pa mishi ku Hesus su paña pa asina e por a kura. Hesus a elogi’é pa su fe. (Mateo 9:20-22) Sí, pa hende muhé, Hesus tabata aserkabel.

Na un otro okashon, Hesus a papia ku un muhé samaritano na un pos. E muhé a keda asina sorprendí ku el a bisa: “Kon por ta ku abo, siendo un hudiu, ta pidi ami, un muhé samaritano, pa duna bo di bebe?” Hudiu no tabata parti un pan ku samaritano, pero Hesus sí a sigui papia kuné i a siñ’é un bèrdat maravioso tokante e “awa ku ta brota pa bida  eterno.” El a sinti su mes kómodo den kompania di hende muhé, sin pensa ku e tabata hasi algu kuestionabel.—Juan 4:7-15.

Hesus ta ser rekordá pa su hopi kualidatnan di bondat, manera su spiritu di sakrifisio propio. E tabata e ehèmpel perfekto di e amor di Dios. Hesus ta pone e modelo pa tur hende ku kier bira su siguidó. Abo ta sigui su ehèmpel estrechamente?—1 Korintionan 13:4-8; 1 Pedro 2:21.

Kon e Kristiannan Djawe Ta Ser Rekordá?

Den e tempu aktual, míles di kristian fiel a muri, hopi den nan behes, otronan relativamente yòn. Pero nan a laga un bon reputashon atras. Algun, manera Crystal, kende a muri den su behes, ta ser rekordá pa nan amor i karakter agradabel pa anda kuné. Otronan, manera Dirk, kende a muri ora e tabatin 40 i piku aña, ta ser rekordá pa nan karakter alegre i bon spiritu di koperashon.

Tuma tambe por ehèmpel e kaso di José di Spaña. Den añanan 60, tempu ku e obra di prediká di Testigunan di Yehova tabata bou di prohibishon den e pais ei, José tabata kasá i tabatin tres yu muhé. E tabatin un bon trabou na Barcelona. Pero e tempu ei tabatin mester di ansianonan kristian maduro den zùit di Spaña. José a laga su bon trabou i a muda bai Málaga huntu ku su famia. Nan a haña nan den situashon ekonómiko difísil i hopi bes sin trabou.

No opstante esei, José tabata un hòmber konfiabel. Tambe e tabata konosí pa su ehèmpel fiel den sirbishi i p’e manera ehemplar ku el a lanta su yunan, lokual el a logra ku yudansa i koperashon di su kasá, Carmela. Ora tabatin mester di hende pa organisá kongresonan kristian den e region, semper José a pone su mes disponibel. Lamentablemente, tempu ku e tabatin 50 i piku aña, un malesa serio a kousa su morto. Pero el a laga atras e reputashon di ta un ansiano konfiabel i trahadó, i un esposo i tata amoroso.

Pues kon abo lo wòrdu rekordá? Si bo a muri ayera, kiko hende lo bisa di bo awe? Esei ta un pregunta ku lo por motivá nos tur pa mehorá den loke nos ta hasi.

Kiko nos por hasi pa establesé un bon reputashon? Semper nos por mehorá den manifestá e fruta di spiritu, manera amor, gran pasenshi, bondat, suavedat i dominio propio. (Galationan 5:22, 23) Sí, definitivamente, “un bon nòmber ta mihó ku un bon ungwento, i e dia di un hende su morto ta mihó ku e dia di su nasementu.”—Eklesiastés 7:1; Mateo 7:12.

[Plachi na página 5]

Abigail ta ser rekordá komo un muhé huisioso

[Plachi na página 7]

Pedro ta ser rekordá komo un hòmber impulsivo pero onesto

[Plachi na página 8]

Hesus a saka tempu pa mucha