Nos Lo Kana den e Nòmber di Yehova pa Semper!

“Nos . . . lo kana den e nòmber di SEÑOR nos Dios pa semper i semper.”—MIKEAS 4:5.

1. Ki mensahe Mikeas kapítulo 3 pa 5 ta kontené?

YEHOVA tin algu di bisa su pueblo, i e ta usa Mikeas komo su profeta. Dios su propósito ta pa tuma akshon kontra hasidónan di maldat. E ta bai kastigá Israel pa su apostasia. No opstante, felismente, Yehova ta bai bendishoná hende ku ta kana den su nòmber. E mensahenan aki ta bini bon kla padilanti den kapítulo 3 pa 5 di e profesia di Mikeas.

2, 3. (a) Ki kualidat e lidernan di Israel mester desplegá, pero en realidat kiko nan ta hasiendo? (b) Kon lo bo splika e idioma simbóliko na Mikeas 3:2 i 3?

² E profeta di Dios ta deklará: “Tende awor, kabesantenan di Jakòb i gobernantenan di e kas di Israel. Boso no mester konosé hustisia?” Sí, nan mester a okupá nan mes ku hustisia. Pero, ta kiko nan ta hasiendo en bes di esei? Mikeas ta bisa: “Boso ku ta odia bondat i ta stima maldat, ku ta ranka e kueru di mi pueblo kita for di nan kurpa i e karni for di nan wesunan, i ku ta kome e karni di mi pueblo, ku ta ranka nan kueru kita for di nan kurpa, ku ta kibra nan wesunan, i ku ta kap nan na pida-pida manera karni pa bai wea, i manera karni den wea.”—Mikeas 3:1-3.

³ Figurá bo, ta nèt e lidernan ta oprimí hende pober i indefenso! Ta fásil pa kualkier hende ku tende Mikeas komprondé e idioma simbóliko ku el a usa aki. Ora di kushiná un karné ku nan a mata, promé nan tabata kita su kueru, i despues kap e na pida-pida. Tin bes nan tabata kibra e wesunan pa laga e tuti di wesu sali. Nan tabata kushiná e karni huntu ku e wesunan den un wea grandi, manera esun ku Mikeas a menshoná. (Ezekiel 24:3-5, 10) Ta un bon ilustrashon pa deskribí e abusu ku e pueblo den e tempu di Mikeas mester a wanta na man di nan lidernan malbado!

Yehova Ta Spera di Nos pa Nos Praktiká Hustisia

4. Ki kontraste tin entre Yehova i e lidernan di Israel?

⁴ Tin un kontraste grandi entre Yehova, e Wardadó amoroso, i e lidernan di Israel. Dor ku nan no ta praktiká hustisia, nan no ta kumpliendo ku e enkargo ku nan a haña pa protehá e tou. En bes di esei, manera Mikeas 3:10 ta bisa, nan ta probechá egoistamente di e karnénan simbóliko. Nan no ta trata nan ku hustisia i ta someté nan na “dramamentu di sanger.” Kiko nos por siña for di e situashon aki?

5. Kiko Yehova ta spera di esnan ku ta hiba delantera den su pueblo?

⁵ Dios ta spera di esnan ku ta hiba delantera den su pueblo pa nan aktua ku hustisia. I esei ta loke nos ta mira sosodé den Yehova su sirbidónan awe. Esaki ta kuadra tambe ku Isaías 32:1, kaminda nos ta lesa: “Mira, un rei lo reina ku hustisia, i prensnan lo goberná ku huisio.” Pero kiko nos ta haña den tempu di Mikeas? E lidernan “ku ta odia bondat i ta stima maldat” ta blo korumpí hustisia.

Ken Su Orashonnan Ta Ser Kontestá?

6, 7. Ki punto importante Mikeas 3:4 ta enfatisá?

⁶ E malbadonan ku a biba den tempu di Mikeas por ferwagt di haña Yehova su aprobashon?  Klaru ku nò! Mikeas 3:4 ta deklará: “Nan lo sklama na SEÑOR, ma e lo no kontestá nan. Al kontrario, e lo skonde su kara pa nan e tempu ei, pasobra nan echonan tabata malu.” Esaki ta enfatisá un punto hopi importante.

⁷ Yehova lo no kontestá nos orashonnan si nos ta praktiká piká. Esaki ta e kaso sigur si nos ta hiba un bida dòbel, esta, skonde nos maldat anto pretendé di ta sirbi Dios fielmente. Na Salmo 26:4 David a kanta: “Mi no ta sinta huntu ku hòmbernan gañadó, tampoko lo mi no anda ku hipókritanan.” Si David mes no a anda ku hende hipókrita, Yehova sigur lo no kontestá orashon di hende ku ta desobedesé su Palabra deliberadamente!

Ku Poder di e Spiritu di Dios

8. Ki spièrtamentu e profetanan falsu di Mikeas su tempu a haña?

⁸ Práktikanan deplorabel a para bira normal p’e lidernan spiritual di Israel! Profeta falsu ta pone e pueblo di Dios dual den sentido spiritual. E lidernan haragan pa kos ta grita “Pas!,” pero en realidat nan ta deklará guera santu kontra esnan ku no ta pone nada den nan boka. “P’esei,” Yehova ta bisa, “lo ta nochi pa boso—sin vishon, i skuridat pa boso—sin adivinashon. Solo lo drenta ofer di e profetanan, i dia lo bira skur ofer di nan. E miradónan lo keda na bèrgwensa, i e adivinadónan lo keda brongosá. Di bèrdat, nan tur lo tapa nan boka.”—Mikeas 3:5-7a.

9, 10. Kiko ta nifiká ‘tapa boka,’ i pakiko Mikeas sí no tin nodi hasi esei?

⁹ Pakiko e hendenan malbado den tempu di Mikeas tin ku “tapa nan boka”? Pa motibu di bèrgwensa. I e malbadonan ei mester tin bèrgwensa bèrdè. “No ta bin kontesta for di Dios” pa nan. (Mikeas 3:7b) Yehova no ta presta atenshon na orashon di hende orguyoso i malbado.

¹⁰ Mikeas sí no tin motibu pa ‘tapa su boka.’ E no ta sinti bèrgwensa. Yehova ta kontestá su orashonnan. Wak kiko e profeta fiel ta bisa na Mikeas 3:8: “Ma al kontrario, ami ta yen di poder—ku e spiritu di SEÑOR—i ku hustisia i kurashi.” Mikeas ta mashá gradisidu ku durante henter su ministerio largu i fiel, semper e tabata “yen di poder—ku e spiritu” di Yehova! Esei a dun’é forsa pa “hasi Jakòb konosé su echo di rebeldia, i Israel su piká.”

11. Kon hende ta haña forsa pa deklará e mensahenan di Dios?

¹¹ Forsa humano so no ta sufisiente pa Mikeas proklamá Dios su mensahe di kondenashon. Tambe e tin mester di Yehova su spiritu, òf forsa aktivo poderoso. Kiko di nos? E úniko manera ku nos por kumpli ku nos enkargo pa prediká ta si Yehova fortalesé nos pa medio di su spiritu santu. Si nos praktiká piká deliberadamente, nos esfuersonan pa prediká lo frakasá sigur. Dios lo no kontestá nos ora nos resa pidié forsa pa kumpli ku su trabou. Si e ‘spiritu di Yehova’ no ta riba nos, definitivamente nos lo no por deklará e mensahenan di huisio di nos Tata selestial. Meskos ku Mikeas, nos por papia e palabra di Dios ku kurashi dor ku Yehova ta skucha nos orashonnan i nos tin e yudansa di spiritu santu.

12. Pakiko e promé disipelnan di Hesus por a ‘papia e palabra di Dios ku tur kurashi’?

 ¹² Kisas bo ta kòrda e relato ku tin na Echonan 4:23-31. Imaginá ku abo ta un di e disipelnan di Hesus den promé siglo. Persiguidónan fanátiko tin algun tempu kaba ta silensiá e siguidónan di Kristu. Pero e sirbidónan leal aki ta resa pidi nan Señor Soberano: “[Yehova], tuma nota di nan menasanan i laga bo sirbidónan papia bo palabra ku tur frankesa [“kurashi,” NW].” Kiko ta e resultado? Ora nan hasi nan súplika, e lugá kaminda nan a bin huntu ta wòrdu sagudí, i nan tur ta wòrdu yená ku spiritu santu i ta kuminsá papia e palabra di Dios ku kurashi. P’esei, laga nos aserká Yehova den orashon i dependé riba su yudansa pa medio di spiritu santu segun ku nos ta kumpli ku nos ministerio.

13. Kiko lo sosodé ku Yerusalèm i Samaria, i pakiko?

¹³ Pensa atrobe riba Mikeas su tempu. Segun Mikeas 3:9-12, e lidernan kulpabel di dramamentu di sanger ta pronunsiá huisio pa plaka pasá bou di mesa, e saserdotenan ta eksigí pago pa nan instruí, i e profetanan falsu ta mira destino pa plaka. Nada straño anto ku Dios a dekretá ku e kapital di Huda, esta, Yerusalèm, “lo bira un monton di ruina”! Adorashon falsu i korupshon moral ta reina na Israel tambe, p’esei Dios ta inspirá Mikeas pa e spièrta nan ku Dios ta bai hasi Samaria “un monton di ruina.” (Mikeas 1:6) De echo, Mikeas ta biba pa mira kumplimentu di e profesia tokante e destrukshon di Samaria na man dje trupanan di Asiria, na aña 740 promé  ku nos era. (2 Reinan 17:5, 6; 25:1-21) Ta bisto ku ta ku e poder di Yehova so Mikeas por a entregá e mensahenan poderoso aki kontra Yerusalèm i Samaria.

14. Kon e profesia di Mikeas 3:12 a kumpli, i ki efekto esei mester tin riba nos?

¹⁴ Definitivamente Huda no por skapa e kondenashon di Yehova. E profesia registrá na Mikeas 3:12 ta bisa ku Síon lo “wòrdu geplug manera un kunuku.” Nos ku ta biba den siglo 21 tin e bentaha di por wak bèk den historia i mira ku e kosnan aki a tuma lugá ora e babilonionan a destruí Huda i Yerúsalèm na aña 607 promé ku nos era. Esei a tuma lugá hopi aña despues ku Mikeas a profetisá tokante dje, pero e tabatin sigur ku e destrukshon tabata na kaminda. Sin duda nos tambe mester tin e mesun konfiansa ku e sistema di kosnan di e mundu malbado djawe lo kaba na nada ora e “dia” profetisá di Yehova yega.—2 Pedro 3:11, 12.

Yehova Ta Rektifiká Asuntunan

15. Kon lo bo deskribí e profesia registrá na Mikeas 4:1-4 den bo mes palabranan?

¹⁵ Ora nos sigui lesa, nos ta mira kon Mikeas ta transmití un mensahe di speransa hopi emoshonante. E palabranan ku nos por lesa na Mikeas 4:1-4 ta masha animante! Un parti di dje ta bisa: “Lo sosodé den e último dianan ku e seru di e kas di SEÑOR lo wòrdu establesí komo hefe di e serunan. E lo wòrdu halsá mas haltu ku e seritunan, i e pueblonan lo basha bai na dje. . . . I e lo husga entre hopi pueblo i hasi desishon pa nashonnan leu i poderoso. E ora ei nan lo bati nan spadanan traha plug ku nan, i nan lo bati nan lansanan traha skèr pa snui ku nan; nashon lo no lanta spada kontra nashon, i nunka mas nan lo no train pa guera. I kada un di nan lo sinta bou di su palu di wendrùif i bou di su palu di figu, i ningun hende lo no spanta nan, pasobra e boka di e SEÑOR di ehérsitonan a papia.”

16, 17. Kon Mikeas 4:1-4 ta kumpliendo awe?

¹⁶ Ta kua ta e ‘hopi pueblonan’ i ‘nashonnan poderoso’ menshoná aki? Eseinan no ta e nashonnan i gobièrnunan di e mundu aki. Mas bien, e profesia ta apliká na personanan individual di tur e nashonnan ku ta uni nan mes den sirbishi sagrado na Yehova su seru di adorashon berdadero.

¹⁷ Manera e profesia di Mikeas a bisa, pronto hende rònt mundu lo praktiká Yehova su adorashon puru. Aworakí mes kaba, hende ku ta “korektamente dispuesto pa bida eterno” ta siña di Yehova su kamindanan. (Echonan 13:48, NW) Yehova ta ‘husga i hasi desishon,’ òf mihó bisá, rektifiká asuntunan den sentido spiritual pa kreyentenan ku ta skohe e banda dje Reino. Nan lo sobrebibí e “gran tribulashon” komo parti di e “multitut grandi.” (Revelashon 7:9, 14) Ya ku nan a bati nan spada traha plug, nan ta biba for di awor na pas ku nan kompañeronan Testigu di Yehova, i ku otro hende. Ki un goso pa ta entre nan!

Determiná pa Kana den e Nòmber di Yehova

18. Kiko e ‘sintamentu bou di bo mes mata di wendrùif i palu di figu’ ta simbolisá?

¹⁸ Awor ku den nos tempu miedu ta kologá riba henter mundu manera nubia skur, ta emoshonante pa mira ku tin hopi hende ta siña Yehova su kamindanan. Nos ta anhelá e dia, ku awor ta asina serka, ora ku tur hende ku stima Dios lo no siña di guera mas. Nan lo sinta bou di nan mes mata di wendrùif i palu di figu. Hopi bes sa tin palu di figu plantá den hòfi di wendrùif. (Lukas 13:6) Sinta bou di bo mes mata di wendrùif i palu di figu ta simbolisá pas, prosperidat i siguridat. Awor aki mes kaba, nos relashon ku Yehova ta duna nos pas mental i siguridat spiritual. Ora e situashonnan ei ta eksistí bou di e gobernashon dje Reino, nos lo ta kompletamente sigur i sin miedu.

19. Kiko ta nifiká kana den e nòmber di Yehova?

¹⁹ Pa nos por haña Dios su aprobashon, nos tin ku kana den Yehova su nòmber. Na un  manera firme e profeta ta trese esaki dilanti na Mikeas 4:5: “Tur e pueblonan ta kana kada un den e nòmber di su dios, ma pa loke ta nos, nos sí lo kana den e nòmber di [“Yehova,” NW] nos Dios pa semper i semper.” Kana den e nòmber di Yehova no ta nifiká djis bisa ku e ta nos Dios. Nos tin ku hasi mas ku djis partisipá den reunionnan kristian i e trabou di prediká e Reino, ounke e aktividatnan ei tambe ta vital. Si nos ta kana den e nòmber di Yehova, nos ta dediká na dje i nos ta hasi esfuerso pa sirbié fielmente pa motibu di nos amor profundo p’e. (Mateo 22:37) I komo su adoradónan, klaru ku nos ta determiná pa kana den e nòmber di Yehova nos Dios pa tur eternidat.

20. Kiko Mikeas 4:6-13 ta profetisá di dje?

²⁰ Awor, laga nos konsiderá e palabranan profétiko di Mikeas 4:6-13. “E yu muhé di Sion” tin ku bai den eksilio te na “Babilonia.” Esei ta presis loke a sosodé ku e habitantenan di Yerusalèm den siglo 7 promé ku nos era. Sin embargo, e profesia di Mikeas ta indiká ku un restu di hudiu mester bolbe na Huda, i ku ora Sion ser restorá Yehova lo perkurá pa su enemigunan kaba na nada.

21, 22. Kon Mikeas 5:2 a kumpli?

²¹ Mikeas kapítulo 5 ta profetisá di mas akontesimentunan dramátiko. Por ehèmpel, wak kiko Mikeas 5:2-4 ta bisa. Mikeas ta profetisá ku un Gobernante ku Dios lo nombra, kende “su orígen ta for di hopi tempu pasá,” lo sali for di Bètlehèm. Lo e goberná komo wardadó “den e forsa di SEÑOR.” Ademas, e Gobernante aki lo ta grandi, no na Israel so, sino “te na e finnan di tera.” Kisas mundu en general no ta logra saka afó ken e ta, pero pa nos sí e no ta un misterio.

²² Ken ta e persona di mas importante ku a yega di nase na Bètlehèm? I ken lo bai ta “grandi te na e finnan di tera”? Nada mas ni nada ménos ku e Mesias, Hesukristu! Ora Herodes e Grandi a puntra e saserdotenan prinsipal i e eskribanan unda e Mesias mester a nase, nan a respondé: “Na Bètlehèm di Hudea.” Asta nan a sita e palabranan di Mikeas 5:2. (Mateo 2:3-6) Algun hende dje pueblo komun tambe tabata sa esaki, pasobra segun Juan 7:42 nan a puntra: “Skritura no a bisa ku e Kristu ta bin di e desendensia di David, i for di Bètlehèm, e pueblito kaminda David tabata?”

Berdadero Refreskamentu p’e Pueblo

23. Kon Mikeas 5:7 ta kumpliendo awor akí?

²³ Mikeas 5:5-15 ta papia di un invashon di Asiria ku lo tin éksito, pero temporalmente so. Tambe Mikeas ta profetisá ku Dios ta bai tuma vengansa kontra nashonnan desobediente. Mikeas 5:7 ta primintí ku Dios lo laga un restu di hudiu repentí bolbe nan patria, pero e palabranan aki ta konta pa nos tempu tambe. Mikeas ta deklará: “E restante di Jakòb lo ta meimei di hopi pueblo, manera serena for di SEÑOR, manera yobidanan di awa riba vegetashon.” Mikeas ta usa e bunita palabranan poétiko aki pa profetisá ku e restu di Jakòb, esta, Israel spiritual, lo ta un bendishon di Dios pa e pueblo. P’e “otro karnénan” di Hesus, ku tin e speransa di biba riba tera, ta un goso di por sirbi huntu ku e restu djawe di “e Israel di Dios.” (Juan 10:16; Galationan 6:16; Sofonias 3:9) Relashoná ku esaki tin un punto importante ku nos tin ku meditá ariba. Komo proklamadónan di Reino, nos tur mester apresiá nos privilegio di por hiba berdadero refreskamentu pa otro hende.

24. Kiko nos a siña for di Mikeas kapítulo 3 pa 5?

 ²⁴ Kiko bo a siña for dje profesia di Mikeas kapítulo 3 pa 5? Podisé e siguiente puntonan: (1) Dios ta spera di esnan ku ta hiba delantera den su pueblo pa nan aktua ku hustisia. (2) Yehova no ta kontestá nos orashonnan si nos ta praktiká piká deliberadamente. (3) Nos por kumpli ku nos enkargo di prediká únikamente si Dios fortalesé nos ku su spiritu santu. (4) Pa nos por tin Yehova su aprobashon, nos tin ku kana den su nòmber. (5) Komo proklamadónan di Reino, nos mester apresiá nos privilegio di hiba berdadero refreskamentu pa e hendenan. Kisas tin mas punto ku a impreshoná bo. Kiko mas nos por siña for dje buki profétiko di Beibel aki? E siguiente artíkulo lo yuda nos saka lèsnan práktiko for dje último dos kapítulonan di e profesia di Mikeas ku ta fortalesé nos fe.

Kon Lo Bo Kontestá?

• Kiko Dios ta spera di esnan ku ta hiba delantera den su pueblo?

• Pakiko orashon i spiritu santu ta hunga un ròl importante den nos sirbishi na Yehova?

• Kon hende ‘ta kana den e nòmber di Yehova’?

[Preguntanan di Estudio]

[Plachi na página 15]

Bo por splika Mikeas su ilustrashon tokante un wea di kushiná?

[Plachinan na página 16]

Meskos ku Mikeas, nos ta kumpli ku nos ministerio ku kurashi