Alabá Yehova ‘Meimei di e Kongregashon’

YEHOVA a perkurá reunionnan kristian pa mantené su pueblo fuerte den sentido spiritual. Dor di asistí regularmente na reunion, nos ta mustra apresio pa loke Yehova ta perkurá. Ademas, nan ta duna nos oportunidat pa “stimulá [nos rumannan] pa stima i hasi bon obra,” lokual ta un manera importante pa demostrá amor pa otro. (Hebreonan 10:24; Juan 13:35) Pero, kon nos por stimulá nos rumannan na reunion?

Ekspresá Bo Mes den Públiko

Rei David a skirbi tokante su mes: “Lo mi anunsiá bo nòmber na mi rumannan; meimei di e [“kongregashon,” NW] lo mi alabá bo. For di bo mi alabansa ta bin den e gran [“kongregashon,” NW].” “Lo mi duna bo gradisimentu den e kongregashon grandi; lo mi alabá bo meimei di un multitut enorme.” “Mi a proklamá bon nobo di hustisia den e kongregashon grandi; ata, lo mi no frena mi lepnan.”—Salmo 22:22, 25; 35:18; 40:9.

Den tempu di apòstel Pablo, ora kristiannan tabata bini huntu pa adorá, nan tambe tabata ekspresá nan fe den Yehova i papia di su gloria. Den e manera aki nan a animá otro i stimulá otro pa mustra amor i hasi bon obra. Den nos tempu, hopi siglo despues di David i Pablo, di bèrdat nos “ta mira ku e dia [di Yehova] ta yegando serka.”  (Hebreonan 10:24, 25) E mundu di Satanas ta tambaliando rumbo pa su destrukshon, i problemanan ta sigui oumentá. Awe mas ku nunka, nos “tin mester di perseveransia.” (Hebreonan 10:36) I si no ta nos rumannan, ta ken otro por animá nos pa perseverá?

Awe tambe, meskos ku den pasado, kada ruman individual ta haña chèns di ekspresá su fe ‘meimei di e kongregashon.’ Un oportunidat ku ta habrí pa tur hende ta di duna komentario riba preguntanan ku ta wòrdu hasí n’e ouditorio na reunionnan di kongregashon. Nunka balotá e benefisionan ku esaki por trese kuné. Por ehèmpel, komentarionan ku ta demostrá kon pa vense òf evitá problema ta fortalesé e determinashon di nos rumannan pa sigui prinsipionan di Beibel. Komentarionan ku ta splika tekstonan menshoná pero no sitá òf ku ta trese puntonan ku nos a topa den nos investigashon personal lo por animá otro rumannan pa desaroyá mihó kustumbernan di studio.

E echo ku nos sa ku tantu nos komo otro personanan lo benefisiá si nos komentá na reunion mester motivá tur Testigu di Yehova pa vense timides. Ta spesialmente importante pa ansianonan i sirbidónan ministerial duna komentario na reunion, ya ku ta ferwagt di nan ku nan ta hiba delantera den asistí i partisipá den nan. Pero kon bo por mehorá si bo ta haña ku e aspekto partikular aki di bo aktividat kristian no ta asina fásil?

Sugerensianan pa Mehorá

Kòrda ku dunamentu di komentario ta parti di nos adorashon na Yehova. Un ruman muhé kristian ku ta biba na Alemania a splika kon e ta mira su komentarionan. “Nan ta mi manera di kontestá Satanas su intentonan pa stroba sirbidónan di Dios di ekspresá nan fe.” Un ruman hòmber resien batisá di e mesun kongregashon ta bisa: “Mi ta hasi hopi orashon pa por duna komentario.”

Prepará bon. Si bo no studia e informashon adelantá, lo bo ripará ku ta difísil pa komentá i bo komentarionan lo no ta asina efektivo. Página 70 di e buki Benefisiá di e Skol di Ministerio Teokrátiko ta duna sugerensia kon pa komentá na reunionnan di kongregashon. *

Pone meta pa duna por lo ménos un komentario na kada reunion. Esaki ta nifiká prepará vários kontesta, ya ku mas bo hisa bo man, mas chèns bo tin di haña bùrt. For di antemano bo por bisa e ruman ku ta dirigí ki preguntanan bo a prepará pa kontestá. Esaki ta un bon yudansa spesialmente si ta awor bo ta kuminsá duna komentario. Kisas bo tin un tiki miedu di hisa man “den e kongregashon grandi,” pero e echo ku bo sa ku esaki ta bo paragraf i ku e ruman ku ta dirigí e reunion lo ta pendiente di bo man lo animá bo pa duna komentario.

Duna komentario for di kuminsamentu. Un tarea difísil no ta bira mas fásil dor di pospon’é. Algu ku por yuda ta di duna komentario  for di den kuminsamentu. Lo bo keda sorprendí kuantu mas fásil ta pa komentá un di dos òf di tres biaha unabes bo a surpasá e opstákulo di duna e promé komentario ei.

Wak un bon lugá di sinta. Algun hende ta haña ta mas fásil pa duna komentario ora nan ta sinta mas dilanti den Salòn di Reino. Tin ménos distraishon, i e konduktor tin ménos chèns di keda sin mira nan man. Si bo ta purba esaki, kòrda papia sufisiente duru pa tur hende tende, spesialmente si e kongregashon no ta usa mikrofon pa duna kontesta.

Skucha atentamente. Esaki lo yuda bo evitá di ripití loke un otro hende a kaba di bisa. Ademas, e komentarionan ku otro personanan ta duna por laga bo kòrda riba un teksto òf un punto ku por amplia riba e pensamentu ku bo a kaba di tende. De bes en kuando un eksperensia breve por ilustrá e punto ku ta ser tratá. E komentarionan ei ta hopi edifikante.

Siña kontestá den bo mes palabra. Un komentario lesá for di e informashon ku ta ser studiá lo por indiká ku bo a haña e kontesta korekto, i lo e por ta un bon manera pa kuminsá komentá. Pero ora bo progresá i ta kontestá den bo mes palabra, bo ta mustra ku bo ta komprondé e punto. No tin nodi sita nos publikashonnan palabra pa palabra. Testigunan di Yehova no ta djis ripití loke nan publikashonnan ta bisa.

Pega n’e tema. Komentarionan ku no tin nada di haber ku e tema òf ku ta desviá for di e pensamentunan prinsipal ku ta ser tratá no ta apropiá. Esaki ta nifiká ku bo komentarionan mester ta relashoná ku e tema ku ta wòrdu analisá. E ora ei nan lo kontribuí na un konsiderashon spiritualmente edifikante di e tema ku ta ser desaroyá.

Bo meta mester ta pa animá. Siendo ku un di e motibunan importante pa duna komentario ta pa animá otro, nos mester purba evitá di bisa kosnan ku lo por desanimá nan. No komentá tampoko riba delaster un punto di e paragraf sin laga nada òf kasi nada pa otronan. Kontestanan largu òf kompliká lo por tapa e nifikashon. En kambio, kontestanan kòrtiku di djis un par di palabra por ta hopi efikas, i esakinan lo animá esnan nobo pa duna e komentarionan kòrtiku ku nan a prepará.

E Papel di Esnan Ku Ta Dirigí Reunion

E ruman ku ta dirigí un reunion tin un responsabilidat di peso; e tin ku animá e ouditorio. E ta mustra ku e ta realmente interesá den kada komentario dor di skucha atentamente i dor di wak esun ku ta komentá den su kara na un manera amigabel, en bes di okupá su mes ku otro kos. Lo ta masha inapropiá si e no skucha ku atenshon i, dor di esei, ta ripití innesesariamente loke a kaba di wòrdu bisá òf ta hasi un pregunta ku a kaba di ser kontestá!

Otro kos ku lo desanimá e ouditorio ta ora ku kada bes e konduktor ta ripití ku palabra un poko diferente un komentario ku a kaba di wòrdu duná, komo si fuera e komentario no tabata muchu bon. Di otro banda, komentarionan ku ta kontribuí na un konsiderashon mas profundo di un punto importante ta masha edifikante. Preguntanan manera, ‘Kon nos por apliká esaki den nos kongregashon?’  òf, ‘Ki teksto den e paragraf ta apoyá loke nos a kaba di tende?’ ta animá komentarionan positivo, loke ta duna un kontribushon balioso na reunion.

Klaru ku mester elogiá spesialmente esnan nobo òf tímido ora nan duna un komentario. Por hasi esaki riba un base personal despues di e studio pa evitá di brongosá nan. A la bes, esaki ta duna e konduktor un oportunidat pa duna sugerensia ora esei ta apropiá.

Den kòmbersashon di tur dia, un persona ku ta monopolisá òf dominá un kòmbersashon ta desanimá otronan pa papia. Esnan ku ta skuch’é no ta sinti e nesesidat pa ekspresá nan mes. Te na ora nan konformá nan mes ku skucha so, nan ta skucha ku mitar orea. Algu similar por sosodé ora esun ku ta dirigí un reunion ta monopolisá e konsiderashon dor di papia muchu. Esaki no ta kita sí ku de bes en kuando e konduktor por invitá e ouditorio pa duna komentario i stimulá nan pensamentu riba e tema dor di hasi pregunta adishonal. Un kos sí, mester limitá e preguntanan ei.

E konduktor no nesesariamente lo duna e promé persona ku hisa man bùrt. Esaki lo por desanimá esnan ku mester di poko tempu pa formulá nan pensamentunan. Dor di warda djis un ratu, lo e duna un persona ku no a komentá ainda e chèns pa hasi esei. Tambe lo e mustra disernimentu dor di no duna mucha chikitu bùrt pa kontestá pregunta riba un punto ku ta fuera di nan kapasidat pa komprondé.

Kiko e konduktor mester hasi ora un kontesta ta inkorekto? E mester evitá di brongosá e persona ku a duna e kontesta. Asta ora un komentario ta inkorekto, hopi bes e ta kontené algun kos ku sí ta kuadra. Dor di usa takto i selektá e parti ku sí ta korekto, dor di formulá e pregunta di un otro manera òf dor di hasi un pregunta adishonal, e konduktor por rektifiká e punto sin laga esun ku a dun’é sintié hopi malu.

Pa animá e ouditorio pa komentá, e ruman ku ta dirigí un reunion mester evitá preguntanan general, manera ‘Ken mas tin komentario?’ E pregunta, ‘Ken no a komentá ainda? Esaki ta bo último chèns!’ por tin bon intenshon su tras, pero definitivamente lo no animá un persona pa ekspresá su mes abiertamente. Rumannan no mester sinti nan kulpabel ku nan no a komentá mas promé den e studio. Mas bien, mester animá nan pa kompartí loke nan sa pasobra dunamentu ta un ekspreshon di amor. Ademas, despues ku e konduktor duna un persona bùrt pa komentá, no ta bon p’e bisa: “Despues di dje, nos lo tende e komentario di ruman tal i tal anto kaba ruman tal i tal.” E konduktor mester skucha e komentario promé i despues determiná si un komentario adishonal ta nesesario.

Ta un Privilegio di Por Duna Komentario

Asistensia na reunionnan kristian ta un rekisito spiritual; dunamentu di komentario durante nan ta un privilegio. N’e grado ku nos ta partisipá den e manera úniko aki di alabá Yehova ‘meimei di e kongregashon,’ n’e mesun grado ei nos ta siguiendo e ehèmpel di David i ta tuma na serio e konseho di Pablo. Nos partisipashon den e reunionnan ta duna prueba ku nos ta stima nos rumannan i ku nos ta parti di Yehova su kongregashon grandi. Segun ku bo “ta mira ku e dia ta yegando serka,” lo bo no kier ta ningun otro kaminda!—Hebreonan 10:25.

[Nota]

[Plachinan na página 20]

Ta importante pa skucha i tambe duna komentario na reunionnan kristian

[Plachi na página 21]

E konduktor ta mustra ku e ta realmente interesá den kada komentario