Hasi Yehova Bo Konfiansa

“Bo ta mi speransa; o Señor DIOS, bo ta mi konfiansa for di mi hubentut.” —SALMO 71:5.

1. Ki reto David, e hóben wardadó di karné, a enfrentá?

GOLIAT tabata midi kasi tres meter. P’esei no ta nada straño ku tur e sòldánan di e ehérsito di Israel tabatin miedu di enfrent’é! Pa simannan largu, tur mainta i tur anochi, e gigante filisteo tabata desafiá e ehérsito di Israel, retando nan pa manda un guerero pa bringa kontra dje. Porfin, un hende a aseptá e reto. Pero no tabata un sòldá, sino un simpel hóben. David, e hóben wardadó di karné, a parse un enano banda di su oponente. Figurá bo, kisas el a pisa ménos ku Goliat su bistí di guera i su armanan! Pero tòg e hóben a enfrentá e gigante i te awe e ta un símbolo famoso di kurashi.—1 Samuel 17:1-51.

2, 3. (a) Kon bin David por a enfrentá Goliat ku tantu konfiansa? (b) Kua ta e dos pasonan ku nos lo konsiderá pa por hasi Yehova nos konfiansa?

² Kiko a duna David asina tantu kurashi? Tuma nota di e siguiente palabranan ku David evidentemente a skirbi mas despues den su bida: “Bo ta mi speransa; o Señor DIOS, bo ta mi konfiansa for di mi hubentut.” (Salmo 71:5) Sí, komo un hóben, David a konfia kompletamente den Yehova. El a enfrentá Goliat ku e palabranan: “Bo ta bin riba mi ku spada, ku lansa i ku yabalina, ma ami ta bin riba bo den e nòmber di e SEÑOR di ehérsitonan, e Dios di e ehérsitonan di Israel, kende bo a reta.” (1 Samuel 17:45) Miéntras ku Goliat a pone su konfiansa den su gran forsa i den su armanan, David su konfiansa tabata den Yehova. Ku e Señor Soberano di universo na su banda, David no tabatin motibu di tin miedu di un simpel hende, pa kon grandi i bon armá e hende ei kisas tabata.

 ³ Ora bo ta lesa tokante David, bo sa deseá ku bo konfiansa den Yehova tabata mas fuerte? Hopi di nos probablemente ta deseá esaki. P’esei, laga nos analisá dos paso ku nos por tuma pa hasi Yehova nos konfiansa. Na promé lugá, nos tin ku vense un opstákulo ku hopi biaha ta stroba nos di tin tal konfiansa, i sigui manten’é bou di kontròl. Na di dos lugá, nos tin ku haña sa kiko konfia den Yehova ta enserá spesífikamente.

Vensiendo un Opstákulo Komun pa Konfiansa den Yehova

4, 5. Dikon hopi hende ta haña ku ta difísil pa nan pone konfiansa den Dios?

⁴ Kiko ta stroba hende di pone nan konfiansa den Dios? Hopi bes, ta pasobra algun di nan ta konfundí tokante e motibu pakiko kos malu ta pasa. Mayoria di nan a wòrdu siñá ku ta Dios ta responsabel pa sufrimentu. Ora tragedia tuma lugá, pastornan kisas ta bisa ku ta Dios “a tuma” e víktimanan pa nan ta huntu kuné den shelu. Ademas, tin hopi lider religioso ta siña hende ku for di masha tempu Dios a predestiná tur suseso—inkluso tur tragedia i maldat—ku ta tuma lugá riba e mundu aki. Ta difísil pa pone bo konfiansa den un Dios sin heful asina. Satanas, kende ta siega mente di esnan ku no ta kere, ta ansioso pa promové tur e tiponan ei di ‘doktrina di demoño.’—1 Timoteo 4:1; 2 Korintionan 4:4.

⁵ Satanas ke pa hende pèrdè konfiansa den Yehova. E enemigu ei di Dios no ke pa nos haña sa kiko realmente ta e kousa di sufrimentu humano. I asta si nos a yega di siña e motibunan ku Beibel ta duna komo kousa di sufrimentu, Satanas lo ke pa nos lubidá nan. P’esei ta bon pa tempu-tempu nos repasá tres motibu básiko pakiko tin sufrimentu na mundu. Dor di hasi esei, nos por sigurá nos kurason ku Yehova no ta responsabel pa e problemanan ku nos ta konfrontá den bida.—Filipensenan 1:9, 10.

6. Kon 1 Pedro 5:8 ta indiká un motibu pakiko hende ta sufri?

⁶ Un motibu pakiko hende ta sufri ta ku Satanas ke kibra e integridat di e pueblo fiel di Yehova. El a purba kibra Jòb su integridat. Den e kaso ei Satanas a frakasá, pero e no a entregá. Komo gobernante di e mundu aki, e ta purba “devorá” e sirbidónan fiel di Yehova. (1 Pedro 5:8) Esei ta inkluí kada un di nos! Satanas ke pone nos stòp di sirbi Yehova. P’esei hopi bes e ta instigá persekushon. Pa doloroso ku e sufrimentu ei por ta, nos tin bon motibu pa soport’é. Dor di perseverá nos ta yuda duna prueba ku Satanas ta un mentiroso, i asina ta hasi Yehova kontentu. (Jòb 2:4; Proverbionan 27:11) Segun ku Yehova ta fortalesé nos pa soportá persekushon, nos konfiansa den dje ta bira mas grandi.—Salmo 9:9, 10.

7. Kua motibu di sufrimentu Galationan 6:7 ta yuda nos rekonosé?

⁷ Un di dos motibu pakiko tin sufrimentu nos ta haña den e prinsipio: “Loke un hende sembra, esaki tambe e lo kosechá.” (Galationan 6:7) Tin biaha hende ta sembra dor di tuma mal desishon i komo konsekuensia di esei nan ta kosechá un midí di sufrimentu. Kisas nan ta skohe pa kore outo na un manera deskabeyá, i esei ta resultá den aksidente. Hopi hende ta skohe pa huma sigaria, i esei ta hiba na malesa di kurason òf kanser di pulmon. Esnan ku ta skohe pa praktiká relashon seksual inmoral ta kore e riesgo di daña nan relashonnan familiar, di pèrdè rèspèt propio, di sufri di malesa transmití seksualmente i di haña nan ku embaraso indeseá. Tal bes hende ta purba kulpa Dios pa tal sufrimentu, pero en realidat nan ta víktima di e mal desishonnan ku nan mes a tuma.—Proverbionan 19:3.

8. Segun Eklesiastés 9:11, dikon hende ta sufri?

⁸ Un di tres motibu pakiko tin sufrimentu nos ta lesa na Eklesiastés 9:11. E versíkulo ei ta bisa: “Atrobe mi a mira bou di solo: ku e kareda no ta pa esun mas lihé, i e bataya no ta pa e guereronan, ni pan no ta pa e sabínan, ni rikesa pa esnan ku tin disernimentu, ni fabor pa e hendenan ku abilidat; pasobra tempu i suerte [“suseso imprevisto,” NW] ta alkansá nan tur.” Tin biaha, simplemente hende ta na un mal lugá  na un mal momentu. Sin importá nos puntonan fuerte òf débil, sufrimentu i morto por alkansá kualkier un di nos na kualkier momentu inesperá. Por ehèmpel, den tempu di Hesus un toren na Yerusalèm a kai i mata 18 hende. Hesus a mustra ku no ta Dios a kastigá nan pa pikánan ku nan a hasi. (Lukas 13:4) Nò, Yehova no ta esun ku nos mester kulpa pa tal sufrimentu.

9. Kiko hopi hende no ta komprondé tokante sufrimentu?

⁹ Ta importante pa komprondé algun di e motibunan pakiko hende ta sufri. Sin embargo, tin un aspekto di e asuntu ku hopi hende ta haña difísil pa komprondé. Ta lo siguiente: Pakiko Yehova Dios ta permití sufrimentu?

Pakiko Yehova Ta Permití Sufrimentu?

10, 11. (a) Segun Romanonan 8:19-22, kiko a pasa ku “henter e kreashon”? (b) Kon nos por saka afó ta ken ta esun ku a someté kreashon na banidat?

¹⁰ Un pasashi den e karta di apòstel Pablo na e romanonan ta aklará e tópiko importante aki. Pablo a skirbi: “E kreashon ta spera ku gran antisipashon riba e revelashon di e yunan di Dios. Pasobra e kreashon a wòrdu sometí na banidat, no di su mes boluntat, ma pa motibu di esun ku a somet’é, den speransa ku e kreashon mes tambe lo wòrdu librá for di su sklabitut na korupshon pa drenta den e libertat glorioso di e yunan di Dios. Pasobra nos sa ku henter e kreashon ta keha i ta sufri e dolónan di parto huntu, te awor.”—Romanonan 8:19-22.

¹¹ Pa nos kapta e punto di e versíkulonan aki, nos tin ku haña kontesta promé riba algun pregunta klave. Por ehèmpel: Ken a someté e kreashon na banidat? Tin hende ta bisa ku ta Satanas; otronan ta bisa ku ta Adam. Pero niun di dos no por a hasi esei. Dikon nò? Pasobra esun ku a someté e kreashon na banidat a hasi esei “den speransa.” Sí, e ta ofresé speransa na esnan fiel ku na e debido tempu lo wòrdu ‘librá for di sklabitut na korupshon.’ Ni Adam ni Satanas no por a ofresé tal speransa. Ta Yehova so tabata por. Pues ta bisto anto, ku e tabata esun ku a someté kreashon na banidat.

12. Ki konfushon tin pa ku e identidat di “henter e kreashon,” i kon nos por klara esei?

¹² Pero kiko ta “henter e kreashon” ku e pasashi aki ta papia di dje? Tin hende ta bisa ku e ta referí na henter e mundu di naturalesa, inkluyendo bestia i mata. Pero bestia i mata tin speransa di alkansá “e libertat glorioso di e yunan di Dios”? Nò. (2 Pedro 2:12) Pues, “henter e kreashon” por ta referí solamente na humanidat. Esaki ta e kreashon ku debí na e rebelion den Edén a ser afektá dor di piká i morto i ku  tin gran nesesidat di speransa.—Romanonan 5:12.

13. Kiko e rebelion den Edén a hasi ku humanidat?

¹³ Pero kiko presis e rebelion ei a hasi ku humanidat? Pablo ta deskribí e resultado di e rebelion ei ku un solo palabra: banidat. Segun un buki di referensia, e palabra aki ta deskribí “e banidat [òf, inutilidat] di un opheto ku no ta funshoná segun e propósito pa kua el a wòrdu diseñá.” Hende a ser diseñá pa biba pa semper, i pa traha unidamente komo un famia perfekto pa kuida un tera paradísiko. Pero na lugá di esei, nan ta hiba un bida kòrtiku, doloroso i hopi bes frustrante. Ta manera Jòb a ekspres’é: “Hende ku a nase di muhé ta biba poko dia i ta yen di problema.” (Jòb 14:1) Esei sí ta banidat!

14, 15. (a) Ki evidensia di hustisia nos ta haña den e sentensia ku Yehova a dikta riba humanidat? (b) Dikon Pablo a bisa ku kreashon a wòrdu someté na banidat “no di su mes boluntat”?

¹⁴ Awor nos ta yega na e pregunta prinsipal: Pakiko “e Hues di henter mundu” a someté humanidat na e bida doloroso i frustrante aki? (Génesis 18:25) Tabata hustu di su parti pa hasi esei? Wèl, kòrda kiko nos promé mayornan a hasi. Ora nan a rebeldiá kontra Dios, nan a tuma parti pa Satanas, kende a lanta un desafio formal kontra Yehova su derecho di goberná. Ku nan akshon, nan a apoyá e afirmashon ku hende su bida lo bai mas mihó sin Yehova miéntras ku nan ta goberná nan mes bou di guia di un kriatura spiritual rebelde. Bon mirá, ora Yehova a sentensiá e rebeldenan el a duna nan loke nan a pidi. El a permití hende goberná nan mes bou di e influensia di Satanas. Den e sirkunstansianan ei, ki desishon lo por tabata mas hustu ku someté humanidat na banidat, pero ku un speransa?

¹⁵ Klaru ku esaki no tabata e kreashon “su mes boluntat.” Nos no tin otro opshon. Nos ta nase katibu di piká i korupshon. Pero Yehova den su miserikòrdia a permití Adam ku Eva biba e restu di nan bida i haña yu. Ounke nos komo nan desendensia ta sometí na e banidat di piká i morto, nos tin e oportunidat di hasi loke Adam ku Eva no a hasi. Nos por skucha Yehova i siña ku su gobernashon supremo ta hustu i perfekto, miéntras ku gobernashon humano separá for di Yehova ta trese solamente doló, frustrashon i banidat. (Jeremias 10:23; Revelashon 4:11) Ademas, e influensia di Satanas ta solamente empeorá e situashon. Historia di humanidat ta duna prueba di e bèrdatnan aki.—Eklesiastés 8:9.

16. (a) Dikon nos por tin sigur ku Yehova no ta responsabel pa e sufrimentu ku nos ta mira na mundu awe? (b) Ki speransa Yehova amorosamente a perkurá pa hende fiel?

¹⁶ Pues, klaramente Yehova tabatin motibunan válido pa someté humanidat na banidat. Pero esei ta nifiká ku ta Yehova ta e kousa di e banidat i sufrimentu ku ta afligí nos kada un awe? Wèl, kompará e situashon ku esun di un hues ku ta dikta un sentensia hustu riba un kriminal. E kriminal kisas ta sufri bastante miéntras ku e ta sinta su kastigu, pero e tin derecho di kulpa e hues di ta e kousa di su sufrimentu? Di ningun manera! Ademas, Yehova nunka no ta e fuente di maldat. Santiago 1:13 ta bisa: “Dios no por wòrdu tentá dor di maldat, i e mes no ta tenta ningun hende.” Kòrda tambe ku Yehova a dikta e sentensia aki “den speransa.” Amorosamente el a hasi areglo pa desendientenan fiel di Adam ku Eva por mira e fin di banidat i alegrá den e “libertat glorioso di e yunan di Dios.” Pa eternidat, fiel humanidat lo no tin nodi preokupá ku henter kreashon lo bolbe kai den e estado doloroso di banidat. E manera hustu ku Yehova a atendé e situashon lo a establesé unabes pa semper ku su gobernashon supremo ta legítimo.—Isaias 25:8.

17. Ora nos repasá e motibunan pakiko hende ta sufri den e mundu djawe, ki efekto esei mester tin riba nos?

¹⁷ Segun ku nos a repasá e motibunan aki pakiko hende ta sufri, nos ta mira kualkier base pa kulpa Yehova pa maldat òf pa pèrdè nos konfiansa den dje? Al kontrario, e análisis aki a duna nos motibu pa ta di akuerdo ku e palabranan di Moisés: “E Baranka! Su obra ta perfekto, pasobra tur su kamindanan ta hustu; un Dios  di fieldat i sin inhustisia, hustu i rekto e ta.” (Deuteronomio 32:4) De bes en kuando laga nos refreská nos komprondementu di e kosnan aki dor di meditá riba nan. Di e manera ei, ora nos ta konfrontá prueba nos lo resistí e intentonan di Satanas pa sembra duda den nos mente. Pero kiko di e di dos paso ku nos a menshoná na kuminsamentu? Kiko konfia den Yehova ta enserá?

Loke Konfia den Yehova Ta Nifiká

18, 19. Ku ki palabranan Beibel ta animá nos pa konfia den Yehova, pero ki ideanan ekiboká algun hende tin relashoná ku esei?

¹⁸ E Palabra di Dios ta urgi nos: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” (Proverbionan 3:5, 6) E palabranan aki ta bunita i trankilisante. Un kos ta sigur, den henter universo no por tin niun persona mas konfiabel ku nos kerido Tata selestial. No opstante, pa lesa e palabranan ei den Proverbionan ta fásil. Pa pone nan na práktika kisas ta mas difísil.

¹⁹ Hopi hende tin ideanan ekiboká tokante loke ta nifiká konfia den Yehova. Algun ta pensa ku e konfiansa ei ta djis un sintimentu, un tipo di emoshon di felisidat ku mester lanta spontáneamente den nos kurason. Otro hende ta kere ku konfia den Dios ta nifiká ku nos por ferwagt ku e ta protehá nos di tur difikultat, ta resolvé tur nos problemanan, ta laga tur reto ku nos ta enfrentá diariamente sali presis manera nos ta spera, anto mesora! Pero e pensamentunan ei ta infundá. Konfiansa ta hopi mas ku djis un sintimentu, i e no ta irealístiko. Serka hende adulto, konfiansa ta enserá tuma desishonnan konsiente i bon pensá.

20, 21. Kiko konfia den Yehova ta enserá? Duna un ehèmpel.

²⁰ Tuma nota atrobe di loke Proverbionan 3:5 ta bisa. E ta hasi un kontraste entre konfia den Yehova i dependé riba nos mes komprondementu, i ta indiká ku nos no por hasi tur dos. Esaki ke men ku nos no mag usa nos kapasidat di komprondé? Nò, no ta esei e ke men, pasobra Yehova, kende a duna nos e kapasidat ei, ta ferwagt ku nos ta us’é ora nos ta sirbié. Pero e punto ta, riba kiko nos ta dependé ora di tuma desishon? Si nos manera di pensa no ta armonisá ku esun di Yehova, nos ta aseptá su sabiduria tòg ya ku e ta infinitamente mas superior ku esun di nos? (Isaias 55:8, 9) Konfia den Yehova ta nifiká laga su manera di pensa guia nos manera di pensa.

²¹ Konsiderá un ehèmpel: Pensa riba un mucha chikí sintá den stul patras den outo, anto su mayornan ta sintá dilanti. Su tata ta stür. Ora surgi difikultat durante e biahe—kisas un pregunta tokante kua ta e ruta ku mester sigui òf podisé un problema ku mal tempu òf ku e kondishon di e kaminda—kon un yu obediente i ku ta konfia su mayornan ta reakshoná? E ta sinta grita instrukshon for di patras, bisando su tata kon e mester kore? E ta kuestioná e desishonnan ku su mayornan ta tuma òf e ta resistí ora nan ta kòrd’é pa keda sinta ku su faha mará? Nò, di naturalesa e ta konfia ku su mayornan lo atendé e asuntunan ei, pa imperfekto ku nan ta. Den kaso di Yehova, nos tin un Tata perfekto. Nos no mester konfi’é kompletamente, foral ora nos ta konfrontá situashonnan difísil?—Isaias 30:21.

22, 23. (a) Dikon nos mester pone nos konfiansa den Yehova ora nos ta konfrontá problema, i kon nos por hasi esei? (b) Kiko nos lo trata den e siguiente artíkulo?

²² Sin embargo, Proverbionan 3:6 ta indiká  ku nos mester ‘rekonosé Yehova den tur nos kamindanan,’ no solamente ora nos ta konfrontá situashonnan difísil. P’esei e desishonnan ku nos ta tuma den nos bida diario mester reflehá nos konfiansa den Yehova. Ora surgi problema, nos no mester desesperá, drenta den pániko òf resistí Yehova su guia relashoná ku e mihó manera pa atendé asuntunan. Nos tin ku mira e pruebanan ku nos ta pasa aden komo oportunidatnan pa apoyá Yehova su gobernashon supremo, pa yuda demostrá ku Satanas ta un mentiroso i pa kultivá obedensia i otro kualidatnan ku ta agradá Yehova.—Hebreonan 5:7, 8.

²³ Nos por demostrá nos konfiansa den Yehova sin importá ki opstákulo tin nos dilanti. Nos ta demostrá esei na nos orashonnan i na e manera ku nos ta akudí na Yehova su Palabra i na su organisashon pa haña guia. Pero kon spesífikamente nos por desplegá konfiansa den Yehova ora nos ta konfrontá e problemanan ku ta surgi den e mundu djawe? Nos siguiente artíkulo lo trata e tópiko ei.

Kon Lo Bo Kontestá?

• Kon David a demostrá ku el a hasi Yehova su konfiansa?

• Menshoná tres motibu pakiko hende ta sufri awe. I dikon ta bon pa repasá nan de bes en kuando?

• Ki sentensia Yehova a dikta riba humanidat, i dikon e tabata un sentensia hustu?

• Kiko konfia den Yehova ta enserá?

[Preguntanan di Estudio]

[Plachinan na página 8]

David a hasi Yehova su konfiansa

[Plachi na página 10]

Hesus a mustra ku ora un sierto toren a kai na Yerusalèm, no ta Yehova tabata responsabel pa esei