Konfia Yehova Kompletamente den Tempu di Angustia

“Dios ta nos refugio i fortalesa, un pronto ousilio den tempu di angustia.”—SALMO 46:1.

1, 2. (a) Ki ehèmpel ta mustra ku djis bisa ku nos ta konfia den Dios no ta basta? (b) Dikon nos tin ku hasi mas ku simplemente bisa ku nos ta konfia den Yehova?

TA FÁSIL pa bisa ku nos ta konfia den Dios. Pero mustra ku nos akshonnan ku nos ta hasié, ta kompletamente un otro kos. Por ehèmpel, ya pa hopi tempu e frase In God We Trust (Den Dios Nos Ta Konfia) ta aparesé riba sèn di papel i moneda merikano. * Na 1956, Kongreso merikano a pasa un lei ku a deklará e ekspreshon ei komo e lema nashonal di Merka. Pero ta un ironia ku hopi hende—no solamente den e pais ei sino rònt mundu—ta pone mas konfiansa den plaka i rikesa material ku den Dios.—Lukas 12:16-21.

² Komo kristiannan berdadero nos tin ku hasi mas ku simplemente bisa ku nos ta konfia den Yehova. Meskos ku ‘fe sin obra ta morto,’ asina tambe kualkier deklarashon ku nos hasi ku nos ta konfia den Dios, no ta nifiká nada a ménos ku nos echonan ta apoyá esei. (Santiago 2:26) Den e artíkulo anterior nos a siña ku nos ta manifestá nos konfiansa den Yehova ora nos ta akudí na dje den orashon, ora nos ta buska guia i instrukshon for di su Palabra i su organisashon. Laga nos ban konsiderá awor kon nos por sigui e tres pasonan aki den tempu di angustia.

Ora Nos Pèrdè Trabou òf Nos Entrada Ta Hopi Abou

3. Ki preshonnan ekonómiko sirbidónan di Yehova ta konfrontá den e “tempunan trabahoso” aki, i kon nos por sa ku Dios ta dispuesto pa yuda nos?

³ Komo kristiannan, den e “tempunan trabahoso” aki nos ta konfrontá e mesun preshonnan ekonómiko ku otro hende. (2 Timoteo 3:1)  P’esei, nos por lanta un dia pèrdè trabou. Òf kisas nos no tin otro opshon sino di traha hopi ora pa tiki plaka. Den tal sirkunstansia kisas ta difísil pa nos ‘proveé pa nos hendenan di kas.’ (1 Timoteo 5:8) E Dios Haltísimo ta dispuesto pa yuda nos na momentunan asina? Definitivamente ku sí! Klaru ku Yehova no ta protehá nos kontra tur difikultat di bida den e mundu djawe. Sin embargo, si nos ta konfia den dje, e palabranan di Salmo 46:1 lo resultá sierto den nos kaso: “Dios ta nos refugio i fortalesa, un pronto ousilio den tempu di angustia.” Pero kon nos por demostrá ku nos ta konfia Yehova kompletamente den tempu di angustia ekonómiko?

4. Kiko nos por pidi den orashon ora nos ta konfrontá problemanan finansiero, i kon Yehova ta reakshoná riba e tipo di orashonnan ei?

⁴ Un manera pa demostrá nos konfiansa den Yehova ta dor di akudí na dje den orashon. Pero kiko nos por pidi den orashon? Wèl ora nos ta konfrontá problemanan finansiero, kisas nos lo tin mas mester di sabiduria práktiko ku nunka. Definitivamente anto, pidi pa esei den orashon! Yehova su Palabra ta sigurá nos: “Ma si kualkier di boso falta sabiduria, lag’é pidi Dios, kende ta duna na tur hende generosamente i sin reproche, i esaki lo wòrdu duná na dje.” (Santiago 1:5) Sí, pidi Yehova sabiduria—esta e kapasidat di hasi bon uso di konosementu, komprondementu i disernimentu—pa nos por tuma desishonnan sabí i skohe loke ta korekto. Nos amoroso Tata selestial ta sigurá nos ku lo e skucha e tipo di orashonnan ei. Semper e ta dispuesto pa dirigí berea òf paso di esnan ku ta konfia den dje ku henter nan kurason.—Salmo 65:2; Proverbionan 3:5, 6.

5, 6. (a) Dikon nos por akudí na e Palabra di Dios pa haña yudansa pa trata ku preshonnan ekonómiko? (b) Kiko nos lo por hasi pa mengua nos ansiedat ora nos pèrdè trabou?

⁵ Akudí na e Palabra di Dios pa haña guia ta un otro manera pa demostrá ku nos ta konfia den Yehova. Su rekordatorionan sabí ku nos ta haña den Beibel ta “masha sigur,” es desir, digno di konfiansa. (Salmo 93:5) Ounke Beibel a ser kompletá mas ku 1.900 aña pasá, e buki inspirá ei ta kontené konseho konfiabel i komprondementu penetrante ku por yuda nos trata mihó ku preshonnan ekonómiko. Konsiderá algun ehèmpel di Beibel su sabiduria.

⁶ Rei sabí Salomon a bisa hopi tempu pasá: “Soño di e hòmber trahadó ta dushi, sea ku e ta kome poko òf hopi. Ma barika-yen di e hòmber riku no ta lag’é drumi.” (Eklesiastés 5:12) Pa nos drecha, limpia, mantené i protehá nos poseshonnan material ta eksigí tempu i plaka. P’esei ora nos pèrdè trabou, kisas nos por probechá di e okashon pa reeksaminá nos estilo di bida i purba distinguí entre loke nos realmente tin mester i loke no ta nesesario. Kisas ta sabí pa nos hasi algun kambio pa asina mengua nos ansiedat. Por ehèmpel, nos lo por simplifiká nos bida, podisé dor di bai biba den un kas mas chikí òf dor di eliminá poseshonnan material innesesario?—Mateo 6:22, NW.

7, 8. (a) Kon Hesus a mustra ku e sa ku hende imperfekto tin e tendensia di ta demasiado preokupá ku kos material? (Wak tambe e nota na pia di página.) (b) Ki konseho sabí Hesus a duna tokante kon pa evitá di preokupá indebidamente?

⁷ Den e Sermon Riba Seru, Hesus a konsehá: “No preokupá boso mes pa boso bida, kiko boso lo kome òf kiko boso lo bebe; tampoko pa boso kurpa, kiko boso lo bisti.” * (Mateo 6:25) Hesus tabata sa ku di naturalesa hende imperfekto ta preokupá pa haña nan nesesidatnan básiko. Pero kon nos por stòp di “preokupá” tokante e kosnan ei? Hesus a bisa: “Buska promé e reino di Dios.” Sin importá ki problema nos ta konfrontá den bida, nos mester sigui pone e adorashon di Yehova na promé lugá. Si nos hasi esei, tur nos nesesidatnan diario “lo wòrdu añadí” na nos dor di nos Tata selestial.  Di un manera òf otro lo e proveé loke nos tin mester.—Mateo 6:33.

⁸ Hesus a duna mas konseho. El a bisa: “No preokupá boso mes pa e dia di mañan; pasobra e dia di mañan lo perkurá pa su mes. Kada dia tin sufisiente problema di su mes.” (Mateo 6:34) No ta sabí pa nos ta demasiado preokupá ku kiko lo por pasa mañan. Un eksperto di Beibel a remarká: “Masha poko bes futuro ta resultá mes malu ku nos a teme ku lo e bira.” Si humildemente nos hasi kaso di e konseho di Beibel, esta, pa konsentrá riba loke ta mas importante i biba un dia a la bes, esei por yuda nos evitá di preokupá indebidamente.—1 Pedro 5:6, 7.

9. Ora nos ta konfrontá angustia finansiero, ki yudansa nos por haña den e publikashonnan di “e esklabo fiel i prudente”?

⁹ Un otro manera pa demostrá nos konfiansa den Yehova ora nos ta konfrontá angustia finansiero, ta dor di buska yudansa den e publikashonnan di “e esklabo fiel i prudente.” (Mateo 24:45) Tempu-tempu e revista Spièrta! a publiká artíkulonan ku tabatin konseho- i sugerensianan práktiko pa trata ku retonan ekonómiko. E artíkulo “Kiko Bo Por Hasi si Bo Pèrdè Trabou?” di e Spièrta! (na spañó) di 8 di ougùstùs 1991, a duna ocho punto práktiko ku a yuda hopi hende keda finansieramente i emoshonalmente stabil ora nan a konfrontá un periodo di desempleo. * Klaru ku e tipo di guia ei mester ser balansá ku un punto di bista korekto di e berdadero importansia di plaka. Anto e artíkulo “Algu Mas Importante Ku Plaka” a trata esaki den e mesun edishon ei di e revista.—Eklesiastés 7:12.

Ora Problema ku Salú Ta Kousa Angustia

10. Kon e ehèmpel di Rei David ta mustra ku ta realístiko pa konfia den Yehova ora nos ta sufri di un malesa grave?

¹⁰ Ta realístiko pa konfia den Yehova ora nos ta sufri di un malesa grave? Klaru ku sí! Yehova ta sinti pa esnan enfermo den su pueblo. Mas ku esei, e ta dispuesto pa yuda. Tuma por ehèmpel Rei David. E mes kisas lo tabata gravemente malu ora ku el a skirbi tokante e manera ku Dios ta trata ku un persona rekto ku ta enfermo. El a bisa: “SEÑOR lo sosten’é riba su kama di malesa; den su enfermedat abo ta restor’é hasié salú.” (Salmo 41:1, 3, 7, 8) David su konfiansa den Dios a keda firme, i finalmente e rei a rekuperá di su malesa. Pero kon nos por desplegá konfiansa den Dios ora problema ku salú ta angustiá nos?

11. Kiko nos por pidi nos Tata selestial ora nos ta sufri di un malesa?

 ¹¹ Un manera ku nos por demostrá nos konfiansa den Yehova ora nos ta sufri di un malesa ta dor di roga Yehova den orashon pa yuda nos perseverá. Kisas nos por pidié yuda nos usa “sabiduria sano” di manera ku nos por buska e grado di salú ku nos sirkunstansia realístikamente ta permití. (Proverbionan 3:21) Tambe nos por pidié yuda nos desplegá pasenshi i perseveransia pa trata ku e malesa. Mas ku tur kos, nos lo ke pidi Yehova sostené nos, duna nos e forsa pa maske kiko ku pasa, nos sigui fiel na dje i no pèrdè nos balansa. (Filipensenan 4:13, NW) Keda fiel na Dios ta asta mas importante ku konserbá nos bida aktual. Si nos keda fiel, e Gran Dunadó di Rekompensa lo duna nos bida i salú perfekto pa eternidat.—Hebreonan 11:6.

12. Ki prinsipionan bíbliko por yuda nos tuma desishonnan sabí relashoná ku tratamentu médiko?

¹² Nos konfiansa den Yehova ta motivá nos tambe pa akudí na su Palabra, Beibel, pa haña guia práktiko. E prinsipionan ku nos ta haña den e Skritura por yuda nos tuma desishonnan sabí relashoná ku tratamentu médiko. Por ehèmpel, sabiendo ku Beibel ta kondená “bruheria,” nos lo evitá kualkier sistema di diagnostiká malesa òf kualkier tratamentu médiko ku tin di haber ku spiritismo. (Galationan 5:19-21; Deuteronomio 18:10-12) Un otro ehèmpel di Beibel su sabiduria konfiabel ta lo siguiente: “E hende simpel ta kere tur kos, ma e hòmber prudente ta wak bon unda e ta bai.” (Proverbionan 14:15) Pues, ora nos ta pensa pa tuma un tratamentu médiko, ta sabí di nos parti pa buska informashon konfiabel en bes di djis “kere tur kos.” Tal manera di pensa “huisioso” por yuda nos evaluá nos opshonnan kuidadosamente i tuma un desishon bon pensá i basá riba konosementu.—Tito 2:12.

13, 14. (a) Ki artíkulonan informativo tokante temanan di salú a sali publiká den e revistanan Toren di Vigilansia i Spièrta!? (Wak e kuadro na página 17.) (b) Ki konseho tokante kon pa trata ku malesanan króniko a sali den e Spièrta! (na spañó) di 22 di yanüari 2001?

¹³ Tambe nos por demostrá nos konfiansa den Yehova dor di hasi investigashon den e publikashonnan di e esklabo fiel. E revistanan Toren di Vigilansia i Spièrta! a yega di publiká artíkulonan informativo riba un variedat amplio di malesa- i problemanan médiko spesífiko. * Tin biaha, e revistanan aki a presentá artíkulonan den kua personanan ta konta kon nan tabatin éksito den trata ku vários trastorno, malesa króniko i desabilidat. Fuera di esei, tin artíkulonan ku a duna sugerensianan bíbliko i tambe konseho práktiko ku ta mustra kon pa biba ku problemanan króniko di salú.

¹⁴ Por ehèmpel, e Spièrta! (na spañó) di 22 di yanüari 2001 tabatin e seri “Konsuelo pa Esnan Enfermo.” E artíkulonan aki a presentá prinsipionan bíbliko útil i tambe informashon personal optené for di entrevista ku personanan ku ta bon na haltura, ya ku nan a biba ku malesa  debilitante pa hopi aña. E artíkulo “Kon pa Biba ku Bo Malesa ku Dignidat” a duna e siguiente konseho: Siña tur loke bo por tokante bo malesa. (Proverbionan 24:5) Fiha metanan práktiko, inkluso metanan pa yuda otro hende, pero sea konsiente ku kisas bo no por alkansá e mesun metanan ku otro hende. (Echonan 20:35; Galationan 6:4) No isolá bo mes di otro hende. (Proverbionan 18:1) Laga ku ora hende bishita bo, esei ta un eksperensia agradabel pa nan. (Proverbionan 17:22) Mas ku tur kos, mantené un amistat será ku Yehova i ku e kongregashon. (Nahum 1:7; Romanonan 1:11, 12) Nos no ta gradisidu pa e guia konfiabel ku Yehova ta proveé mediante su organisashon?

Ora un Debilidat Karnal Ta Persistí

15. Kon apòstel Pablo a logra sali ganá den su lucha kontra e debilidatnan di e karni imperfekto, i ki garantia nos por tin?

¹⁵ “No tin nada bon ta biba den mi, esta, den mi karni,” apòstel Pablo a skirbi. (Romanonan 7:18) Pablo tabata sa di su propio eksperensia kon difísil ta pa lucha kontra e deseonan i debilidatnan di e karni imperfekto. Sin embargo, Pablo tabatin konfiansa tambe ku lo e por a sali ganá. (1 Korintionan 9:26, 27) Kon? Dor di konfia kompletamente den Yehova. Ta p’esei Pablo por a bisa: “Hende miserabel ku mi ta! Ken lo libra mi di e kurpa di morto aki? Mi ta duna gradisimentu na Dios dor di Hesukristu, nos Señor!” (Romanonan 7:24, 25) Ke tal di nos? Nos tambe tin un lucha kontra debilidatnan karnal. Segun ku nos ta lucha pa trata ku e debilidatnan ei, ta fásil pa nos pèrdè konfiansa i bira konvensí ku nunka nos lo logra. Pero Yehova lo yuda nos si nos, meskos ku Pablo, realmente ta dependé riba dje i no riba nos mes forsa.

16. Ora un debilidat karnal ta persistí, kiko nos tin ku pidi den orashon, i kiko nos mester hasi si nos sufri un rekaida?

¹⁶ Ora un debilidat karnal ta persistí, nos por demostrá nos konfiansa den Yehova dor di suplik’é den orashon. Nos tin ku pidi Yehova, sí asta rog’é, pa duna nos e yudansa di su spiritu santu. (Lukas 11:9-13) Nos por pidi spesífikamente pa dominio propio, ku ta parti di Dios su fruta di spiritu. (Galationan 5:22, 23) Kiko  nos tin ku hasi si nos sufri un rekaida? Un kos ta sigur, nos no mester entregá. Laga nos nunka kansa di hasi orashon humildemente na nos Dios miserikòrdioso, pidiendo su pordon i yudansa. Yehova nunka lo no rechasá un kurason ku ta “repentí i kibrá” dor di e peso di un mal konsenshi. (Salmo 51:17) Si nos suplik’é ku un kurason sinsero i arepentí, Yehova lo yuda nos resistí tentashon.—Filipensenan 4:6, 7.

17. (a) Dikon ta bon pa reflekshoná riba loke Yehova ta pensa di e debilidat spesífiko ku nos ta luchando kontra dje? (b) Kua ta e tekstonan ku nos por siña for di kabes si nos ta luchando pa stòp di rabia lihé? pa kontrolá nos lenga? pa resistí entretenimentu òf rekreo ku no ta sano?

¹⁷ Tambe nos por demostrá nos konfiansa den Yehova dor di buska yudansa den su Palabra. Usando un konkordansia bíbliko òf e Indèks di Publikashonnan Watch Tower, nos por buska kontesta riba e pregunta: ‘Kiko Yehova ta pensa di e debilidat spesífiko aki ku mi ta luchando kontra dje?’ Dor di reflekshoná riba loke Yehova ta pensa di e asuntu por fortalesé nos deseo pa agrad’é. Di e manera ei nos por kuminsá sinti manera e ta sinti, i odia loke e ta odia. (Salmo 97:10) Tin persona a ripará ku loke ta yuda nan ta di siña for di kabes e tekstonan bíbliko ku ta apliká na e debilidat spesífiko ku nan ta luchando kontra dje. Nos ta luchando pa stòp di rabia lihé? Anto nos por purba siña tekstonan manera Proverbionan 14:17 i Efesionan 4:31 for di kabes. Nos tin problema pa kontrolá nos lenga? Kisas nos por memorisá tekstonan manera Proverbionan 12:18 i Efesionan 4:29. Nos ta inkliná den direkshon di entretenimentu òf rekreo ku no ta sano? Kisas nos por purba kòrda versíkulonan manera Efesionan 5:3 i Kolosensenan 3:5.

18. Dikon nos no mester laga bèrgwensa stroba nos di pidi e ansianonan yudansa pa vense nos debilidat?

¹⁸ Un manera mas pa demostrá nos konfiansa den Yehova ta dor di buska yudansa di e ansianonan den kongregashon ku ta nombrá pa spiritu. (Echonan 20:28) Al fin i al kabo, e ‘donnan den hende’ aki ta un perkurashon ku Yehova a hasi mediante Kristu pa protehá i kuida su karnénan. (Efesionan 4:7, 8, 11-14) Ta bèrdat ku no ta fásil pa pidi yudansa ora bo ta lucha kontra un debilidat. Tal bes nos tin bèrgwensa, i ta teme ku e ansianonan lo tin ménos rèspèt pa nos. Al kontrario, e hòmbernan spiritualmente madurá aki indudablemente lo respetá nos pasobra nos tabatin e kurashi di pidi yudansa. Ademas, e ansianonan  ta purba reflehá e kualidatnan di Yehova ora nan ta trata ku e tou. Nan konseho i instrukshon práktiko i bondadoso saká for di e Palabra di Dios, podisé ta nèt loke nos tin mester pa fortalesé nos determinashon lo sufisiente pa vense nos debilidat.—Santiago 5:14-16.

19. (a) Den ki manera Satanas ta purba usa e banidat di bida den e mundu aki? (b) Kiko konfiansa ta enserá, i kiko mester ta nos determinashon firme?

¹⁹ No lubidá nunka ku Satanas sa ku ta un poko tempu mas so a ked’é. (Revelashon 12:12) E ke usa e banidat di bida den e mundu aki pa desanimá nos i pa pone nos entregá. Laga nos tin pleno konfiansa den loke ta wòrdu ekspresá na Romanonan 8:35-39: “Ken lo separá nos for di e amor di Kristu? Tribulashon, angustia, persekushon, hamber, sunú, peliger òf spada? . . . Ma den tur e kosnan aki nos ta mas ku vensedó dor di esun ku a stima nos. Pasobra mi ta konvensí ku ni morto, ni bida, ni angelnan, ni prinsipadonan [gobièrnunan], ni kosnan presente, ni kosnan futuro, ni podernan, ni haltura, ni profundidat, ni ningun otro kos kreá, lo por separá nos for di e amor di Dios ku ta den Kristu Hesus nos Señor.” Ki un tremendo deklarashon di konfiansa den Yehova! Sin embargo, tal konfiansa ta mas ku un sintimentu. Mas bien e ta un konfiansa ku ta enserá e desishonnan bon pensá ku nos ta tuma den nos bida diario. P’esei anto, laga nos ta firmemente determiná pa konfia kompletamente den Yehova den tempu di angustia.

[Nota]

Bo Ta Kòrda?

• Ora nos ta konfrontá problemanan ekonómiko, kon nos por demostrá ku nos ta konfia den Yehova?

• Kon nos por demostrá konfiansa den Dios ora problemanan di salú ta angustiá nos?

• Ora un debilidat karnal ta persistí, kon nos por demostrá ku nos realmente ta dependé riba Yehova?

[Preguntanan di Estudio]

[Kuadro na página 17]

Bo Ta Kòrda e Artíkulonan Aki?

Ora nos ta sinti nos mes angustiá debí na problemanan di salú, ta un animashon pa lesa tokante otro hende ku tabatin éksito den trata ku trastorno médiko, malesa króniko òf desabilidat. At’akí algun artíkulo ku a sali publiká den e revistanan Toren di Vigilansia i Spièrta!

“Kon Mi A Trata ku Mi Debilidatnan” a konsentrá riba kon pa trata ku pensamentu negativo i depreshon.—E Toren di Vigilansia (na spañó), 1 di mei 1990.

“Ni Sikiera un Pulmon di Heru No Por A Stòp E di Prediká.”—Spièrta! (na spañó), 22 di yanüari 1993.

“Un Bala A Kambia Mi Bida” a enfoká riba kon pa trata ku parálisis.—Spièrta! (na spañó), 22 di òktober 1995.

“Bo No Sa Kon Bo Bida Lo Ta Mañan” a konsiderá kon pa trata ku trastorno di beis bipolar òf sikósis maniako-depresivo.—E Toren di Vigilansia, 1 di desèmber 2000.

“Loida Su Salida for di Silensio” a enfoká riba kon pa trata ku parálisis selebral.—Spièrta!, 8 di mei 2000.

“Mi Lucha ku Endometriósis.”—Spièrta!, 8 di ougùstùs 2000 (na spañó, 22 di yüli 2000).

“Ounke Surdu i Siegu, Tòg Mi A Haña Siguridat.”—Spièrta!, 8 di mei 2001 (na spañó, 22 di aprel 2001).

“Mi A Gana e Bataya Kontra Depreshon Posparto.”—Spièrta! (na spañó), 22 di yüli 2002.

[Plachi na página 15]

Ora nos pèrdè trabou, kisas ta sabí pa nos reeksaminá nos estilo di bida

[Plachi na página 16]

E relato di Loida ta mustra kon konfiansa den Yehova ta yuda un hende perseverá. (Wak e kuadro na página 17)

[Plachi na página 18]

Nos no mester tin bèrgwensa di pidi yudansa pa vense nos debilidatnan