Nos Rumannan di Edat Ta Balioso pa Abo?

ORA e israelitanan di antigwedat tabata den un pakto ku Dios, e mandato tabata: “Lanta para pa esun ku tin kabei blanku, onra e ansiano i teme bo Dios.” (Levítiko 19:32) Pues rèspèt pa hende grandi tabata un deber sagrado, estrechamente ligá ku sumishon na Dios. Maske kristiannan djawe no ta bou di e Lei di Moisés mas, e lei aki ta rekordá nos ku Yehova ta sigui konsiderá hende grandi ku ta sirbié mes balioso i presioso ku e tempu ayá. (Proverbionan 16:31; Hebreonan 7:18) Nos tin Yehova su punto di bista? Nos ta balorá nos rumannan hende grandi?

Elias A Balorá Su Amigu di Edat

Den e buki bíbliko di Segundo Reinan tin un relato ku ta mustra nos kon importante rèspèt pa hende grandi ta. E ta deskribí kon profeta Eliseo, ku tabata mas yòn, a bira susesor di profeta Elias. Ban wak kiko a pasa riba Elias su último dia komo profeta den e reino di dies tribu di Israel.

Riba e dia ei, Yehova a bisa e profeta di edat aki p’e bai di Gilgal pa Bèt-èl, i di Bèt-èl pa Jeriko, i for di Jeriko pa Riu Hordan. (2 Reinan 2:1, 2, 4, 6) Durante e biahe ei di kasi 50 kilometer, tres biaha Elias a supliká Eliseo pa stòp di siguié. Pero, meskos ku e hóben Ruth kende siglonan promé a nenga rotundamente di bai laga Noemí, asina Eliseo a nenga di bai laga e profeta di edat. (Ruth 1:16, 17) Tres bes Eliseo a bisa: “Manera SEÑOR ta biba i manera abo mes ta biba, lo mi no laga bo.” (2 Reinan 2:2, 4, 6) Pa e tempu ei, Eliseo a yuda Elias pa alrededor di seis aña kaba. Pero tòg e tabata deseá di sirbi Yehova huntu ku Elias mas tantu tempu posibel. Sí, e relato ta sigui bisa: “Anto a sosodé ku miéntras nan tabata kana ta papia, mira, . . . Elias a subi bai.” (Versíkulo 11) Elias ku Eliseo a keda papia ku otro te na e último momentu di Elias su ministerio den Israel. Aparentemente e profeta yòn tabata ansioso pa apsorbá mas tantu instrukshon i animashon posibel for di e profeta mas grandi i mas eksperensiá. Klaramente, el a balorá su amigu di edat.

‘Manera Tata ku Mama’

No ta difísil pa komprondé dikon Eliseo a stima e profeta di edat komo amigu, i asta komo un tata spiritual. (2 Reinan 2:12) Un  poko promé ku Elias su asignashon na Israel a terminá, el a bisa Eliseo: “Pidi loke bo kier pa mi hasi pa bo promé ku mi wòrdu kitá for di bo.” (Versíkulo 9) Pues te na final, Elias a mustra interes den e bienestar spiritual di su susesor i tambe pa e trabou di Dios sigui.

Awe, ta masha konmovedor pa mira ku nos rumannan kristian di edat ta mustra e mesun spiritu di ‘tata ku mama’ ora nan ta kompartí nan konosementu i sabiduria generosamente ku esnan mas yòn. Por ehèmpel, boluntarionan ku tin hopi tempu ta sirbi na ofisinanan di sukursal di Testigunan di Yehova, ku muchu gustu ta yuda miembronan nobo di e famia di Bètel pa nan bira kapas den nan trabou. Superintendentenan biahero ku nan esposanan ku a bishitá kongregashonnan pa hopi aña tambe ta kontentu pa kompartí e eksperensia ku nan a akumulá, ku esnan ku ta haña entrenamentu pa sirbi komo superintendente biahero. Ademas, den kongregashonnan di Testigunan di Yehova rònt mundu, tin rumannan grandi ku a sirbi Yehova fielmente pa dékadanan i ku buena gana ta kompartí nan sabiduria sano i eksperensia ku miembronan nobo di e kongregashon.—Proverbionan 2:7; Filipensenan 3:17; Tito 2:3-5.

E interes sinsero ku e rumannan stimá di edat aki ta mustra ta pone ku ta un berdadero plaser pa mustra rèspèt pa nan. Pues, nos kier imitá Eliseo su ehèmpel i mustra apresio di kurason pa nos rumannan di edat. Manera apòstel Pablo ta rekordá nos, laga nos sigui trata ‘un hòmber bieu manera un tata’ i “muhénan mas bieu manera mama.” (1 Timoteo 5:1, 2) Ora nos hasi esei, berdaderamente nos ta kontribuí pa tur kos den e kongregashon kristian rònt mundu kana bon i nos ta yuda e kongregashonnan progresá.

[Plachi na página 30]

Eliseo a deseá di sirbi Yehova huntu ku Elias mas tantu tempu posibel

[Plachinan na página 31]

Hóbennan por benefisiá masha hopi for di kristiannan di edat