Pregunta di Lektor

Ta un kustumber na hopi parti di mundu pa duna regalo di kasamentu. Kua prinsipionan bíbliko nos mester tuma na kuenta ora di duna òf haña e regalonan ei?

Beibel ta aprobá dunamentu di regalo ora esei ta wòrdu hasí ku e motibu korekto i na e okashon apropiá. Relashoná ku e asuntu di dunamentu, Beibel ta animá kristiannan berdadero pa imitá nan Perkuradó generoso, Yehova. (Santiago 1:17) Apòstel Pablo a urgi kristiannan: “No laga di hasi bon i di kompartí ku otro; pasobra sorto di sakrifisionan asina ta agradá Dios.” Pues kristiannan ta wòrdu animá pa ta generoso.—Hebreonan 13:16; Lukas 6:38.

Pero kiko di mesa di regalo, konosí komo bruidstafel, ku ta un práktika komun den diferente pais? Den algun pais ta normal pa e pareha ku ta bai kasa bishitá un establesimentu komersial pa mira kiko nan kier komo regalo, i reservá e artíkulonan aki. Despues ta informá famia i amigunan di e pareha ta na kua establesimentu nan por kumpra un di e artíkulonan. Esaki por zona práktiko dor ku e kumpradó no tin nodi pèrdè tempu pa buska un regalo, i e pareha no ta hañ’é ta debolbé artíkulonan indeseá.

Si un pareha ta deseá di tin un mesa di regalo òf nò, ta un asuntu personal. Sin embargo, un kristian lo kier tene kuidou pa evitá kualkier praktiká ku ta violá prinsipionan bíbliko. Por ehèmpel, kiko lo pasa si un pareha ku ta komprometí pa kasa ta skohe artíkulonan ku ta hopi kostoso? Den e kaso ei, esnan ku no tin hopi moda kisas lo no por duna un regalo, òf nan por sinti ku ta mihó pa nan no aseptá e invitashon pa no pasa den e bèrgwensa di a trese un regalo barata. Un señora kristian a skirbi: “Dunamentu di regalo pa kasamentu a para bira un karga. Mi tabata purba di ta generoso, pero últimamente mi no ta sinti e felisidat di duna ku mi tabata sinti ántes.” Lo ta hopi tristu si un kasamentu para bira un fuente di desanimashon!

Definitivamente, e dunadó no mester sinti ku pa e regalo por ta aseptabel, e mester kumpr’é na un sierto establesimentu òf ku e mester gasta un sierto suma di plaka. Al fin i al kabo, Hesukristu a indiká ku loke ta mas balioso den Dios su bista ta e aktitut di kurason di e dunadó i no kuantu e regalo ta kosta. (Lukas 21:1-4) Meskos tambe, tokante dunamentu di regalonan na esnan den nesesidat, apòstel Pablo a skirbi: “Laga kada un hasi manera el a proponé den su kurason; no kontra su gustu òf obligá; pasobra Dios ta stima esun ku ta duna ku alegria.”—2 Korintionan 9:7.

Bíblikamente no tin nada malu den identifiká bo mes komo e dunadó di un regalo, kisas dor di pone un nota huntu ku kuné. Sin embargo, na algun lugá, ta un kustumber pa bisa dilanti di tur esnan presente kiko kada hende a duna. E kustumber aki por hiba na problema. Esnan ku a duna un regalo kisas no kier pa otro hende haña sa kiko nan a duna, pa evitá di hala indebido atenshon na nan mes. Personanan asina ta aktua na armonia ku e prinsipio hañá na Mateo 6:3 [Beibel na papiamentu koriente], kaminda Hesus a bisa: “Ma abo, ora bo ta duna esnan ku ta den nesesidat algu, no laga bo man robes sa kiko bo man drechi ta hasi.” Otro hende ta sinti ku dunamentu di regalo ta algu personal i mester keda entre e dunadó i esun ku ta haña e regalo. Ademas, identifikando e dunadó dilanti tur presente por pone ku hende ta kuminsá kompará e regalonan ku otro i asina ‘instigá kompetensia.’ (Galationan 5:26, NW) Sin duda kristiannan lo kier evitá di pone hende sinti nan mes inkómodo òf haña bèrgwensa dor di anunsiá públikamente e nòmbernan di e dunadónan di regalo.—1 Pedro 3:8.

Sí, dor di aktua na armonia ku e prinsipionan ku tin den e Palabra di Dios, dunamentu di regalo lo sigui ser un fuente di goso.—Echonan 20:35.