Ta Un ‘Iglesia Berdadero’ So Tin?
Ta Un ‘Iglesia Berdadero’ So Tin?
“MESKOS ku tin un solo Kristu, asina tin un solo kurpa di Kristu, un solo Brùit di Kristu: ‘un solo Iglesia Katóliko i apostóliko.’”—Dominus Iesus.
Asina e kardinal katóliko romano, Joseph Ratzinger, a splika e siñansa di su iglesia ku ta un iglesia berdadero so por tin. El a bisa ku e iglesia ei ta “un solo Iglesia di Kristu, i esei ta Iglesia Katóliko.”
“No Ta Iglesia den e Sentido Eksakto di Palabra”
Ounke Papa Juan Pablo II a insistí ku den e dokumento Dominus Iesus no tin nada di “arogansia pa ku otro religion, òf falta di rèspèt pa nan,” lidernan di iglesia protestant sí a reakshoná fuertemente riba dje. Por ehèmpel, n’e Asamblea General Presbiteriano na Belfast, Nort Irlanda, na yüni 2001, un minister a bisa ku e dokumento ta produkto di “un grupo poderoso den Iglesia Katóliko Romano . . . ku ta spantá pa e aktitut muchu habrí ku Vatikano II a asumí.”
Robin Eames, arsobispu di Iglesia di Irlanda, a bisa ku lo e keda “sumamente desapuntá” si e dokumento ta boga pa Iglesia Katóliko “bai bèk na su sistema di pensa promé ku Vatikano II.” Den su komentario riba e deklarashon di Vatikano ku e iglesianan ku ta rechasá sierto doktrinanan katóliko “no ta iglesia den e sentido eksakto di palabra,” Eames a bisa: “Esei lo por ta un insulto pa mi.”
Kiko a motivá Ratzinger pa skirbi su Dominus Iesus? Ta parse ku e asina yamá relativismo religioso a molestiá e Curia Katóliko Romano. Segun The Irish Times, “e surgimentu di un teologia pluralista—ku básikamente ta bisa ku tur religion ta mes bon . . . a bin ta preokupá Kardinal Ratzinger mas i mas.” Aparentemente ta e punto di bista aki a provoká su komentarionan tokante un solo iglesia berdadero.
Ta Importá na Kua Iglesia Bo Ta Pertenesé?
Klaru ku pa algun hende, “relativismo religioso” òf “teologia pluralista” ta muchu mas rasonabel i atraktivo ku kualkier idea ku ta un iglesia berdadero so por tin. Pa nan, religion mester ta puramente un kuestion di preferensia personal. Nan ta bisa ku ‘al fin i al kabo no ta importá masha na kua iglesia bo ta pertenesé.’
Esei por parse e punto di bista mas tolerante—ounke el a kousa divishon den religion dor
di kua a lanta un gran kantidat di diferente denominashon. Hopi ta bisa ku ‘e diversidat ei den religion ta djis un ekspreshon saludabel di libertat individual.’ Sin embargo, segun e eskritor Steve Bruce, bon mirá, e “toleransia religioso” ei no ta nada mas ku “indiferensia religioso.”—A House Divided: Protestantism, Schism, and Secularization.Kiko ta e punto di bista korekto anto? Ta un iglesia berdadero so tin? Akaso Iglesia Katóliko Romano ta e úniko iglesia berdadero? Otro iglesianan tambe ta aseptabel pa Dios? Siendo ku e preguntanan aki tin di haber ku nos relashon ku nos Kreadó, sigur ta importante pa haña sa su punto di bista riba e asuntu aki. Kon nos por haña sa esei? Dor di wak den Beibel, e Palabra inspirá di Dios. (Echonan 17:11; 2 Timoteo 3:16, 17) Laga nos analisá loke e ta bisa riba e tópiko aki di un solo iglesia berdadero.
[Rekonosementu pa Potrèt na página 2]
KAFT: Mark Gibson/Index Stock Photography