Un Solo Berdadero Fe Kristian Ta un Realidat

HESUKRISTU a establesé un solo iglesia, òf kongregashon. E kongregashon ei tabata un kurpa spiritual, òf un famia spiritual, es desir, un grupo di hende ku a bini huntu i ku Dios a skohe pa medio di su spiritu. Dios ta rekonosé nan tur komo su “yunan.”—Romanonan 8:16, 17; Galationan 3:26.

Hesus a siña ku ta un medio so Dios a usa pa dirigí hende na e bèrdat i na bida. Pa ilustrá e bèrdat importante ei, Hesus a kompará e medio ku ta hiba na bida eterno ku un kaminda. El a bisa: “Drenta dor di e porta smal, pasobra hanchu ta e porta i espasioso e kaminda ku ta hiba na destrukshon, i hopi ta esnan ku ta drenta dor di dje. Pasobra chikitu ta e porta i smal e kaminda ku ta hiba na bida, i poko ta esnan ku ta hañ’é.”—Mateo 7:13, 14; Juan 14:6; Echonan 4:11, 12.

Un Kongregashon Uní

Nos no mester kere ku e kongregashon di promé siglo tabata “un sosiedat mundial, universal i organisá manera nos kier men awendia ora nos ta papia tokante iglesia katóliko,” segun The New Dictionary of Theology. Pakiko no? E ta bisa: “Pa e simpel motibu ku un sosiedat universal organisá asina no a eksistí.”

Niun hende lo por ègt nenga e echo ku e kongregashon kristian di promé siglo no tabata parse na nada e iglesianan institushonalisá ku nos ta mira awe. Pero e tabata organisá sí. E kongregashonnan individual no a funshoná independiente di otro. Nan tur a rekonosé e outoridat di un kuerpo gobernante den Yerusalèm. E kuerpo ei, ku a konsistí di e apòstelnan i ansianonan di e kongregashon di Yerusalèm, a yuda konserbá e unidat di e kongregashon komo e “solo kurpa” [NW] di Kristu.—Efesionan 4:4, 11-16; Echonan 15:22-31; 16:4, 5. 

 Kiko a sosodé ku e úniko kongregashon berdadero ei? Akaso ta é a bira e poderoso Iglesia Katóliko? Ta é a desaroyá den e vários denominashonnan dividí di Iglesia Protestant ku nos ta mira awe? Òf ta algu otro a sosodé?

“Trigu” i “Yerba Shimaron”

Pa haña e kontestanan, laga nos analisá kuidadosamente kiko Hesukristu mes a bisa ku lo a pasa. Kisas lo bo keda sorprendí pa haña sa ku Hesus a antisipá ku su kongregashon lo a disparsé for di esena i ku lo el a permití e situashon lamentabel ei kontinuá pa hopi siglo.

Hesus a konektá su kongregashon ku “e reino di shelu,” i den e konteksto ei el a bisa: “E reino di shelu por wòrdu kompará ku un hende ku a sembra bon simia den su kunuku. Ma miéntras ku hende tabata drumi, su enemigu a bin, a sembra simia di yerba shimaron den e trigu i a kohe su kaminda bai. I ora ku e trigu a sprùit i a forma tapushi, e yerba shimaron tambe a keda bisto. I e esklabonan di e doño di kunuku a bin bis’é: ‘Señor, no ta bon simia bo a sembra den bo kunuku? Di kon anto tin yerba shimaron aden?’ I el a bisa nan: ‘Ta un enemigu a hasi esaki!’ I e esklabonan a puntr’é: ‘Bo kier anto pa nos bai i rekohé nan?’ Ma el a kontestá: ‘Nò, pa no sosodé ku miéntras boso ta rekohé e yerba shimaron, boso ranka e trigu tambe huntu kuné. Laga tur dos krese huntu te na kosecha; i na tempu di kosecha lo mi bisa e kosechadónan: Rekohé e yerba shimaron promé i mara nan na bòshi pa kima nan; ma rekohé e trigu warda den mi mangasina.’”—Mateo 13:24-30.

Hesus a splika ku “esun ku [a] sembra” tabata e mes i ku “e bon simia” a representá su berdadero disipelnan. Su “enemigu” tabata Satanas e Diabel. “E yerba shimaron” tabata kristiannan falsu ku pokopoko pero sigur a bin forma parti di e kongregashon kristian di promé siglo. El a bisa ku lo e laga “e trigu” i “e yerba shimaron” krese huntu te na “kosecha,” ku lo yega na “fin di mundu.” (Mateo 13:37-43) Kiko tur esaki a nifiká?

E Kongregashon Kristian A Ser Korumpí

Djis despues di morto di e apòstelnan, maestronan apóstata di den e kongregashon a kuminsá tuma kontròl di esaki. Nan tabata papia “kosnan pèrvèrso, pa desviá e disipelnan i hasi nan bai nan tras.” (Echonan 20:29, 30) Esei a pone hopi kristian “kai for di fe.” Nan a bai tras di “fábula.”—1 Timoteo 4:1-3; 2 Timoteo 4:3, 4.

 The New Dictionary of Theology ta bisa ku pa siglo 4 di nos era “kristianismo katóliko a bira e religion ofisial . . . di e Imperio Romano.” Nan a forma un “koalishon di un sosiedat eklesiástiko i sivil”—un meskla di Iglesia i Estado ku tabata totalmente kontrali n’e kreensianan di e promé kristiannan. (Juan 17:16; Santiago 4:4) E mesun fuente ta deklará ku den transkurso di tempu, henter e struktura i karakterístika di e iglesia, i tambe hopi di su kreensianan fundamental, a kambia radikalmente “bou di influensia di un kombinashon straño i kompletamente insaludabel di T[èstamènt] B[ieu] i modelonan neoplatóniko.” Manera Hesukristu a pronostiká, segun ku kristiannan falsu a floresé, su berdadero disipelnan a pèrdè for di bista.

Hesus su oyentenan tabata sa kon difísil ta pa distinguí berdadero trigu for di yerba shimaron manera e yerba venenoso di e famia Lolium temulentum, ku durante e temporada ku e ta krese parse trigu mashá. Pues Hesus tabata ilustrando ku pa un tempu lo tabata difísil pa distinguí e kristiannan berdadero for di e variedat di kristiannan falsu. Esaki no ta nifiká ku e kongregashon kristian a stòp di eksistí, pasobra Hesus a primintí di sigui guia su rumannan spiritual “te na fin di mundu.” (Mateo 28:20) Hesus a bisa ku e trigu lo a sigui krese. Sin embargo, atraves di siglonan, kristiannan berdadero—tantu individual òf komo grupo—sigur a hasi nan bèst pa pega n’e siñansanan di Kristu. Pero ya nan no tabata forma un kuerpo òf organisashon visibel mas ku bo por a identifiká klaramente. Un kos sí ta sigur: nan no tabata manera e sistema religioso apóstata ku atraves di historia a trese solamente bèrgwensa i desonor riba e nòmber di Hesukristu.—2 Pedro 2:1, 2.

‘E Hòmber di Piká Ta Keda Manifestá’

Apòstel Pablo a profetisá algu mas ku lo karakterisá religion falsu. El a skirbi: “No laga ni un hende gaña boso di ningun manera, pasobra e dia [di Yehova] lo no bin promé ku e kaimentu for di fe yega i e hòmber di piká keda manifestá.” (2 Tesalonisensenan 2:2-4) E “hòmber di piká” aki no ta nada ménos ku e klase di klero ku a halsa su mes den un posishon di outoridat riba e kongregashon “kristian.” *

E apostasia a kuminsá den tempu di apòstel Pablo. Ora e apòstelnan a muri, mas i mas hende a kai for di fe pasobra ya no tabatin e influensia di e apòstelnan ku por a frena e apostasia. Pablo a bisa ku esaki lo tabata bisto na “e aktividat di Satanas, ku tur poder i señalnan i maravianan falsu, i ku tur e engaño.” (2 Tesalonisensenan 2:6-12) Esei ta un deskripshon eksakto di e aktividatnan di masha hopi lider religioso atraves di historia!

Pa respaldá nan pretenshon ku Katolisismo Romano ta e úniko iglesia berdadero, lidernan katóliko ta bisa ku nan obispunan a “heredá nan apostolado for di e apòstelnan original pa medio di un liña di suseshon ku ta bai bèk te na kuminsamentu [di kristianismo].” En realidat, e pretenshon aki di suseshon apostóliko no tin base históriko ni bíbliko. No tin niun evidensia konvinsente ku spiritu santu di Dios a yega di dirigí e iglesia ku a surgi despues di morto di e apòstelnan di Hesus.—Romanonan 8:9; Galationan 5:19-21.

I kiko di e otro iglesianan ku a lanta manera paddestoel despues di e asina yamá Reformashon? Nan a sigui e modelo di e kongregashon kristian di promé siglo? Nan a reestablesé e puresa di e kongregashon kristian original? Ta bèrdat ku despues di e Reformashon, Beibel a bira disponibel pa hopi hende di pueblo komun den nan propio idioma. Sin embargo, historia ta mustra ku e iglesianan aki a sigui siña doktrinanan eróneo. *—Mateo 15:7-9.

 Pero tuma nota di esaki. Hesukristu definitivamente a profetisá ku su úniko kongregashon berdadero lo a ser reestablesé durante loke el a yama e konklushon di un sistema di kosnan. (Mateo 13:30, 39, NW) Profesia di Beibel ku ta kumpliendo ta mustra ku aktualmente nos ta bibando den e tempu ei. (Mateo 24:3-35) Siendo ku esei ta e kaso, nos kada un tin ku puntra: ‘Unda e úniko iglesia berdadero ei ta?’ Lo mester bira mas i mas fásil pa identifik’é.

Kisas bo ta pensa ku bo a haña e iglesia òf kongregashon ei kaba. Ta importante pa bo hasi sigur. Pakiko? Pasobra meskos ku den e promé siglo, ta un iglesia berdadero so por tin. Bo a tuma e tempu pa hasi sigur ku bo iglesia ta sigui estrechamente e modelo ku e kongregashon kristian di promé siglo a establesé i ku e ta pega lealmente n’e siñansanan di Hesukristu? Pakiko no analisá esaki awor? Testigunan di Yehova lo ta kontentu pa yuda bo hasi netamente esei.—Echonan 17:11.

[Nota]

[Plachinan na página 5]

Kiko e ilustrashon di Hesus di e trigu i e yerba shimaron ta siña nos tokante e kongregashon berdadero?

[Plachinan na página 7]

Bo iglesia ta reflehá e modelo ku e kristiannan di promé siglo a establesé den prediká i studia?