Historia di Bida

Yehova Semper Ta Perkurá pa Nos

SEGUN E RELATO DI ENELESI MZANGA

Tabata aña 1972. Dies mucha hòmber ku tabata miembro di Liga Hubenil di Malawi a kibra drenta nos kas, gara mi i lastra mi hiba na un plantashon di kaña eibanda. Nan a bati mi i laga mi bentá einan keriendo ku mi tabata morto.

Hopi Testigu di Yehova na Malawi a eksperensiá atakenan kruel manera esaki. Pakiko nan a wòrdu persiguí? Kiko a yuda nan wanta? Permití mi konta bo e historia di mi famia.

MI A nase dia 31 di desèmber 1921, i a lanta den un famia masha religioso. Mi tata tabata un pastor di e Iglesia Presbiteriano Sentral di Afrika. Mi a lanta den Nkhoma, un pueblito serka di Lilongwe, kapital di Malawi. Ora mi tabatin 15 aña, mi a bira esposa di Emmas Mzanga.

Un dia un amigu di mi tata ku tambe tabata un pastor, a bishitá nos. El a ripará ku tabatin Testigunan di Yehova ta biba serka di nos kas i el a atvertí nos pa no atendé ku nan. El a bisa nos ku e Testigunan tin demoño i ku si nos no tene kuidou, nos tambe por bira endemoniá. E atvertensia ei a spanta nos asina tantu ku nos a muda bai un otro pueblo, kaminda Emmas a haña trabou komo bendedó den un tienda. Pero poko despues nos a bin haña sa ku nos kas nobo tambe ta keda den bisindario di Testigunan di Yehova!

Sin embargo, no a tarda hopi ku Emmas su amor profundo pa Beibel a konmov’é pa papia ku un Testigu. Despues di a haña kontestanan satisfaktorio pa su tantísimo preguntanan, Emmas a aseptá e Testigu su oferta pa studia  Beibel kuné. Na prinsipio nan tabata studia na e tienda kaminda e tabata traha, pero despues nan a tene e studio semanal na nos kas. Kada bes ku e Testigunan di Yehova tabata bin, mi tabata sali bai pasobra mi tabatin miedu di nan. Apesar di esei, Emmas a sigui studia Beibel. El a batisá na aprel 1951, mas o ménos seis luna despues ku el a kuminsá studia. Sin embargo, e no a bisa mi nada tokante esei pasobra e tabatin miedu ku esei lo a kibra nos matrimonio.

Tres Siman di Problema

Pero un dia mi amiga Ellen Kadzalero a bisa mi ku mi kasá a batisá komo Testigu di Yehova. Mi tabata kushi di rabia! For di e dia ei padilanti, mi no a papia mas kuné ni mi no a kushiná p’e. Tambe mi a stòp di buska awa i mi no tabata keint’é mas pa e baña. Segun nos kultura, ta e esposa ta responsabel pa hasi esei.

Despues di a soportá e trato aki pa tres siman, bondadosamente Emmas a pidi mi pa nos papia, anto e ora ei el a konta mi ta pakiko el a tuma e desishon pa bira un Testigu. El a lesa i splika vários teksto di Beibel, entre otro 1 Korintionan 9:16. Mi a keda profundamente konmoví i a sinti ku ami tambe mester partisipá den prediká e bon nobo. Pues mi a disidí di kuminsá studia Beibel ku Testigunan di Yehova. E mesun anochi ei, mi a prepará un bon kuminda p’e, i mi kerido esposo a haña un berdadero alivio.

Kompartiendo e Bèrdat ku Famia i Amigunan

Nos mayornan a oponé nos fuertemente ora ku nan a tende ku nos tabata asosiá ku Testigunan Yehova. Mi famia a skirbi nos un karta pa bisa ku nan no kier pa nos bishitá nan mas. Maske nan reakshon a hasi nos tristu, nos a konfia den Hesus su promesa ku nos lo haña hopi mama ku tata i ruman spiritual.—Mateo 19:29.

Mi a progresá lihé den mi studio di Beibel i mi a batisá solamente tres luna i mei despues di mi kasá, na ougùstùs di aña 1951. Mi a sinti ku mi tin ku kompartí e bèrdat ku mi amiga Ellen. Ta bon mes ku el a aseptá mi oferta pa studia Beibel. Na mei di 1952, Ellen a batisá i a bira mi ruman spiritual; esaki ta algu ku a hasi nos amistat mas fuerte. Te awe, ainda nos ta bon amiga.

Na 1954, Emmas a haña asignashon pa bishitá kongregashonnan komo superintendente di sirkuito. Nos tabatin seis yu kaba. E tempu ei, un superintendente biahero tabata pasa un siman bishitando un kongregashon anto e siguiente siman e tabata serka su kasá i yunan. Sin embargo, ora Emmas tabata biaha, semper el a hasi sigur ku mi a tene nos studio di Beibel ku e famia. Nos a purba hasi e studio ku e muchanan algu agradabel. Tambe nos a papia ku konvikshon sinsero tokante nos amor pa Yehova i pa e bèrdat di su Palabra, i nos a traha huntu komo famia den e trabou di prediká. E programa di entrenamentu spiritual aki a fortalesé e fe di nos yunan i a prepará nan pa e persekushon ku nos tabata a punto di enfrentá.

Persekushon Religioso Ta Kuminsá

Malawi a bira un nashon independiente na 1964. Ora lidernan dje partido na mando a haña sa di nos neutralidat polítiko, nan a purba fòrsa nos pa kumpra karchi di afiliashon n’e partido. * Dor ku ami ku Emmas a nenga di kumpra karchi, miembronan di Liga Hubenil a destruí nos kunuku di maishi, ku tabata nos  fuente prinsipal di kuminda pa e siguiente aña. Segun ku e miembronan di Liga Hubenil tabata kap e maishinan, nan tabata kanta: “Tur hende ku nenga di kumpra karchi di Kamuzu [Presidente Banda], komehein lo kome nan tapushi ku no ta hechu ainda i e hendenan aki lo yora.” Pero apesar ku nos a pèrdè nos kuminda, nos no a desesperá. Nos a sinti kon Yehova a perkurá pa nos. Amorosamente el a duna nos fortalesa.—Filipensenan 4:12, 13, NW.

Un anochi lat na ougùstùs di aña 1964, mi tabata mi so na kas ku e muchanan. Nos tabata drumí, pero un zonidu di kantamentu leu ayá a lanta mi. Tabata e Gulewamkulunan, un sosiedat sekreto di bailadónan di tribu ku tabata ataká hende i pretendé di ta spiritu di antepasadonan morto. E Liga Hubenil a manda e Gulewamkulunan pa ataká nos. Mesora mi a kore lanta e muchanan, i promé ku e atakadónan a yega nos kas, nos a hui bai den mondi.

For di nos lugá di skonde nos por a mira un klaridat inmenso. E Gulewamkulunan a pega nos kas ku dak trahá di yerba na kandela. E kas a kima plat-plat huntu ku tur nos poseshonnan. Segun ku e atakadónan tabata kana bai for di loke a sobra di nos kas ku tabata saka huma, nos a tende nan bisa: “Nos a sende un bon kandela pa e Testigu ei tene su mes kayente.” Nos a keda sumamente gradisidu na Yehova ku nos a logra skapa! Sí, nan a destruí tur nos propiedat, pero nan no a destruí nos determinashon pa konfia den Yehova mas bien ku den hende.—Salmo 118:8.

Nos a haña sa ku e Gulewamkulunan a hasi e mesun kos teribel ei ku sinku otro famia Testigu di Yehova den nos área. Nos a keda hopi kontentu i gradisidu ora e rumannan di e kongregashonnan den serkania a bin yuda nos! Nan a rekonstruí nos kasnan i a perkurá pa nos haña kuminda pa vários siman.

Persekushon Ta Intensifiká

Na sèptèmber 1967 tabatin un kampaña pa gara tur Testigu di Yehova den henter e pais. Pa haña nos, hòmbernan yòn sin miserikòrdia i sumamente agresivo a bai di kas pa kas buskando Testigunan. Nan tabata miembronan di Liga Hubenil i Pioneronan Yòn di Malawi, armá ku machete. Ora nan a haña e Testigunan, e hòmbernan a purba bende karchi di partido polítiko ku nan.

Ora nan a yega nos kas, nan a puntra si nos tabatin un karchi di partido. Mi a bisa: “Nò, mi no a kumpra. Mi no ta kumpra un awor, i mi no ta bai kumpra un den futuro tampoko.” E ora ei nan a gara ami ku mi esposo i hiba nos warda di polis, sin duna nos niun chèns di kohe nada. Ora nos yunan mas chikitu a yega for di skol, nan no a haña nos na kas, i nan a bira hopi preokupá. Ménos mal ku un poko despues nos yu mayó Daniel a yega kas i un bisiña a kont’é loke a pasa. Mesora el a pasa man kohe su rumannan ckikí i tumba bai warda di polis. Nan a yega nèt ora polis tabata hinka nos den trùk pa hiba nos Lilongwe. E muchanan a bai ku nos.

Nan a tene un huisio falsu na e warda di polis na Lilongwe. E polis a puntra nos: “Boso ta pensá di sigui komo Testigu di Yehova?” Nos a kontestá “Sí!” maske e kontesta aki outomátikamente a nifiká un sentensia di shete aña den prizon. Esnan ku tabata “na kabes” di e organisashon a haña un sentensia di 14 aña.

Despues ku nos a pasa un anochi sin kome i sin drumi, polis a hiba nos Prizon Maula. Ei, e sèlnan tabata asina yen ku ni riba flur nos no por a haña un lugá di drumi! E wc den kada sèl a konsistí di solamente un hèmber. Kuminda tabata masha malu i masha tiki. Despues di dos siman e funshonarionan di prizon a realisá ku nos ta hende pasífiko i a permití nos usa e kurá di ehersisio dje prizon. Ya ku nos tabata asina hopi, tur dia nos tabatin oportunidat pa animá otro i duna testimonio ekselente na otro prizonero. Pa nos sorpresa, despues di a sinta mas o ménos tres luna di nos sentensia, nan a laga nos bai pa motibu di preshon internashonal riba gobièrnu di Malawi.

 Polis a urgi nos pa bai nos kas bèk, pero tambe nan a bisa nos ku e obra di Testigunan di Yehova ta prohibí na Malawi. E prohibishon aki a dura di 20 di òktober 1967 te 12 di ougùstùs 1993, kasi 26 aña. E añanan ei tabata añanan difísil, pero ku yudansa di Yehova nos por a mantené nos neutralidat estriktamente.

Persiguí Manera Animal

Un dekreto di gobièrnu a kousa un otro periodo di persekushon violento na òktober di aña 1972. E dekreto a dikta pa kita tur Testigu di Yehova for di trabou i pa saka tur Testigu ku ta biba den pueblo for di nan kas. Nan a persiguí e Testigunan manera animal.

E tempu ei un ruman hòmber hóben a bin nos kas ku e mensahe urgente aki pa Emmas: ‘Liga Hubenil ta tramando pa kita bo kabes, pon’é riba un palu, i hib’é serka e hefenan lokal.’ Mesora Emmas a hui bai, pero promé el a hasi areglo pa nos siguié mas pronto posibel. Lihé-lihé mi a manda e muchanan bai su tras. Pero nèt ora mi tabata serka di bai, dies miembro di Liga Hubenil a aparesé, en buska di Emmas. Nan a kibra drenta nos kas, pero nan a deskubrí ku Emmas no tabat’ei. Rabiá e hòmbernan a lastra mi hiba na un plantashon di kaña, kaminda nan a skòp mi i bati mi ku palu di kaña. Despues nan a bai laga mi pensando ku mi tabata morto. Ora ku m’a bin bei, mi a lastra bai kas bèk.

Despues ku a bira skur e anochi ei, Emmas a riska su bida dor di bin kas bèk pa buska mi. Ora ku Emmas a haña mi tur mal batí, e ku un amigu ku tabatin un outo a pone mi pokopoko den dje. Nos a bai na kas di un ruman na Lilongwe, kaminda mi a rekuperá tiki-tiki di e atake. Einan Emmas a kuminsá traha plan pa hui di e pais.

Refugiadonan sin Pariba sin Pabou

Nos yu muhé Dinesi i su kasá tabatin un trùk di sinku tòn. Nan tabatin un shofùr ta traha pa nan ku un tempu tabata miembro di Pioneronan Yòn di Malawi, pero ku despues a bin komprondé nos situashon. El a ofresé su mes pa yuda nos i otro Testigunan. Pa vários anochi el a pasa buska Testigunan na lugánan di skonde ku nan a palabrá di antemano. Anto el a bisti su unifòrm di Pioneronan Yòn di Malawi i asina el a logra pasa ku su trùk riba vários karetera ku tabatin barikada di polis. El a tuma hopi rísiko pa yuda sentenáres di Testigu krusa frontera i drenta Zambia.

Despues di un par di luna, outoridat di Zambia a manda nos Malawi bèk; pero nos no por a bai nos pueblo bèk. Hende a hòrta tur kos ku nos a laga atras. Asta e plachinan di metal di nos dak nan a bai kuné. Dor ku nos no tabatin  niun kaminda safe pa bai, nos a hui bai Mozambique i nos a keda dos aña i mei den e kampo di refugiado di Mlangeni. Sin embargo, na yüni di aña 1975, un gobièrnu nobo na Mozambique a sera e kampo di refugiado i a fòrsa nos bai Malawi bèk, kaminda e situashon no a kambia pa Yehova su pueblo. No a keda nos nada otro di hasi sino di bai Zambia pa di dos bes. Ei nos a keda na e kampo di refugiado di Chigumukire.

Dos luna despues un fila di bus i trùk militar a parker banda di e karetera prinsipal, i sentenáres di sòldá bon armá di Zambia a invadí e kampo di refugiado. Nan a bisa nos ku kas bunita a wòrdu trahá pa nos i ku nan a bin pa hiba nos aya. Nos tabata sa ku esei no ta bèrdat. E sòldánan a kuminsá pusha hende den trùk i bùs, i tur hende a drenta pániko. E sòldánan a kuminsá tira den laira ku nan armanan outomátiko, i míles di nos rumannan a kore bai morto spantá.

Den tur e konfushon, aksidentalmente hende a tumba Emmas i a trapa riba dje, pero un di e rumannan a yud’é lanta bèk. Nos a kere ku ta tribulashon grandi a kuminsá. Tur refugiado a kore bai den direkshon di Malawi. Miéntras ku nos tabata na Zambia ainda, nos a yega na un riu i e rumannan a tene man di otro pa forma un kadena pa yuda tur hende krusa i yega safe n’e otro banda di e riu. Pero na e otro banda dje riu, sòldánan di Zambia a piki e rumannan i a obligá nan bai Malawi bèk.

Una bes ku nos a yega Malawi atrobe, nos no tabata sa unda pa bai. Nos a haña sa ku nan tabata avisá hende den reunionnan polítiko i den korant pa tene kuidou ku “karanan nobo” den e pueblo, refiriendo na Testigunan di Yehova. Pues nos a disidí di bai na e stat kapital, kaminda nos lo tabata ménos notabel ku den un pueblo. Nos a logra hür un kasita i Emmas a sigui ku su trabou sekreto di bishitá e kongregashonnan komo superintendente biahero.

Reunionnan di Kongregashon

Kiko a yuda nos keda fiel? Reunionnan di kongregashon! Den e kamponan di refugiado di Mozambique i Zambia, nos tabata asistí na nos reunionnan libremente. Nos Salònnan di Reino tabata simpel i trahá ku dak di yerba. Pa asistí na e reunionnan na Malawi a rekerí esfuerso pasobra tabata peligroso i difísil; pero semper e tabata bale la pena. Pa evitá ku hende ta mira nos, generalmente nos tabata tene e reunionnan anochi lat na lugánan retirá. Pa evitá di hala atenshon na nos reunimentu, nos no tabata klap man pa ekspresá nos apresio pa e oradó. Nos tabata simplemente frega nos mannan riba otro.

Boutismo tabata tuma lugá anochi lat. Nos yu hòmber Abiyudi a batisá na un okashon asina. Despues di e diskurso di boutismo, den skuridat e rumannan a hiba e ku e otro kandidatonan di boutismo na un moeras (un área ku mata i awa) kaminda nan a koba un buraku no muchu hundu. Ei, nan a batisá.

Nos Kasita: Un Refugio Sigur

Durante e último añanan di prohibishon, nos kas na Lilongwe a sirbi komo un sitio di entrega ku tabata safe. Nan tabata entregá pòst i literatura di e ofisina di sukursal di Zambia den sekreto na nos kas. Rumannan ku a sirbi komo koerier riba baiskel tabata bin nos kas pa buska e kargamentu di Zambia i hiba pòst i literatura na tur parti di Malawi. Nan tabata print e revista Toren di Vigilansia riba papel fini ku nan tabata usa pa print Beibel. Esaki tabata permití e koeriernan transportá dos bes mas tantu revista ku lo tabata posibel si nan tabata di print riba papel gewon. Tambe e koeriernan tabata distribuí e revista Toren di Vigilansia den tamaño miniatura. Esakinan tabata kontené solamente e artíkulonan di studio. Un mini revista tabata fásil pa skonde den saku di bo kamisa pasobra el a konsistí di un blachi so.

E koeriernan a riska nan libertat i bida ora nan tabata kore riba nan baiskel den mondi, tin biaha den skuridat djanochi, ku kaha di  stapel riba otro yen di literatura prohibí. Apesar di kareteranan ku tabatin barikada di polis i otro peligernan, nan a biaha sentenáres di kilometer den tur tipo di wer pa entregá alimento spiritual na nan rumannan. E kerido koeriernan ei tabatin hopi kurashi!

Yehova Ta Perkurá pa Biuda

Na desèmber di aña 1992, Emmas a haña un atake selebral ora e tabata dunando un diskurso durante un di su bishitanan di sirkuito. Despues di esei, e no por a papia mas. Un poko tempu despues el haña un otro atake selebral ku a laga un banda di su kurpa paralisá. Maske tabata difísil p’e trata ku su salú delikado, e sosten amoroso ku nos a haña serka nos kongregashon a kita mi desesperashon. Mi a kuida mi esposo na kas te ora el a muri na novèmber di aña 1994, ku 76 aña. Nos tabatin 57 aña kasá, i Emmas a mira kon e prohibishon a ser kitá promé ku el a muri. Pero ainda mi ta yora e morto di mi kompañero fiel.

Despues ku mi a bira biuda, mi suegro a tuma e responsabilidat di perkurá no solamente pa su esposa i su sinku yunan, sino pa ami tambe. Lamentablemente, despues di tabata malu pa un periodo kòrtiku, el a fayesé na ougùstùs di aña 2000. Kon mi yu muhé lo a haña kuminda i lugá di keda pa nos? Atrobe mi por a mira kon Yehova ta perkurá pa nos i ku e ta berdaderamente “un tata di wèrfano i un hues pa biuda.” (Salmo 68:5) Mediante su sirbidónan riba tera, Yehova a duna nos un bunita kas nobo. Kon el a hasi esei? Ora e rumannan den nos kongregashon a mira nos situashon tristu, nan a traha un kas pa nos den solamente sinku siman! Rumannan hòmber mètsla di otro kongregashon a bin pa yuda. E amor i generosidat ku tur e Testigunan aki a mustra a asombrá nos pasobra e kas ku nan a traha pa nos ta mihó ku e kasnan kaminda nan mes ta biba. E muestra di amor aki a duna un testimonio ekselente den nos bario. Ora mi bai drumi anochi, mi ta sinti komo si fuera ta den Paradeis mi ta! Sí, nos kas bunita ta trahá ku blòki i semènt, pero manera hopi hende a bisa, eigenlijk e ta un kas trahá ku amor.—Galationan 6:10.

Yehova Ta Sigui Perkurá pa Nos

Ounke tabatin biaha ku mi a hera di pèrdè kabes, Yehova tabata bon i generoso ku mi. Shete di mi nuebe yunan ta na bida ainda, i awor mi famia ta konsistí di 123 persona. Mi ta hopi gradisidu ku mayoria di nan ta sirbidónan fiel di Yehova!

Awe, na edat di 82 aña, mi ta yena di goso ora mi mira loke Dios su spiritu a hasi na Malawi. Den e último kuater añanan so, mi a mira e kantidat di Salònnan di Reino oumentá di unu te mas ku 600. Tambe nos tin un ofisina di sukursal nobo na Lilongwe, i konstantemente nos ta gosa di un kantidat di alimento spiritual ku ta fortalesé nos i ku no ta prohibí. Di bèrdat mi ta sinti ku mi a eksperensiá e kumplimentu di e promesa di Dios na Isaias 54:17, kaminda nos ta haña e siguransa: “Ningun arma ku wòrdu formá kontra bo lo no prosperá.” Despues di a sirbi Yehova pa mas ku 50 aña, mi ta konvensí ku sea kual sea e prueba ku nos haña, Yehova semper ta perkurá pa nos.

[Nota]

[Plachi na página 24]

Mi esposo, Emmas, a batisá na aprel 1951

[Plachi na página 26]

Un grupo di koerier yen di kurashi

[Plachi na página 28]

Un kas trahá ku amor