Pakiko Nos Mester Hasi Orashon sin Stòp?

“Hasi orashon sin stòp; sea gradisidu den tur kos.”—1 Tesalonisensenan 5:17, 18.

1, 2. Kon Daniel a demostrá ku el a apresiá e privilegio di por hasi orashon, i ki efekto esaki tabatin riba su relashon ku Dios?

PROFETA Daniel tabatin e kustumber di resa na Dios tres biaha pa dia. E tabata hinka rudia den su kamber ariba dilanti di e bentananan ku tabata kara pa e stat di Yerusalèm, i hasi su orashonnan. (1 Reinan 8:46-49; Daniel 6:10) Asta ora un dekreto real a prohibí orashon na kualkier otro persona ku no ta Darío, e rei medo, Daniel no a duda niun ratu si e mester a sigui hasi esei òf nò. Sea ku esei a pone su bida na peliger òf nò, e hòmber di orashon aki a sigui roga Yehova sin stòp.

² Kiko Yehova a pensa di Daniel? Ora angel Gabriel a bini pa kontestá un di Daniel su orashonnan, el a deskribí e profeta komo “masha stimá.” (Daniel 9:20-23) Den e profesia di Ezekiel, Yehova a referí na Daniel komo un hòmber hustu. (Ezekiel 14:14, 20) Atraves di añanan, Daniel su orashonnan evidentemente a resultá den un relashon íntimo ku su Dios, un echo ku asta Darío a rekonosé.—Daniel 6:16.

3. Kon orashon por yuda nos mantené integridat, manera e eksperensia di un misionero ta mustra?

³ Orashon regular tambe por yuda nos enfrentá pruebanan severo. Por ehèmpel, konsiderá e kaso di Harold King, un misionero na China ku a ser sentensiá na sinku aña di enkarselashon solitario. Ruman King a bisa relashoná ku su eksperensia: “Kisas mi tabata isolá di mi próhimo, pero niun hende no por a isolá mi for di Dios. . . . P’esei, abiertamente den bista di ken ku por a pasa dilanti mi sèl, mi tabata hinka rudia den mi sèl tres biaha pa dia i resa na bos  haltu, kòrdando riba Daniel, di ken Beibel ta papia. . . . A parse mi ku na e okashonnan ei e spiritu di Dios tabata guia mi mente na e asuntunan di mas probechoso i kalma mi. Orashon a duna mi hopi fortalesa spiritual i konsuelo!”

4. Ki preguntanan relashoná ku orashon nos lo analisá den e artíkulo aki?

⁴ Beibel ta deklará: “Hasi orashon sin stòp; sea gradisidu den tur kos.” (1 Tesalonisensenan 5:17, 18) En bista di e konseho aki, laga nos konsiderá e siguiente preguntanan: Dikon nos mester presta atenshon na nos orashonnan? Ki motibunan nos tin pa aserká Yehova konstantemente? I kiko nos mester hasi si nos ta sinti ku nos no ta digno di resa na Dios debí na nos fayonan?

Kultivá Amistat via Orashon

5. Ki amistat úniko orashon ta yuda nos disfrutá di dje?

⁵ Lo bo ke pa Yehova pensa di bo komo su amigu? El a papia di patriarka Abraham komo su amigu. (Isaias 41:8; Santiago 2:23) Yehova ke pa nos desaroyá e klase di relashon ei kuné. Eigenlijk, e ta invitá nos pa hala serka dje. (Santiago 4:8) E invitashon ei mester pone nos reflekshoná riba e perkurashon úniko di orashon. Ta masha difísil pa nos haña un afsprak ku un funshonario importante di gobièrnu, ban kòrda bira su amigu! Sin embargo, e Kreadó di universo ta animá nos pa aserk’é libremente den orashon, ki ora ku nos ke òf ki ora ku nos mester. (Salmo 37:5) Nos orashonnan sin stòp lo yuda nos tin un amistat será ku Yehova.

6. Kon Hesus su ehèmpel ta siña nos ku ta nesesario pa “hasi orashon kontinuamente”?

⁶ Sin embargo, ta masha fásil pa nos neglishá orashon! Djis trata ku e preshonnan di tur dia por apsorbá nos atenshon asina tantu, ku nos no ta hasi un esfuerso pa papia ku Dios. Hesus a animá su disipelnan pa “hasi orashon kontinuamente,” i e mes tambe a hasi esei. (Mateo 26:41, NW) Ounke kasi semper e tabata okupá for di mainta te anochi, el a apartá tempu pa papia ku su Tata selestial. Tabatin biaha ku Hesus a lanta “mainta trempan, ora tabata skur ainda,” pa e por a hasi orashon. (Marko 1:35) Na otro okashonnan, el a bai na un lugá solitario na fin di dia pa e por a papia ku Yehova. (Mateo 14:23) Hesus semper a traha tempu pa hasi orashon, i nos tambe mester hasié.—1 Pedro 2:21.

7. Ki sirkunstansianan mester motivá nos pa papia ku nos Tata selestial diariamente?

 ⁷ Tur dia ta surgi momentunan apropiá pa hasi orashon privá, segun ku nos tin ku tuma desishon, ta konfrontá problema i tentashon. (Efesionan 6:18) Ora nos ta buska e guia di Dios den tur aspekto di bida, nos amistat kuné sigur lo krese. Ora dos amigu ta enfrentá problemanan huntu, esei no ta hasi nan amistat mas fuerte? (Proverbionan 17:17) Asina tambe lo pasa ku nos ora nos ta lèn riba Yehova i ta eksperensiá su yudansa.—2 Krónikanan 14:11.

8. For di e ehèmpelnan di Nehemias, Hesus i Ana, kiko nos ta siña tokante kon largu nos orashonnan personal por ta?

⁸ Nos por ta hopi kontentu ku Dios no ta pone límite na kon largu òf kuantu biaha nos por papia kuné den orashon! Nehemias a hasi un orashon lihé i silensioso promé ku el a hasi un petishon na e rei di Pèrsia. (Nehemias 2:4, 5) Hesus tambe a hasi un orashon kòrtiku ora el a pidi Yehova dun’é poder pa resusitá Lázaro. (Juan 11:41, 42) Di otro banda, Ana a “sigui hasi orashon” dilanti di Yehova ora ku e tabata deshogá su kurason na dje. (1 Samuel 1:12, 15, 16) Nos orashonnan personal por ta kòrtiku òf largu, segun e nesesidat i e sirkunstansia.

9. Dikon nos orashonnan mester inkluí alabansa i gradisimentu pa tur loke Yehova ta hasi pa nos?

⁹ Hopi di e orashonnan den Beibel ta ekspresá apresio sinsero pa Yehova su posishon supremo i su obranan maravioso. (Eksodo 15:1-19; 1 Krónikanan 16:7-36; Salmo 145) Den un vishon apòstel Juan a mira e 24 ansianonan—e kantidat kompletu di kristiannan ungí den nan posishon selestial—ta alabá Yehova. Nan tabata bisa: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” (Revelashon 4:10, 11) Nos tambe tin motibu pa alabá e Kreadó regularmente. Mayornan ta sinti nan hopi kontentu ora ku nan yu gradisí nan di kurason pa algu ku nan a hasi p’e. Reflekshonando ku apresio riba e bondatnan di Yehova i ekspresando nos gratitut sinsero pa nan, ta un bon manera pa mehorá e kalidat di nos orashonnan.

Pakiko “Hasi Orashon sin Stòp”?

10. Ki papel orashon ta hunga den fortalesé nos fe?

¹⁰ Orashon regular ta esensial pa nos fe. Despues di a konta un komparashon pa mustra ku nos “mester hasi orashon tur ora bai i no desmayá,” Hesus a puntra: “Ora ku e  Yu di hende bin, lo e haña fe riba mundu?” (Lukas 18:1-8) Orashon signifikativo i di kurason ta edifiká fe. Ora ku patriarka Abraham tabata birando bieu sin ku el a produsí un desendiente ainda, el a papia ku Dios tokante e asuntu. Komo kontesta, na promé lugá, Yehova a pidié hisa kara wak shelu i konta e streanan, si e por a konta nan. Anto Dios a garantisá Abraham: “Asina bo desendientenan lo ta.” E resultado? Abraham “a kere [“pone fe,” NW] den SEÑOR, i el a konta esaki komo hustisia p’e.” (Génesis 15:5, 6) Si nos deshogá nos kurason na Yehova den orashon, aseptá su garantianan for di Beibel, i obedes’é, lo e fortalesé nos fe.

11. Kon orashon por yuda nos trata ku problema?

¹¹ Tambe orashon por yuda nos manehá problema. Nos bida diario ta yen di karga i e sirkunstansianan ku nos ta konfrontá ta difísil pa soportá? Beibel ta bisa nos: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.” (Salmo 55:22) Ora nos ta konfrontá desishonnan difísil, nos por imitá e ehèmpel di Hesus. El a pasa henter un anochi hasiendo orashon privá promé ku el a nombra su 12 apòstelnan. (Lukas 6:12-16) I durante e anochi promé ku el a muri, Hesus a hasi orashon asina intenso ku “su sodó a bira manera gotanan di sanger ku tabata kai abou na suela.” (Lukas 22:44) E resultado? “El a wòrdu tendí pa motibu di su piedat.” (Hebreonan 5:7) Orashon ku fervor i sin stòp lo yuda nos trata ku situashonnan yen di tenshon i pruebanan difísil.

12. Kon e privilegio di orashon ta ilustrá Yehova su interes personal den nos?

¹² Un otro motibu pa hala mas serka Yehova mediante orashon ta ku e, na su turno, lo hala mas serka nos. (Santiago 4:8) Ora nos ta deshogá nos kurason na Yehova den orashon, nos no ta sinti ku e ta interesá den nos nesesidatnan i tiernamente ta perkurá pa nos? Nos ta eksperensiá Dios su amor den un manera masha personal. Yehova no a duna niun otro persona e responsabilidat di skucha delaster un orashon ku su sirbidónan ta dirigí na dje komo nan Tata selestial. (Salmo 66:19, 20; Lukas 11:2) I e ta invitá nos pa ‘tira tur nos preokupashonnan riba dje, pasobra e ta perkurá pa nos.’—1 Pedro 5:6, 7.

13, 14. Ki motibunan nos tin pa hasi orashon sin stòp?

¹³ Orashon por duna nos mas selo pa e sirbishi  públiko i fortalesé nos ora ku indiferensia òf oposishon den sirbishi lo por duna nos gana di stòp. (Echonan 4:23-31) Tambe orashon por protehá nos kontra “e trampanan di Diabel.” (Efesionan 6:11, 17, 18) Ora nos ta lucha pa trata ku pruebanan diario, nos por pidi Dios konstantemente pa fortalesé nos. Hesus su orashon modelo ta inkluí e petishon pa Yehova “libra nos for di e malbado,” Satanas e Diabel.—Mateo 6:13.

¹⁴ Si nos sigui pidi yudansa den orashon pa kontrolá nos inklinashonnan pekaminoso, nos lo mira kon Yehova ta duna nos un man. Nos tin e garantia aki: “Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.” (1 Korintionan 10:13) Apòstel Pablo mes a eksperensiá Yehova su kuido ku a fortales’é den tur tipo di sirkunstansia. El a bisa: “Pa tur kos mi tin e forsa den birtut di esun ku ta duna mi poder.”—Filipensenan 4:13, NW; 2 Korintionan 11:23-29.

Perseverá den Orashon Apesar di Nos Fayonan

15. Kiko por pasa ora ku nos kondukta no ta kumpli ku e normanan di Dios?

¹⁵ Pa Yehova skucha nos orashonnan ku aprobashon, nos no mester rechasá e konseho di su Palabra. Apòstel Juan a skirbi: “Kiko ku nos pidi nos ta risibí for di dje, pasobra nos ta warda su mandamentunan i ta hasi e kosnan ku ta agradabel den su bista.” (1 Juan 3:22) Pero kiko lo por pasa si nos kondukta no ta kumpli ku e normanan di Dios? Adam ku Eva a skonde nan mes despues di nan piká den e hòfi di Edén. Nos tambe kisas ta sinti nos mes inkliná na skonde “pa e presensia di SEÑOR” i stòp di hasi orashon. (Génesis 3:8) Klaus, un superintendente biahero ku eksperensia, a remarká: “Mi a ripará ku kasi semper e promé eror ku esnan ku ta apartá for di e kaminda di Yehova i di su organisashon ta kometé, ta ku nan ta stòp di hasi orashon.” (Hebreonan 2:1) Esaki tabata e kaso ku José Ángel. El a bisa: “Pa kasi ocho aña, apénas mi tabata hasi orashon na Yehova. Mi tabata sinti ku mi no ta digno di papia kuné, ounke ainda mi a konsider’é mi Tata selestial.”

16, 17. Duna algun ehèmpel pa mustra kon orashon regular por yuda nos vense debilidat spiritual.

¹⁶ Algun di nos kisas ta sinti ku nos no ta digno di hasi orashon debí na debilidat spiritual òf debí ku nos a kometé malecho. Pero ta nèt e ora ei nos tin ku saka pleno probecho di e perkurashon di orashon. Jonas a hui for di su asignashon. Pero ‘den su angustia, Jonas a sklama na Yehova, i El a kontest’é. For di e profundidat di Seol, Jonas a sklama pa yudansa, i Yehova a tende su bos.’ (Jonas 2:2) Jonas a hasi orashon, Yehova a kontestá su orashon, i Jonas a rekuperá spiritualmente.

¹⁷ José Ángel tambe ku fervor a pidi yudansa den orashon. El a bisa: “Mi a deshogá mi kurason i a roga Dios pa pordon. I el a yuda mi. Mi no ta kere ku lo mi a bolbe na e bèrdat sin yudansa di orashon. Awor mi ta hasi orashon ku regularidat tur dia, i mi ta anhelá e momentunan ei.” Semper nos mester sinti nos mes liber pa papia ku Dios abiertamente tokante nos erornan i humildemente pidié pordon. Ora Rei David a konfesá su transgreshonnan, Yehova a pordoná su pikánan. (Salmo 32:3-5)  Yehova ke yuda nos, no kondená nos. (1 Juan 3:19, 20) I e orashonnan di e ansianonan di kongregashon por yuda nos spiritualmente, pasobra nan orashonnan “por logra hopi.”—Santiago 5:13-16.

18. Ki konfiansa sirbidónan di Dios por tin sin importá kon leu nan por a dual?

¹⁸ Ta kua tata lo rechasá un yu ku humildemente ta akudí na dje pa haña yudansa i konseho despues di a kometé un eror? E komparashon di e yu pèrdí ta mustra ku sin importá kon leu nos por a dual, nos Tata selestial ta alegrá ora nos bolbe bèk na dje. (Lukas 15:21, 22, 32) Yehova ta urgi tur esnan ku a dual pa yam’é, “pasobra e lo pordoná abundantemente.” (Isaias 55:6, 7) Ounke David a kometé vários piká grave, el a sklama na Yehova, bisando: “Skucha mi orashon, o Dios, i no skonde bo mes pa mi súplika.” Tambe e di: “Atardi, mainta i mèrdia lo mi keha i grita yora, i [Yehova] lo tende mi bos.” (Salmo 55:1, 17) Esaki ta hopi alentador!

19. Dikon nos no mester konkluí ku orashonnan ku aparentemente Dios no kontestá ta un prueba ku e ta malkontentu ku nos?

¹⁹ Kiko si nos no haña un reakshon mesora riba nos petishon? Anto nos tin ku hasi sigur ku nos petishon ta na armonia ku e boluntat di Yehova i ku el a ser pidí den nòmber di Hesus. (Juan 16:23; 1 Juan 5:14) Disipel Santiago a referí na algun kristian kende nan orashonnan no a haña kontesta pasobra nan tabata “pidi ku motibu robes.” (Santiago 4:3) Di otro banda, nos no mester ta muchu lihé pa konkluí semper ku orashonnan ku aparentemente Dios no a kontestá ta un prueba ku e ta malkontentu ku nos. Tin biaha Yehova ta permití adoradónan fiel sigui resa tokante un asuntu pa un tempu promé ku ta bisto kiko ta su kontesta. Hesus a bisa: “Sigui pidi, i lo duna na boso” (Mateo 7:7, NW) Pues, nos tin ku “perseverá den orashon.”—Romanonan 12:12, NW.

Hasi Orashon Regularmente

20, 21. (a) Dikon nos tin ku hasi orashon sin stòp den e “último dianan” aki? (b) Kiko nos lo risibí ora diariamente nos ta aserká Yehova su trono di grasia?

²⁰ Preshonnan i problemanan ta sigui multipliká den e “último dianan” aki marká pa “tempunan trabahoso.” (2 Timoteo 3:1) I pruebanan fásilmente por okupá nos mente. Sin embargo hasiendo orashon sin stòp lo yuda nos mantené nos bida riba un rumbo spiritual apesar di problema, tentashon i desanimashon persistente. Nos orashonnan diario na Yehova por perkurá e sosten tan vital ku nos mester.

²¹ Yehova, Esun “ku ta skucha orashon,” nunka no ta muchu drùk pa skucha nos. (Salmo 65:2) Laga nos nunka ta muchu drùk pa papia kuné. Nos amistat ku Dios ta e poseshon mas presioso ku nos tin. Laga nos nunka konsider’é komo di ménos importansia. “P’esei, laga nos aserká e trono di grasia ku konfiansa, pa nos risibí miserikòrdia i haña grasia pa yuda den tempu di nesesidat.”—Hebreonan 4:16.

Kon Lo Bo Kontestá?

• Kiko nos ta siña for di profeta Daniel tokante e balor di orashon?

• Kon nos por fortalesé nos amistat ku Yehova?

• Pakiko nos mester hasi orashon sin stòp?

• Dikon nos no mester laga e sintimentu di ku nos no ta digno stroba nos di resa na Yehova?

[Preguntanan di Estudio]

[Plachi na página 16]

Nehemias a hasi un orashon kòrtiku i silensioso promé ku el a papia ku e rei

[Plachi na página 17]

Ana “a sigui hasi orashon” dilanti di Yehova

[Plachinan na página 18]

Hesus a hasi orashon henter anochi promé ku el a nombra su 12 apòstelnan

[Plachinan na página 20]

Henter dia ta surgi oportunidatnan pa hasi orashon