Hopi Pregunta—Tiki Kontesta Satisfaktorio

RIBA e mainta di Dia di Tur Santu, 1 di novèmber 1755, na momentu ku mayoria siudadano tabata den misa, un temblor potente a sagudí e stat di Lisboa. Míles di edifisio a basha den otro, i desénas di míles di hende a pèrdè nan bida.

Djis despues di e tragedia ei, e eskritor franses Voltaire a publiká su Poème sur le désastre de Lisbonne (Poema Riba e Desaster di Lisboa), den kua el a rechasá e idea ku e katástrofe tabata un kastigu ku Dios a manda riba e pueblo pa motibu di su pikánan. Segun Voltaire, hende no por komprondé ni splika e susesonan kalamitoso ei, p’esei el a skirbi:

Naturalesa no por papia, ta pòrnada nos ta hasié pregunta;

nos mester di un Dios ku ta papia ku e rasa humano.

Klaru ku Voltaire no ta e promé persona ku a hasi pregunta tokante Dios. Atraves di historia humano, tragedia i desaster a lanta pregunta den mente di hende. Míles di aña pasá, e patriarka Jòb, ku a kaba di pèrdè tur su yunan i ku tabata sufriendo di un enfermedat teribel, a puntra: “Pakiko lus ta wòrdu duná na esun ku ta sufri, i bida na esun ku tin amargura di alma?” (Jòb 3:20) Awe, hopi hende ta puntra nan mes kon un Dios bondadoso i amoroso por keda aparentemente indiferente apesar di asina tantu sufrimentu i inhustisia.

Konfrontá ku e realidat di skarsedat di kuminda, enfermedat i morto, hopi hende ta rechasá abiertamente ku ta eksistí un Kreadó ku ta interesá den humanidat. Un filósofo ateo a remarká: “Dios no tin niun èksküs pa laga un mucha sufri, . . . naturalmente a ménos ku e mes no ta eksistí.” Tragedianan na gran eskala, manera e Holokousto durante e Segundo Guera Mundial, ta hiba na konklushonnan similar. Tuma nota kiko un eskritor hudiu a komentá den un boletin di notisia: “E splikashon di mas simpel p’e sufrimentu di Auschwitz ta ku no tin un Dios ku ta intervení den asuntunan humano.” Segun un enkuesta ku nan a tene na Fransia na 1997, un pais kaminda religion katóliko ta predominá, e genosidionan ku a tuma lugá por ehèmpel na Ruanda na 1994, a pone ku rònt di 40 porshento di e hendenan ta duda ku ta eksistí un Dios.

Un Opstákulo pa Fe?

Pakiko Dios no ta hasi nada pa evitá tragedia? Un kronista katóliko ta di opinion ku e  pregunta aki ta “un opstákulo serio pa fe” di hopi hende. E ta puntra: “Ta realmente posibel pa kere den un Dios ku ta para wak sin hasi nada pa evitá ku miónes di hende inosente ta muri i poblashonnan kompletu den mundu ta ser masakrá?”

Meskos tambe, un editorial den e korant katóliko La Croix ta komentá: “Sea ta trata di tragedia di pasado, suseso kousá pa avansenan teknológiko, desaster natural, krímen organisá òf e morto di un ser kerí, den kada kaso wowonan yen di horor ta wak den direkshon di shelu. Unda Dios ta? Nan ta eksigí un kontesta. No ta e ta e Gran Persona Indiferente, e Gran Ousente?”

Papa Juan Pablo II a toka e punto aki den su karta apostóliko di 1984 Salvifici Doloris. El a skirbi: “Ounke eksistensia di mundu ta habri wowo di hende, na moda di papia, n’e realidat ku ta eksistí un Dios, ku e ta sabí, poderoso i mahestuoso, tòg ta parse ku maldat i sufrimentu ta tapa e imágen aki drástikamente, foral dor ku tin asina tantu kaso di sufrimentu sin hustifikashon i asina tantu maldat sin e debido kastigu.”

Si ta eksistí un Dios todopoderoso i yen di amor, manera Beibel ta bisa, kon por tin asina tantu sufrimentu humano? E ta hasi algu pa evitá tragedia ku ta afektá hende individual òf nashonnan kompletu? E ta hasi algu pa nos awe? I, pa usa palabranan di Voltaire, tin “un Dios ku ta papia ku e rasa humano” pa kontestá e preguntanan aki? Sea asina bon di lesa e siguiente artíkulo pa haña sa e kontestanan.

[Plachinan na página 3]

E destrukshon di Lisboa na 1755 a impulsá Voltaire pa deklará ku hende no por komprondé e susesonan ei

[Rekonosementu]

Voltaire: For di e buki Great Men and Famous Women; Lisboa: J.P. Le Bas, Praça da Patriarcal depois do terramoto de 1755. Potrèt: Museu da Cidade/Lisboa

[Plachi na página 4]

E resultadonan trágiko di genosidionan, manera esun na Ruanda, a pone hopi hende duda ku ta eksistí un Dios

[Rekonosementu]

AFP PHOTO

 [Rekonosementu pa Potrèt na página 2]

KAFT, muchanan: USHMM, courtesy of Main Commission for the Prosecution of the Crimes against the Polish Nation