Intervenshon di Dios—Kiko Nos Por Spera?

DEN siglo 8 promé ku nos era, tempu ku Rei Ezekias di Huda tabatin 39 aña di edat, el a haña sa ku e tabatin un malesa fatal. Esei a laga Ezekias hopi kibrá, p’esei el a roga Dios den orashon pa kur’é. Dios a kontest’é mediante su profeta: “Mi a tende bo orashon, mi a mira bo lágrimanan; mira, lo mi añadí diesinku aña mas na bo bida.”—Isaias 38:1-5.

Dikon Dios a intervení n’e okashon partikular ei? Siglonan mas promé, Dios a primintí hustu Rei David: “Bo kas i bo reino lo permanesé mi dilanti pa semper; bo trono lo ta establesí pa semper.” Tambe Dios a revelá ku e Mesias lo a bini di e liña di David. (2 Samuel 7:16; Salmo 89:20, 26-29; Isaias 11:1) Tempu ku  Ezekias a bira malu, ainda e no tabatin yu hòmber, i dor di esei e liña real di David lo por a kaba einan. Pues e propósito spesífiko pakiko Dios a intervení den e kaso di Ezekias tabata pa konserbá e liña di desendensia ku a hiba n’e Mesias.

Pa kumpli ku su promesanan, Yehova a hañ’é ta intervení na vários okashon na fabor di su pueblo durante e era pre-kristian. En konekshon ku e liberashon di Israel for di sklabitut na Egipto, Moisés a deklará: “Pasobra SEÑOR tabata stima boso i a warda e huramentu ku el a hura na boso tatanan, p’esei SEÑOR a saka boso pa medio di un man poderoso.”—Deuteronomio 7:8.

Den e promé siglo tambe Dios a intervení den asuntunan humano pa garantisá ku su propósito ta kumpli. Por ehèmpel, riba kaminda pa Damasko, un hudiu ku yama Saulo a risibí un vishon milagroso pa stòp e di persiguí e disipelnan di Kristu. E kombertimentu di e hòmber aki, kende a bira apòstel Pablo, a hunga un papel vital den e plamamentu di e bon nobo entre e nashonnan.—Echonan 9:1-16; Romanonan 11:13.

Ta Semper Dios A Intervení?

Ta semper Dios a intervení òf ta na sierto okashon so el a hasi esei? E Skritura ta mustra klaramente ku esaki sigur no tabata e norma. Ounke Dios a libra e tres hóbennan hebreo for di un morto sigur den un fòrnu kayente i profeta Daniel for di e kueba di leon, e no a intervení pa skapa otro profetanan for di morto. (2 Krónikanan 24:20, 21; Daniel 3:21-27; 6:16-22; Hebreonan 11:37) Pedro a skapa  milagrosamente for di e prizon kaminda Herodes Agripa I a laga ser’é. Tòg, e mesun rei aki a laga mata apòstel Santiago, i Dios no a intervení pa prevení e krímen aki. (Echonan 12:1-11) Ounke Dios a duna e apòstelnan poder pa kura hende enfermo i asta lanta morto, e no a konsentí pa eliminá e “sumpiña den karni”—tal bes un problema físiko—ku a tormentá apòstel Pablo.—2 Korintionan 12:7-9; Echonan 9:32-41; 1 Korintionan 12:28.

Dios no a intervení pa evitá un ola di persekushon ku e emperador romano Nero a instigá kontra e disipelnan di Kristu. E kristiannan a wòrdu torturá, kimá bibu i bentá pa bestia salbahe. Sin embargo, e oposishon aki no a sorprendé e promé kristiannan, i sigur e no a pone nan duda ku tin un Dios. Al fin i al kabo, Hesus a spièrta su disipelnan ku nan lo wòrdu hibá dilanti korte i ku nan lo mester ta dispuesto pa sufri i asta muri pa nan fe.—Mateo 10:17-22.

Meskos ku Dios a hasi den pasado, awe tambe sigur e por libra su sirbidónan for di situashonnan peligroso, i nos no mester kritiká esnan ku ta sinti ku nan a risibí su protekshon. Sin embargo, ta difísil pa bisa sin mas ku Dios a intervení òf laga di intervení den e kasonan ei. Vários fiel sirbidó di Yehova a sufri herida debí na un eksploshon na Toulouse, i míles di kristian fiel a muri den kampamentunan nazi i komunista òf bou di otro sirkunstansianan trágiko sin ku Dios a hasi nada pa evitá eseinan. Pakiko Dios no ta intervení sistemátikamente na fabor di tur esnan ku tin su aprobashon?—Daniel 3:17, 18.

“Tempu i Suseso Imprevisto”

Tur hende por ta víktima di un katástrofe, i esei no nesesariamente tin di haber ku fieldat na Dios. E eksploshon na Toulouse, for di kua Alain i Liliane a sali ileso, a kousa morto di 30 hende i sentenáres di herido, ounke no tabata nan falta. Riba eskala mayor, dies di míles di hende ta bira víktima di krímen, korementu di outo deskabeyá òf guera, i nos no por kulpa Dios pa e kalamidatnan ei. Beibel ta rekordá nos ku “tempu i suseso imprevisto ta kai riba” tur hende.—Eklesiastés 9:11, NW.

Es mas, hende ta sometí na enfermedat, behes i morto. Asta algun persona ku a pensa ku ta Dios a salba nan bida milagrosamente, òf ku ta Dios por kier ku nan a rekuperá inesperadamente di nan enfermedat, a bin muri tòg despues. E tempu pa Dios eliminá enfermedat i morto i “seka tur lágrima” mester bini ainda.—Revelashon 21:1-4.

Pa esei por tuma lugá, algu muchu mas ekstenso i radikal ku un intervenshon insidental ta nesesario. Beibel ta papia di un suseso ku e ta yama “e gran dia di SEÑOR.” (Sofonias 1:14) Durante e intervenshon na eskala mayor aki, Dios lo eliminá tur maldat. Humanidat lo haña e oportunidat di biba pa semper den kondishonnan perfekto, den kua “e kosnan di ántes lo no wòrdu rekordá mas ni bin na memoria.” (Isaias 65:17) Asta e mortonan lo wòrdu resusitá, i esaki lo eliminá e efektonan di loke sin duda ta e mayor tragedia humano. (Juan 5:28, 29) Pa e tempu ei, den su gran bondat i amor sin límite, Dios lo a solushoná e problemanan di humanidat di unabes pa semper.

Kon Dios Ta Intervení Awe

Sin embargo, esaki no ta nifiká ku miéntras tantu Dios ta simplemente wak su kreashon sufri sin hasi nada. Awe, Dios ta ekstendiendo na tur hende, sin importá nan  antesedensia étniko òf sosial, e oportunidat pa konos’é i pa desaroyá un relashon personal kuné. (1 Timoteo 2:3, 4) Hesus a deskribí e proseso aki den e siguiente palabranan: “Ni un hende no por bin serka mi, si no ta e Tata ku a manda mi a hal’é.” (Juan 6:44) Dios ta atraé hende di kurason onrado na dje pa medio di e mensahe di Reino ku su sirbidónan ta proklamá rònt mundu.

Ademas, Dios tin influensia direkto riba e bida di hende ku ta someté nan mes boluntariamente na su guia. Pa medio di su spiritu santu, Dios ta ‘habri nan kurason’ pa komprondé su boluntat i pa pone na práktika loke e ta rekerí. (Echonan 16:14) Sí, dor di duna nos e oportunidat di konos’é, di siña su Palabra i sa kiko ta su propósitonan, Dios ta duna prueba di su interes amoroso den kada un di nos.—Juan 17:3.

Finalmente, Dios ta yuda su sirbidónan awe, no dor di libra nan milagrosamente, sino dor di duna nan su spiritu santu i “e poder mas ayá di loke ta normal” pa enfrentá kualkier situashon ku nan haña nan mes aden. (2 Korintionan 4:7, NW) Apòstel Pablo a skirbi: “Pa tur kos mi tin e forsa den birtut di esun [Yehova Dios] ku ta duna mi poder.”—Filipensenan 4:13, NW.

Pues nos tin tur motibu pa gradisí Dios tur dia p’e bida i p’e speransa ku el a duna nos di biba pa semper den un mundu liber di tur sufrimentu. “Kiko lo mi duna SEÑOR pa tur su benefisionan na mi?” e salmista a puntra. “Lo mi hisa e kopa di salbashon, i invoká e nòmber di SEÑOR.” (Salmo 116:12, 13) Dor di lesa e revista aki regularmente, lo bo por komprondé kiko Dios a hasi, kiko e ta hasiendo i kiko lo e hasi pronto ku lo por duna bo felisidat awor i un speransa sólido pa futuro.—1 Timoteo 4:8.

[Komentario na página 6]

“E kosnan di ántes lo no wòrdu rekordá mas ni bin na memoria.”—Isaias 65:17

[Plachinan na página 5]

Den tempu di Beibel, Yehova no a prevení e piedramentu di Zakarias . . .

ni e masakre di mucha inosente na man di Herodes

[Plachi na página 7]

Fin di sufrimentu ta hopi serka; asta e mortonan lo biba atrobe