Komprondé e Propósito di Disiplina
Komprondé e Propósito di Disiplina
ORA bo tende e palabra “disiplina,” kiko ta bin na bo mente? Un dikshonario ta definí disiplina komo “e práktika di pone hende obedesé regla òf normanan di kondukta, i di kastigá nan ora nan keda sin hasié.” Ounke tin vários otro definishon pa e palabra aki, awendia hopi hende ta mira tur loke tin di haber ku disiplina den un lus negativo.
Di otro banda, Beibel ta papia di disiplina for di un punto di bista diferente. Salomon e rei sabí a skirbi: “Mi yu, no rechasá e disiplina di SEÑOR.” (Proverbionan 3:11) Aki e no ta papiando di disiplina en general, sino di “e disiplina di SEÑOR,” esta, disiplina basá riba Dios su prinsipionan elevá. Ta e tipo di disiplina ei so ta produktivo, benefisioso i asta deseabel den sentido spiritual. En kambio, hopi bes ora hende duna disiplina basá riba nan propio pensamentu, i na konflikto ku Yehova su prinsipionan elevá, nan ta hasié na un manera severo i perhudisial. Esei ta splika dikon hopi hende tin un aktitut negativo tokante disiplina.
Dikon Beibel ta animá nos asina fuertemente pa aseptá Yehova su disiplina? E Skritura ta bisa ku Dios su disiplina ta un manera di demostrá su amor pa su kriaturanan humano. P’esei Salomon a bisa: “Esun ku SEÑOR ta stima, e ta reprendé, meskos ku un tata ta reprendé e yu ku e tin delisia den dje.”—Proverbionan 3:12.
Disiplina, òf Kastigu?
Ora Beibel ta papia di disiplina e por nifiká hopi kos—guia, instrukshon, entrenamentu, reprendementu, korekshon i asta kastigu. Pero den tur kaso, ta amor ta motivá Yehova pa disipliná nos, i semper e ta hasié ku nos bienestar na mente. Nunka Yehova no ta duna nos disiplina únikamente pa kastigá nos.
Di otro banda, ora Dios ta kastigá, no ta semper e ta hasié pa korigí òf eduká esun ku e ta kastigá. Por ehèmpel, for di e dia ku Adam ku Eva a peka, nan a kuminsá sufri konsekuensia di nan desobedensia. Yehova a ekspulsá nan for di e paradeis di Edén, i nan a sukumbí na e efektonan di imperfekshon, enfermedat i behes. Despues di vários siglo di bida doloroso, nan a muri pa semper. Tur esei tabata un kastigu di Dios, pero e no tabata un disiplina. Adam ku Eva a aktua deliberadamente; nan no a repentí, i p’esei nan no por a ser korigí.
Otro ehèmpelnan di ehekushon di kastigu di Yehova ta e Diluvio den tempu di Noe, e destrukshon di Sodoma ku Gomora i eliminashon di e ehérsito egipsio den Laman Kòrá. Yehova no a hasi e kosnan aki ku intenshon di duna guia, instrukshon ni entrenamentu na esnan ku el a kastigá. Papiando di e tipo di ehekushonnan di kastigu ei di parti di Dios, apòstel Pedro a skirbi: “[Dios] no a spar e mundu antiguo, ma a preservá Noe, un predikadó di hustisia, huntu ku shete otro persona mas, ora ku el a trese un diluvio riba e mundu di e impíonan; i . . . el a kondená e statnan Sodoma i Gomora pa destrukshon dor di hasi nan bira shinishi, hasiendo nan un ehèmpel pa esnan ku despues lo a biba den impiedat.”—2 Pedro 2:5, 6.
Kon asina e ehekushonnan di kastigu aki ta sirbi komo “un ehèmpel pa esnan ku despues lo a biba den impiedat”? Den Pablo su karta na e tesalonisensenan, e ta referí na nos era aktual komo e tempu ora Dios, pa medio di su Yu 2 Tesalonisensenan 1:8, 9) Klaramente, e kastigu ei su meta no ta pa siña ni refiná esnan ku risibié. Sin embargo, ora Yehova ta invitá su adoradónan pa aseptá su disiplina, e no ta papiando di e kastigu ku ta bini riba pekadónan ku no ta repentí.
Hesukristu, lo “duna pago meresí na esnan ku no konosé Dios i na esnan ku no ta obedesé e evangelio.” Pablo ta agregá: “Esakinan lo paga e kastigu di pèrdishon eterno.” (Ta bon pa remarká ku Beibel no ta deskribí Yehova na promé lugá komo un dunadó di kastigu. Mas bien, ku mas frekuensia e ta deskribí Dios komo un maestro amoroso i un entrenadó ku pasenshi. (Jòb 36:22; Salmo 71:17; Isaias 54:13) Sí, ora Dios disipliná nos ku e propósito di korigí nos, semper e ta hasié ku amor i pasenshi. Si un kristian komprondé e propósito tras di disiplina, e ta den un mihó posishon pa asept’é i tambe pa disipliná otro hende ku e aktitut korekto.
Disiplina di Mayornan Amoroso
Ta importante pa den ambiente di famia i den kongregashonnan kristian, tur hende komprondé e propósito ku tin tras di disiplina. Esaki ta asta mas importante pa esnan ku ta den un posishon di outoridat, manera por ehèmpel mayornan. Proverbionan 13:24 ta deklará: “Esun ku laga di usa bara ta odia su yu, ma esun ku ta stim’é ta disiplin’é for di trempan.”
Kon mayornan mester duna disiplina? Beibel ta splika: “Boso, tatanan, no provoká boso yunan na rabia, ma lanta nan den e disiplina i instrukshon di Señor.” (Efesionan 6:4) E spièrtamentu aki ta bolbe bin dilanti den e siguiente palabranan: “Tatanan, no provoká boso yunan, pa nan no pèrdè ánimo.”—Kolosensenan 3:21.
Mayornan kristian ku komprondé e propósito di disiplina lo no aktua na un manera brutu. E prinsipio deklará na 2 Timoteo 2:24 por ser apliká na e manera kon mayornan mester duna disiplina. Pablo a skirbi: “E sirbidó di Señor no mester ta pleitadó, ma kariñoso ku tur hende, ku kapasidat pa siña.” Eksploshonnan histériko di rabia i palabranan insultante òf humiante difísilmente por ser kategorisá komo disiplina amoroso. No tin espasio pa e tipo di komportashon aki den bida di un kristian.— Efesionan 4:31; Kolosensenan 3:8.
Pa mayornan korigí nan yunan, nan mester hasi hopi mas ku djis duna nan kastigu inmediato i desisivo. Mayoria mucha mester risibí spièrtamentu bes tras bes promé ku nan kambia nan manera di pensa. Pues, mayornan tin ku dediká tempu, mustra pasenshi i pensa bon
kon nan ta duna disiplina. Nan tin ku tene na mente ku e muchanan mester ‘ser lantá den e disiplina i instrukshon di Yehova.’ Esei ta nifiká ku ta pa hopi aña mester entrená nan.Wardadónan Kristian Ta Disipliná ku Suavedat
E mesun prinsipionan ta aplikabel den kaso di ansianonan kristian. Komo wardadónan amoroso, nan ta hasi tur nan esfuerso pa edifiká e tou dor di duna nan instrukshon, direkshon i reprendementu ora ta nesesario. Ora nan ta duna disiplina, nan ta tene bon na mente kiko ta e berdadero propósito di disiplina. (Efesionan 4:11, 12) Si ta riba kastigu nan ta enfoká, anto nan lo djis imponé un kastigu riba un hende ku a faya, anto keda te ei. Pero disiplina di Dios ta enserá hopi mas. Amor ta motivá ansianonan pa keda den kontakto ku e persona, i sigui gui’é te ora ku nan konseho duna fruta. Debí ku nan interes ta sinsero, ku frekuensia nan ta reuní vários bes ku e persona pa anim’é i entren’é.
Di akuerdo ku loke 2 Timoteo 2:25 i 26 ta bisa, asta ora ansianonan ta trata ku un persona ku no ta aseptá disiplina muchu lihé, nan mester instruyé “ku suavedat.” Dirèkt despues e teksto ta bisa kiko ta e propósito di tal disiplina: “Pa kisas Dios duna nan repentimentu ku ta hiba na konosementu di e bèrdat, i nan bin na nan sano huisio i skapa for di e trampa di Diabel.”
Tin bes ta nesesario pa ekspulsá un malechor for di kongregashon ora e no ta repentí. (1 Timoteo 1:18-20) Pero nos mester mira asta e medida drástiko ei komo un forma di disiplina, i no djis komo un kastigu. Tempu-tempu ansianonan ta hasi esfuerso pa bishitá hende ekspulsá ku no ta praktikando maldat aktivamente mas. Den bishitanan asina, ansianonan ta aktua na armonia ku e berdadero propósito di disiplina dor di splika e persona kua ta e pasonan ku e mester dal pa e por bolbe na e kongregashon kristian.
Yehova Ta e Hues Perfekto
Mayornan, wardadónan kristian i otro personanan ku tin outoridat bíbliko pa duna disiplina mester hasi esfuerso pa tuma e responsabilidat ei na serio. Nan no mester hasi e fout di husga ku sierto hendenan ta kompletamente inkoregibel. P’esei mes, nunka e disiplina ku nan ta duna no mester bira manera un kastigu motivá pa vengansa òf enemistat.
Ta bèrdat ku Beibel ta bisa ku Yehova lo trese kastigu na un manera severo i total. Hebreonan 10:31) Pero nunka niun ser humano no mester ni purba kompará su mes ku Yehova, ni den e sentido aki ni den niun otro sentido. I niun hende lo no mester sinti ku ta un kos teribel pa kai den man di un mayor òf un sierto ansiano den kongregashon.
De echo, e Skritura ta bisa ku “ta un kos teribel pa kai den man di e Dios bibu.” (Yehova tin e kapasidat di duna disiplina na un manera perfektamente balansá. Hende sí no por. Dios por lesa kurason i determiná ki ora un persona a bira kompletamente inkoregibel, i ku pues lo e mester risibí kastigu desisivo i total. Pero hende sí no ta kapas pa husga na e manera ei. P’e motibu ei, ora bira nesesario pa duna disiplina, semper esnan ku ta den puesto di outoridat mester disipliná ku e propósito di korigí so.
Aseptá Yehova Su Disiplina
Nos tur tin mester di Yehova su disiplina. (Proverbionan 8:33) De echo, nos mester anhelá disiplina basá riba e Palabra di Dios. Segun ku nos ta studia e Palabra di Dios, nos por aseptá disiplina ku ta bini direktamente for di Yehova via e Skritura. (2 Timoteo 3:16, 17) Pero tin bes ku nos lo risibí disiplina for di nos kompañeronan kristian tambe. Si nos komprondé ku ki intenshon nan ta hasié, lo ta mas fásil pa nos aseptá e disiplina aki di buena gana.
Apòstel Pablo a rekonosé ku “na e momentu mes ningun disiplina no ta parse di ta kousa di goso, sino di doló.” Pero el a agregá: “Ma pa esnan ku a wòrdu entrená dor di dje, despues e ta duna e fruta pasífiko di hustisia.” (Hebreonan 12:11) Yehova su disiplina ta un demostrashon di e amor profundo ku e ta sinti pa nos. Sea ku nos ta risibí òf duna disiplina, laga nos tene na mente kiko ta e propósito tras di Dios su disiplina, i laga nos obedesé e konseho sabí aki di Beibel: “Gara instrukshon [“disiplina,” NW]; no lag’é bai. Kuid’é, pasobra e ta bo bida.”—Proverbionan 4:13.
[Plachinan na página 21]
Pekadónan ku no repentí ta risibí Dios su ehekushon di kastigu, no su disiplina korektivo
[Plachinan na página 22]
Amor ta motivá ansianonan pa dediká tempu na hasi investigashon i yuda esnan ku faya
[Plachinan na página 23]
Ku pasenshi i amor, mayornan ta duna nan yunan “e disiplina i instrukshon” di Yehova