E Bon Nobo Ta Duna Fruta  na São Tomé i Príncipe

MAYORIA hende probablemente nunka a tende di São Tomé i Príncipe. Normalmente nan no ta hasi propaganda pa e islanan aki den foldernan pa fakansi. Riba un mapa di mundu, nan ta keda manera kabes di feneta den Golfo di Guinea dilanti di e kosta wèst di Afrika. São Tomé ta situá kasi riba evenar i Príncipe ta keda un poko mas nortost. Nan tin un klima di hopi humedat i áwaseru ku a produsí selvanan di yobida hopi bèrdè ku ta kubri barika di serunan ku ta mas ku 2.000 meter haltu.

E islanan tropikal aki, rondoná pa awa blou i playanan dòrná ku palma, ta ser habitá pa un pueblo amikal i kariñoso, kende su desendensia mesklá di afrikano i europeo a resultá den un kombinashon agradabel di kultura. E 170.000 habitantenan ta biba di eksportashon dje produkto prinsipal, kakou, òf di agrikultura i piskamentu. Pero den añanan resien, tabata difísil pa nan haña asta nan pan di kada dia.

Sin embargo, den e último dékada di siglo 20 a sosodé algu ku tabatin un efekto masha grandi den bida di un kresiente kantidat di hende riba e islanan aki. Na yüni 1993, Testigunan di Yehova a haña registrashon legal serka e gobièrnu di São Tomé i Príncipe, i asina a yega un fin na un periodo largu i hopi bes difísil di e historia di Testigunan di Yehova riba e islanan aki.

Simianan Sembrá den Situashon Difísil

Aparentemente, e promé Testigu di Yehova a yega na e pais aki na prinsipio di dékada di 1950 ora ku outoridatnan tabata manda prezunan afrikano di otro kolonianan portugues pa bin hasi trabou fòrsá den plantashon riba e islanan. E Testigu afrikano aki ku tabata un pionero òf predikadó di tempu kompletu, a ser deportá for di Mozambique pasobra el a prediká e bon nobo di e Reino di Dios den e pais ei. Ounke e Testigu tabata su so, el a tene su mes okupá, i denter di seis luna tabatin 13 hende ta partisipá den predikashon di e bon nobo. Despues, otro Testigunan den e mesun sirkunstansia a yega for di Angola. Durante nan deportashon, nan a probechá di tur oportunidat pa kompartí e bon nobo ku e habitantenan lokal.

Pa aña 1966 tur e rumannan ku tabata traha den e plantashonnan di trabou fòrsá na São Tomé, a regresá e kontinente afrikano. E grupo chikí di publikadó di Reino ku a keda atras a sigui padilanti ku kurashi. Nan a ser persiguí, gòlpiá i enkarselá pasobra nan tabata reuní pa studia Beibel, i no tabatin niun hende pa bishitá nan ni animá nan. E pais a haña independensia di Portugal na 1975, i pokopoko pero sigur e simianan di e bèrdat di Reino a kuminsá duna fruta.

Ekspanshon i Konstrukshon

Den e mesun luna di yüni 1993 ku nan a haña registrashon legal, nan tabatin un máksimo di 100 publikadó di Reino. E mesun aña ei, pioneronan spesial a bini for di Portugal. E esfuerso ku nan a hasi pa siña kreol portugues a pone e poblashon lokal haña masha kariño pa nan. Loke a bira un prioridat e ora ei tabata pa haña tereno pa un Salòn di Reino. Ora ku un ruman ku yama Maria a tende di e nesesidat aki, el a duna komo kontribushon mitar di e tereno riba kua e tabatin su kasita. E tereno tabata sufisiente pa traha un Salòn di Reino grandi. Maria no tabata sa ku komo ku e no tabatin niun otro famia mas na bida, desaroyadónan ambisioso di tereno tabatin bista riba e propiedat ei. Un dia un komersiante prominente a bin papia ku Maria.

“Loke mi ta tende di bo no ta bon!” el a spièrta Maria. “Mi a tende ku bo a regalá bo tereno. Bo no sa ku un tereno asina den stat ta bal hopi plaka?”

Maria a puntr’é: “Si mi a ofresé abo e tereno, kuantu lo bo a paga mi?” Ora ku e hòmber  no a kontestá, Maria a sigui bisa: “Ni maske bo a duna mi tur plaka na mundu, lo e no ta basta, pasobra plaka no por kumpra bida.”

“Bo no tin yu, tòg?” e hòmber a puntra.

Pa pone fin na e kòmbersashon, Maria a bisa: “E tereno ta pertenesé na Yehova. El a fia mi e pa asina tantu aña, i awor mi a dunele bèk. Mi tin e speransa di biba pa semper.” Anto el a puntra e hòmber: “Òf akaso bo ta ofresé bida eterno?” Sin bisa un pia di palabra, e hòmber a bira lomba kana bai.

E resultado tabata un bunita edifisio di dos piso ku a ser konstruí ku yudansa di rumannan kualifiká di Portugal. E tin un bodega ku ta abarká henter e espasio bou di e promé piso, un Salòn di Reino espasioso i lugá di alohamentu. Tambe e tin vários sala pa tene skol pa ansianonan, pa sirbidónan ministerial i pioneronan. Awor tin dos kongregashon ta tene nan reunionnan den e salòn ei, i esei ta hasié un ekselente sentro edukativo pa adorashon puru den e kapital.

Na Mé-Zochi, tabatin un kongregashon di 60 publikadó seloso. Tabata bisto ku nan mester di un Salòn di Reino apropiá, ya ku nan tabata tene reunion den un Salòn di Reino improvisá situá meimei di un plantashon di bakoba. Nan a informá e outoridatnan lokal di esaki, i funshonarionan simpátiko a ofresé nan un bon pida tereno den e kaya prinsipal. Den dos luna nan a traha un bunita Salòn di Reino ku yudansa di rumannan di Portugal, usando e método di konstrukshon rápido. E hendenan lokal no por a kere nan bista. Un ingeniero sueko ku tabata traha riba un proyekto di konstrukshon den stat a keda babuká ora el a mira e rumannan den akshon. El a bisa: “E kos aki ta inkreibel! Testigunan di Yehova, aki na Mé-Zochi, usando un método di konstrukshon rápido! Ta asina nos mester a organisá nos proyekto.” E Salòn di Reino a wòrdu dediká dia 12 di yüni 1999, i tabatin 232 hende presente. E salòn a bira un atrakshon prinsipal pa turistanan ku bishitá e stat di Mé-Zochi.

Un Kongreso Históriko

Un evento históriko pa Testigunan di Yehova na São Tomé i Príncipe tabata e Kongreso di Distrito di tres dia “Siñansa Divino” na  yanüari 1994, e promé kongreso na e islanan aki. Nan a ten’é den e mihó sala airekondishoná di e pais. Bo por imaginá kon kontentu e 116 publikadónan di Reino tabata? Tabatin un asistensia grandi di 405 hende i pa promé bes nan a mira presentashon di dramanan bíbliko i haña publikashonnan nobo di kongreso! Un playa tropikal tabata e sitio pa e boutismo di 20 persona dediká.

Un novedat ku a akapará atenshon di públiko tabata e bèchnan úniko ku e delegadonan tabatin bistí. E presensia di 25 bishitante di Portugal i Angola a duna e kongreso un toke internashonal. No a tarda mashá ku e rumannan a desaroyá un laso kaluroso di amor kristian entre nan, i hopi hende tabata awa na wowo durante e último seshon ora a yega e momentu di tuma despedida.—Juan 13:35.

Reporteronan di Radio Nashonal a bini i a entrevistá e superintendente di kongreso. Tambe nan a transmití porshonnan di vários diskurso. En bèrdat esei tabata un okashon históriko, i pa e Testigunan fiel aki ku pa hopi tempu tabata aislá, e kongreso a laga nan sinti komo si fuera e organisashon visibel di Yehova ta hopi mas serka di nan.

Dunando Fruta pa e Alabansa di Yehova

Ora e mensahe di Reino ta duna fruta, e ta produsí bon kondukta ku ta trese alabansa i onor pa Yehova. (Tito 2:10) Un mucha muhé teenager a gusta loke e tabata siña for di su studio di Beibel semanal. Sin embargo, su tata a prohibié di asistí na e reunionnan di kongregashon. Ora ku el a splika e tata na un manera respetuoso di e importansia di e reunionnan kristian i di su deseo pa asistí, e tata a sak’é for di kas mesora. Aparentemente, el a pensa ku e yu lo a hasi loke hopi otro hóben ta hasi: bai biba mesora ku un hòmber ku por kria nan. Ora e tata a haña sa ku e yu ta hiba un bida kristian limpi i ehemplar, esei a konmov’é pa tum’é bèk na kas i dun’é pleno libertat pa sirbi Yehova.

Un otro ehèmpel ta di un lider di un grupo musikal. Su estilo di bida inmoral a lag’é desilushoná. Den su búskeda pa un propósito den bida, e Testigunan a haña kontakto kuné. Ora el a kuminsá biba segun e normanan moral di Beibel, el a bira e tópiko di kòmbersashon. No a tarda hopi ku el a mira ku ta nesesario pa e kibra ku tur mal kompania. (1 Korintionan 15:33) Anto el a tuma e paso importante di batisá komo símbolo di su dedikashon na Yehova.

Tabatin un grupo di hóben en buska di e religion berdadero. Den nan búskeda nan tabata kòmbersá ku pastornan di vários grupo evangéliko, pero esei a resultá den mas konfushon i desilushon. Konsekuentemente, nan a bira vagabundonan violento i personanan ku ta hasi bofon di tur loke ta religioso.

Un dia un Testigu di Yehova, un misionero, tabata riba kaminda pa bai kondusí un studio di Beibel i el a pasa banda di e lugá kaminda e hóbennan aki tabata. E grupo tabata ke pa e misionero kontestá algun pregunta i nan a bai kuné den kurá di un kas, kaminda nan a invit’é pa sinta riba un banki chikí. Nan a atak’é ku un avalancha di pregunta riba temanan manera alma, fièrnu di kandela, bida den shelu i fin di mundu. E Testigu a kontestá tur nan preguntanan for di e Beibel ku e lider di e gèng a fi’é. Un ora despues, e lider, ku yama Law, a bisa e misionero: “Ora nos a pidi bo pa bin i kontestá pregunta, nos intenshon tabata pa hasi bofon di bo, manera nos a hasi ku hende di otro religion. Nos tabata kere ku niun hende lo por a kontestá e preguntanan ei. Pero bo sí a kontestá nan, i bo a usa solamente e Beibel! Bisa mi, kon mi por siña mas tokante Beibel?” E ruman a kuminsá un studio di Beibel ku Law, i poko despues el a kuminsá asistí na reunion. Djis despues di esei, el a bandoná e grupo i a stòp ku su estilo di bida violento. Denter di un aña, el a dediká su bida na Yehova i a batisá. Awor e ta sirbi komo sirbidó ministerial.

 Un kustumber lokal ku ta fuertemente ankrá ta ku parehanan ta biba kompañá, pues sin ta kasá legalmente. Hopi di nan a biba huntu pa años i tin yu. Ta difísil pa nan aseptá Dios su punto di bista di e asuntu. P’esei ta alentador pa mira kon e Palabra di Dios a yuda un persona vense e opstákulo aki.—2 Korintionan 10:4-6; Hebreonan 4:12.

Antonio a komprondé ku e mester legalisá su matrimonio i a plania pa hasi esei despues di e kosecha di maishi, ora ku lo e tin poko sèn pa e fiesta di kasamentu. Un anochi, djis promé ku e kosecha, ladronnan a bini i a hòrta su kosecha. El a disidí di warda pa e kosecha di e siguiente aña, i ladronnan a bolbe hòrt’é. Ora ku un otro intento pa haña plaka pa su kasamentu a frakasá, Antonio a realisá ta ken tabata su berdadero opositor. El a bisa: “Satanas no ta kue mi kabes abou mas. Den un luna i mei, nos lo kasa, ku òf sin fiesta!” I asina a sosodé. Pa nan sorpresa, nan amigunan a trese galiña, patu i un kabritu pa e fiesta di kasamentu. Despues di a legalisá nan matrimonio, Antonio ku su kasá—huntu ku nan seis yunan—a batisá komo símbolo di nan dedikashon na Yehova.

Un Bista di Isla Príncipe

Den añanan resien e superintendente di sirkuito i pioneronan di São Tomé de bes en kuando tabata bishitá e 6.000 habitantenan di Príncipe. E habitantenan tabata masha hospitalario i ansioso pa tende loke e Testigunan tabatin di bisa. Despues ku un hòmber a lesa un tratado ku e pioneronan a dun’é, el a bai buska nan su siguiente dia i a ofresé pa yuda nan parti mas tratado. E pioneronan a splik’é ku ta nan mes mester hasi e obra aki, pero e hòmber a insistí ku e mester kompañá nan di kas pa kas ya asina e por introdusí nan na e doñonan di kas i rekomendá nan pa skucha bon. Finalmente e hòmber a bai laga nan, pero promé el a elogiá e pioneronan pa e trabou importante ku nan tabata hasi.

Na 1998 dos pionero di São Tomé a bai biba na Príncipe, i poko despues nan tabata kondusí 17 studio di Beibel. E obra a sigui ekspandé, i no a tarda hopi ku e Studio di Buki di Kongregashon tabatin un promedio di 16 hende presente, i mas ku 30 tabata asistí na e diskurso públiko. E rumannan a papia ku outoridatnan lokal tokante e nesesidat di un lugá pa reuní, i felismente, nan a duna un tereno pa traha un Salòn di Reino. Rumannan di São Tomé boluntariamente a traha un Salòn di Reino chikí ku tambe tin lugá di biba pa dos pionero spesial.

Sin duda e bon nobo ta dunando hopi fruta i ta oumentando riba e islanan remoto aki. (Kolosensenan 1:5, 6) Na yanüari 1990 tabatin 46 publikadó na São Tomé i Príncipe. Durante e aña di sirbishi 2002 nan a alkansá un máksimo di 388 proklamadó di Reino! Mas ku 20 porshento di e publikadónan ta den sirbishi di tempu kompletu, i nan ta kondusí alrededor di 1.400 studio di Beibel. Na e Memorial di 2001 tabatin pa promé bes un asistensia di 1.907 hende. Sí, riba e islanan tropikal aki, e palabra di Yehova ta plamando rápidamente i ta ser glorifiká.—2 Tesalonisensenan 3:1.

[Kuadro/Plachi na página 12]

Programanan Popular na Radio

Un buki ku ta wòrdu apresiá mashá riba e islanan aki ta Loke hovenan sa puntra−Contesta práctica. * Kada dos siman, Radio Nashonal ta transmití un programa di 15 minüt ku tin e mesun tema ei. Ta masha emoshonante pa tende e lokutor puntra: “Hóbennan, kon boso por sa si loke boso ta sinti ta amor berdadero òf un enamorashon pasahero?,” anto e ta kuminsá lesa un porshon di e buki! (Wak kapítulo 31.) Un otro programa similar ta presentá partinan selektá for di e buki E Secreto pa Felicidad den Famia. *

[Nota]

[Plachi na página 9]

Promé Salòn di Reino na São Tomé na 1994

[Plachinan na página 10]

1. Salòn di Reino di konstrukshon rápido na Mé-Zochi

2. Un kongreso di distrito históriko a tuma lugá aki nan

3. Kandidatonan pa boutismo felis na kongreso

[Rekonosementu pa Potrèt na página 8]

Mundu: Mountain High Maps® Copyright © 1997 Digital Wisdom, Inc.