Kon Bo Por Tuma Desishonnan Sabí?

“UN HENDE sabí lo tende i lo oumentá su konosementu,” Salomon, rei di Israel di antigwedat, a bisa. Mayoria di nos a yega di tuma desishonnan robes simplemente pa e echo ku nos no a hasi kaso di konseho di otro hende.—Proverbionan 1:5.

Despues e palabranan ei di Salomon a ser skirbí den Beibel, huntu ku e restu di “tres mil proverbio” ku el a komponé. (1 Reinan 4:32) Nos por benefisiá for di su dichonan sabí dor di siña konosé nan, i tuma nan na pechu? Sí. Nan ta yuda nos ‘konosé sabiduria i instrukshon, diserní e dichonan di komprondementu, risibí instrukshon den kondukta prudente, hustisia, huisio i rektitut.’ (Proverbionan 1:2, 3) Laga nos analisá sinku konseho basá riba Beibel ku por yuda nos tuma desishonnan sabí.

Konsiderá Konsekuensianan Riba Término Largu

Tin algun desishon ku lo tin konsekuensianan basta serio. P’esei purba determiná di antemano kiko esakinan lo por ta. Tene kuidou pa e benefisionan atraktivo riba término kòrtiku no siega bo pa e posibel konsekuensianan desagradabel riba término largu. Proverbionan 22:3 ta spièrta: “Un hende prudente ta mira maldat i ta skonde, ma e simpelnan ta sigui bai, i ta haña kastigu pa esei.”

Kisas lo ta útil pa traha un lista di e konsekuensianan tantu riba término kòrtiku komo esnan riba término largu. Por ta ora bo skohe un sierto trabou, e resultado riba término kòrtiku lo por ta ku bo ta haña un bon salario i un trabou agradabel. Pero ta posibel ku un di e konsekuensianan riba término largu por ta ku lo bo tin un trabou sin berdadero futuro? Òf a lo largu kisas lo bo tin ku muda bai otro kaminda, por ta leu for di amigunan i famianan? Òf kisas lo bo por haña bo ta traha den un ambiente insaludabel òf ku lo ta asina laf ku bo ta keda profundamente frustrá? Wak kiko ta e bentahanan i desbentahanan, anto kaba disidí kua faktor ta mas importante.

Tuma Sufisiente Tempu

Ora bo tuma desishon den purá ta manera e dicho ta bisa: Sopi purá ta sali salu. Proverbionan 21:5 ta spièrta: “E plannan di hende balente siguramente ta kondusí na abundansia, ma tur esnan ku tin purá, siguramente ta resultá den pobresa.” Por ehèmpel, tinernan ku ta lokamente enamorá mester tuma tempu promé ku nan disidí di kasa. Sino, nan lo por eksperensiá e bèrdat di loke William Congreve, un dramaturgo ingles ku a biba na prinsipio di siglo 18, a bisa: “Esnan ku kore kasa tin hopi tempu despues pa lamentá.”

Sin embargo, nos no mester konfundí tumamentu di sufisiente tempu pa disidí ku posponé  tumamentu di desishon. Tin desishon ta asina importante ku ta sabí pa tuma nan mas pronto posibel. Si nos tarda innesesariamente e por sali tantu nos komo otro hende karu. Posponé un desishon riba su mes kisas por ta un desishon ku probablemente no ta dje sabí ei.

Keda Habrí pa Konseho

Siendo ku no tin dos situashon idéntiko, no ta semper dos persona ku problemanan similar lo tuma e mesun desishon. Pero tòg ta útil pa tende ki desishon otro hende a tuma den situashonnan similar. Puntra nan kiko nan ta pensa awor di nan desishon. Por ehèmpel, ora di skohe un fishi, pidi esnan ku ya ta hasi e trabou ei pa un tempu kaba pa konta bo ámbos banda di e medaya. Kiko tabata e bentahanan i desbentahanan òf posibel peligernan di e trabou aki?

“Pa falta di konseho plannan ta frakasá,” segun spièrtamentu bíbliko, “ma ku hopi konsehero nan ta wòrdu lográ.” (Proverbionan 15:22) Naturalmente, ora nos ta buska konseho i ta siña for di eksperensia di otro hende, nos mester ta plenamente konsiente ku ta nos mes tin ku tuma e desishon final i a la bes karga e responsabilidat pa e desishon aki.—Galationan 6:4, 5.

Hasi Kaso di un Konsenshi Bon Entrená

Nos konsenshi por yuda nos tuma desishonnan na armonia ku e prinsipionan básiko ku nos ta skohe pa guia nos den bida. Pa un kristian, esaki ta nifiká entrená e konsenshi di tal manera ku e ta reflehá e pensamentunan di Dios. (Romanonan 2:14, 15) E Palabra di Dios ta bisa nos: “Den tur bo kamindanan rekonos’é, i e lo dirigí bo bereanan.” (Proverbionan 3:6) Naturalmente, den algun aspekto dos persona—kada un ku un konsenshi bon entrená—kisas por yega na diferente konklushon i p’esei tuma desishonnan distinto for di otro.

Sin embargo, ora ta trata di akshonnan ku e Palabra di Dios ta kondená direktamente, un konsenshi bon entrená lo no duna e persona libertat pa skohe. Por ehèmpel, un konsenshi ku no a ser entrená pa prinsipionan bíbliko por permití un hende hòmber i hende muhé biba huntu gewon sin kasa pa nan wak si nan ta bai bon ku otro. Kisas nan ta pensa ku nan a tuma un desishon sabí, rasonando ku esei lo por evitá ku nan ta kore kasa i biba infelis. Por ta nan konsenshi no ta kondená nan. Sin embargo, kualkier hende ku tin e punto di bista di Dios tokante relashon seksual i matrimonio lo no bai di akuerdo ku un areglo temporal i inmoral asina.—1 Korintionan 6:18; 7:1, 2; Hebreonan 13:4.

Kon Bo Desishonnan Ta Afektá Otro Hende

Hopi bes bo desishonnan por afektá otro hende. P’esei nunka no tuma un desishon imprudente ni bobo deliberadamente, ya ku lo bo por pone bo relashon presioso ku bo amigunan i famianan òf, mas importante ainda, bo relashon ku Dios na peliger. Proverbionan 10:1 ta bisa: “Un yu sabí ta hasi su tata kontentu, ma un yu bobo ta un tristesa pa su mama.”

Di otro banda, tin bes ta nesesario pa skohe entre amigunan. Por ehèmpel, kisas bo ta disidí di rechasá puntonan di bista religioso ku bo tabatin anteriormente pero ku no ta na armonia ku e Skritura. Òf bo por disidí di hasi kambionan  grandi den bo personalidat pasobra bo kier biba na armonia ku guia divino ku bo a aseptá awor. Bo desishon kisas no ta agradá sierto amigu òf famianan, pero kualkier desishon ku ta agradá Dios ta un desishon sabí.

Sea Sabí i Tuma e Desishon Mas Importante

Maske hende en general no sa esei, tur hende awe tin ku disidí entre bida i morto. E israelitanan di antigwedat a enfrentá un situashon similar ora nan tabata nèt dilanti di e Tera Primintí na aña 1473 promé ku nos era. Komo bosero di Dios, Moisés a bisa nan: “Mi a pone bida i morto boso dilanti, e bendishon i e maldishon. P’esei, skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje; pasobra esaki ta bo bida i e largura di bo dianan, pa bo biba na e tera ku SEÑOR a hura na bo tatanan, na Abraham, Isaak i Jakòb, pa duna nan.”—Deuteronomio 30:19, 20.

Profesia i kronologia bíbliko ta mustra ku nos ta biba den “tempunan trabahoso” i ku “e esena dje mundu aki ta kambiando.” (2 Timoteo 3:1; 1 Korintionan 7:31, NW) E kambio predisí lo kulminá den e destrukshon di un sistema humano korupto, ku lo wòrdu remplasá pa Dios su mundu nobo di hustisia.

E mundu nobo ei ta hopi serka. Lo bo drenta pa disfrutá di bida eterno riba tera bou di e Reino di Dios? Òf lo bo wòrdu eliminá for di tera huntu ku e sistema di Satanas? (Salmo 37:9-11; Proverbionan 2:21, 22) E desishon enkuanto ki estilo di bida bo tin ku sigui awor ta un desishon ku abo tin ku tuma. Sí, e ta un desishon ku ta un kuestion di bida òf morto. Lo bo deseá di haña yudansa pa bo tuma e desishon korekto, un desishon sabí?

Si bo skohe bida esei ta nifiká ku na promé lugá lo bo tin ku siña kiko ta Dios su rekisitonan. Mayoria religion no a splika kiko eksaktamente e rekisitonan aki ta. Hopi bes nan lidernan a pone nan hendenan kere falsedat i hasi kosnan ku ta desagradá Dios. Nan a keda sin splika ku ta importante pa hende tuma un desishon personal pa adorá Dios “den spiritu i bèrdat.” (Juan 4:24) P’e motibu ei mayoria di hende no ta adorá Dios di e manera ei. Pero tuma nota kiko Hesus a bisa: “Esun ku no ta ku mi ta kontra mi; i esun ku no ta rekohé huntu ku mi ta plama.”—Mateo 12:30.

Ku goso Testigunan di Yehova ta yuda hende haña un mihó komprondementu di e Palabra di Dios. Regularmente nan ta tene kòmbersashonnan bíbliko ku hende individual òf gruponan na e ora i lugá ku ta kumbiní e personanan aki. Esnan ku kier hasi uso di e areglo aki mester sea tuma kontakto ku Testigunan di Yehova den nan área òf skirbi e editornan di E Toren di Vigilansia.

Klaru ku algun hende kisas ya tin un konosementu básiko di loke Dios ta rekerí. Por ta nan ta asta konvensí kaba ku Beibel ta bèrdat i konfiabel. Pero tòg algun di nan a posponé e desishon pa dediká nan mes na Dios. Dikon? Por tin diferente motibu.

Akaso nan no ta konsiente di e importansia pa hasi esei? Hesus a bisa klaramente: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu.” (Mateo 7:21) Konosementu di Beibel so no ta sufisiente; mester aktua tambe. E kongregashon kristian di promé a pone ehèmpel pa nos. Tokante algun kristian den promé siglo Beibel ta bisa: “Ora nan a kere Felipe, kende tabata prediká e bon nobo tokante di e reino di Dios i e nòmber di Hesukristu, nan tabata wòrdu batisá, tantu hòmber komo muhé.” (Echonan 2:41; 8:12) Pues si un hende aseptá e Palabra di Dios ku henter su kurason, kere loke e ta bisa i pone su bida na armonia ku Dios su normanan, kiko ta strob’é di batisá komo símbolo di su dedikashon? (Echonan 8:34-38) Ta klaru ku si un hende kier pa Dios aseptá su dedikashon, e tin ku dal e paso aki boluntariamente i ku un kurason gososo.—2 Korintionan 9:7.

Tin hende ta pensa ku nan no tin sufisiente konosementu pa dediká nan bida na Dios. Pero  tur hende ku kuminsá ku algu nobo den bida tin konosementu limitá. Kua profeshonal lo tribi di bisa ku na kuminsamentu di su karera e tabata sa tur loke e sa awor? Pa un hende tuma e desishon pa sirbi Dios, loke e tin mester ta simplemente un konosementu básiko di siñansanan i prinsipionan di Beibel, akompañá pa un deseo sinsero pa biba na armonia ku nan.

Tin algun hende ta tarda pa tuma nan desishon dor ku nan tin miedu ku nan lo no por kumpli kuné? Den hopi kompromiso ku hende ta hasi, ta lógiko ku nan ta sinti nan mes preokupá ku nan lo por faya. Un hòmber ku disidí pa kasa i kria un famia por sinti ku e no ta masha kapas, pero dor di hasi un kompromiso esei ta motiv’é p’e hasi su máksimo esfuerso. Di igual manera, un hóben ku a kaba di haña su reibeweis kisas tin miedu di kousa un aksidente, spesialmente si e ta na haltura di sifranan ku ta indiká ku shofùrnan yòn tin mas chèns di haña aksidente na komparashon ku shofùrnan di mas tantu tempu. Sin embargo, e konosementu aki por ta benefisioso ya ku e ta motiv’é pa kore ku mas kuidou. Keda sin buska reibeweis di ningun manera lo no ta e solushon!

Disidí pa Bida!

Beibel ta mustra ku e aktual sistema polítiko, ekonómiko i religioso rònt mundu i esnan ku ta apoy’é pronto lo no eksistí riba tera mas. Sin embargo, hende individual ku sabiamente a disidí pa bida i ku ta aktua na armonia ku e desishon ei lo keda. Komo núkleo di un sosiedat di mundu nobo, nan lo partisipá den hasi e tera un paradeis, manera tabata Dios su propósito original. Abo lo partisipá den e trabou gososo aki bou di e direkshon di Dios?

Si ta asina, tuma desishon pa studia e Palabra di Dios. Tuma desishon pa bo siña kiko ta e rekisitonan pa agradá Dios. Anto disidí pa kumpli ku nan i, mas importante ainda, pega na nan te na final. Ku poko palabra, disidí pa bida!

[Plachinan na página 4]

Tuma sufisiente tempu pa tuma desishonnan grandi

[Plachi na página 5]

Keda habrí pa konseho ora di skohe un karera

[Plachinan na página 7]

Esnan ku disidí pa sirbi Dios awor lo por yuda hasi e tera un paradeis