“No Uni Boso Mes den Yugo Desigual”

MANERA bo por mira riba e plachi ei, e kamel i e toro ku ta plug huntu ta mustra masha inkómodo. E yugo ku ta tene nan huntu ta pone nan tur dos sufri, ya ku e ta trahá pa tene dos bestia di e mesun tamaño i forsa huntu. Preokupá pa e bienestar di tal bestia di karga, Dios a bisa e israelitanan: “No plug ku un bue i un buriku huntu.” (Deuteronomio 22:10) E mesun prinsipio lo ta aplikabel tambe den e kaso di un toro i un kamel.

Normalmente, un kunukero lo no laga su bestianan pasa den e sufrimentu ei. Pero si e no tabatin dos toro, ta e dos bestianan ku e tabatin disponibel lo e mester a pone huntu bou di e mesun yugo. Aparentemente manera e plachi ta mustra, ta esei ta loke e kunukero di siglo 19 a disidí di hasi. Debí ku e bestianan no tabatin mesun tamaño ni peso, esun mas suak lo mester a hasi hopi esfuerso pa kana mes duru ku e otro bestia, i esun mas fuerte lo mester a karga mas tantu peso.

Apòstel Pablo a usa e ilustrashon di un yugo desigual pa siña nos un lès importante. “No uni boso mes den yugo desigual ku inkrédulonan,” el a skirbi. “Pasobra ki kompañerismo hustisia tin ku inhustisia, i ki komunion lus tin ku skuridat?” (2 Korintionan 6:14) Kon un kristian lo por uni su mes bou di un yugo desigual?

Un manera ta si e skohe pa kasa ku un hende ku no tin e mesun kreensianan kuné. Tal union lo ta inkómodo pa nan tur dos, ya ku nan lo haña nan ku desakuerdonan riba asuntunan fundamental.

Ora Yehova a originá matrimonio, el a duna e esposa e papel di un ayudante “ku ta pas” ku e hòmber. (Génesis 2:18) Asina tambe, mediante profeta Malakias, Dios a referí na un esposa komo un “kompañera.” (Malakias 2:14) Nos Kreadó kier pa parehanan kasá traha armoniosamente den e mesun direkshon spiritual, kargando e responsabilidatnan huntu, pa nan tur dos kosechá e mesun benefisionan.

Dor di kasa solamente “den Señor,” un kristian ta mustra rèspèt pa e konseho di nos Tata ku ta den shelu. (1 Korintionan 7:39) Esaki ta pone un fundeshi pa un matrimonio uní, ku por trese alabansa i onor pa Dios miéntras ámbos partner ta sirbié komo “kompañero di yugo” den un sentido spesial.—Filipensenan 4:3, NW.

[Rekonosementu pa Potrèt na página 32]

Kamel i toro: Di e buki La Tierra Santa, Volúmen 1, 1830