Pa Gana e Premio, Ehersé Dominio Propio!
Pa Gana e Premio, Ehersé Dominio Propio!
“Tur ku ta kompetí den e weganan ta ehersé dominio propio den tur kos.”—1 KORINTIONAN 9:25.
1. Di akuerdo ku Efesionan 4:22-24, kon miónes di hende a bisa sí na Yehova?
SI BO a batisá komo Testigu di Yehova, bo a duna di konosé públikamente ku bo ta dispuesto pa partisipá den un kompetensia ku tin bida eterno komo premio. Bo a bisa sí, òf bai di akuerdo, pa hasi e boluntat di Yehova. Promé ku hopi di nos a hasi un dedikashon na Yehova, nos tabatin ku hasi kambionan importante pa asina nos dedikashon por ta válido i aseptabel pa Dios. Nos a sigui e konseho ku apòstel Pablo a duna kristiannan: “Pone un banda e hende bieu ku ta wòrdu korumpí konforme e pashonnan engañoso . . . Bisti e hende nobo, ku a wòrdu kreá segun Dios den hustisia i santidat berdadero.” (Efesionan 4:22-24) Ku otro palabra, promé ku nos a bisa sí na nos dedikashon na Dios, nos tabatin ku bisa nò na nos estilo di bida anterior inaseptabel.
2, 3. Kon 1 Korintionan 6:9-12 ta indiká ku hende mester hasi dos tipo di kambio pa nan por haña e aprobashon di Dios?
2 Sierto rasgonan di e personalidat bieu (“e hende bieu”) ku prospektivo Testigunan di Yehova mester pone un banda ta ser kondená direktamente den e Palabra di Dios. Pablo a menshoná algun den su karta na e korintionan, bisando: “Ni fornikadó, ni adoradó di dios falsu, ni adúltero, ni sodomita, ni homoseksual, ni ladron, ni esnan golos pa plaka, ni buraché, ni blasfemadó, ni estafadó lo no heredá e reino di Dios.” Kaba el a mustra ku e kristiannan di promé siglo a hasi e kambionan nesesario den nan personalidat dor di agregá: “I asina algun di boso tabata.” Tuma nota ku e no a bisa ku nan ta, sino ku nan tabata.—1 Korintionan 6:9-11.
3 Tambe Pablo a sugerí ku kisas mas kambio lo ta nesesario, pasobra el a sigui bisa: “Tur kos ta permití pa mi, ma tur kos no ta kumbiní.” (1 Korintionan 6:12) P’esei hopi hende awe ku ta deseá di ta un Testigu di Yehova, ta mira ku ta nesesario pa nan bisa nò asta na kosnan ku ounke nan ta permití, no ta kumbiní òf ta di poko balor duradero. Kisas e kosnan aki ta kita hopi tempu i lo por desviá nan di sigui tras di asuntunan di mayor importansia.
4. Riba ki punto kristiannan dediká ta di akuerdo ku Pablo?
4 Dedikashon na Dios ta ser hasí boluntariamente, no di mala gana, komo si fuera e ta un sakrifisio inmenso. Kristiannan dediká ta di akuerdo ku Pablo, kende a bisa despues ku el a bira un siguidó di Kristu: “Pa [Hesus] mi a sufri pièrdè di tur kos, i ta konsiderá nan komo basura, pa mi por gana Kristu.” (Filipensenan 3:8) Gustosamente Pablo a bisa nò na kosnan di poko balor ya asina e por a sigui bisa sí na Dios.
5. Den ki klase di kareda Pablo a partisipá ku éksito, i kon nos por hasi meskos?
5 Pablo a ehersé dominio propio den su kareda spiritual i na final e por a bisa: “Mi a lucha e bon lucha, mi a terminá e kareda, mi a warda e fe; den futuro ta wardá pa mi e korona di hustisia, kual Señor, e hues hustu, lo duna mi riba e dia ei; i no na ami so, ma tambe na tur esnan ku a stima su binida.” (2 Timoteo 4:7, 8) Nos tambe lo por ekspresá meskos un dia? Nos lo por, si nos ehersé fe ku dominio propio segun ku nos ta sigui den nos kareda kristian sin stòp te na final.
Dominio Propio Ta Nesesario pa Hasi Bon
6. Kiko ta dominio propio, i kua ta e dos maneranan nos tin ku ehers’é?
6 E palabranan hebreo i griego tradusí komo “dominio propio” den Beibel, literalmente ta indiká ku un persona tin poder òf kontròl riba su mes. Hopi bes nan ta transmití e idea di frena bo mes di hasi malu. Pero ta bisto ku nos lo tin mester di un sierto grado di dominio propio tambe si nos ke usa nos kurpa pa hasi obra bon. E tendensia natural di hende imperfekto ta pa hasi malu, pues nos tin dos lucha. (Eklesiastés 7:29; 8:11) Miéntras nos ta frena nos mes pa no hasi loke ta malu, nos tin ku fòrsa nos mes tambe pa hasi loke ta bon. De echo, dominá nos kurpa p’e hasi bon ta un di e mihó maneranan pa evitá di hasi malu.
7. (a) Meskos ku David, kiko nos mester pidi den orashon? (b) Kiko nos mester meditá riba dje pa yuda nos ehersé mayor dominio propio?
7 Ta bisto anto ku dominio propio ta esensial pa nos por kumpli ku nos dedikashon na Dios. Meskos ku David, nos tin ku pidi den orashon: “Krea den mi un kurason limpi, o Dios, i renobá un spiritu rekto den mi.” (Salmo 51:10) Nos por meditá riba e benefisionan di evitá kosnan ku ta moralmente malu òf ku físikamente ta debilitá nos. Pensa riba e daño ku nos por sufri si nos no evitá e kosnan ei: problemanan serio di salú, problema den relashonnan personal, asta morto prematuro. Di otro banda, pensa riba e tantísimo benefisionan di sigui e estilo di bida ku Yehova ta preskribí. Sin embargo, nos mester ta realista i no lubidá ku nos kurason ta engañoso. (Jeremias 17:9) P’esei nos mester ta desididu pa resistí e intentonan di nos kurason pa purba minimisá e seriedat di pega na e normanan di Yehova.
8. Ki realidat nos sa di eksperensia? Duna un ehèmpel.
8 Mayoria di nos sa di eksperensia ku nos karni indispuesto hopi bes ta purba fria e selo di nos spiritu dispuesto. Tuma por ehèmpel e predikashon di Reino. Yehova ta alegrá ora ku hende di buena gana ta pone nan mes disponibel pa partisipá den e trabou aki ku ta duna bida. (Salmo 110:3; Mateo 24:14) Pa mayoria di nos, no tabata fásil pa siña prediká públikamente. Esei a rekerí—i kisas ainda ta rekerí—pa nos dominá nos kurpa, ‘gòlpi’é’ i ‘hasié esklabo,’ en bes di permitié dikta e proseder di mas fásil.—1 Korintionan 9:16, 27; 1 Tesalonisensenan 2:2.
“Den Tur Kos”?
9, 10. Kiko ehersé “dominio propio den tur kos” ta enserá?
9 E konseho bíbliko pa ehersé “dominio propio den tur kos” ta indiká ku dominio propio ta enserá mas ku simplemente dominá nos mes pa no rabia lihé i evitá kondukta inmoral. Podisé nos ta sinti ku nos a alkansá dominio propio riba e terenonan aki, i si ta asina, nos realmente por ta gradisidu. Sin embargo, ke tal di otro tereno di bida kaminda podisé e nesesidat di dominio propio no ta asina bisto? Por ehèmpel, suponé ku nos ta biba den un pais relativamente riku ku tin un nivel haltu di bida. Lo no ta sabí pa siña bisa nò na gastamentu innesesario di plaka? Mayornan ta hasi bon di siña nan yunan pa no kumpra kiko ku nan mira djis pasobra e ta disponibel, e ta bunita òf nan tin e plaka pa kumpr’é. Klaru ku pa e instrukshon ei ta efektivo, mayornan mes mester pone un bon ehèmpel.—Lukas 10:38-42.
10 Siña biba sin sierto kosnan ku kisas nos tin gana di dje, por duna nos mas determinashon òf forsa di boluntat. Tambe esei por yuda nos haña mas apresio pa e kosnan material ku nos tin i por hasi nos mas komprensivo pa ku esnan ku tin ku biba sin sierto kosnan, no pasobra nan ke sino debí na nesesidat. Ta bèrdat ku un estilo di bida moderá ta nèt kontrali di e aktitutnan popular manera “trata bo mes bon” òf “bo meresé lo mihó.” E mundu di propaganda ta stimulá e deseo pa satisfakshon instantáneo, pero e ta hasi esei pa yena su mes saku. E situashon aki lo por stroba nos esfuerso pa desplegá dominio propio. Un revista di un pais próspero na Europa a menshoná resientemente: “Si hende ku ta biba den e sirkunstansianan agonisante di pobresa ekstremo tin ku hiba un lucha interno pa mantené impulsonan indeseabel bou di kontròl, anto esnan ku ta biba den e pais di abundansia di nos sosiedat riku djawe tin un lucha hopi mas fuerte!”
11. Dikon ta probechoso pa nos siña biba sin sierto kosnan, pero kiko ta hasi esaki difísil?
11 Si nos tin difikultat pa distinguí entre loke nos ke i loke realmente nos tin mester, lo por ta bon pa nos dal paso pa hasi sigur ku nos no ta aktua iresponsabel. Por ehèmpel, si nos ta deseá di kombatí e inklinashon pa gasta plaka pa loko, podisé nos por disidí pa no kumpra kos na krédito, òf ora nos ta bai hasi kómpras, nos ta sali ku solamente un kantidat fiho di plaka. Kòrda ku Pablo a bisa ku “santidat [“deboshon na Dios,” NW] akompañá pa kontentamentu ta di gran ganashi.” El a rasoná: “Nos no a trese nada den mundu, i nos no por hiba nada for di dje tampoko. I si nos tin kuminda i paña pa bisti, ku esakinan nos mester ta kontentu.” (1 Timoteo 6:6-8) Nos ta kontentu ku loke nos tin? Pa nos siña hiba un bida simpel, liber di e karganan adishonal di satisfakshon desenfrená di deseonan—sea kual sea e deseonan ei—ta eksigí forsa di boluntat i dominio propio. Sin embargo, e ta un lès ku ta bale la pena pa nos siñ’é.
12, 13. (a) Den ki manera reunionnan kristian tin di haber ku dominio propio? (b) Riba ki otro tereno nos tin ku kultivá dominio propio?
12 Ora nos ta asistí na reunion-, asamblea- i kongresonan kristian tambe nos tin mester di un sierto grado di dominio propio. Por ehèmpel, e kualidat ei ta nesesario pa nos no laga nos mente dual durante e programa. (Proverbionan 1:5) Kisas nos mester di dominio propio pa nos no stroba otro hende dor di sinta flùister ku esnan sintá banda di nos en bes di presta pleno atenshon na e oradó. Podisé e ta eksigí dominio propio tambe pa ahustá nos programa pa nos por yega na tempu. Ademas, nos lo por tin mester di dominio propio pa apartá tempu pa prepará pa reunion i despues partisipá den nan.
13 Ehersiendo dominio propio den kosnan chikí ta duna nos mas forsa pa dominá nos mes den kosnan grandi. (Lukas 16:10) P’esei, ta hopi bon pa nos disipliná nos mes pa lesa e Palabra di Dios i publikashonnan bíbliko riba un base regular, studia nan i meditá riba loke nos ta siña. Tambe ta masha sabí di nos parti pa disipliná nos mes relashoná ku trabou-, amistat-, aktitut- i kustumbernan personal ku no ta bon, òf disipliná nos mes pa bisa nò na aktividatnan ku lo por hòrta tempu presioso for di nos sirbishi di Dios. Kedando okupá den e sirbishi di Yehova ta siguramente un bon protekshon kontra kosnan ku lo por kita nos for di e paradeis spiritual di Yehova su kongregashon mundial.
Bira Madurá Mediante Dominio Propio
14. (a) Kon mucha mester siña ehersé dominio propio? (b) Kiko por ta e benefisionan ora mucha ta siña ehersé dominio propio for di trempan den bida?
14 Beibi resien nasí no ta famoso pa nan dominio propio. Un pamfleta di ekspertonan den komportashon di mucha ta splika: “Un yu no ta haña dominio propio outomátikamente òf diripiente. Beibi i mucha chikí tin mester di e guia i apoyo di nan mayornan pa kuminsá ku e proseso di siña dominio propio. . . . Ku mayornan guiando e proseso, e yu su dominio propio ta oumentá den transkurso di su añanan eskolar.” Un estudio di muchanan di kuater aña a revelá ku esnan ku a siña ehersé un midí di dominio propio “por lo general a krese bira teenagernan mihó balansá, mas popular, aventurero, ku konfiansa propio i konfiabel.” Esnan ku no a kuminsá siña e lès aki “tabatin mas chèns di ta muchanan solitario, kabesura i ku ta frustra lihé. Nan tabata entregá bou di strès i a evitá desafio.” Klaramente anto, pa un mucha bira un adulto balansá, e mester siña ehersé dominio propio.
15. Kiko un falta di dominio propio ta indiká, i esei ta na kontraste ku kua meta ku ta ser deskribí den Beibel?
15 Di igual manera, pa nos por bira kristiannan madurá, nos tin ku siña desplegá dominio propio. Un falta di esei ta indiká ku ainda nos ta un beibi spiritual. Beibel ta enkurashá nos pa ‘madurá den nos pensamentu.’ (1 Korintionan 14:20) Nos meta ta pa “yega na e unidat di fe i di e konosementu di e Yu di Dios, na bira un hòmber madurá, na e midí di e estatura di e plenitut di Kristu.” Dikon? “Pa nos no ta mucha mas, tirá p’aki p’aya dor di olanan, i hibá dor di tur bientu di doktrina, dor di triki di hende, dor di astusia den trahamentu di plan engañoso.” (Efesionan 4:13, 14) Klaramente anto, siña ehersé dominio propio ta esensial pa nos spiritualidat.
Kultivando Dominio Propio
16. Kon Yehova ta perkurá yudansa?
16 Pa kultivá dominio propio, nos tin mester di yudansa divino, i e ta disponibel. E Palabra di Dios, meskos ku un spil perfekto, ta mustra nos na unda nos tin ku hasi kambionan personal, i ta perkurá konseho kon pa hasié. (Santiago 1:22-25) Tambe nos tin un hermandat amoroso ku ta kla pa duna un man. Ansianonan kristian ta mustra komprenshon dor di ofresé yudansa personal. Yehova mes ta duna nos libremente di su spiritu santu si nos pidi p’e den orashon. (Lukas 11:13; Romanonan 8:26) P’esei, laga nos usa e perkurashonnan aki ku goso. E sugerensianan na página 21 lo por yuda.
17. Ki animashon Proverbionan 24:16 ta duna nos?
17 Ta un gran konsuelo pa sa ku Yehova ta apresiá mashá e esfuerso ku nos ta hasi pa agrad’é! Esaki mester motivá nos pa sigui hasi esfuerso pa haña mas dominio propio. Maske kuantu biaha nos trompeká, nunka nos no mester stòp di hasi esfuerso. “Un hende hustu ta kai shete bes, i ta lanta atrobe.” (Proverbionan 24:16) Kada biaha ku nos logra un viktoria, nos tin motibu pa ta kontentu ku nos mes. Nos por tin sigur tambe ku Yehova ta kontentu ku nos. Un Testigu a konta ku promé ku el a dediká su bida na Yehova, kada biaha ku el a logra pasa un siman sin huma, e tabata rekompensá su mes dor di kumpra algu útil ku e plaka ku dominio propio a yud’é spar.
18. (a) Kiko nos lucha pa haña dominio propio ta enbolbé? (b) Ki garantia Yehova ta duna?
18 Mas ku tur kos, nos mester kòrda ku dominio propio ta enbolbé nos mente i emoshonnan. Nos por mira esaki na e palabra di Hesus: “Ken ku wak un muhé pa dese’é, ya kaba el a kometé adulterio kuné den su kurason.” (Mateo 5:28; Santiago 1:14, 15) Esun ku siña dominá su mente i sintimentunan lo ripará ku ta bira mas fásil pa e kontrolá henter su kurpa. P’esei laga nos fortalesé nos determinashon pa no solamente evitá di hasi loke ta malu sino pa asta evitá di pensa riba dje. Si mal deseo mester lanta, rechasá nan mesora. Nos por hui di tentashon dor di hasi orashon i mantené nos bista fihá riba Hesus. (1 Timoteo 6:11; 2 Timoteo 2:22; Hebreonan 4:15, 16) Segun ku nos ta hasi nos bèst, nos lo ta siguiendo e konseho di Salmo 55:22: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.”
Bo Ta Kòrda?
• Kua te e dos maneranan ku nos tin ku ehersé dominio propio?
• Kiko ke men ehersé “dominio propio den tur kos”?
• Ki sugerensianan práktiko pa kultivá dominio propio bo a tuma nota spesial di dje durante nos studio?
• Na unda dominio propio ta kuminsá?
[Preguntanan di Estudio]
[Kuadro/Plachinan na página 21]
Kon pa Fortalesé Dominio Propio
• Kultiv’é asta den kosnan chikí
• Meditá riba su benefisionan aktual i di futuro
• Remplasá loke Dios ta taha ku e kosnan ku e ta animá nos pa hasi
• Rechasá mal pensamentu mesora
• Yena bo mente ku pensamentu spiritualmente edifikante
• Aseptá e yudansa ku rumannan kristian maduro por duna bo
• Evitá situashonnan ku ta hinka bo den tentashon
• Resa pidi Dios su yudansa na momentu di tentashon
[Plachinan na página 18, 19]
Dominio propio ta motivá nos pa hasi bon