Tumamentu di Desishon—Un Reto Ku Bo No Por Evitá

“SA KON pa tuma desishon ta e kos di mas difísil pa hasi, i p’esei, si un persona por logra hasi esei, e ta bira tambe e kos mas balioso,” Napoleon Bonaparte, emperador franses di siglo 19, a yega di bisa. Probablemente lo bo bai di akuerdo ku ámbos aspekto di tumamentu di desishon menshoná den e sita aki riba, ya ku hende en general gusta mashá pa nan por tin kontròl riba nan propio bida. Na mes momentu, hende a haña sa ku tin bes no ta niun tiki fásil pa tuma desishon.

Sea ku e ta fásil òf difísil, tumamentu di desishon ta algu ku bo no por evitá. Tur dia nos tin ku tuma desishon. Ora nos lanta mainta, nos tin ku disidí kiko pa bisti, kiko pa desayuná i kon pa trata ku yen di otro kos durante dia. Mayoria di e desishonnan aki no ta dje importante ei. Masha poko nos ta ègt para pensa riba nan. Rara bes nos ta pèrdè soño pa motibu ku nos ta preokupá si den e kasonan ei nos a tuma un bon desishon òf nò.

Di otro banda, algun desishon sí tin konsekuensia di largu alkanse. Hopi hóben den e mundu djawe tin ku disidí ki meta pa sigui. Por ta nan tin ku disidí ki klase di edukashon nan tin mester i pa kuantu tempu. Tardi òf trempan mayoria di nan lo disidí si nan ta kasa òf ta keda soltero. Esnan ku ta skohe pa kasa mester disidí: ‘Mi ta sufisientemente grandi i madurá pa kasa? Ki klase di partner mi ta deseá, òf mas importante ainda, ki klase di partner mi tin mester?’ Masha poko desishon ku nos tuma tin un impakto asina profundo riba nos bida manera skohementu di un kasá.

Ta vital pa tuma desishonnan sabí ora ta trata di asuntunan ku ta hopi importante, ya ku nos felisidat básikamente ta dependé di esei. Tin hende kisas ta pensa ku nan ta sufisientemente kapas pa tuma e tipo di desishonnan ei nan mes, i ta p’esei ora hende ofresé nan yudansa, nan lo por rechasá esei. Esei ta sabí? Laga nos mira.

[Rekonosementu pa Potrèt na página 3]

Napoleon: Di e buki The Pictorial History of the World