Konfiansa Ta Vital pa un Bida Felis

SHUATAMENTU ta masha desagradabel. Un hende ku ta shuata kada bes tin ku wak bon kiko e ta kome. Pero lo no ta realístiko p’e stòp di kome djis pa e no shuata. Esei lo kousa mas problema, pasobra sin kuminda ningun hende no por keda na bida pa hopi tempu.

Di igual manera, ta masha doloroso ora un hende traishoná nos konfiansa. Ora esei sosodé na vários okashon, kisas nos lo tene mas kuidou ta ken nos ta skohe pa anda kuné. Sin embargo, alehá kompletamente for di hende djis pa no kore riesgo ku nan ta laga nos na kaya no ta e solushon. Dikon nò? Pasobra si nos no por konfia hende nos no por ta felis. Nos tin mester di amistat ku otro hende basá riba konfiansa mutuo pa nos por ta kontentu den bida.

“Konfiansa ta un di e elementonan básiko den nos trato normal di tur dia ku otro hende,” e buki Jugend 2002 ta komentá. “Tur hende ta deseá di tin un hende ku nan por konfia,” e korant Neue Zürcher Zeitung ta informá. “Konfiansa ta mehorá e kalidat di bida” asina tantu ku e “ta vital pa sobrebibensia.” Sí, e korant ta sigui bisa ku “hende no por biba na drechi” sin konfiansa.

Ya ku nos tin un nesesidat básiko di pone nos konfiansa den un hende, ta ken nos por konfia sin kore riesgo di wòrdu lagá na kaya?

Konfia den Yehova ku Henter Bo Kurason

Beibel ta bisa nos pa “konfia den SEÑOR ku henter bo kurason.” (Proverbionan 3:5) Sí, bes tras bes e Palabra di Dios ta animá nos pa konfia nos Kreadó, Yehova Dios.

Dikon nos por pone nos konfiansa den Dios? Na promé lugá, pasobra Yehova Dios ta santu. Profeta Isaias a skirbi: “Santu, santu, santu, ta e SEÑOR.” (Isaias 6:3) Bo ta sinti ku e idea di santidat no ta atraé bo? Eigenlijk e mester atraé bo pasobra Yehova su santidat ta nifiká ku e ta puru, e no ta konsentí mes ku maldat i ta apsolutamente konfiabel. Nunka e por bira korupto ni abusá di su poder, i pió ainda, traishoná nos konfiansa.

Ademas, nos por pone nos konfiansa den Dios pa motibu di su abilidat i  deseo pa yuda hende ku ta sirbié. Por ehèmpel, su poder supremo ta pone ku e por aktua. Su hustisia i sabiduria perfekto ta guia e manera ku e ta aktua. I su amor inigualabel ta motiv’é pa aktua. Apòstel Juan a skirbi: “Dios ta amor.” (1 Juan 4:8) Dios su amor ta influensiá tur kos ku e ta hasi. Yehova su santidat i su otro kualidatnan sobresaliente ta hasié un Tata ideal, un persona den ken nos por pone tur nos konfiansa. Nunka nada ni ningun hende lo no por ta mas digno di nos konfiansa ku Yehova.

Konfia den Yehova i Biba Felis

Un otro motibu válido pa konfia den Yehova ta ku e ta komprondé nos mihó ku kualkier otro hende. E sa ku tur hende tin e nesesidat básiko di un relashon di konfiansa, duradero i sigur ku e Kreadó. Esnan ku tin un relashon asina kuné ta sinti nan mes mas sigur. Rei David a yega n’e siguiente konklushon: “Bendishoná ta e hende ku ta pone su konfiansa den SEÑOR.” (Salmo 40:4) Awe, di kurason, miónes di hende ta bisa meskos ku David.

Laga nos ban wak algun ehèmpel. Doris a biba na Alemania, Gresia, Merka i Repúblika Dominikana. El a bisa: “Mi ta sinti mi masha kontentu di por pone mi konfiansa den Yehova. E sa kon pa kuida mi físikamente, spiritualmente i emoshonalmente. E ta e mihó amigu ku un hende por yega di tin.” Wolfgang, un konsehero hurídiko, ta splika: “Ta masha dushi ora bo por konfia den un persona ku tin bo bienestar shen porshento na pechu, un persona ku por, i eigenlijk lo hasi loke ta mihó pa bo!” Ham, kende a nase na Asia pero ku awor ta biba na Europa, ta konta: “Mi tin konfiansa ku tur asuntu ta den man di Yehova, i e no ta hasi fout, pues mi ta kontentu ku mi por dependé riba dje.”

Ta klaru ku kada un di nos mester konfia no den nos Kreadó so pero tambe den otro hende. P’esei, Yehova, komo un amigu sabí i eksperensiá, ta konsehá nos enkuanto ki klase di hende nos por konfia. Dor di lesa Beibel kuidadosamente nos por haña sa kiko ta su konseho den e asuntu aki.

Hende Ku Nos Por Konfia

E salmista a skirbi: “No konfia den prensnan, den yu di hende, den kende no tin salbashon.” (Salmo 146:3) E deklarashon inspirá aki ta yuda nos mira ku hopi hende no ta digno di nos konfiansa. No ta outomátikamente “prensnan” òf hende ku den bista di mundu ta importante, manera ekspertonan riba sierto tereno òf den sierto aktividat, ta digno di nos konfiansa. Nan guia hopi bes ta falibel, i ora bo pone konfiansa den “prensnan” asina, ta masha fásil pa bo keda desepshoná.

Naturalmente esaki no mester pone nos deskonfiá di tur hende. Sin embargo, no kabe duda ku nos mester wak bon ora nos ta skohe ken nos kier konfia. Ki kriterio nos mester usa ora nos ta skohe? Kisas un ehèmpel di e nashon di Israel di pasado lo por yuda nos. Ora a surgi e nesesidat pa nombra hòmbernan  pa karga responsabilidat pisá den Israel, Moisés a haña konseho pa “skohe for di den henter e pueblo hòmbernan kapas ku ta teme Dios, hòmbernan konfiabel, esnan ku ta odia ganashi desonesto.” (Eksodo 18:21) Kiko nos por siña di esaki?

E hòmbernan ku a haña posishonnan di responsabilidat tabata hòmbernan ku ya kaba tabata desplegá sierto kualidatnan ku ta agradá Dios. Nan a duna prueba kaba ku nan tabata teme Dios; nan tabatin un rèspèt profundo i saludabel pa e Kreadó i tabatin miedu di desagrad’é. Tur hende por a mira bon kla ku e hòmbernan aki tabata hasi nan máksimo esfuerso pa mantené Dios su normanan na haltu. Nan tabata odia ganashi desonesto, lokual a indiká ku nan tabatin fortalesa moral pa no laga poder korumpí nan. Nan lo no a abusá di konfiansa ku a ser poné den nan dor di buska nan propio interesnan òf esnan di nan famianan i amigunan.

No ta sabí pa nos usa un kriterio similar awe ora nos ta skohe esnan den ken nos kier pone nos konfiansa? Nos konosé hende ku ta demostrá pa medio di nan kondukta ku nan ta teme Dios? Nan ta determiná pa sigui su normanan di kondukta? Nan ta para firme na momentu ku nan tin ku evitá di hasi kosnan ku no ta bon? Nan ta sufisiente onesto pa no manipulá un situashon i purba saka probecho personal for di dje òf pa haña nan kier? Sin duda hòmber- i muhénan ku ta desplegá tal kualidatnan ta digno di nos konfiansa.

No Laga un òf Otro Desepshon Kibra Bo

Ora di disidí den ken nos por konfia, nos mester tin pasenshi ya ku ta tuma tempu pa bo haña konfiansa den otro hende. Ta sabí pa konfia un hende gradualmente, paso a paso. Kon nos por hasi esei? Wèl, kisas nos por opservá un persona su kondukta pa un tempu i wak kon e ta reakshoná den sierto situashon. E persona ta konfiabel den kosnan chikí? Por ehèmpel, e ta debolbé kosnan ku el a fia i e ta puntual na su afspraknan? Si ta asina, e ora ei nos por sinti nos mes liber pa konfi’é den asuntunan mas serio. Esaki ta na armonia ku e prinsipio: “Esun ku ta fiel den un kos masha chikitu, ta fiel tambe den hopi.” (Lukas 16:10) Loke por yuda nos prevení di haña nos ku desepshonnan grandi ta dor di wak bon ken nos ta skohe i tene pasenshi.

Pero kiko nos mester hasi si un hende laga nos na kaya? Studiantenan di Beibel probablemente lo kòrda ku riba e anochi ku nan a arestá Hesukristu, su apòstelnan a lag’é kompletamente na kaya. Hudas Iskariote a traishon’é, i e otro disipelnan a hui di miedu. Pedro asta a neng’é tres bes. Pero Hesus a diserní ku ta solamente Hudas a aktua di mala fe. E echo ku nan a lag’é na kaya na un momentu asina krusial no a stroba Hesus di konfirmá su konfiansa den e sobrá 11 apòstelnan djis un par di siman despues. (Mateo 26:45-47, 56, 69-75; 28:16-20) Di igual manera, si nos ta sinti ku un hende a traishoná nos konfiansa, ta bon pa nos puntra nos mes si e supuesto traishon ta evidensia ku e persona mes no ta konfiabel òf ku ta djis un debilidat pasahero.

Ami Mes Ta Konfiabel?

Un hende ku disidí di wak bon ta ken e ta konfia mester puntra su mes frankamente: ‘Ami mes ta konfiabel? Kiko ta rasonabel pa mi spera tantu di mi mes komo di otro hende, pa loke ta trata norma di konfiabilidat?’

No kabe duda ku un persona ku ta konfiabel semper bai ta papia bèrdat. (Efesionan 4:25) E no ta kambia su palabranan djis pa e agradá esnan ku ta skuch’é i dje manera ei saka bentaha personal. Anto si e hasi un promesa, un hòmber konfiabel ta hasi tur loke ta den su alkanse pa e kumpli ku su palabra. (Mateo 5:37) Si un hende konfi’é algu, e persona konfiabel ta tene esaki pa su mes i e no ta kana hasi redu. Un persona konfiabel ta fiel na su kasá. E no ta wak pornografia, e no ta keda pensa riba fantasianan sensual, ni e no ta flirt. (Mateo 5:27, 28) Un hende ku ta digno di nos konfiansa ta traha duru pa gana su pan di kada dia p’e kria su  famia, anto e no ta buska pa haña plaka di un manera fásil dor di biba riba kustia di otro hende. (1 Timoteo 5:8) Ku tal normanan bíbliko rasonabel na mente nos lo por distinguí ta ken nos por konfia. Ademas, si nos mes biba na armonia ku e mesun normanan di komportashon, otro hende lo por konfia nos.

Lo ta masha dushi pa biba den un mundu kaminda tur hende ta digno di konfiansa i kaminda desepshon pa motibu di traishon lo ta kos di pasado! Esei ta djis un fantasia? No pa hende ku ta tuma e promesanan di Beibel na serio, pasobra e Palabra di Dios ta predisí ku pronto lo bin un bunita “tera nobo” kaminda lo no tin traishon, mentira ni abusu i tampoko lo no tin tristesa, malesa ni morto! (2 Pedro 3:13; Salmo 37:11, 29; Revelashon 21:3-5) Lo no ta bale la pena pa haña sa mas tokante e speransa aki? Ku muchu gustu Testigunan di Yehova lo duna bo mas informashon tantu riba e tópiko aki komo riba otro tópikonan importante.

[Plachi na página 4]

Si nos no por konfia hende nos no por ta felis

[Plachi na página 5]

Yehova ta e persona mas digno di nos konfiansa

[Plachinan na página 7]

Nos tur tin mester di amistat ku otro hende basá riba konfiansa mutuo