Pregunta di Lektor
Pregunta di Lektor
Dikon Eliseo a pidi “dòbel porshon” di e spiritu di Elias?
Djis promé ku Elias a terminá su asignashon komo profeta den Israel, e profeta mas hóben, Eliseo, a pidié: “Pa fabor, laga un dòbel porshon di bo spiritu ta riba mi.” (2 Reinan 2:9) Den sentido spiritual, Eliseo evidentemente tabata pidi pa haña un porshon dòbel manera ta wòrdu duná na un yu hòmber ku ta e promé yu, esta, e primogénito. (Deuteronomio 21:17) Un konsiderashon breve di e relato lo aklará esaki i lo yuda nos siña algun lès for di loke a tuma lugá.
Na armonia ku e instrukshon di Yehova, profeta Elias a ungi Eliseo komo su susesor. (1 Reinan 19:19-21) Durante mas o ménos seis aña, Eliseo a fungi komo Elias su fiel sirbidó i tabata determiná pa hasi esaki te na final. Asta riba Elias su último dia komo profeta den Israel, Eliseo no a kita for di banda di su maestro i konsehero. Ounke Elias a urgi Eliseo pa stòp di siguié, e profeta mas hóben a deklará tres biaha: “Lo mi no laga bo.” (2 Reinan 2:2, 4, 6; 3:11) Sin duda, Eliseo a konsiderá e profeta ku tabata mas bieu kuné komo su tata spiritual.—2 Reinan 2:12.
Sin embargo, Eliseo no tabata e úniko yu spiritual di Elias. Elias ku Eliseo a asosiá ku un grupo di hòmber konosí komo “e yu hòmbernan di e profetanan.” (2 Reinan 2:3) E relato den Segundo Reinan ta indiká ku e “yu hòmbernan” aki tambe tabatin un relashon será ku nan tata spiritual, Elias. (2 Reinan 2:3, 5, 7, 15-17) Sin embargo, komo ku Eliseo tabata e susesor ungí, e tabata esun prinsipal entre e yu hòmbernan spiritual di Elias. E tabata manera e primogénito. Den Israel di antigwedat, un yu hòmber primogénito a haña dòbel porshon di e herensia di su tata, miéntras kada un di e otro yu hòmbernan a risibí un solo porshon. P’esei Eliseo a pidi dòbel porshon di e herensia spiritual di Elias.
Dikon Eliseo a hasi e petishon aki na e tempu spesífiko ei? Debí ku e tabata a punto di kuminsá ku un tarea pisá: ser Elias su susesor komo profeta den Israel. Eliseo a realisá ku pa e por a kumpli ku e responsabilidatnan relashoná ku e asignashon sumamente difísil aki, e tabatin mester di poder spiritual ku tabata fuera di su propio kapasidat, poder ku solamente Yehova por a perkurá. E mester tabata sin miedu meskos ku Elias tabata. (2 Reinan 1:3, 4, 15, 16) Ta p’esei el a pidi pa dòbel porshon di e spiritu di Elias: un spiritu di kurashi i e spiritu di ta “apsolutamente yalurs pa Yehova”—kualidatnan deseabel ku e spiritu di Dios ta produsí. (1 Reinan 19:10, 14, NW) Kon Elias a reakshoná?
Elias tabata sa ku Eliseo a pidi algu ku Elias no tabatin derecho di duna, sino Dios so. P’esei modestamente Elias a kontestá: “Bo a pidi un kos difísil. Sin embargo, si bo mira mi ora mi wòrdu kitá for di bo, lo t’asina pa bo.” (2 Reinan 2:10) I en bèrdat, Yehova a permití Eliseo mira Elias bai laira den un warwarú. (2 Reinan 2:11, 12) Pues, Eliseo su petishon a ser konsedé. Yehova a dun’é e spiritu ku e tabatin mester pa kuminsá ku su tarea nobo i pa enfrentá e pruebanan su dilanti.
Awe, kristiannan ungí (ku tin biaha ta wòrdu yamá e klase di Eliseo) i sirbidónan di Dios en general por haña hopi animashon for di e relato bíbliko aki. Tin biaha, nos por sinti nos mes inadekuá i un poko desesperá ora nos risibí un asignashon nobo. Òf kisas nos ta pèrdiendo un poko di nos kurashi pa sigui ku e trabou di prediká e Reino segun ku nos ta topa kada bes mas indiferensia òf oposishon den nos teritorio. Sin embargo, si nos roga Yehova pa sostené nos, lo e duna nos spiritu santu segun ku nos tin mester di dje pa trata ku difikultat i ku sirkunstansia ku ta kambia. (Lukas 11:13; 2 Korintionan 4:7; Filipensenan 4:13, NW) Sí, meskos ku Yehova a fortalesé Eliseo pa e por a kumpli ku su responsabilidatnan mas pisá, asina lo e yuda nos tur, hóben i bieu, pa kumpli ku nos sirbishi.—2 Timoteo 4:5.