Tin Hende Konfiabel?

DESPUES di e kaida di e Muraya di Berlin na 1989, vários sekreto ku tabata bon tapá a sali na kla. Por ehèmpel, Lydia * a deskubrí ku durante e régimen sosialista na Alemania Oriental, Stasi, òf Servisio di Siguridat di Estado, a kompilá un fail di su aktividatnan privá. Maske Lydia a keda sorprendí ora el a tende di e fail, el a keda di shòk ora el a haña sa ta ken a duna Stasi informashon; su kasá. Nèt e hende ku supuestamente lo e mester por a konfia plenamente a traishon’é.

Robert tabata un kabayero di edat ku tabata konsiderá su dòkter lokal komo un hende “masha respetabel, atmirabel i konfiabel,” The Times di Lònden ta informá. Nan ta bisa ku e tabata un dòkter ku tin “bon manera i interes den su pashèntnan.” Pero diripiente Robert a muri. Ta un atake di kurason el a haña òf ta un atake selebral? Nò. Outoridatnan a konkluí ku e dòkter a bai bishitá Robert na su kas i, sin ku Robert i su famia tabata sa, a pas’é un angua pa mat’é. Aparentemente, e persona ku Robert tabatin pleno konfiansa den dje a mat’é.

Nèt e hendenan ku Lydia ku Robert a konfia a traishoná nan di un manera baho, anto ku konsekuensianan serio. Den otro kasonan e konsekuensianan no ta dje serio ei. No opstante, no ta nada straño ku nos ta wòrdu desepshoná dor di un persona ku nos ta konfia. Un rapòrt ku un organisashon prinsipal di enkuesta na Alemania, Allensbacher Jahrbuch der Demoskopie 1998-2002 a publiká, ta indiká ku 86 porshento di esnan ku a partisipá den un enkuesta a wòrdu desepshoná dor di un hende ku nan a konfia. Kisas abo tambe tabatin un eksperensia asina. P’esei nos no mester keda sorprendí ku e korant suiso Neue Zürcher Zeitung na aña 2002 a informá ku “na paisnan industrialisá di wèst, relashonnan di konfiansa mutuo ta menguando pa dékadanan kaba.”

Difísil pa Haña, Fásil pa Pèrdè

Kiko ta konfiansa? Tin dikshonario ta bisa ku pone konfiansa den otro hende ta nifiká kere ku nan ta onesto i sinsero i ku nan lo no hasi nada deliberadamente pa hasi bo daño. Pokopoko un hende ta haña konfiansa pero e por pèrd’é masha lihé mes. Siendo ku asina hopi hende ta sinti ku otronan a abusá di nan konfiansa, ta straño ku hende no ta dispuesto pa konfia otro mas? Segun un enkuesta publiká na Alemania na aña 2002, “ménos di 1 di kada 3 hóben tin un konfiansa básiko den otro hende.”

Kisas nos por puntra nos mes: ‘Realmente nos por konfia otro hende? Ta bale la pena pa pone nos konfiansa den un hende apesar ku e por laga nos na kaya?’

[Nota]

[Komentario na página 3]

Segun un rapòrt, 86 porshento di esnan ku a partisipá den un enkuesta a wòrdu desepshoná dor di un hende ku nan a konfia