Yehova A Siña Mi for di Mi Hubentut
Historia di Bida
Yehova A Siña Mi for di Mi Hubentut
SEGUN E RELATO DI RICHARD ABRAHAMSON
“O Dios, bo a siña mi for di mi hubentut; i te ainda mi ta deklará bo obranan maravioso.” Laga mi splika dikon e palabranan ei di Salmo 71:17 tin un nifikashon spesial pa mi.
MI MAMA, Fannie Abrahamson, na aña 1924 a haña bishita di Studiantenan di Beibel (manera nan tabata yama Testigunan di Yehova e tempu ei). Ami tabatin un aña so. Segun ku e Testigunan tabata siña Mama bèrdatnan di Beibel, e tabata bai bishitá su bisiñanan umbes i konta nan e kosnan ku el a siña, i tambe e tabata siña ami ku mi ruman hòmber i ruman muhé mas grandi. Promé ku mi por a lesa, el a siña mi memorisá hopi teksto bíbliko ku a papia di e bendishonnan di e Reino di Dios.
Mi a nase i krese na La Grande, den estado di Oregon na Merka. Na final di dékada di 1920, nos grupo di Studiantenan di Beibel den e stat ei tabata konsistí di un par di hende muhé i mucha. Ounke nos tabata aislá, tòg nos tabata haña bishita un òf dos biaha pa aña di predikadónan biahero. Nan a duna diskursonan stimulante, a kompañá nos den sirbishi di kas pa kas, i a mustra interes bondadoso den e muchanan. Entre e rumannan stimá ei tabatin Shield Toutjian, Gene Orrell i John Booth.
Niun hende di nos grupo no por a asistí na e kongreso di aña 1931 na Columbus, Ohio, kaminda Studiantenan di Beibel a tuma e nòmber Testigunan di Yehova. Pero kongregashonnan i gruponan isolá ku no tabatin representante na e kongreso, a tene un reunion lokal na ougùstùs di e aña ei pa tuma un resolushon pa aseptá e nòmber. Nos grupo chikí na La Grande
tambe a hasi esaki. Anto na 1933, durante e kampaña pa repartí e foyeto chikí E Krísis, mi a memorisá un presentashon di Beibel i pa promé bes mi a prediká mi so di kas pa kas.Durante dékada di 1930, e oposishon kontra nos obra a oumentá. Pa trata ku esaki, kongregashonnan a wòrdu agrupá huntu, i nan a tene asambleanan chikí i partisipá den kampañanan di prediká un òf dos biaha pa aña. Na e asambleanan aki nos a risibí instrukshon kon pa prediká i kon pa trata respetuosamente ku polis ku tabata interferí ku nos obra. Komo ku nan tabata hiba e Testigunan ku frekuensia dilanti un hues polisial òf un korte normal, nos tabata repasá di antemano un papel di instrukshon ku tabata yama Prosedimentunan di un Huisio. Esaki a prepará nos pa trata ku oposishon.
Prinsipio di Mi Kresementu den e Bèrdat
Mi tabata haña mas i mas apresio pa bèrdatnan bíbliko i pa e speransa basá riba Beibel di por biba pa semper riba tera bou di Dios su Reino selestial. N’e tempu ei no tabata pone masha énfasis riba boutismo pa esnan ku no tabatin e speransa di goberná den shelu huntu ku Kristu. (Revelashon 5:10; 14:1, 3) No opstante, nan a bisa mi ku si den mi kurason mi a determiná pa hasi Yehova su boluntat, anto lo ta na su lugá pa mi batisá. I mi a hasi esei na ougùstùs 1933.
Ora mi tabatin 12 aña, mi yùfrou di skol a haña ku mi tabata bon den papia dilanti públiko, p’esei el a urgi Mama pa hasi areglo pa mi haña mas entrenamentu den esei. Mama a pensa ku esaki lo por a yuda mi sirbi Yehova mihó. P’esei el a paga pa mi haña lès dor di laba paña pa e instruktor un aña largu. E entrenamentu a resultá útil pa mi sirbishi. Pero ora mi tabatin 14 aña, mi a haña acuut reuma, i pa mas ku un aña mi no por a bai skol.
Na 1939 un predikadó di tempu kompletu ku tabata yama Warren Henschel a bin biba den nos área. * Den sentido spiritual, e tabata manera un ruman mayó pa mi, i tabata hiba mi pa traha kasi henter dia den sirbishi di vèlt kuné. Poko despues el a yuda mi kuminsá den sirbishi di pionero di fakansi, un forma temporal di sirbishi di tempu kompletu. E zomer ei nos grupo a bira un kongregashon. Warren a keda nombrá komo sirbidó di kongregashon, i ami a wòrdu nombrá komo konduktor di Studio di Toren di Vigilansia. Anto mi a bira sirbidó di kongregashon ora ku Warren a bai laga nos pa sirbi na Bètel, e sede internashonal di Testigunan di Yehova situá na Brooklyn, New York.
Komienso di Sirbishi di Tempu Kompletu
E mayor responsabilidat di sirbi komo sirbidó di kongregashon a duna mi mas gana di drenta den e sirbishi regular di tempu kompletu, i mi a hasi esei tambe na edat di 17 aña, despues ku mi a kaba tres aña di skol sekundario. Tata no a kompartí nos kreensianan religioso, pero el a perkurá bon pa nos famia i tabata un hòmber di prinsipionan haltu. E tabata ke pa mi bai skol mas avansá. Sin embargo, el a bisa tambe ku lo mi por hasi loke mi ke, basta mi no bin serka dje pa buska kuminda i lugá di keda.
Pues, mi a kuminsá traha pionero dia 1 di sèptèmber 1940.Ora mi tabata bai for di kas, mi mama a laga mi lesa Proverbionan 3:5 i 6: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” I en bèrdat, e echo ku semper mi a laga mi bida den man di Yehova tabata un gran yudansa pa mi.
Poko despues mi a djòin Joe ku Margaret Hart den sirbishi na e parti nort-sentral di Estado di Washington. E teritorio tabata hopi variá: rancho di baka, rancho di karné, reservashon di indjan, i tambe hopi stat chikí i pueblito. Den lènte di 1941 mi a ser nombrá komo sirbidó di kongregashon na Wenatchee, Washington.
Na un di nos asambleanan na e stat Walla Walla, Washington, mi a sirbi komo ùsher, dunando bonbiní na esnan ku tabata drenta den e sala di ouditorio. Pero mi a ripará kon un hóben tabata lucha ku e sistema di loutspiker sin por a pon’é traha. P’esei mi a sugerí pa e tuma mi asignashon, i ami lo tuma esun di dje. Ora ku e sirbidó regional, Albert Hoffman, a regresá i a mira ku mi a bandoná mi asignashon, el a splika mi ku un sonrisa amigabel ku ta hopi importante pa keda den bo asignashon te ora ku bo haña instrukshon pa hasi otro kos. Semper mi a keda kòrda e konseho ei.
Na ougùstùs 1941, Testigunan di Yehova a organisá un kongreso masha grandi na St. Louis, Missouri. E pareha Hart a pone banki den e baki di nan pikòp i un kapa riba e baki. Nos nuebe pionero a hasi e biahe di 2.400 kilometer pa St. Louis den e pikòp ei. A tuma nos mas o ménos un siman pa bai i un siman pa bini. Na e kongreso, segun kálkulo di polis, tabatin un máksimo di 115.000 hende presente. Ounke probablemente e asistensia tabata ménos ku esei, e tabata sigur mas ku e alrededor di 65.000 Testigunan ku tabatin na Merka e tempu ei. E kongreso tabata un gran estímulo spiritual.
Sirbishi na Bètel di Brooklyn
Despues ku mi a regresá Wenatchee, mi a haña un karta ku a pidi mi bin sirbi na Bètel di Brooklyn. Ora mi a yega dia 27 di òktober 1941, nan a hiba mi na e ofisina di Nathan H. Knorr, e superintendente di imprenta. Bondadosamente el a splika mi kon bida na Bètel tabata i a enfatisá ku pa bida na Bètel ta un éksito bo mester pega na Yehova. Kaba nan a hiba mi na e Departamentu di Manda Literatura i mi a kuminsá ku e trabou di mara kaha di literatura pa ser mandá.
Dia 8 di yanüari 1942, Joseph Rutherford, kende tabata presidí e obra di Testigunan di Yehova mundialmente, a muri. Sinku dia despues e direktornan di e Sosiedat a elegí Ruman Knorr pa ta su susesor. Ora ku Sosiedat su sekretario i tesorero di hopi tempu, W. E. Van Amburgh, a anunsiá esaki na e famia di Bètel, el a bisa: “Mi ta kòrda tempu ku C. T. Russell a muri [na 1916] i J. F. Rutherford a remplas’é. Señor a sigui dirigí Su obra i hasié prosperá. Awor aki tambe mi tin pleno konfiansa ku e
obra ta sigui padilanti ku Nathan H. Knorr komo presidente pasobra e obra aki ta di Señor, no di hende.”Na febrüari 1942, nan a anunsiá ku lo kuminsá ku e “Kurso Avansá den Ministerio Teokrátiko.” Nan a prepará e kurso pa entrená rumannan na Bètel pa nan por mehorá nan abilidat di hasi investigashon riba temanan bíbliko, organisá nan informashon bon i present’é efikasmente. Debí na e lès ku mi a haña na mucha den papia dilanti públiko, mi por a hasi progreso rápido den e programa.
No muchu despues mi a ser asigná na e Departamentu di Sirbishi ku tabata supervisá e trabou di prediká di Testigunan na Merka. Mas lat den e aña ei, e rumannan a disidí di reinstituí un programa pa ruman hòmbernan bishitá kongregashonnan di Testigunan. Ku tempu e rumannan biahero aki, ku nan a yama sirbidó di e rumannan, a haña e nòmber superintendente di sirkuito. Durante e zomer di 1942, tabatin un kurso na Bètel pa entrená ruman hòmbernan pa e tipo di sirbishi aki, i mi tabatin e privilegio di ta entre esnan ku a risibí e entrenamentu aki. Mi ta kòrda spesialmente ku Ruman Knorr, un di e instruktornan, a enfatisá e punto aki pa nos: “No purba agradá hende. Na final di kuenta lo bo no agradá niun. Agradá Yehova, i lo bo agradá tur esnan ku ta stima Yehova.”
Na òktober 1942 e trabou biahero di bishitá kongregashonnan a kuminsá. Algun di nos na Bètel a partisipá den dje durante sierto fin di siman, bishitando kongregashonnan ku no tabata keda mas leu ku 400 kilometer for di New York City. Nos tabata repasá e informenan di e kongregashon su aktividat di prediká i su asistensia na reunion, tene un reunion ku esnan ku tabata atendé e responsabilidatnan di kongregashon, duna un òf dos diskurso, i traha den sirbishi ku e Testigunan lokal.
Na 1944 mi tabata un di e rumannan di e Departamentu di Sirbishi ku nan a manda hasi e trabou biahero pa un periodo di seis luna, i mi a sirbi na Delaware, Maryland, Pennsylvania i Virginia. Despues, pa un par di luna, mi a bishitá kongregashonnan na Connecticut, Massachusetts i Rhode Island. Ora mi a regresá Bètel, mi a traha partaim den ofisina huntu ku Ruman Knorr i su sekretario Milton Henschel, kaminda mi a familiarisá mi mes ku nos obra mundial. Tambe mi a sirbi partaim den Ofisina di Tesorero bou di supervishon di W. E. Van Amburgh i su asistente, Grant Suiter. Anto na 1946, mi a bira superintendente di vários departamentu na Bètel.
Kambionan Grandi den Mi Bida
Durante e tempu ku mi tabata sirbi e kongregashonnan na 1945, mi a sera konosí ku Julia Charnauskas na Providence, Rhode Island. Den transkurso di aña 1947 nos a kuminsá plania pa kasa. Mi tabata stima mi sirbishi na Bètel masha hopi, sin embargo na e tempu ei no tabatin areglo pa bin sirbi einan ku bo kasá. P’esei na yanüari 1948 mi a sali for di Bètel, i ami ku Julia (Julie) a kasa. Mi a haña trabou partaim den un supermarket na Providence, i nos a kuminsá traha pionero huntu.
Na sèptèmber 1949 mi a haña invitashon pa hasi trabou di sirkuito den nortwèst di Wisconsin. Pa mi ku Julie tabata un kambio grandi pa prediká prinsipalmente den pueblitonan i área di kunuku kaminda tabatin hopi boerderij ku tabata produsí lechi i produktonan di lechi. Wenter einan tabata largu i friu, i pa hopi siman temperatura sa ta mas abou ku -20° Celsius i hopi sneu. Nos no tabatin outo. Sin embargo, semper nos a haña un hende duna nos un left pa bai e siguiente kongregashon.
Poko despues ku mi a kuminsá den e trabou di sirkuito, nos tabatin un asamblea di sirkuito. Mi ta kòrda kon mi tabata kontrolá tur kos ku sumo atenshon pa wak si e rumannan a hasi nan trabou, i esei a hasi algun di nan un poko nervioso. P’esei e superintendente di distrito, Nicholas Kovalak, bondadosamente a splika mi ku e rumannan lokal tabatin kustumber di atendé e kosnan na nan manera i ku mi no mester a purba kontrolá delaster un detaye. E konseho ei a yuda mi trata ku hopi asignashon ku mi a risibí despues.
Na 1950 mi a haña un asignashon temporal: supervisá e akomodashon pa delegadonan di e promé di nos tantísimo kongresonan grandi na Yankee Stadium na New York City. E kongreso tabata emoshonante for di kuminsamentu te final, tabatin delegado for di 67 pais i un asistensia máksimo di 123.707 hende! Despues di e kongreso, ami ku Julie a reanudá nos sirbishi biahero. Nos tabata gusta nos trabou di sirkuito. Sin embargo, nos a sinti ku nos mester sigui pone nos mes disponibel pa kualkier otro sirbishi di tempu kompletu. P’esei tur aña nos tabata yena un solisitut tantu pa Bètel komo pa sirbi komo misionero. Na 1952 nos a keda enkantá ku e invitashon pa asistí na e di 20 klas di e Skol Bíbliko di Galaad di Watchtower, kaminda nos a risibí entrenamentu pa e trabou di misionero.
Sirbishi den Eksterior
Ora nos a gradua na 1953, nos a ser asigná na Gran Bretaña, kaminda mi a sirbi den e trabou di distrito den sur di Inglatera. Despues di ménos ku un aña den e aktividat aki, un aktividat ku ami ku Julie a disfrutá sinfin di dje, nos a keda sorprendí pa haña e asignashon pa muda pa Dinamarka. Na Dinamarka tabatin mester di supervishon nobo na e sukursal. Komo ku mi no tabata muchu leu di nan i a risibí entrenamentu den e tipo di trabou ei na Brooklyn, mi a wòrdu mandá pa yuda. Nos a tuma un fèri bai Hulanda, i djei nos a kohe un trein pa Kopenhagen, Dinamarka. Nos a yega dia 9 di ougùstùs 1954.
Un di e problemanan ku mester a atendé tabata ku un par di ruman den puesto di responsabilidat no kier a aseptá instrukshon for di nos sede na Brooklyn. Tambe, tres di e kuater personanan ku tabata tradusí nos publikashonnan na danes a bandoná Bètel i ku tempu a stòp di
asosiá ku Testigunan di Yehova. Pero Yehova a kontestá nos orashonnan. Dos pionero, Jørgen i Anna Larsen, ku a yega di hasi algun trabou di tradukshon partaim, a pone nan mes disponibel pa traha fultaim. Asina tradukshon di nos revistanan na danes a sigui sin ku a salta niun edishon. E pareha Larsen ainda ta na Bètel na Dinamarka, i Jørgen ta kordinadó di e Komité di Sukursal.Un berdadero fuente di animashon den e promé añanan ei tabata bishitanan regular di Ruman Knorr. E tabata tuma tempu pa sinta papia, kontando eksperensianan ku a duna nos un idea kon pa trata ku problemanan. Durante un bishita na 1955, desishon a kai ku nos mester traha un sukursal nobo ku fasilidat di imprenta ya asina nos por a produsí revista pa Dinamarka. Nos a haña tereno den un bario den nort di Kopenhagen, i pa zomer di 1957, nos a muda pa nos edifisio nobo. Harry Johnson, ku resientemente a yega Dinamarka ku su kasá Karin despues di a gradua di e di 26 klas di Galaad, a yuda establesé nos imprenta i pon’é funshoná.
Nos a mehorá nos manera di organisá kongresonan grandi na Dinamarka, i e eksperensia ku mi a gana tempu ku mi tabata traha ku kongresonan na Merka a resultá útil. Na 1961 nos tabatin un kongreso internashonal grandi na Kopenhagen ku delegadonan for di mas ku 30 pais. Asistensia máksimo tabata 33.513 persona. Na 1969, nos tabata anfitrion di loke a resultá e kongreso mas grandi ku nan a yega di tene na Skandinavia, tabatin un asistensia máksimo di 42.073 persona!
Na 1963 mi a haña invitashon pa asistí na e di 38 klas di Galaad. Esaki tabata un kurso ahustá di dies luna, prepará spesialmente pa entrená personal di sukursal. Tabata un plaser pa ta ku e famia di Bètel di Brooklyn atrobe i benefisiá di e eksperensia di esnan ku tabatin hopi aña ta hasi e trabou na e sede mundial.
Despues di e kurso aki mi a regresá Dinamarka pa sigui atendé e responsabilidatnan einan. Ademas, mi tabatin e privilegio di sirbi komo superintendente di zona, bishitando sukursalnan den wèst i nort Europa pa duna animashon na nan personal i yuda nan kumpli ku nan responsabilidatnan. Último tempu mi a hasi e trabou aki na Wèst Afrika i Caribe.
Na final di dékada di 1970, e rumannan na Dinamarka a kuminsá buska un sitio kaminda nan por a konstruí un fasilidat mas grandi pa nan por hasi mas trabou di tradukshon i imprenta. Nan a haña un bon tereno ku a keda mas o ménos 60 kilometer wèst di Kopenhagen. Huntu ku otro rumannan, mi a traha riba e plannan i diseño di e fasilidat nobo aki, i ami ku Julie tabata ansioso pa bai biba ku e famia di Bètel den nan bunita kas nobo. Sin embargo, kos no a bai asina.
Bèk na Brooklyn
Na novèmber 1980 ami ku Julie a haña e invitashon pa bai sirbi na Bètel na Brooklyn, i nos a yega einan na prinsipio di yanüari 1981. Nos tabatin kasi 60 aña, i despues di a sirbi pa mitar di nos bida huntu ku nos rumannan stimá na Dinamarka, no tabata fásil pa nos bolbe Merka. Sin embargo, nos no a keda pensa riba unda nos lo a preferá di ta, sino mas bien a purba konsentrá riba nos asignashon di e momentu ei i e desafionan ku e tabatin.
Nos a yega Brooklyn i a hasi nos mes na kas. Julie a ser asigná na e departamentu di boekhouding hasiendo kasi e mesun tipo di trabou ku e tabata hasi na Dinamarka. Ami a ser asigná
na Departamentu di Redakshon pa yuda programá e trabou di prosesá nos publikashonnan. Prinsipio di dékada di 1980 tabata un tempu di kambio pa e trabou na Brooklyn, ya ku nos tabata kitando for di uso di taip mashin i di imprimí ku chumbu kayente, pa bai usa kòmpiuter i imprenta di offset. Mi no tabata sa nada di kòmpiuter, pero mi tabata komprondé algu di e proseduranan di e organisashon i kon pa traha ku hende.Poko despues, segun ku nos a kuminsá imprimí ku mashin offset na koló i usa plachi- i potrètnan di koló, tabatin mester di mas sosten na e Departamentu di Arte. Ounke mi no tabatin eksperensia den arte, mi por a yuda organisá e departamentu. Asina mi tabatin e privilegio di supervisá e departamentu ei pa nuebe aña.
Na 1992 mi a ser asigná pa yuda e Komité di Publikashon di e Kuerpo Gobernante i a ser trasladá pa e Ofisina di Tesorero. Aki mi ta sirbi te ainda en konekshon ku e aktividatnan finansiero di Testigunan di Yehova.
Sirbishi for di Mi Hubentut en Adelante
For di trempan den mi hubentut i durante 70 aña di sirbishi dediká, Yehova ku pasenshi a siña mi mediante su Palabra, Beibel, i mediante rumannan servisial den su organisashon maravioso. Mi a disfrutá di mas ku 63 aña di sirbishi di tempu kompletu, di kua 55 aña huntu ku mi fiel kasá Julie. Di bèrdat mi ta sinti ku Yehova a bendishoná mi rikamente.
Na 1940, ora ku mi a bandoná kas pa drenta den sirbishi di pionero, mi tata a hasi chèrchè di mi desishon i a bisa: “Mi yu, si bo bai for di kas pa hasi e kos ei, no kere ku bo por kore bin bèk serka mi pa yuda bo ku nada.” Atraves di añanan, nunka mi no mester a hasi esei. Yehova a perkurá generosamente pa mi nesesidatnan, hopi bes mediante rumannan kristian ku tabata kla pa yuda. Despues mi tata a haña rèspèt pa nos trabou, i asta el a hasi algun progreso den siña konosé e bèrdat di Beibel promé ku el a muri na 1972. Mama, kende tabatin e speransa di bida selestial, a sigui sirbi Yehova fielmente te na su morto na 1985, na edat di 102 aña.
Ounke sa surgi problema den e sirbishi di tempu kompletu, ami ku Julie nunka no a pensa di bandoná nos asignashon. Yehova semper a sostené nos den e determinashon aki. Asta ora ku mi mayornan a kuminsá bira bieu i tabatin mester di yudansa, mi ruman muhé Victoria Marlin a ofresé pa duna un man i bondadosamente a kuida nan. Nos ta masha gradisidu pa su aporte amoroso ku a permití nos sigui den sirbishi di tempu kompletu.
Julie a apoyá mi fielmente den tur nos asignashonnan, mirando esaki komo parti di su propio dedikashon na Yehova. I maske awor mi tin 80 aña i ta sufri di algun problema ku mi salú, mi ta sinti ku Yehova a bendishoná mi rikamente. Mi ta haña hopi animashon for di e salmista ku despues di a proklamá ku Dios a siñ’é for di su hubentut en adelante, a roga: ‘I asta ora mi bira bieu, o Dios, no bandoná mi, te ora mi deklará bo poder na tur esnan ku ta bin.’—Salmo 71:17, 18.
[Nota]
^ par. 12 Warren tabata e ruman grandi di Milton Henschel ku a sirbi pa hopi aña komo un miembro di e Kuerpo Gobernante di Testigunan di Yehova.
[Plachi na página 20]
Ami ku Mama na 1940, tempu ku mi a kuminsá traha pionero
[Plachi na página 21]
Ami ku mi partnernan di pionero Joe ku Margaret Hart
[Plachi na página 23]
Dia nos a kasa na yanüari 1948
[Plachi na página 23]
Na 1953, huntu ku otro kompañeronan di skol di Galaad. Di robes pa drechi: Don i Virginia Ward, Geertruida Stegenga, Julie i ami
[Plachi na página 23]
Ami ku Frederick W. Franz i Nathan H. Knorr na Kopenhagen, Dinamarka, 1961
[Plachi na página 25]
Ami ku Julie awe