Prediká ku e Meta di Hasi Disipel

“Ma ora Prisila i Akila a tende [Apolos], nan a hal’é un banda i a splik’é e kaminda di Dios na un manera mas eksakto.”—ECHONAN 18:26.

1. Ounke Apolos tabata “ferviente den spiritu,” kiko e tabatin mester?

PRISILA i Akila, un pareha kristian kasá di promé siglo, a opservá Apolos duna un spich den un snoa den e stat di Efeso. Apolos a kapta e atenshon di su ouditorio ku su palabranan elokuente i su manera di papia konvinsente. E tabata “ferviente den spiritu,” i a “siña eksaktamente e kosnan tokante di Hesus.” Sin embargo, tabata bisto ku Apolos tabata “konosé solamente e boutismo di Juan.” Loke Apolos a prediká tokante Hesus tabata bèrdat, pero limitá. E problema tabata ku su konosementu di Kristu no tabata kompletu. Apolos mester a oumentá su konosementu di e papel ku Hesukristu a hunga den e realisashon di Yehova su propósito.—Echonan 18:24-26.

2. Ki reto Prisila i Akila a aseptá?

 ² Sin vasilá, Prisila i Akila a hasi nan mes disponibel pa yuda Apolos bira un persona ku por a kumpli ku “tur loke” Kristu a ordená. (Mateo 28:19, 20) E relato ta bisa ku nan a tuma Apolos den nan kompania: nan a “hal’é un banda i a splik’é e kaminda di Dios na un manera mas eksakto.” Sin embargo, tabatin algun kos di Apolos ku lo a pone ku algun kristian lo no tabata masha dispuesto pa siñ’é. Kiko asina? I kiko nos por siña di e esfuerso di Prisila i Akila pa konsiderá e Skritura ku Apolos? Kon un repaso di e relato históriko aki por yuda nos konsentrá riba kuminsá studionan di Beibel?

Presta Atenshon na Nesesidat di Hende

3. Dikon e background di Apolos no a stroba Prisila i Akila di siñ’é?

³ Apolos a nase di desendensia hudiu, i aparentemente a lanta den e stat di Alehandria. E tempu ei Alehandria tabata kapital di Egipto i un sentro di edukashon avansá, renombrá pa su tremendo biblioteka. E stat tabatin un poblashon grandi di hudiu, inkluyendo hopi persona bon siñá. P’esei e tradukshon griego di e Skritura Hebreo konosí komo Septuaginta, a ser produsí einan. No ta straño anto ku Apolos “tabatin hopi bon konosementu di e Skrituranan”! Akila ku Prisila tabata trahadó di tènt. E echo ku Apolos tabata un bon diskursante a spanta nan? Nò. Motivá pa amor, nan a konsiderá e persona, su nesesidatnan, i kon nan lo por a yud’é.

4. Na unda i kon Apolos a risibí e yudansa ku e tabatin mester?

⁴ Pa bon diskursante ku Apolos tabata, e tabatin mester di instrukshon. E yudansa ku e tabatin mester no a ser hañá den ningun universidat sino entre e miembronan di e kongregashon kristian. Apolos tabata bai benefisiá di puntonan ku lo a resultá den un komprondementu mas eksakto di Dios su areglo pa salbashon. Prisila i Akila “a hal’é un banda i a splik’é e kaminda di Dios na un manera mas eksakto.”

5. Kiko bo por bisa di e spiritualidat di Prisila i Akila?

⁵ Prisila i Akila tabata spiritualmente fuerte i bon fundá den e fe. Muy probablemente nan tabata ‘semper dispuesto pa duna kontesta na kada un ku pidi nan pa duna kuenta di nan speransa,’ sea ku tabata un persona riku, pober, studiá òf katibu. (1 Pedro 3:15) Akila ku su esposa tabatin e abilidat di “manehá e palabra di bèrdat na un manera korekto.” (2 Timoteo 2:15) Evidentemente, nan tabata studiantenan serio di e Skritura. Apolos a keda profundamente konmoví pa e instrukshon basá riba e ‘palabra di Dios ku ta bibu i aktivo,’ i ku ta influensiá kurason.—Hebreonan 4:12.

6. Kon nos por sa ku Apolos a apresiá e yudansa ku el a haña?

⁶ Apolos a apresiá e ehèmpel di su maestronan i a bira asta mas ábil den hasi disipel. El a hasi bon uso di su konosementu den e trabou di proklamá e bon nobo, foral entre e poblashon hudiu. Apolos tabata eksepshonalmente útil den konvensé e hudiunan tokante Kristu. ‘Siendo poderoso den e Skritura,’ e por a proba nan ku tur e profetanan di pasado a antisipá e binida di e Kristu. (Echonan 18:24, Kingdom Interlinear Translation) E relato ta agregá ku despues di esei Apolos a bai Akaya, kaminda “e tabata di gran ayudo pa esnan ku a kere pa medio di grasia; pasobra e tabata refutá e hudiunan fuertemente den públiko, mustrando pa medio di e Skrituranan ku Hesus tabata e Kristu.”—Echonan 18:27, 28.

Siña for di e Ehèmpel di Otro Maestronan

7. Kon Akila i Prisila a bira maestronan ábil?

⁷ Kon Akila i Prisila a logra bira maestronan kompetente di e Palabra di Dios? Fuera di tabata diligente den studio personal i asistensia na reunion, nan asosiashon estrecho ku apòstel Pablo sigur a yuda nan hopi. Pa 18 luna  Pablo a biba den kas di Prisila i Akila na Korinto. Huntu nan a laborá den trahamentu i drechamentu di tènt. (Echonan 18:2, 3) Imaginá bo e kòmbersashonnan bíbliko profundo ku nan lo mester tabatin. I e asosiashon ei ku Pablo siguramente a duna nan spiritualidat un tremendo empuhe! Proverbionan 13:20 ta bisa: “Esun ku anda ku hende sabí lo ta sabí.” Bon kompania tabatin un bon efekto riba nan kustumbernan spiritual.—1 Korintionan 15:33.

8. Kiko Prisila i Akila a siña dor di opservá Pablo den sirbishi?

⁸ Ora Prisila i Akila a opservá Pablo komo proklamadó di Reino, nan a mira un bon maestro den akshon. E relato na Echonan ta deklará ku tur dia di sabat Pablo “tabata rasoná den snoa [na Korinto] i tabata trata di konvensé hudiu i griego.” Despues, ora ku Silas i Timoteo a djòin Pablo, el a kuminsá “dediká su mes kompletamente na predikamentu di e palabra, dunando testimonio na e hudiunan ku Hesus tabata e Kristu.” Prisila i Akila a tuma nota ku ora Pablo a mira ku e miembronan di snoa no tabata masha interesá, el a transferí e sentro di su aktividat di prediká pa un sitio mas faborabel, na un kas banda di snoa. Einan Pablo a yuda Crispo, “e lider di snoa,” pa bira disipel. Muy probablemente Prisila i Akila a ripará ku hasiendo e hòmber ei disipel, tabatin un efekto profundo i produktivo riba e teritorio. E relato ta bisa: “Crispo . . . a kere den Señor huntu ku tur e hendenan di su kas, i hopi di e korintionan, ora nan a tende, a kere i a wòrdu batisá.”—Echonan 18:4-8.

9. Kon Prisila i Akila a reakshoná riba e ehèmpel di Pablo?

⁹ Otro proklamadónan di Reino, manera Prisila i Akila, a imitá Pablo su ehèmpel den sirbishi di vèlt. E apòstel a urgi otro kristiannan: “Sea imitadónan di mi, meskos ku ami tambe ta di Kristu.” (1 Korintionan 11:1) Prisila i Akila, na armonia ku e ehèmpel di Pablo, a yuda Apolos komprondé siñansanan kristian mas korektamente. Apolos na su turno a yuda otronan. Prisila i Akila sin duda a yuda hasi disipel na Roma, Korinto i Efeso.—Echonan 18:1, 2, 18, 19; Romanonan 16:3-5.

10. Kiko abo a siña for di Echonan kapítulo 18 ku lo yuda bo den e trabou di hasi disipel?

¹⁰ Kiko nos por siña di nos konsiderashon di Echonan kapítulo 18? Wèl, meskos ku Akila i Prisila kisas a siña for di Pablo, nos por mehorá nos abilidat di hasi disipel dor di sigui e ehèmpel di bon maestronan di e Palabra di Dios. Nos por asosiá ku esnan ku ta ‘dediká nan mes kompletamente na predikamentu di e palabra’ i ku ta “dunando testimonio kabal” na otro hende. (Echonan 18:5, Kingdom Interlinear Translation) Nos por opservá kon nan ta yega na kurason di hende dor di usa  métodonan konvinsente pa siña hende. E métodonan ei por yuda nos hasi disipel. Ora un persona ta studia Beibel ku nos, nos lo por sugerí pa e invitá otro miembronan di su famia òf bisiña pa djòin den e studio. Òf nos lo por pidié pa laga nos sa di otro hende ku nos lo por ofresé un studio di Beibel.—Echonan 18:6-8.

Krea Oportunidatnan pa Hasi Disipel

11. Unda nos por haña disipel nobo?

¹¹ Pablo ku su kompañeronan kristian a purba hasi disipel dor di prediká di kas pa kas, na marshe i miéntras nan tabata biaha, de echo, tur kaminda. Komo un trahadó seloso di Reino ku ta purba hasi disipel, abo lo por ekspandé bo aktividatnan di sirbishi di vèlt? Lo bo por probechá di oportunidatnan pa buska hende digno i prediká na nan? Kua ta algun manera ku nos rumannan publikadó di e bon nobo a haña disipel? Laga nos analisá promé e kampo di predikashon via telefon.

12-14. Pa ilustrá e benefisionan di predikashon via telefon, konta un eksperensia personal òf un di esnan den e paragrafnan aki.

¹² Un ruman kristian ku nos lo yama Maria, predikando di kas pa kas na Brazil, a entregá un tratado na un señora hóben ku tabata saliendo for di un edifisio di apartamento. Usando e tema di e tratado komo introdukshon, Maria a puntr’é: “Lo bo kier sa mas tokante Beibel?” E señora a kontestá: “Sí, ku mil amor. E problema ta ku mi ta yùfrou di skol, i dunamentu di lès ta tuma tur mi tempu.” Maria a splik’é ku nan lo por konsiderá tópikonan bíbliko via telefon. E señora a duna Maria su number di telefon, i e anochi ei mes el a kuminsá un studio via telefon usando e foyeto Kico Dios Ta Rekerí di Nos? *

¹³ Un predikadó di tempu kompletu na Etiopia a spanta ora ku segun ku e tabata prediká via telefon ku un hende hòmber, el a tende un bochincha den fondo. E hòmber a pidié yama bèk despues. Ora el a hasi esei, e hòmber a pidié despensa i a bisa ku na momentu di su promé yamada, e ku su kasá tabata meimei di un pleitu pisá. E ruman muhé a probechá di e komentario ei pa mustra riba e guia sabí ku Beibel ta duna pa trata problemanan familiar. El a bisa e hòmber ku e buki E Secreto pa Felicidad den Famia, publiká dor di Testigunan di Yehova, a yuda hopi famia. Un par di dia despues ku el a entregá e buki, e ruman muhé a bolbe bèl e hòmber. E hòmber a deklará entusiasmá: “E buki aki a salba mi matrimonio!” De echo, el a tene un reunion ku su famia pa kompartí e bon puntonan ku el a lesa den e buki. Esaki a resultá den un studio di Beibel, i poko despues e hòmber a kuminsá asistí regularmente na reunionnan kristian.

¹⁴ Un proklamadó di Reino na Dinamarka ku a kuminsá un studio di Beibel dor di prediká via telefon a bisa: “E superintendente di  sirbishi a animá mi pa partisipá den predikashon via telefon. Na prinsipio mi a vasilá, bisando: ‘E kos ei no ta pa mi.’ Sin embargo, un dia mi a tuma un kurashi i a bèl e promé doño di kas. Sonja a kontestá, i despues di un kòmbersashon kòrtiku, el a bai di akuerdo pa risibí literatura basá riba Beibel. Un anochi nos a kòmbersá riba e tópiko di kreashon, i e tabata kier a lesa e buki Bida—Kon El A Presentá? Dor di Evolushon òf Kreashon? * Mi a bis’é ku lo ta bon si nos por a topa personalmente i trata e tópiko. El a bai eens. Sonja tabata kla p’e studio ora mi a yega, i for di e dia ei nos ta studia tur siman.” Nos ruman muhé kristian a konkluí bisando: “Pa hopi aña mi tabata pidi un studio di Beibel den orashon, pero mi no a ferwagt di haña unu dor di prediká via telefon.”

15, 16. Ki eksperensianan bo por konta pa mustra e benefisio di ta alerta pa diferente manera di kuminsá studio di Beibel?

¹⁵ Hopi publikadó tin éksito dor ku nan ta apliká e sugerensia pa prediká na hende na unda ku nan ta. Un ruman muhé kristian na Merka a parker su outo banda di un vèn riba un parkeerplaats. Ora e señora den e vèn a mir’é, e ruman a kuminsá splik’é e karakter di nos obra bíbliko edukativo. E señora a skucha, sali for di su vèn i a bini na outo di e ruman. E di ku e ruman: “Mi ta masha kontentu ku bo a para pa papia ku mi. Mi tin basta tempu sin haña boso literatura. Ademas, mi ke studia Beibel atrobe. Bo por studia ku mi?” Nos ruman pues a krea un situashon faborabel pa kompartí e bon nobo.

¹⁶ Un ruman muhé na Merka tabatin e siguiente eksperensia ora el a bishitá un kas di kuido pa ansiano: El a bai serka un empleado enkargá ku aktividatnan den e lugá, i a bis’é ku lo e tin gana di duna un man komo boluntario pa yuda satisfasé e nesesidatnan spiritual di e habitantenan. Nos ruman a agregá ku gustosamente lo e kondusí semanalmente un studio di Beibel grátis ku ken ku ke asistí. E empleado a dun’é pèrmit pa bishitá e kuartonan di diferente habitante. Poko despues e tabata kondusí un studio di Beibel tres biaha pa siman ku un total di 26 habitante, di kua unu ta den kondishon pa asistí na nos reunionnan regularmente.

17. Ki método hopi bes ta efektivo den kuminsá studio di Beibel?

¹⁷ Algun proklamadó di Reino tin bon resultado dor di ofresé e hendenan direktamente un studio di Beibel. Un mainta, un kongregashon di 105 publikadó a hasi un esfuerso spesial pa ofresé un studio di Beibel na tur doño di kas ku nan topa. Ochentiseis publikadó a partisipá den sirbishi di vèlt, i despues di dos ora den e trabou di prediká, nan a deskubrí ku nan a logra kuminsá por lo ménos 15 studio di Beibel nobo.

Sigui Buska Hende Digno

18, 19. Ki instrukshon importante di Hesus nos mester tene na mente, i pa logra esei kiko nos mester ta determiná pa hasi?

¹⁸ Komo un proklamadó di Reino, kisas bo ta deseá di purba e sugerensianan menshoná den a artíkulo aki. Klaru ku lo ta sabí pa tene kuenta ku kustumbernan lokal ora ku nos ta pensa riba métodonan pa duna testimonio. Mas ku tur kos, laga nos tene na mente e instrukshon  ku Hesus a duna pa buska hende digno i yuda e personanan ei bira disipel.—Mateo 10:11; 28:19.

¹⁹ Pa logra esei, laga nos manehá “e palabra di bèrdat na un manera korekto.” Nos por hasi esei dor di usa argumentunan konvinsente sólidamente basá riba e Skritura. Esaki lo yuda nos toka kurason di hende interesá i motivá nan pa aktua. Segun ku nos ta dependé riba Yehova, kompañá pa orashon, nos por yuda algun bira disipel di Hesukristu. Anto e trabou aki ta algu ku ta duna gran satisfakshon! P’esei laga nos ‘hasi tur nos esfuerso pa presentá nos mes aprobá dilanti di Dios,’ semper onrando Yehova komo proklamadónan seloso ku ta prediká ku e meta di hasi disipel.—2 Timoteo 2:15.

[Nota]

Bo Ta Kòrda?

• Dikon mester a splika Apolos e kaminda di Dios mas kompletamente?

• Den ki maneranan Prisila i Akila a siña for di apòstel Pablo?

• Kiko abo a siña tokante e trabou di hasi disipel for di Echonan kapítulo 18?

• Kon bo por krea oportunidat pa hasi disipel?

[Preguntanan di Estudio]

[Plachi na página 18]

Prisila i Akila ‘a splika Apolos e kaminda di Dios na un manera mas eksakto’

[Plachi na página 20]

Apolos a bira ábil den hasi disipel

[Plachi na página 21]

Pablo a prediká na unda ku el a bai

[Plachinan na página 23]

Krea oportunidat pa prediká