Sí, Ta Rasonabel pa Kere den un Paradeis Riba Tera

ATRAVES di historia, miónes di hende a kere ku finalmente nan lo bandoná tera i bai shelu. Tin hende a pensa ku nos Kreadó nunka tabatin intenshon pa tera bira nos lugá permanente di biba. Asétikonan (hende ku ta severo ku nan mes) a bai mas leu ainda. Pa hopi di nan, tera i tur kos material ta malu i ta un barera pa berdadero satisfakshon spiritual i un relashon será ku Dios.

Esnan ku a bin ku e ideanan aki sea no tabata konsiente di loke Dios a bisa tokante un paradeis riba tera òf a skohe pa ignor’é. De echo, awe hopi hende no ta interesá mes pa sa kiko Dios a inspirá hende pa skirbi tokante e tópiko aki den su Palabra, Beibel. (2 Timoteo 3:16, 17) Pero no ta sabí pa konfia den e Palabra di Dios en bes di aseptá teoria di hende? (Romanonan 3:4) En realidat ta masha importante pa nos hasi esei ya ku Beibel ta spièrta nos ku un kriatura poderoso pero malbado i invisibel a siega hende spiritualmente i awor “ta gaña henter mundu.”—Revelashon 12:9; 2 Korintionan 4:4.

Dikon Tin Konfushon?

Ideanan kontradiktorio tokante alma a konfundí hende enkuanto kiko ta Dios su propósito pa e tera. Hopi hende ta kere ku nos tin un alma inmortal ku ta sali for di e kurpa humano despues di morto i ta sigui biba. Otro hende ta kere ku alma di kada hende a eksistí promé ku nan kurpa humano a ser kreá. Segun un obra di referensia, e filósofo griego Plato a pensa ku e alma “ta enkarselá den un kurpa komo kastigu pa e pikánan ku el a kometé tempu e tabata den shelu.” Di igual manera teólogo Orígenes di siglo 3 a bisa ku “tur alma a peka [den shelu] promé ku nan a uni ku e kurpa” i a wòrdu “enkarselá [den e kurpa ei riba tera] komo kastigu pa nan pikánan.” I miónes di hende ta kere ku tera ta simplemente un tipo di lugá pa tèst hende durante nan biahe pa shelu.

Tambe tin diferente idea tokante kiko ta pasa ku e alma ora un hende muri. Segun e buki History of Western Philosophy (Historia di Filosofia Oksidental), e egipsionan a desaroyá e punto di bista “ku alma di e defuntunan ta baha bai den mundu di e mortonan.” Despues filósofonan a argumentá ku alma di e defuntunan no a baha den un mundu skur di mortonan pero ku eigenlijk nan a subi bai na un region di spiritu superior. Nan ta bisa ku e filósofo griego Sócrates tabata di opinion ku ora un hende muri su alma “ta bai den [un] region invisibel . . . i ta pasa e restu di su bida ku e diosnan.”

Kiko Beibel Ta Bisa?

Niun kaminda Beibel, e Palabra ku Dios a inspirá no ta bisa ku hende tin un alma inmortal. Lesa Génesis 2:7 pa bo mes. E ta bisa: “SEÑOR Dios a forma hende di e stòf di tera i a supla e rosea di bida den su nanishi; i hende a bira un ser bibu.” Esei ta mas kla ku di dia i no por wòrdu mal interpretá. Ora Dios a krea e promé hende, esta, Adam, E no a hinka ningun ingrediente ku no ta físiko den dje. Nò, pasobra Beibel ta bisa ku “hende a bira un ser bibu.” E hòmber no tabatin un alma sino tabata un alma.

Ora Yehova a krea tera i e famia humano, niun ora so su intenshon no tabata pa hende muri. Dios su propósito tabata pa hende biba  pa semper den Paradeis riba tera. Adam a muri pasobra el a desobedesé Dios su lei. (Génesis 2:8, 15-17; 3:1-6; Isaias 45:18) Unda e promé ser humano a bai ora el a muri? Na un region di spiritu? Nò! E alma, Adam, a bolbe na stof for di kua el a wòrdu kreá.—Génesis 3:17-19.

Nos tur a heredá piká i morto for di nos promé mayor Adam. (Romanonan 5:12) E morto aki ku nos a heredá ta un kondishon den kua e persona ta stòp di eksistí, meskos ku tabata e kaso ku Adam. (Salmo 146:3, 4) Eigenlijk, den niun di su 66 bukinan, Beibel ta asosiá e palabra “inmortal” òf “eterno” ku e palabra “alma.” Al kontrario, e Skritura klaramente ta bisa ku e alma, esta, e persona, ta mortal. E alma ta muri.—Eklesiastés 9:5, 10; Ezekiel 18:4.

Kosnan Material Riba Nan Mes Ta Malu?

Tur kos material, inkluso tera, ta malu? Siguidónan di manikeismo, un movementu religioso fundá dor di un tal Mani na Pèrsia durante siglo 3 di nos era, tabatin e punto di bista ei. The New Encyclopædia Britannica ta bisa: “Manikeismo tabata un reakshon riba e angustia ku e kondishon humano a kousa.” Mani a opiná ku bida humano “no ta natural, ta insoportabel i totalmente malu.” Tambe e tabata di opinion ku e úniko manera pa skapa for di e “angustia” aki tabata si e alma sali for di e kurpa, bandoná tera i haña un bida spiritual den un mundu di spiritu.

Na kontraste, Beibel ta bisa nos ku for di Dios su punto di bista “tur loke el a traha” ora el a krea tera i humanidat tabata “masha bon.” (Génesis 1:31) E tempu ei no tabatin barera entre hende ku Dios. Adam ku Eva tabatin un bon komunikashon i un relashon será ku Yehova, meskos ku e hòmber perfekto Hesukristu a gosa di un relashon íntimo ku su Tata selestial.—Mateo 3:17.

Si nos promé mayornan, Adam ku Eva, no a peka, pa semper nan lo a keda ku un relashon será ku Yehova Dios den un paradeis riba tera. Nan bida a kuminsá den Paradeis, pasobra e Skritura ta bisa nos: “SEÑOR Dios a planta un hòfi parti pariba, na Edén; i ayanan el a pone e hòmber ku el a forma.”  (Génesis 2:8) Ta den e paradeis ei Eva a wòrdu kreá. Si Adam ku Eva no a peka, tantu nan komo nan yunan perfekto lo por a traha huntu den felisidat te ku henter e tera lo a bira un paradeis. (Génesis 2:21; 3:23, 24) E Paradeis riba tera lo a bira humanidat su lugá di biba pa semper.

Dikon Algun Hende Ta Bai Shelu?

Kisas lo bo bisa: ‘Pero, Beibel ta bisa ku tin hende ta bai shelu, no ta asina?’ Sí. Despues ku Adam a peka, Yehova su propósito tabata pa establesé un Reino den shelu. Algun desendiente di Adam lo a forma parti di e Reino aki pa for di den shelu huntu ku Hesukristu nan “reina riba tera.” (Revelashon 5:10; Romanonan 8:17) Nan lo mester a wòrdu resusitá pa haña bida inmortal den shelu. Huntu nan mester a forma un grupo di 144.000 persona, i e proménan entre nan tabata e disipelnan fiel di Hesus di promé siglo.—Lukas 12:32; 1 Korintionan 15:42-44; Revelashon 14:1-5.

Sin embargo, no tabata Dios su propósito original pa hende hustu bandoná tera i bai biba den shelu. De echo, ora Hesus tabata riba tera, el a bisa: “Ni un hende no a subi na shelu, sino esun ku a baha for di shelu, esta, e Yu di hende.” (Juan 3:13) Mediante “e Yu di hende,” Hesukristu, Dios a perkurá un reskate ku ta hasi bida pa semper posibel pa esnan ku ehersé fe den e sakrifisio di Hesus. (Romanonan 5:8) Pero na unda e miónes di hendenan ei lo bai biba pa semper?

Dios Su Propósito Original Lo Kumpli

Dios su propósito tabata pa skohe algun hende di e famia humano pa sirbi komo ko-gobernante ku Hesukristu den e Reino di shelu, pero esei no kier men ku tur bon hende ta bai shelu. Yehova a krea tera p’e bira un paradeis pa e famia humano biba aden. Pronto, Dios lo kumpli ku e propósito original ei.—Mateo 6:9, 10.

Bou di liderato di Hesukristu i su ko-gobernantenan selestial, pas i felisidat lo reina na tur parti di mundu. (Salmo 37:9-11) Esnan ku ta den Dios su memoria lo wòrdu resusitá i lo gosa di salú perfekto. (Echonan 24:15) Debí na nan fieldat na Dios, humanidat obediente lo haña loke nos mayornan original a pèrdè, esta, perfekshon i bida eterno den paradeis riba tera.—Revelashon 21:3, 4.

Yehova Dios nunka ta keda sin kumpli ku su propósito. Mediante su profeta Isaias, el a deklará: “Manera áwaseru i sneu ta kai for di shelu, i no ta bolbe ayanan sin muha tera, i ta hasi tera produsí i sprùit, i ta duna simia na e sembradó i pan na esun ku ta kome, asina mi palabra ku ta sali for di mi boka lo ta; e lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”—Isaias 55:10, 11.

E buki bíbliko di Isaias ta duna nos un idea kon bida den Paradeis riba tera lo ta. Ningun hende ku ta biba den Paradeis lo bisa: “Mi ta malu.” (Isaias 33:24) Bestia lo no forma peliger pa hende. (Isaias 11:6-9) Hende lo konstruí kasnan bunita i biba den nan i nan lo planta i kome te keda satisfecho. (Isaias 65:21-25) Ademas, Dios “lo traga morto pa semper, i Señor DIOS lo seka awa di wowo for di tur kara.”—Isaias 25:8.

Pronto, humanidat obediente lo biba bou di kondishonnan ekselente. Nan ‘lo wòrdu librá for di sklabitut na korupshon pa drenta den e libertat glorioso di e yunan di Dios.’ (Romanonan 8:21) Esta dushi lo ta pa biba pa semper den Paradeis riba tera manera Dios a primintí! (Lukas 23:43) Abo tambe lo por ta einan si bo aktua na armonia ku konosementu eksakto di e Skritura i ehersé fe den Yehova Dios i Hesukristu. I bo por tin konfiansa ku en bèrdat ta rasonabel pa kere den un paradeis riba tera.

[Plachi na página 5]

Adam ku Eva tabata diseñá pa biba pa semper den un paradeis riba tera

 [Plachinan na página 7]

Den Paradeis riba tera . . .

nan lo konstruí kasnan

nan lo planta wendrùif

Yehova lo bendishoná nan

[Rekonosementu pa Potrèt na página 4]

U.S. Fish & Wildlife Service, Washington, D.C./NASA