Yuda Otro Hende Aseptá e Mensahe di Reino

“Agripa a kontestá Pablo: ‘Kasi bo ta konvensé mi pa bira kristian.’”—ECHONAN 26:28.

1, 2. Kon bini Pablo a aparesé dilanti Gobernadó Festo i Rei Herodes Agripa II?

NA AÑA 58 di nos era, na Cesarea, gobernadó romano Porsio Festo a haña bishita di Rei Herodes Agripa II ku su ruman muhé Berenise. Riba invitashon di Gobernadó Festo, nan a bini “tur rondoná di luho i grandesa, i a drenta e sala di oudiensia, akompañá pa e komandantenan i e hòmbernan prominente di stat.” Riba òrdu di Festo, apòstel kristian Pablo a wòrdu tresé den nan presensia. Kon bini e siguidó aki di Hesukristu ta dilanti e tribunal di Gobernadó Festo?—Echonan 25:13-23.

² Loke Festo a konta su invitadonan ta duna un kontesta riba e pregunta ei. El a bisa: “Rei Agripa i boso tur, kabayeronan aki presente ku nos, boso ta mira e hòmber aki tokante di kende henter e pueblo hudiu a apelá na mi, tantu na Yerusalèm komo aki, deklarando na bos haltu ku e no mester keda biba mas. Ma ami a haña ku e no a hasi nada ku meresé morto; i komo ku e mes a apelá na Emperador, mi a disidí di mand’é. Sin embargo, mi no tin nada definitivo tokante di dje pa skirbi mi señor. P’esei mi a tres’é boso dilanti, i spesialmente dilanti di abo, Rei Agripa, pa despues ku e investigashon a tuma lugá, mi por tin algu di skirbi. Pasobra ta parse mi apsurdo pa manda un prezu sin skirbi tambe e akusashonnan ku tin kontra dje.”—Echonan 25:24-27.

3. Dikon e lidernan religioso a presentá akusashon kontra Pablo?

³ E palabranan di Festo ta indiká ku Pablo a ser akusá falsamente di ta kousa lantamentu, un krímen ku tabata karga pena di morto. (Echonan 25:11) Sin embargo, Pablo tabata inosente. E akusashonnan a originá di e lidernan religioso yalurs den Yerusalèm. Nan tabata kontra di Pablo su trabou komo proklamadó di Reino i nan tabatin masha rabia ku el a yuda otro hende bira siguidó di Hesukristu. Kompañá pa bewakernan bon armá, nan a trese Pablo for di Yerusalèm na e stat portuario di Cesarea, kaminda el a apelá na Cesar. Djeinan nan lo a hib’é Roma.

4. Ki deklarashon sorprendente Rei Agripa ta hasi?

 ⁴ Imaginá Pablo den palasio di gobernadó dilanti di un grupo ku ta inkluí e gobernante di un parti importante di e Imperio Romano. Rei Agripa ta bira kara pa Pablo i bisa: “Bo tin mag di papia.” Segun ku Pablo ta papia, algu ekstraordinario ta sosodé. Loke Pablo ta bisa ta kuminsá influensiá e rei. De echo, Rei Agripa ta bisa: “Kasi bo ta konvensé mi pa bira kristian.”—Echonan 26:1-28.

5. Dikon Pablo su palabranan na Agripa tabata asina efektivo?

⁵ Djis pensa! Debí na Pablo su defensa ábil, un gobernante a ser influensiá dor di e poder penetrante di e Palabra di Dios. (Hebreonan 4:12) Ta kiko a hasi Pablo su defensa asina efektivo? I kiko nos por siña for di Pablo ku por yuda nos den nos trabou di hasi disipel? Ora nos analisá su defensa, nos ta mira bon kla dos punto ku ta destaká: (1) Pablo tabatin argumentunan konvinsente den su presentashon. (2) El a usa su konosementu di e Palabra di Dios na un manera ábil, meskos ku un artesano ta usa un hèrmènt na un manera efektivo.

Usa Argumentunan Konvinsente

6, 7. (a) Segun e manera ku Beibel ta usa e palabra “konvensé,” kiko e ta nifiká? (b) Ora nos ta yuda hende aseptá un siñansa di Beibel, pakiko ta importante pa “konvensé” nan?

⁶ Den e buki di Echonan, palabranan griego ku ta nifiká “konvensé” ta ser usá vários bes relashoná ku Pablo su predikashon. Kiko esei ta nifiká pa nos trabou di hasi disipel?

⁷ Den e idioma original di e Skritura Griego Kristian, “konvensé” ta nifiká “gana na bo banda” òf pone un persona “kambia di pensamentu mediante rasonamentu òf konsiderashonnan moral,” segun e Expository Dictionary of New Testament Words di Vine. Si nos analisá e nifikashon básiko di e palabra nos ta haña mas klarifikashon. E ta transmití e idea di konfiansa. P’esei si bo konvensé un persona pa aseptá un siñansa di Beibel, bo a gana su konfiansa, di manera ku e ta pone fe den e bèrdat di e siñansa ei. Ta bisto anto ku no ta basta pa djis konta un persona loke Beibel ta bisa, pa asina e por kere esei i aktua a base di dje. Bo oyente mester ta konvensí ku loke bo ta bisa ta bèrdat, sea ku e ta un mucha, un bisiña, un kolega di trabou òf di skol, òf un famia.—2 Timoteo 3:14, 15.

8. Kiko konvensé un persona di un bèrdat bíbliko ta enserá?

⁸ Kon bo por konvensé un persona ku loke bo ta proklamá for di e Palabra di Dios ta e bèrdat? Dor di usa rasonamentu lógiko, argumentunan sólido i apelashon sinsero, Pablo a purba kambia e pensamentu òf mentalidat di e hendenan ku el a papia kuné. * P’esei en bes di djis deklará ku algu ta bèrdat, bo tin ku presentá evidensia satisfaktorio pa respaldá bo deklarashon. Kon bo por hasi esaki? Hasi sigur ku bo deklarashon ta basá firmemente riba e Palabra di Dios i no riba opinion personal. Tambe, usa evidensia adishonal pa apoyá bo deklarashonnan bíbliko sinsero. (Proverbionan 16:23, Beibel na papiamentu koriente) Por ehèmpel, si bo deklará ku humanidat obediente lo disfrutá di bida den un paradeis riba tera, apoyá e deklarashon ei ku un teksto bíbliko, manera por ehèmpel Lukas 23:43 òf Isaias 65:21-25. Kon bo por presentá mas evidensia pa apoyá bo punto bíbliko? Podisé bo por usa ehèmpelnan ku bo oyente mes a eksperensiá. Lo bo por rekord’é di e plasernan simpel i grátis ku hende por disfrutá dje, manera un bunita bahada di solo, e dushi aroma di un flor, e sabor sukulento di un fruta, òf e goso di mira un para alimentá su yunan. Yuda e persona mira ku e plasernan ei ta prueba ku e Kreadó ke pa nos disfrutá di bida riba tera.—Eklesiastés 3:11, 12.

9. Kon nos por demostrá den nos trabou di prediká ku nos ta rasonabel?

⁹ Ora bo ta purba konvensé un persona pa  aseptá un sierto siñansa di Beibel, tene kuidou pa bo entusiasmo no pone bo zona irasonabel, i di e manera ei sera mente i kurason di bo oyente. E buki Skol di Ministerio ta duna e palabra aki di atvertensia: “Si nos bisa un persona na un manera bòt un bèrdat ku ta mustra ku un kreensia ku ta presioso p’e ta falsu, lo no ta fásil pa e aseptá esei ku gustu, ni maske nos tin un lista largu di tekstonan bíbliko komo prueba. Por ehèmpel, si nos djis kondená selebrashonnan popular bisando ku nan ta di orígen pagano, esaki probablemente lo no kambia loke hende ta pensa di nan. Pero si bo ta rasonabel, normalmente lo bo tin mas éksito.” Pakiko nos tin ku hasi un esfuerso determiná pa ta rasonabel? E buki ta sigui bisa: “Si bo rasoná ku hende esei ta stimulá nan pa analisá un asuntu na un manera habrí i ophetivo. Tambe esei ta duna nan kos pa pensa ariba despues i ta laga porta habrí pa mas kòmbersashon den futuro. Esei por ta masha konvinsente.”—Kolosensenan 4:6.

Argumentunan Konvinsente Ku Ta Motivá Kurason

10. Den ki manera Pablo a introdusí su defensa dilanti Agripa?

¹⁰ Laga nos analisá awor Pablo su palabranan di defensa na Echonan kapítulo 26. Tuma nota kon el a kuminsá su diskurso. Pa introdusí su tópiko, Pablo a haña un base legítimo pa elogiá Agripa, ounke ku e rei tabatin un relashon skandaloso ku su ruman muhé Berenise. Pablo a bisa: “Mi ta konsiderá mi mes dichoso, o Rei Agripa, ku mi por defendé mi mes bo dilanti awe kontra tur loke e hudiunan ta akusá mi di dje; spesialmente pasobra bo ta un eksperto den tur kustumber i kuestion ku tin den e hudiunan; p’esei mi ta roga bo pa skucha mi ku pasenshi.”—Echonan 26:2, 3.

11. Kon e palabranan di Pablo na Agripa a demostrá rèspèt, i esei a resultá den ki benefisio?

¹¹ Bo a ripará ku Pablo a rekonosé Agripa su posishon di outoridat dor di papia kuné usando su título, Rei? Esaki a demostrá rèspèt, i dor  di skohe su palabranan na un manera sabí, Pablo a mustra onor na Agripa. (1 Pedro 2:17) E apòstel a rekonosé ku Agripa tabata un eksperto di e kustumber- i leinan kompliká di su súpditonan hudiu. Tambe el a bisa ku e ta kontentu ku e por a hasi su defensa dilanti un gobernante asina bon informá. Pablo, un kristian, no a aktua komo si fuera el a sinti su mes superior na Agripa, kende no tabata kristian. (Filipensenan 2:3) Mas bien Pablo a roga e rei pa skuch’é ku pasenshi. Asina Pablo a krea un ambiente den kua Agripa, i tambe e otro oyentenan, lo tabata mas dispuesto pa aseptá loke e ta bai presentá. Pablo tabata poniendo un fundeshi, un tereno komun pa e por a sigui desaroyá su argumentunan.

12. Den e trabou di proklamá e Reino, kon nos por toka kurason di nos oyentenan?

¹² Laga nos tambe, meskos ku Pablo dilanti Agripa, toka kurason di nos oyentenan for di e introdukshon te na e konklushon di nos presentashon di e mensahe di Reino. Nos por hasi esaki dor di mustra rèspèt sinsero pa e persona na ken nos ta prediká i tambe berdadero interes den su background i mentalidat.—1 Korintionan 9:20-23.

Usa e Palabra di Dios na un Manera Ábil

13. Kon abo por motivá bo oyentenan, meskos ku Pablo a hasi esei?

¹³ Pablo kier a motivá su oyentenan pa aktua riba e bon nobo. (1 Tesalonisensenan 1:5-7) Pa logra esei, el a toka nan kurason, e sentro di motivashon. Segun ku nos ta sigui konsiderá Pablo su defensa dilanti Agripa, tuma nota kon Pablo a ‘manehá e palabra di Dios korektamente’ dor di referí na kosnan ku Moisés i e profetanan a deklará.—2 Timoteo 2:15.

14. Splika kon Pablo a usa argumentunan konvinsente ora e tabata dilanti Agripa.

¹⁴ Pablo tabata sa ku Agripa tabata un hudiu pa nòmber so. Probechando di Agripa su konosementu di hudaismo, Pablo a rasoná ku su predikashon realmente a enserá pa no “bisa  nada mas sino loke e Profetanan i Moisés a bisa ku lo a bai sosodé” relashoná ku morto i resurekshon di e Mesias. (Echonan 26:22, 23) Dirigiendo su mes direktamente na Agripa, Pablo a puntra: “Rei Agripa, bo ta kere e Profetanan?” Agripa tabata den un dilema. Si el a bisa ku e ta rechasá e profetanan, esei lo a daña su reputashon di ta un hudiu kreyente. Pero si el a bai eens ku e rasonamentu di Pablo, lo el a demostrá públikamente di ta di akuerdo ku e apòstel i lo a kore e riesgo di ser yamá un kristian. Sabiamente Pablo mes a kontestá su pregunta, bisando: “Mi sa ku bo ta kere.” Kon Agripa su kurason a motiv’é pa kontestá? El a bisa: “Kasi bo ta konvensé mi pa bira kristian.” (Echonan 26:27, 28) Ounke Agripa no a bira un kristian, Pablo evidentemente a touch su kurason te na sierto grado ku su mensahe.—Hebreonan 4:12.

15. Kon Pablo a logra kuminsá un kongregashon na Tesalónika?

¹⁵ Bo a ripará ku Pablo su presentashon di e bon nobo a konsistí di hasi proklamashon i tambe usa argumentunan konvinsente? Komo ku Pablo a usa e método ei segun ku el a ‘manehá e palabra di Dios korektamente,’ algun hende ku a tend’é no a keda simplemente oyente sino a bira kreyente. Esaki tabata e kaso na Tesalónika, kaminda Pablo a bai den snoa pa buska hudiu i hende temeroso di Dios ku no tabata hudiu. E relato na Echonan 17:2-4 ta bisa: “Segun Pablo su kustumber, el a bai serka nan, i tres sabat siguí el a rasoná ku nan for di e Skrituranan, splikando i mustrando ku e Kristu mester a sufri i lanta for di e mortonan . . . I algun di nan a wòrdu konvensí.” Pablo a usa argumentunan konvinsente. El a rasoná, splika i proba mediante e Skrituranan ku Hesus tabata e Mesias primintí for di hopi tempu. E resultado? El a establesé un kongregashon di kreyente.

16. Kon bo por haña mas goso den e proklamashon di Reino?

¹⁶ Abo por bira mas ábil den usa argumentunan konvinsente ora di splika e Palabra di Dios? Si ta asina, lo bo haña mas satisfakshon personal i goso den bo trabou di prediká i siña hende tokante e Reino di Dios. Esaki tabata e eksperensia di publikadónan di e bon nobo ku a apliká e sugerensia pa usa Beibel mas tantu den e trabou di prediká.

17. Relatá un eksperensia personal òf duna e punto prinsipal di esun den e paragraf aki, pa mustra ku ta probechoso pa nos usa Beibel den nos sirbishi.

¹⁷ Por ehèmpel, un superintendente biahero di Testigunan di Yehova a skirbi: “Un kantidat basta grandi di ruman awor ta kana ku un Beibel den man ora nan ta duna testimonio di kas pa kas. Esaki a yuda e publikadónan lesa un teksto pa hopi di e hendenan ku nan ta topa. Esei a yuda tantu e doñonan di kas komo e publikadónan pa konektá nos sirbishi ku Beibel, i no simplemente ku revista i buki.” Klaru ku ta dependé di vários faktor, inkluso di kustumbernan lokal, si nos ta kana ku Beibel den man ora nos ta partisipá den e aktividat di prediká. No opstante, nos ke tin e reputashon di ta usa e Palabra di Dios na un manera ábil pa konvensé otro hende pa aseptá e mensahe di Reino.

Tene Dios Su Punto di Bista di Sirbishi

18, 19. (a) Kon Dios ta mira nos sirbishi, i dikon nos mester kultivá su punto di bista? (b) Kiko lo yuda nos hasi rebishitanan eksitoso? (Wak e kuadro titulá “Kon pa Tin Éksito den Hasi Rebishita,” na página 16.)

¹⁸ Un otro manera pa yega na kurason di nos  oyentenan ta enserá mira sirbishi for di e punto di bista di Dios i tene pasenshi. Dios su boluntat ta pa tur klase di hende “yega na konosementu di e bèrdat.” (1 Timoteo 2:3, 4) Akaso esei no ta nos deseo? Tambe Yehova ta tene pasenshi, i su pasenshi ta duna hopi hende oportunidat di bin na repentimentu. (2 Pedro 3:9) P’esei, ora nos topa un hende ku ta dispuesto pa skucha e mensahe di Reino, kisas lo ta nesesario pa nos bishit’é vários biaha pa por kultivá e interes ei. Ta tuma tempu i pasenshi pa mira e simianan di e bèrdat krese. (1 Korintionan 3:6) E kuadro athunto titulá “Kon pa Tin Éksito den Hasi Rebishita” ta duna algun sugerensia pa kultivá e interes ei. Kòrda ku e hendenan su bida—nan problemanan i situashonnan—ta kambia konstantemente. Podisé nos tin ku purba hopi biaha promé ku nos haña nan na kas, pero ta bale la pena. Nos ke duna nan un chèns di tende Dios su mensahe di salbashon. P’esei pidi Yehova Dios duna bo e sabiduria pa desaroyá bo abilidat di usa argumentunan konvinsente den bo trabou di yuda hende aseptá e mensahe di Reino.

¹⁹ Unabes nos haña un persona ku ta deseá di tende mas di e mensahe di Reino, kiko otro nos komo trahadónan kristian por hasi? Nos siguiente artíkulo ta ofresé yudansa.

[Nota]

Bo Ta Kòrda?

• Kiko a hasi Pablo su defensa dilanti Rei Agripa efektivo?

• Kon nos mensahe por toka kurason di hende?

• Kiko lo yuda nos usa e Palabra di Dios efektivamente pa yega na kurason di hende?

• Kon nos por tin Dios su punto di bista di sirbishi?

[Preguntanan di Estudio]

[Kuadro/Plachinan na página 16]

Kon pa Tin Éksito den Hasi Rebishita

• Mustra un interes personal sinsero den hende.

• Skohe un tópiko interesante di Beibel pa konsiderá.

• Pone e fundeshi pa kada bishita ku lo sigui.

• Keda pensa riba e persona despues ku bo bai.

• Bolbe bèk pronto, podisé den un òf dos dia, pa kultivá e interes.

• Tene na mente ku bo meta ta pa kuminsá un studio di Beibel.

• Pidi Yehova den orashon pa laga e interes di e persona krese.

[Plachi na página 15]

Pablo a usa argumentunan konvinsente ora e tabata dilanti Gobernadó Festo i Rei Agripa