“Dispuesto pa Hasi Tur Bon Obra”

“REKÒRDÁ nan pa ta sumiso na gobernantenan i na outoridatnan, pa ta obedesidu, i dispuesto pa hasi tur bon obra.” (Tito 3:1) Ta kua bon obra apòstel Pablo tabatin na mente ora el a skirbi e palabranan ei na su rumannan den fe? E eksperto di Beibel E. F. Scott a señalá na un tipo di bon obra, bisando: “Kristiannan no solamente mester a obedesé outoridat, sino tambe nan mester tabata kla pa hasi kualke bon obra. . . . Ki ora ku e situashon a eksigí esei, kristiannan lo mester tabata entre e proménan pa demostrá interes pa komunidat. Konstantemente lo tabatin kandela, epidemia i vários tipo di kalamidat, i tur bon siudadano lo a deseá di yuda nan próhimo.”

Kristiannan ta partisipá den sierto obranan ku ta na bienestar di komunidat te asina leu ku e obranan ei no ta na konflikto ku e leinan di Dios. (Echonan 5:29) Por ehèmpel, e sukursal di Testigunan di Yehova na Hapon, situá na Ebina, kumpliendo ku instrukshon di e departamentu lokal di bombero ta tene tur aña un training kon pa paga kandela i kiko pa hasi den kaso di kandela. Na okashonnan asina, tur miembro di e famia di Bètel ta bini huntu pa skucha e instrukshonnan ku ta ser duná dor di un representante di e departamentu lokal di bombero.

Ademas, pa mas ku un dékada, e sukursal ei ta koperá ku outoridatnan lokal den un ekshibishon ku ta ser patrosiná pa hasi hende mas konsiente di prevenshon di kandela. Na e ekshibishon ei, kompania- i empresanan di e stat ta demostrá kon bon prepará nan ta pa kombatí kandela i manten’é bou di kontròl. Hopi bes e sukursal a risibí rekonosementu pa e abilidat i koperashon di su personal. Na aña 2001 nan a haña e promé premio den e ekshibishon. Pues, nan ta prepará i dispuesto pa hasi bon obra ku por salba bida den kaso di kandela.

Un Servisio Balioso

Sin embargo, Testigunan di Yehova ta interesá den un tipo di bon obra ku ta hopi mas importante, i ku tambe ta salba bida. Regularmente nan ta bishitá nan próhimo pa kompartí ku nan e evangelio òf bon notisia di e Reino di Dios. (Mateo 24:14) E Testigunan ta enkurashá hende pa siña prinsipionan bíbliko i apliká nan den nan bida. Esei por yuda nan mehorá e kalidat di nan bida awor i tambe duna nan e speransa di bida eterno den un mundu kaminda lo reina berdadero pas i siguridat.

Tin hende ku kisas no ta komprondé e balor di e servisio ku Testigunan di Yehova ta rindi, i ta konsiderá nan un molèster. Sin embargo, Hues Jean Crepeau di Korte Superior di Quebec na Canada sí no a pensa asina. Testigunan di Yehova den e pais ei a presentá opheshon kontra un dekreto munisipal di e stat Blainville, na Quebec, ku a eksigí un pèrmit pa nan por hasi nan bishitanan di kas pa kas. Den e desishon di korte, Hues Crepeau a deklará: “E bishitanan di e Testigunan di Yehova ta un servisio kristian na komunidat i . . . e publikashonnan  ku e Testigunan ta ofresé na siudadanonan ku ta interesá ta literatura serio ku ta trata ku tópikonan manera religion, Beibel, droga, alkoholismo, edukashon di hubentut, problemanan matrimonial i divorsio.” E veredikto a sigui bisa: “E úniko konklushon ku korte por yega na dje ta ku komparando Testigunan di Yehova ku bendedó riba kaya, ta un insulto, un degradashon, algu ofensivo i difamatorio.”

Testigunan di Yehova ta kontribuí na e bienestar di e komunidat kaminda nan ta biba dor di yuda hende vense problema den nan bida diario i dor di duna nan un speransa pa futuro. Beibel ta prepará nan pa kumpli ku e trabou ei. “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia, pa e hende di Dios por ta perfekto, ekipá pa tur bon obra.”—2 Timoteo 3:16, 17.

Abo lo tin gana di sa kon Testigunan di Yehova ta hasi nan mes “dispuesto pa tur bon obra”? Nos ta invitá bo pa aseptá nan yudansa pa siña mas tokante Beibel i asina probechá di e servisio vital aki na komunidat ku nan ta rindi den bo área i tambe rònt mundu.

[Plachinan na página 30, 31]

Testigunan di Yehova ta trata na koperá ku outoridatnan

[Plachi na página 31]

Testigunan ta konosí pa e echo ku nan ta yuda nan próhimo