E Motibu Korekto pa Kere den Dios

E BUKI koreano 31 Reasons Why Young People Leave the Church (31 Motibu Pakiko Hóbennan Ta Bandoná Misa) ta bisa ku hopi hóben ta stòp di bai misa dor ku nan no ta haña kontesta satisfaktorio pa nan preguntanan. Por ehèmpel, nan sa puntra: ‘Dikon hende ku ta kere den Dios ta sufri?’ i ‘Dikon nos mester aseptá tur loke nos ta siña na misa siendo ku hopi di e siñansanan aki ta konfuso i kontradiktorio?’

Desepshoná pa e kontestanan ku nan ta haña for di nan pastornan, hopi di nan ta saka konklushon ku Beibel no tin un kontesta. Ora un pastor ta duna un splikashon ku ta basá únikamente riba su propio opinion, hopi bes e resultado ta ku hende ta haña un idea robes di Dios i di Beibel, anto asta ta rechasá nan.

Esei ta loke a sosodé ku Abel, kende a lanta komo luterano na Suráfrika. E ta kòrda: “Iglesia ta siña bo ku Dios ta ‘tuma’ tur hende ku muri. Pero mi no por a komprondé dikon un Dios di amor lo a ‘tuma’ mayornan for di nan yunan. Den kunuku kaminda mi a lanta, nos tabata mata un galiña solamente si su puitunan a bira grandi. Ora nos a haña sa ku un baka ta dek, nos no tabata mat’é, sino tabata warda te ora e bisé nase i stòp di bebe lechi. Mi no tabata komprondé dikon un Dios di amor no a mustra e mesun konsiderashon pa hende.”

Aram, un kanades, tabatin dudanan similar. E ta konta: “Tempu mi tabatin 13 aña, mi tata a muri. Durante e akto di entiero, un pastor prominente a splika ku Dios tabata ke pa mi tata muri  pa e por ta mas serka Dios den shelu. E pastor a bisa: ‘Dios ta tuma bon hende dor ku e ta stima hende hustu.’ Mi no por a komprondé kon Dios por ta asina egoista.”

Ku tempu, tantu Abel komo Aram a drenta den kontakto ku Testigunan di Yehova, ámbos a kuminsá studia Beibel ku nan i finalmente a haña kontesta pa nan preguntanan. Nan a kultivá amor pa Dios i un fe fuerte den dje. Anto finalmente nan a dediká nan bida na Yehova i a bira sirbidónan leal di dje.

Konosementu Eksakto—Un Faktor Importante pa Kere den Dios

Kiko nos por siña for di e eksperensianan aki? Nan ta siña nos ku pa loke ta trata kerementu den Dios, konosementu eksakto di Beibel ta esensial. Apòstel Pablo a bisa kristiannan di e stat antiguo di Filipos: “Esaki ta mi orashon, ku boso amor por abundá mas i mas ainda den konosementu berdadero i tur disernimentu.” (Filipensenan 1:9) Aki Pablo ta relashoná amor pa Dios i pa rumannan den fe ku konosementu berdadero òf konosementu eksakto di Dios, i komprondementu enkuanto kiko ta su boluntat.

Esei ta rasonabel, ya ku e promé kos ku por yuda nos konfia den un hende ta si nos konos’é; mas mihó nos konos’é, mas nos lo por konfi’é. Di igual manera, konosementu eksakto ta nesesario pa bo por sinti bo motivá pa kere den Dios. Pablo a bisa: “Fe ta e siguransa di kosnan ku hende ta spera, e konvikshon di kosnan ku hende no ta mira.” (Hebreonan 11:1) Kere den Dios sin konosementu eksakto di Beibel ta meskos ku konstruí un kas riba santu. E por basha den otro fásilmente.

Un studio di Beibel por yuda bo haña kontesta pa preguntanan manera esun ku a konfundí Abel i Aram pa hopi tempu: Dikon hende ta muri? Beibel ta splika ku “dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.” (Romanonan 5:12) Hende ta bira bieu i muri, no pasobra Dios ta tuma nan pa nan ta huntu kuné, sino pasobra Adam a peka. (Génesis 2:16, 17; 3:6, 17-19) Ademas, Beibel ta revelá kiko ta e berdadero speransa ku Yehova Dios ta ofresé. Mediante su Yu, Hesukristu, e ta proveé e speransa di un resurekshon pa humanidat pekaminoso.—Juan 5:28, 29; Echonan 24:15.

Pa yuda nos komprondé e bèrdat tokante resurekshon, Beibel ta menshoná vários ehèmpel den kua Hesus a lanta hende for di morto. (Lukas 7:11-17; 8:40-56; Juan 11:17-45) Ora bo lesa e relatonan bíbliko aki, mira kuantu goso i alegria e amigu- i famianan di esnan resusitá a sinti. Ripará tambe ku nan a sinti nan konmoví pa alabá Dios i pone fe den Hesus.

Konosementu eksakto tokante Dios i su propósitonan por tin e mesun efekto riba hende awe. Hopi hende tabata konfundí, kargá i asta a trompeká pa motibu ku nan no por a haña kontesta satisfaktorio pa preguntanan importante. Pero segun ku nan a studia Beibel nan a haña kontesta pa e preguntanan aki, i esei a kambia nan bida kompletamente.

Amor pa Dios Ta e Motibu Prinsipal pa Sirbié

Konosementu eksakto ta esensial pa un hende por ehersé fe den Dios, pero mas ku esei ta nesesario pa un hende sintié motivá pa obedes’é i sirbié. Ora nan a puntra Hesus kua ta e mandamentu di mas grandi, el a bisa: “Stima SEÑOR bo Dios ku henter bo kurason, i ku henter bo alma, i ku henter bo mente, i ku tur bo forsa.” (Marko 12:30) Si un hende ta stima Dios n’e moda ku Hesus a indiká, lo e ta muchu mas dispuesto pa obedes’é i sirbié. Den bo kaso ta asina?

Rachel, kende tabata un misionero pa algun dékada na Korea, ta duna e siguiente motibu pakiko e tin fe den Dios: “Mi ta pensa riba e generosidat ku Yehova a mustra na su kriaturanan, e manera ku el a pordoná su pueblo ora el a trata ku nan i riba e deseo ku e tin pa nos prosperá dor di laga nos sa kiko e ke di  nos. Tur e kosnan aki ta pone mi amor pa Dios krese. I e amor aki ta pone mi sinti un deseo pa sirbié.”

Martha, un biuda na Alemania, a sirbi Yehova pa 48 aña. E ta bisa: “Dikon mi ta sirbi Yehova? Pasobra mi stim’é. Tur anochi mi ta papia ku Yehova den orashon i ta bis’é kon gradisidu mi ta pa tur e bendishonnan ku el a drama riba mi, spesialmente pa e sakrifisio di reskate.”

Sí, amor pa Dios ta pone nos haña un deseo di kurason pa sirbié. Pero kon un hende por kultivá e amor ei? E motivashon mas fuerte pa kultivá amor pa Dios ta apresio profundo pa e amor ku el a demostrá na nos. Tuma nota di e siguiente rekordatorio konmovedor ku Beibel ta duna: “Esun ku no ta stima no konosé Dios, pasobra Dios ta amor. Pa medio di esaki e amor di Dios a wòrdu manifestá den nos, ku Dios a manda su Yu unigénito den mundu pa nos por a biba pa medio di dje. Den esaki amor ta konsistí, no ku ta nos a stima Dios, ma ku ta el a stima nos i a manda su Yu pa ta e propisiashon pa nos pikánan.”—1 Juan 4:8-10.

Bo ta realisá kon grandi e amor aki ta? Imaginá bo ku bo ta hogando den un koriente di awa fuerte i un hòmber ta riska su bida pa skapa bo. Lo bo lubid’é, òf lo bo keda sumamente gradisidu na dje? Lo bo no ta dispuesto pa hasi tur loke bo por p’e? E amor ku Dios a mustra ora el a proveé su Yu Hesukristu komo e sakrifisio di reskate, ta hopi mas grandi na komparashon. (Juan 3:16; Romanonan 8:38, 39) Ora Dios su amor touch bo kurason, lo bo sinti bo motivá pa stim’é i sirbié ku henter bo kurason.

Bendishonnan Awor i den Futuro

Maske nos amor pa Dios mester ta e motibu prinsipal pakiko nos ta hasi su boluntat, ta dushi pa sa ku Dios ta rekompensá esnan ku ta sirbié. Apòstel Pablo a indiká: “Sin fe ta imposibel pa agrad’é, pasobra esun ku bin serka Dios mester kere ku e ta, i ku e ta esun ku ta  rekompensá esnan ku ta busk’é.”—Hebreonan 11:6.

Dios realmente ta bendishoná esnan ku ta stim’é i obedes’é. Hopi di nan tin un mihó salú debí ku nan ta sigui e prinsipionan di Beibel. (Proverbionan 23:20, 21; 2 Korintionan 7:1) Esnan ku apliká prinsipionan di Beibel relashoná ku onestidat i diligensia, por lo general ta ser konfiá dor di nan doño di trabou i komo resultado nan ta disfrutá di mas tantu siguridat ekonómiko. (Kolosensenan 3:23) Dor di pone konfiansa den Yehova, sirbidónan di Dios ta bendishoná ku pas mental asta bou di sirkunstansianan hopi difísil. (Proverbionan 28:25; Filipensenan 4:6, 7) I sobre todo, nan ta antisipá ku konfiansa e bendishon di bida eterno den e binidero Paradeis riba tera.—Salmo 37:11, 29.

Kiko esnan ku ta disfrutá di tal bendishonnan for di Yehova ta sinti p’e? Jacqueline, un kristian na Canada, ta ekspresá su apresio pa Dios di e siguiente manera: “Semper e ta duna nos regalonan asina maravioso, i e ta proveé e speransa sigur di bida eterno.” Abel, kende a ser menshoná na prinsipio di e artíkulo, ta deskribí su sintimentunan asin’aki: “E speransa di biba pa semper den paradeis riba tera tabata algu nobo pa mi, i mi ta spera ansiosamente riba dje. Sin embargo, asta si no tabatin Paradeis, tòg lo ta un plaser pa mi mustra mi amor na Dios dor di sirbié.”

Abo Tambe Por Haña Berdadero Fe

Beibel ta bisa: “SEÑOR di ehérsitonan, kende ta husga ku hustisia, i ta skudriñá e sintimentunan i e kurason.” (Jeremias 11:20) Sí, Yehova ta eksaminá loke tin skondí te den fondo di nos alma. Kada hende tin ku eksaminá e motibu pakiko personalmente e ta kere den Dios. Kreensia- i konseptonan robes tokante Dios por a pone un hende hasi kosnan robes den pasado. Pero konosementu di Beibel por yuda un hende desaroyá un bon relashon ku e Kreadó, Yehova Dios.—1 Timoteo 2:3, 4.

Mediante nan areglo di studio di Beibel grátis na kas, Testigunan di Yehova ta yuda hende haña konosementu eksakto di Dios. (Mateo 28:20) Hopi hende ku a aseptá tal yudansa a siña stima Yehova i a kultivá berdadero fe den dje. Dor di un studio di Beibel, nan a haña “sabiduria práktiko i kapasidat di pensa,” ku ta yuda nan “kana den siguridat” den e tempu insigur aki. (Proverbionan 3:21-23, NW) I mas importante ainda, awor nan tin un “speransa sigur i firme” pa futuro. (Hebreonan 6:19) Abo tambe por haña berdadero fe i disfrutá di e bendishonnan aki.

[Kuadro na página 6]

Preguntanan Inkietante Ku Mester A Wòrdu Kontestá

“Miéntras mi tabata kore stage na un hospital pa mi bira dòkter, mi a mira bon hende sufri pa motibu di malesa òf desaster. Si tin un Dios, dikon e kosnan aki ta sosodé? Religion ta simplemente un medio pa un hende por haña pas mental?”—Un eks-presbiteriano na Korea.

“Hopi bes mi tabata puntra mi mes si mi tata alkohóliko a bai fièrnu òf shelu. Mi tabatin hopi miedu di hende morto i di fièrnu di kandela. Mi no por a komprondé kon un Dios di amor por a manda un hende bai sufri pa semper den fièrnu.”—Un eks-katóliko na Brazil.

“Kiko ta bai pasa den futuro ku planeta tera i ku hende? Kon hende lo por biba pa semper den futuro? Kon hende por haña berdadero pas?”—Un eks-katóliko na Alemania.

“E siñansa di reenkarnashon no a parse mi lógiko. Bestia no por adorá, pues si pa ékis motibu bo reenkarná den un bestia pa bo paga pa e pikánan ku bo a kometé, kon lo bo por drecha bo bida i progresá?”—Un eks-hindú na Suráfrika.

“Mi a lanta den un famia ku a praktiká konfusianismo, i tabatin kustumber di partisipá den e seremonia pa deskanso di nos antepasadonan. Miéntras mi tabata yuda drecha e mesa di sakrifisio i tabata bùig, mi tabata puntra mi mes si e antepasadonan lo a bin pa kome i mira nos ta bùig pa nan.”—Un eks-miembro di konfusianismo na Korea.

Tur e hendenan aki a haña kontesta pa nan preguntanan ora nan a studia Beibel ku Testigunan di Yehova.