E Motibu Pakiko Nan Ta Bai Misa

“REPÚBLIKA di Korea awor tin kasi kuater bes mas tantu presbiteriano ku Merka.” E deklarashon ei den e revista Newsweek kisas a sorprendé hopi lesadó, ya ku mayoria hende ta pensa ku Korea ta un pais kaminda budismo i konfusianismo ta predominá. Awendia, un bishitante lo haña un kantidat konsiderabel di misa “kristian” einan, hopi bes identifiká mediante un krus di lus di neon koló kòrá. Riba djadumingu, ta normal pa mira dos òf tres hende ta kana huntu, ku Beibel den man, pa bai misa. Segun un enkuesta ku nan a hasi na aña 1998, kasi 30 porshento di koreano tabata bai sea un misa katóliko òf protestant, i na komparashon esei ta mas ku esnan ku a bisa ku nan ta budista.

Awendia, ta straño pa mira un porsentahe asina haltu di hende na kualke parti di mundu bai misa regularmente. Tòg, esaki ta nèt loke ta sosodiendo no solamente na Korea sino tambe na otro paisnan asiátiko, Afrika i Latinoamérika. Dikon asina hopi hende ainda ta bisa ku nan ta kere den Dios siendo ku na tur parti di mundu tin indiferensia religioso? Dikon nan ta bai misa?

Un enkuesta di Galup ta indiká ku mas ku mitar di e baidónan di misa na Korea ta en buska di pas mental; mas o ménos un tersera parti tin speransa di haña bida eterno despues di morto; i 1 di kada 10 ta en buska di salú, rikesa i éksito.

Hopi hende na China ta basha bai misa ku e speransa di haña algu ku lo yena e bashí spiritual ku a surgi debí na e echo ku metanan kapitalista gradualmente a remplasá ideologia komunista. Tur aña, China ta imprimí i distribuí miónes di Beibel, i ta parse ku hende ta les’é ku e mesun selo ku nan tabata lesa e buki kòrá chikitu di Mao.

Algun katóliko na Brazil, spesialmente esnan di e generashon mas yòn, no ta satisfecho ku e promesa di felisidat den e bida ku ta bin, nan kier felisidat awor. E revista di notisia Tudo ta remarká: “Si ta teologia di liberashon ta loke a motivá hende durante  añanan ’70, awe ta teologia di prosperidat ta motivá hende.” Durante un enkuesta na Gran Bretania nan a puntra baidónan di misa pa menshoná kiko nan ta gusta di nan misa. Mayoria di nan a menshoná ku ta asosiashon ku nan kompañeronan di fe.

Tur esaki ta un indikashon ku maske un gran kantidat di hende ainda ta kere den Dios, mayoria di hende ta mas interesá den loke nan por haña awor ku den loke lo bin den futuro, òf asta mas ku den Dios mes. Kiko bo ta pensa ku ta e motibu korekto pa kere den Dios? Kiko Beibel tin di bisa tokante e asuntu aki? E kontesta ta den e siguiente artíkulo.