Pregunta di Lektor

Den ki sentido Ezekiel a bira “muda” durante e periodo ku sòldánan a rondoná Yerusalèm i despues destruyé?

Básikamente, den e sentido ku e no tabatin nada di agregá na Yehova su mensahe profétiko ku ya el a proklamá kaba.

Profeta Ezekiel a kuminsá sirbi komo un fiel vigilante pa e eksiliadonan israelita na Babilonia den “e di sinku aña di eksilio di Rei Joakin,” esta, na aña 613 promé ku nos era. (Ezekiel 1:2, 3) Riba e di dies dia den e di dies luna di aña 609, Ezekiel a ser notifiká pa medio di inspirashon divino ku e babilonionan a rondoná Yerusalèm i tabatin e stat sitiá. (Ezekiel 24:1, 2) Kiko lo tabata e resultado di e sitiamentu? Yerusalèm i su habitantenan infiel lo a skapa? Komo vigilante, Ezekiel a proklamá Yehova su mensahe inekibokabel di destrukshon kaba, i no tabata nesesario pa Ezekiel agregá nada mas, komo si fuera pa hasi e mensahe mas konvinsente. Ezekiel a bira muda den e sentido ku e no tabatin nada mas di bisa di e sitiamentu di Yerusalèm.—Ezekiel 24:25-27.

Un seis luna despues di Yerusalèm su destrukshon na aña 607, un hende ku a skapa a bin trese e notisia di e desolashon di e stat santu pa Ezekiel na Babilonia. E anochi promé ku e hende ei a yega, Yehova ‘a habri Ezekiel su boka, i e no tabata muda mas.’ (Ezekiel 33:22, NW) Esei a pone fin na su periodo di silensio.

Pero Ezekiel tabata literalmente muda durante e periodo ei? Ta bisto ku nò, pasobra asta despues ku el a bira “muda,” el a ekspresá profesianan dirigí prinsipalmente na e nashonnan bisiña ku a alegrá riba e kaida di Yerusalèm. (Ezekiel, kapítulo 25-32) Mas na prinsipio di su karera komo profeta i vigilante, Yehova a bis’é: “Lo mi hasi bo lenga pega na bo shel’i boka, asina ku lo bo keda muda i no por ta e hende pa reprendé nan, pasobra nan ta un kas rebelde. Ma ora mi papia ku bo, lo mi habri bo boka.” (Ezekiel 3:26, 27) Ora Yehova no tabatin ningun mensahe pa Israel, Ezekiel no mester a bisa nada relashoná ku e nashon ei. Ezekiel tabatin ku papia loke Yehova tabata ke p’e papia, na e momentu ku Yehova tabata ke p’e papia. Bisando ku Ezekiel tabata muda a indiká ku e no tabatin niun palabra profétiko pa bisa e israelitanan.

E vigilante di nos tempu aktual, kristiannan ungí, a bin ta spièrta tokante e destrukshon di kristiandat, Yerusalèm antitípiko. Ora ku e “gran tribulashon” dal aden i destrosá “e Gran Babilonia”—e imperio mundial di religion falsu—e klase di Ezekiel lo no tin nodi bisa nada mas tokante e fin di kristiandat, ku ta forma un parti prinsipal di e imperio ei.—Mateo 24:21; Revelashon 17:1, 2, 5.

Sí, lo yega un dia ora ku e restu ungí i nan kompañeronan lo bira muda, ya ku nan lo no tin nada mas di bisa kristiandat. Esei lo ta ora “e dies kachunan” i “e bestia” hasi Babilonia e Grandi desolá i sunú. (Revelashon 17:16) Klaru ku esaki no ke men ku kristiannan lo ta muda den un sentido literal. Meskos ku nan ta hasi awor, nan lo alabá Yehova i hasi menshon di dje tur dia i “den tur generashon” pa semper.—Salmo 45:17; 145:2.