Renbaknan Ku No Por Tene Awa

DEN tempu bíbliko, hende tabata koba algun pos prinsipalmente pa funshoná komo renbak. Durante sierto époka, den e Tera Primintí, nan tabata e úniko manera pa hende por tin un suministro di awa ku ta asina vital pa bida.

Ora profeta Jeremias tabata skirbiendo un deklarashon formal di Dios, el a referí na renbak den e sentido figurativo. El a bisa: “Mi pueblo a kometé dos echo di maldat: Nan a bandoná mi, e fuente di awa bibu, pa traha renbak pa nan mes, renbak kibrá ku no por tene awa.”—Jeremias 2:13.

E israelitanan a bandoná nan Dios, Yehova—“e fuente di awa bibu”—anto a sera paktonan militar inkonfiabel ku nashonnan pagano i a adorá diosnan falsu i impotente. Na armonia ku Jeremias su komparashon, tal lugánan di refugio den kende nan a kere, a resultá manera renbaknan kibrá ku ta sipel awa i ku no tabatin poder pa protehá òf salba.—Deuteronomio 28:20.

Nos por siña un lès for di e ehèmpel históriko aki? Manera tabata e kaso den e dia di Jeremias, Yehova e Dios eterno ta sigui ta e úniko Fuente di awa ku ta duna bida. (Salmo 36:9; Revelashon 4:11) Solamente for di dje, mediante su Yu, Hesukristu, hende por haña bida eterno. (Juan 4:14; 17:3) Sí, manera Jeremias su kontemporáneonan, masha hopi hende awe a skohe pa rechasá i asta suak e palabra di Dios ku tin den Beibel. En bes di esei, nan ta pone nan konfiansa den solushonnan polítikamente kumbiniente, rasonamentu humano bashí i ideologia- i filosofianan inútil ku ta desonrá Dios. (1 Korintionan 3:18-20; Kolosensenan 2:8) Pues e asuntu ta masha kla. Den kua di nan abo lo pone bo konfiansa? Den “e fuente di awa bibu,” esta Yehova, òf den “renbak kibrá ku no por tene awa”?

[Plachi na página 32]

Imágen di terra-cotta di un diosa mama ku a ser hañá den un graf israelita

[Rekonosementu]

Potrèt saká pa kortesia di British Museum