Informe di Proklamadónan di Reino

Un Programa di Televishon A Habri Kaminda p’e Glorifiká Dios

APÒSTEL Pablo a bisa ku “algun, di bèrdat, ta prediká Kristu pa motibu di envidia i pleitu, ma algun tambe for di bon boluntat.” (Filipensenan 1:15) Tin bes, asta hende ku ta purba difamá Yehova su pueblo inkonsientemente a pone hende di kurason sinsero sinti nan mes atraí na e bèrdat.

Na novèmber 1998, e kanal di televishon nashonal franses a pasa un dokumentario tokante Bètel, e kompleho di sukursal di Testigunan di Yehova na Louviers, Fransia. Apesar ku e programa a kousa diferente reakshon, el a produsí bon resultado di maneranan inesperá.

Un di e hendenan ku a wak e programa tabata Anna-Paula, kende ta biba solamente 60 kilometer for di Bètel. Anna-Paula, un señora divorsiá ku tin dos yu, tabata buska trabou. P’esei e siguiente mainta, el a yama Bètel i a puntra si e por a haña un trabou einan. E ta bisa: “Mi a haña e impreshon ku e tabata un lugá sano i ku e trabou ku nan ta hasi einan ta útil.” El a keda masha sorprendí ora el a haña sa ku tur esnan na Bètel ta trahadónan boluntario! Despues di un kòmbersashon kòrtiku relashoná ku e aktividat di Testigunan di Yehova, el a bai di akuerdo pa un Testigu bishit’é.

Ora ku Léna, un predikadó di tempu kompletu di e kongregashon lokal a bishit’é, nan tabatin un kòmbersashon largu, i Anna-Paula a aseptá e buki Conocimentu cu Ta Hiba na Bida Eterno. * Ya pa e siguiente bishita, Anna-Paula a lesa henter e buki i tabatin masha hopi pregunta. Ku muchu gustu el a aseptá un studio di Beibel. Anna-Paula a bisa: “Pa promé bes mi a haña sa kiko e Palabra di Dios ta bisa. Nunka mi no a yega di tin un Beibel den mi man.”

Na yanüari Anna-Paula a bishitá Bètel, i e siguiente siman el a bai su promé reunion kristian. Un poko despues, el a kuminsá studia Beibel ku su yunan i papia di e bèrdat ku su amigunan. E ta bisa: “Mi no por a tene loke mi a siña pa mi mes, mi kier a kompartí e bèrdatnan di Beibel ku otro hende i konsolá nan.” Despues ku el a lucha i vense vários problema personal, Anna-Paula a kuminsá asistí regularmente na e reunionnan. El a progresá hopi lihé i dia 5 di mei 2002, el a batisá.

Ademas, debí na Anna-Paula su bon ehèmpel i predikashon seloso, su mama a kuminsá studia i a batisá no muchu tempu despues. Anna-Paula ta bisa: “No tin palabra pa ekspresá kon kontentu mi ta. Mi ta gradisí Yehova tur dia ku el a laga mi konos’é i sirbié, i pa tur e bendishonnan ku el a drama riba mi.”

[Nota]

[Plachinan na página 8]

Ariba: Anna-Paula

Abou: Entrada di e ofisina di sukursal di Fransia