Awor Ta Mas Urgente pa Nos Ta Alerta

“Sea alerta anto, pasobra boso no sa ki dia boso Señor ta bin.”—MATEO 24:42.

1, 2. Kiko ta mustra ku nos ta biba den e konklushon di e sistema aktual?

“E KOS ku mas a influensiá siglo 20 ta guera,” segun outor Bill Emmott. Ounke el a atmití ku tur periodo di historia humano a sinti e peso di guera i violensia, el a agregá: “Siglo 20 no tabata distinto di otro siglonan den su naturalesa, e tabata distinto den severidat. E tabata e promé siglo ku tabatin un konflikto ku realmente a abarká henter mundu . . . I, komo si fuera pa enfatisá esei, e tabatin no un di e konfliktonan mundial ei so, sino dos.”

² Hesukristu a profetisá ku lo tin guera ku ta enbolbé ‘nashon kontra nashon i reino kontra reino.’ Sin embargo, nan ta un solo aspekto di ‘e señal di Kristu su binida i di e fin di tempu.’ Den Hesus su profesia remarkabel el a menshoná tambe hamber, pestilensia i temblor. (Mateo 24:3, 7, 8; Lukas 21:6, 7, 10, 11) Den hopi manera, e kalamidatnan ei a oumentá na magnitut i severidat. E maldat di hende ta abundá, manera nos por mira na nan aktitut pa ku Dios i próhimo. Deterioro moral i oumento di kriminalidat i violensia ta bisto. Hende a bira stimadó di plaka mas bien ku stimadó di Dios, i nan ta opseshoná ku plaser. Tur esaki ta duna prueba ku nos ta biba den “tempunan trabahoso.”—2 Timoteo 3:1-5.

3. Ki efekto “e señalnan di e tempunan” mester tin riba nos?

³ Kiko abo ta pensa di e echo ku asuntunan humano ta birando pió? Hopi hende no tin kunes, i asta a pèrdè heful, pa e susesonan angustioso di aktualidat. Mundu su hendenan intelektual i esnan ku tin influensia no ta komprondé e nifikashon di “e señalnan di e tempunan”; i lidernan religioso tampoko no a duna e guia korekto den e asuntu aki. (Mateo 16:1-3) Pero Hesus a spièrta su siguidónan: “Sea alerta anto, pasobra boso no sa ki dia boso Señor ta bin.” (Mateo 24:42) Aki Hesus ta enkurashá nos pa ta alerta no djis pa un tempu kòrtiku, sino mas bien pa sigui ta alerta. Pa keda alerta nos mester ta atento i vigilante. Esaki ta rekerí mas ku djis rekonosé ku nos ta biba den e último dianan i ku tempu ta difísil. Nos mester tin e konvikshon firme ku “fin di tur kos ta serka.” (1 Pedro 4:7) Ta asina so nos lo ta alerta ku un sentido di urgensia. Pues, e pregunta ku nos mester reflekshoná riba dje ta: ‘Kiko lo yuda nos fortalesé nos konvikshon ku e fin ta serka?’

4, 5. (a) Kiko lo fortalesé nos konvikshon ku fin di e sistema malbado aki ta serka, i dikon? (b) Menshoná un similaridat entre e tempu di Noe i e binida di e Yu di hende.

⁴ Konsiderá e kondishonnan ku tabata reina djis promé ku un suseso úniko den historia humano: e gran Diluvio di tempu di Noe. Hende tabata asina malbado ku nan a ‘hasi Yehova su kurason tristu.’ El a deklará: “Lo mi destruí hende ku mi a krea for di riba superfisie di tera.” (Génesis 6:6, 7) I esei ta presis loke el a hasi tambe. Komentando riba e similaridatnan entre e tempu di Noe i nos tempu, Hesus a bisa: “E binida di e Yu di hende lo ta meskos ku e dianan di Noe.”—Mateo 24:37.

⁵ Ta rasonabel pa asumí ku Yehova ta sinti  meskos pa e mundu aktual ku loke el a sinti pa e mundu promé ku Diluvio. Siendo ku el a kaba ku e mundu malbado di tempu di Noe, siguramente lo e destruí e mundu malbado djawe. Si nos tin un komprondementu kla di e similaridatnan entre e tempu ei i nos tempu, nos konvikshon ku e fin di e mundu aktual ta serka lo bira mas firme. Kiko ta e similaridatnan anto? Tin por lo ménos sinku. E promé ta ku un spièrtamentu bon kla ta wòrdu duná di e binidero destrukshon.

Spièrtá Tokante “Kosnan Ku No A Wòrdu Mirá Ainda”

6. Kiko Yehova a determiná pa hasi den tempu di Noe?

⁶ Den tempu di Noe, Yehova a deklará: “Mi spiritu lo no lucha ku hende pa semper, pasobra di bèrdat ta karni e ta; sin embargo, su dianan lo ta shentibinti aña.” (Génesis 6:3) Deklarashon di e dekreto divino aki na aña 2490 promé ku nos era, a marka komienso di e fin di e mundu malbado ei. Djis pensa kiko esei a nifiká pa e hendenan na bida e tempu ei! Solamente 120 aña mas i Yehova lo a trese “un diluvio di awa riba tera, pa destruí tur karni, ku tin e rosea di bida, for di bou di shelu.”—Génesis 6:17.

7. (a) Kon Noe a reakshoná ora Dios a spièrt’é di e Diluvio? (b) Kon nos mester reakshoná riba spièrtamentunan tokante fin di e sistema aki?

⁷ Vários dékada di antemano Noe a risibí spièrtamentu di e binidero katástrofe, i el a hasi uso sabí di e tempu pa prepará pa sobrebibí. Apòstel Pablo a bisa: “Noe, siendo spièrtá pa Dios tokante di kosnan ku no a wòrdu mirá ainda, ku temor di Dios a prepará un arka pa salbashon di e hendenan di su kas.” (Hebreonan 11:7) Ke tal di nos? Rònt di 90 aña a pasa for di tempu ku e último dianan di e sistema aki a kuminsá na 1914. No tin duda ku nos ta den “e tempu di e fin.” (Daniel 12:4) Kon nos mester reakshoná riba e spièrtamentunan ku nos a haña? “Esun ku hasi e boluntat di Dios ta permanesé pa semper,” Beibel ta deklará. (1 Juan 2:17) P’esei awor ta tempu pa hasi e boluntat di Yehova ku un sentido fuerte di urgensia.

8, 9. Ki spièrtamentunan a ser duná den tempu moderno, i kon nan ta ser proklamá?

⁸ Den tempu moderno, studiantenan sinsero di Beibel a siña for di e Skritura inspirá ku e sistema aki ta kondená na destrukshon. Nos di bèrdat ta kere esaki? Tuma nota di loke Hesukristu a deklará bon kla: “Lo tin un gran tribulashon, manera nunka tabatin for di prinsipio di mundu te awor aki, i ku lo no tin nunka mas tampoko.” (Mateo 24:21) Tambe Hesus a bisa ku lo e bini komo Dios su Hues nombrá i lo e separá hende manera un wardadó ta separá karné for di kabritu. Esnan ku ser hañá indigno lo “bai den kastigu eterno, ma e hustunan den bida eterno.”—Mateo 25:31-33, 46.

⁹ Yehova a dirigí atenshon di su pueblo na e spièrtamentunan aki mediante rekordatorionan oportuno ku ta forma parti di e alimento spiritual perkurá dor di “e esklabo fiel i prudente.” (Mateo 24:45-47) Ademas, tur nashon, tribu, lenga i pueblo ta haña e yamada  pa “teme Dios i dun’é gloria, pasobra e ora di su huisio a yega.” (Revelashon 14:6, 7) Un parti esensial di e mensahe di Reino ku ta ser prediká rònt mundu dor di Testigunan di Yehova ta e spièrtamentu ku e Reino di Dios pronto lo eliminá gobernashon humano. (Daniel 2:44) Nos no mester mira e spièrtamentu aki komo algu di ménos importansia. Dios Todopoderoso semper ta kumpli ku su palabra. (Isaias 55:10, 11) El a kumpli ku su palabra den tempu di Noe, i lo e kumpli kuné den nos tempu.—2 Pedro 3:3-7.

Perversidat Seksual Ta Plama Tur Kaminda

10. Kon ekstenso perversidat seksual tabata den tempu di Noe?

¹⁰ Nos tempu ta korespondé ku tempu di Noe den un segundo aspekto. Yehova, kende a krea e fakultatnan seksual di e promé hòmber i muhé, a duna nan e mandamentu pa “yena e tera” ku hende usando e fakultatnan ei onorablemente den e areglo di matrimonio. (Génesis 1:28) Den tempu di Noe, angelnan desobediente a kontaminá humanidat ku relashon seksual innatural. Nan a baha bini na tera, bisti kurpa karnal, biba ku muhénan bunita i produsí yu ku tabata mitar hende mitar demoño, yunan gigante. (Génesis 6:2, 4) E piká di e angelnan yen di pashon aki ta ser kompará ku e perversidat seksual (práktikanan seksual kontra naturalesa) di Sodoma i Gomora. (Hudas 6, 7) Konsekuentemente, perversidat seksual tabata tur kaminda den e tempu ei.

11. Kiko ta tumando lugá den nos ambiente moral awe ku ta hasi nos tempu similar na esun di Noe?

¹¹ Kon ta pará ku e ambiente moral djawe? Den e dianan final aki, bida di hopi hende ta drei rònt di sèks. Pablo detayadamente a deskribí personanan asina komo hende ku a ‘pèrdè tur heful’; hopi di nan a “entregá nan mes na sensualidat pa, ku golosidat, nan praktiká tur klase di impuresa.” (Efesionan 4:19) Pornografia, sèks promé ku matrimonio, abusu seksual di mucha i homoseksualidat ta kos di tur dia. Tin hende ku ya kaba “ta risibí den nan mes persona e kastigu meresí” den forma di malesanan transmití seksualmente, bida di famia kibrá i otro problemanan sosial.—Romanonan 1:26, 27.

12. Dikon nos mester kultivá odio pa loke ta malu?

¹² Den tempu di Noe, Yehova a manda un gran Diluvio i a pone fin na e mundu ei ku tabata loko pa sèks. Nos no mester lubidá nunka ku e tempu ku nos ta biba aden di bèrdat ta meskos ku den tempu di Noe. E binidero “gran tribulashon” lo eliminá ‘fornikadó, adúltero, sodomita i homoseksual’ for di riba tera. (Mateo 24:21; 1 Korintionan 6:9, 10; Revelashon 21:8) P’esei ta masha urgente pa nos kultivá odio pa loke ta malu i keda leu for di situashonnan ku lo por hiba na inmoralidat!—Salmo 97:10; 1 Korintionan 6:18.

Tera Ta “Yen di Violensia”

13. Dikon e tera tabata “yen di violensia” den tempu di Noe?

¹³ Señalando un di tres karakterístika di tempu di Noe, Beibel ta deklará: “Tera tabata korumpí den bista di Dios i tera tabata yen di violensia.” (Génesis 6:11) Pero eigenlijk violensia no tabata algu nobo. Adam su yu Kain a  asesiná su ruman hòmber hustu. (Génesis 4:8) Reflehando e spiritu violento di su tempu, Lamek a komponé un poema den kua e ta broma tokante kon el a mata un mucha hòmber, supuestamente den defensa propio. (Génesis 4:23, 24) Loke tabata nobo den tempu di Noe, tabata e grado di violensia. Segun ku yunan di Dios ku tabata angel desobediente, a kasa ku muhé riba tera i a produsí yu—gigante—violensia a oumentá na un nivel sin presedente. Segun Tradukshon di Mundu Nobo e palabra hebreo original ku ta referí na e gigantenan violento aki ta nifiká “e Tumbadónan,” “esnan ku ta pone otronan kai.” (Génesis 6:4) Komo resultado, tera tabata “yen di violensia.” (Génesis 6:13) Imaginá bo kuantu problema Noe lo mester a konfrontá pa lanta su famia den un ambiente asina! Sin embargo, Noe a resultá di ta ‘hustu dilanti di Yehova’ meimei di e generashon ei.—Génesis 7:1.

14. Te na ki grado e mundu djawe ta “yen di violensia”?

¹⁴ Violensia a eksistí den transkurso di henter historia di humanidat. Pero meskos ku tabata e kaso den tempu di Noe, nos tempu tambe a eksperensi’é riba un eskala sin presedente. Ku regularidat nos ta tende tokante violensia doméstiko, aktonan di terorismo, kampañanan di genosidio i di pistoleronan ku ta basha bala riba multitut di hende kasi sin un motibu bisto. Agregá na tur esaki e dramamentu di sanger kousá dor di guera. Anto atrobe tera ta yen di violensia. Dikon? Kiko a kontribuí na e oumento? E kontesta ta revelá un otro similaridat ku e tempu di Noe.

15. (a) Kiko a kontribuí na e oumento di violensia den e último dianan? (b) Nos por tin sigur ku kiko lo bai tuma lugá?

¹⁵ Ora ku Dios su Reino Mesiániko a keda establesé den shelu na 1914, e Rei entronisá Hesukristu, a tuma un akshon históriko. El a saka Satanas e Diabel i su demoñonan for di shelu i benta nan den bisindario di tera. (Revelashon 12:9-12) Promé ku Diluvio, angelnan desobediente a bandoná nan posishon selestial boluntariamente; sin embargo, den tempu moderno nan a wòrdu saká na mal òrdu. Ademas, awor nan no por bisti kurpa humano riba tera pa gosa di plasernan karnal ilegal. P’esei debí na frustrashon, rabia i miedu di e binidero huisio, e angelnan aki ta influensiá hende i organisashon pa kometé aktonan inhumano di krímen i violensia na un eskala asta mas grandi ku den tempu di Noe. Yehova a destruí e mundu promé ku Diluvio, despues ku angelnan desobediente i nan yunan a yen’é ku maldat. Bo por tin sigur ku lo e hasi meskos den nos tempu! (Salmo 37:10) Sin  embargo, esnan ku keda alerta awe sa ku nan liberashon ta serka.

E Mensahe Ta Wòrdu Prediká

16, 17. Kua ta e di kuater similaridat entre e tempu di Noe i nos tempu?

¹⁶ E di kuater punto di similaridat entre e tempu aktual i e mundu promé ku Diluvio ta ser mirá den e trabou ku Noe a ser enkargá pa hasi. Noe a traha un arka inmenso. Tambe e tabata “un predikadó.” (2 Pedro 2:5) Ki mensahe el a prediká? Noe su predikashon evidentemente a inkluí un yamada pa arepentí i un spièrtamentu di e binidero destrukshon. Hesus a bisa ku e hendenan den tempu di Noe “no a hasi kaso te ku e diluvio a bini i a bari nan tur.”—Mateo 24:38, 39, NW.

¹⁷ Asina tambe, segun ku Testigunan di Yehova ta kumpli diligentemente ku nan enkargo pa prediká, e mensahe di e Reino di Dios ta ser proklamá mundialmente. Den kasi tur parti di e planeta, hende por tende i lesa e mensahe di Reino den nan mes idioma. E revista Toren di Vigilansia, anunsiando e Reino di Yehova Dios, tin un sirkulashon di mas ku 25.000.000 ehemplar i ta ser imprimí den mas ku 140 idioma. Sí, e bon nobo di e Reino di Dios ta ser prediká “den henter mundu komo un testimonio na tur nashon.” Ora e trabou ei ser kompletá na Dios su satisfakshon, e fin lo bin sigur.—Mateo 24:14.

18. Kon e reakshon di hopi hende riba nos aktividat di prediká ta kompará ku e reakshon di mayoria hende den tempu di Noe?

¹⁸ En bista di e falta total di interes den kosnan spiritual i e falta di moralidat den e dianan promé ku e Diluvio, nos por komprondé dikon e bisiñanan di e famia di Noe konstantemente tabata hari nan, hasi bofon di nan i papia palabranan ofensivo ku nan. Pero e fin a bin. Di igual manera, tin masha hopi ‘bofonadó ku nan bofon’ den e último dianan. “Ma e dia di Señor lo bin manera un ladron,” Beibel ta deklará. (2 Pedro 3:3, 4, 10) I lo e bin sigur na e tempu señalá. Lo e no ta lat. (Habakuk 2:3) Ta sabí di nos parti pa keda alerta!

Poko Hende So Ta Sobrebibí

19, 20. Ki paralelo nos por mira entre e Diluvio i e destrukshon di e sistema aktual?

¹⁹ E paralelo entre e tempu di Noe i nos tempu no ta solamente relashoná ku maldat di e hendenan i nan destrukshon. Meskos ku tabatin hende ku a sobrebibí e Diluvio, asina tambe lo tin esnan ku ta sobrebibí fin di e sistema aktual. E sobrebibientenan di e Diluvio tabata esnan mansu ku no a biba manera mayoria hende a biba. Nan a hasi kaso di e spièrtamentu divino i a keda separá for di e mundu malbado di e tempu ei. Beibel ta bisa: “Noe a haña grasia den bista di SEÑOR.” E tabata un hòmber ireprochabel meimei di su generashon. (Génesis 6:8, 9) For di henter humanidat, un solo famia, algun hende, “esta, ocho persona, a wòrdu hibá sano i salvo dor di e awa.” (1 Pedro 3:20) I Yehova Dios a duna nan un mandato bisando: “Sea fruktífero i multipliká, i yena tera.”—Génesis 9:1.

²⁰ E Palabra di Dios ta sigurá nos ku “un multitut grandi” lo “sali for di e gran tribulashon.” (Revelashon 7:9, 14) Kuantu hende lo tin den e multitut grandi? Hesus mes a bisa: “Chikitu ta e porta i smal e kaminda ku ta hiba na bida, i poko ta esnan ku ta hañ’é.” (Mateo 7:13, 14) E sobrebibientenan di e binidero gran tribulashon lo ta poko na komparashon ku e 6 mil mion hendenan ku ta biba riba tera awor. Pero por ta masha bon ku nan lo haña e mesun privilegio ku Dios a duna e sobrebibientenan di e Diluvio. E sobrebibientenan  kisas pa un tempu lo por haña yu siendo parti di e sosiedat nobo riba tera.—Isaias 65:23.

“Sea Alerta”

21, 22. (a) Kon e konsiderashon di e relato di Diluvio aki a benefisiá bo? (b) Kiko ta e teksto di aña pa 2004, i dikon nos mester hasi kaso di e konseho ku e ta duna?

²¹ Ounke e Diluvio por parse di no tin nada di haber ku nos tempu ya ku el a tuma lugá asina tantu tempu pasá, ta bisto ku e ta duna nos un spièrtamentu ku nos no mester pasa por haltu. (Romanonan 15:4) E similaridatnan entre e tempu di Noe i nos tempu mester hasi nos mas i mas konsiente di e nifikashon di loke ta tumando lugá. Tambe esei mester alertá nos pa Hesus su binida inesperá pa ehekutá huisio riba e malbadonan.

²² Awe, Hesukristu ta dirigiendo un tremendo trabou di konstrukshon spiritual. Pa e siguridat i sobrebibensia di adoradónan berdadero, ta eksistí un paradeis spiritual semehante un arka. (2 Korintionan 12:3, 4) Pa nos pasa bibu dor di e gran tribulashon, nos tin ku keda den e paradeis ei. Pafó di e paradeis spiritual tin e mundu di Satanas, kla pa traga ken ku kabishá spiritualmente. Ta sumamente importante pa nos sigui ta “alerta” i prepará pa e dia di Yehova.—Mateo 24:42, 44.

Bo Ta Kòrda?

• Ki spièrtamentu Hesus a duna relashoná ku su binida?

• Ku kiko Hesus a kompará e tempu di su presensia?

• Den ki maneranan nos tempu ta similar na e tempu di Noe?

• Reflekshonando riba e similaridatnan entre e tempu di Noe i nos tempu, mester tin ki efekto riba nos sentido di urgensia?

[Preguntanan di Estudio]

[Komentario na página 18]

E teksto di aña pa 2004 lo ta: “Sea alerta . . . Sea prepará.”—Mateo 24:42, 44.

[Plachi na página 15]

Noe a hasi kaso di spièrtamentu divino. Nos tambe ta hasi meskos?

[Plachinan na página 16, 17]

“E binida di e Yu di hende lo ta meskos ku e dianan di Noe”